Hlawhtlinna Engtin Nge I Teh?

SUMDAWNNA hmunpui Wall Street-a sumdâwngtu hlawhtling ber nia ṭhenkhatin an thlîr Jesse Livermore-a chu sumdâwnna lama thu tlûkna fing a siam thiam avânga hriat hlawh tak a ni a. Chuvâng chuan, sum leh pai nasa tak a khâwl khâwm a ni. Kut ṭhui suit ṭha tak tak inbelin, pindan 29 nei inah a chêng a, motor enkawltuin a khalhsak Rolls-Royce motor dumah ngat a chuang bawk a ni.

David-aa chuan chutiang bawk nun kawng chu a zawh ve a. Company lian taka vice president leh general manager a nih angin, divisional president dinhmun chang thei tûr hial a ni a. Hausakna leh nihna sâng chu a duh hle a ni. Amaherawhchu, David-a chuan mi mal thu tlûkna a siam a, chu chuan a hna a bânsan a ngaihtîr ta a ni. Ani chuan: “Hetiang hna lian hi ka chelh leh ngai tawh dâwn lo tih ka hria,” a ti. David-a chuan thu tlûkna a siam sual niin i hria em?

Mi tam tak chuan hlawhtlinnaah chuan hausakna te, lârna te, a nih loh leh challanna te a tel niin an hria a. Mahse, mi hausate chuan chhûngril lama ruak nia inhriatna leh dam chhan nei lo nia inhriatna chu an la nei cheu thei a ni. Chu chu Pu Livermore-a dinhmun niin a lang. A hausa hle chung pawhin, a nun chu beidawnna, vânduaina, leh lungngaihna hlîrin a khat a. Lunghnualna te, nupa inṭhenna te, leh a fapate nêna inpawh lohnate a tuar bawk a ni. A tâwpa a neih sum tam tak a chân hnuah chuan, ni khat chu hotel changkâng tak pakhata zu inna hmunah ṭhuin Pu Livermore-a chu a thil chânte avângin a rûm a. Zu in tûr a chah a, savuna tuam a notebook chu phawrh chhuakin, a nupui tân thlahna thu a ziak ta a. A zu a in zawh chuan, thawmhnaw dahna pindan thimah chuan a kal a, a va inkâphlum ta a ni.

A intihhlum chhan chiah chu hriat thiam har mah se, he thiltawn hian: “Hausak tumte chu . . . anmahni leh anmahni lungngaihna tam takin an inchhun tlang ta chuk a,” tih Bible thusawi dikzia chu a finfiah a ni.​—1 Timothea 6:​9, 10.

Hausakna te, nihna te, leh challanna te hmanga hlawhtlinna tehtute chuan tehna dik hlel an hmang a ni thei ang em? Mi hlawhtling niin i inhria em? Engvângin nge i inhriat? He thu tlûkna siam tûrin eng tehna nge i hman? Engin nge hlawhtlinna i thlîr dân chu thunun? A dawta thuziak chuan mi maktaduai têlte hlawhtlintîrtu thurâwn rin tlâk tak chu a bih chiang a ni. I hlawhtlin ve theih dân chu ilo en ang u. (w07 1/1)

[Footnote]