Pathian Hnam Thlan Zînga Mi Angin An Lo Piang

“A pual bîk ni tûra LALPA in Pathianin a thlan che u in ni.”​​—DEUTERONOMY 7:6.

1, 2. Jehova chuan a mite tân eng thil mak ropui takte nge a tih a, Israelte chuan Pathian nên eng inlaichînna nge an neih thar?

JEHOVA chuan B.C.E. 1513 khân leia a chhiahhlawhte nên inlaichînna thar a siam a. Chu mi kum chuan, khawvêl awptu chu titlâwmin, a mi Israelte chu an sal tânna ata a chhan chhuak a ni. Chuvângin, anmahni Chhandamtu leh Neitu a lo ni ta a. Mahse, chutianga hma a lâk hmain, Pathian chuan Mosia hnênah: “Israela thlahte hnênah chuan, ‘Kei Jehova ka ni a, Aigupta-hote phurrit lak ata hi ka hruai chhuak ang che u a, an bâwiha in awm hi ka chhuahtîr ang che u; tin, nasa taka ngaihtuah che uin bân phar meuhvin ka tlan ang che u: tin, ka mi atân ka nei ang che u a, tin, kei in tân Pathian ka ni ang,’” tih sawi tûrin a hrilh a ni.​—Exodus 6:​6, 7; 15:​1-7, 11.

² Aigupta an Chhuahsan hnu rei lo têah, Israelte chuan an Pathian, Jehova nên inlaichînna thuthlung chu an thlung a. A mi mal emaw, chhûngkua emaw, a nih loh leh a chi ang emawa dâwr ai chuan, Jehova chuan anni chu he leia pâwl pakhat leh hnam pakhat angin a dâwr tawh zâwk dâwn a ni. (Exodus 19:​5, 6; 24:7) Ani chuan a mite nî tin nun kaihruaitu tûr leh chu aia pawimawh zâwk an biakna chungchânga kaihruaitu tûr dânte chu a pe a. Mosia chuan an hnênah heti hian a sawi: “Kan koh apianga LALPA kan Pathianin min hnaih anga anmahni hnaih ṭhîn Pathian nei hnam ropui tunge awm ve? Heti taka fel, dânte leh rorêlte, tûna in hmaa ka zam zawng zawng ang dân nei hi hnam ropui dang tunge awm ve?” tiin.​—Deuteronomy 4:​7, 8.

Thuhretu Hnam Zînga Mi Angin An Lo Piang

3, 4. Israelte hnam pakhat anga an awm chhan pawimawh tak chu eng nge?

³ Kum zabi tam tak a liam hnuah, Jehova chuan a zâwlnei Isaia hmangin Israelte hnênah hnam pakhat anga an awm chhan pawimawh tak chu a hriatnawntîr a. Heti hian a sawi a ni: “Aw Jakob-hote u, LALPA nangmahni siamtu leh aw Israel-hote u, nangmahni dintu chuan heti hian a ti: ‘Hlau suh u, ka tlan tawh che u hi; in hmingah ka ko che u a, ka ta in ni asin. Kei hi LALPA in Pathian, Israel-ho Mi Thianghlim, nangmahni chhandamtu ka ni si a. . . . Ka fapate chu hla tak aṭangin rawn hruai ula, ka fanute chu kâwlkil aṭangin rawn hruai rawh u; ka hming pu apiangte leh ka ropuina tûra ka siam apiangte chu; anmahni chu ka din a, a ni, anmahni chu ka siam a ni. . . . Nangni hi mi hriatpuitute in ni, ka chhiahhlawh ka thlana pawh chu, LALPAN a ti . . . mi fakna tilangtu tura ka tâna ka mi siamte chu,’” tiin.​—Isaia 43:​1, 3, 6, 7, 10, 20, 21.

⁴ Jehova hming putute an nih angin, Israelte chu hnamte hmaa a lalchungnunna hriatpuituah an ṭang dâwn a. Anni chu ‘Jehova ropuina tûra siam’ an ni tûr a ni. ‘Jehova fakna tilangtu’ tûr leh a chhan chhuahna thiltih ropui tak sawitu tûr an ni a, chutiang chuan a hming thianghlim chu an chawimawi tûr a ni. A tawi zâwnga sawi chuan, Jehova tâna thuhretu hnam an ni tûr a ni.

5. Eng kawngin nge Israel chu hnam inpumpêk a nih?

⁵ Lal Solomona chuan Pathian Jehova’n Israelte chu hnam pakhat anga a tihhran tawh thu B.C.E. kum zabi 11-ah khân a târ lang a. Ani chuan Jehova hnêna a ṭawngṭainaah: “I rochan atân khawvêl hnam tin zîng ata i tihrang a ni si a,” tiin an chungchâng chu a sawi a ni. (1 Lalte 8:53) Israel mi, a mi mal tinte pawhin Jehova nêna inlaichînna ṭha bîk tak an nei a. Tûn hma pawhin, Mosia chuan: “LALPA in Pathian fate in ni . . . LALPA in Pathian tân hnam thianghlim in ni si a,” tiin a lo hrilh tawh a. (Deuteronomy 14:​1, 2) Chuvângin, Israel naupangte tân chuan Jehova hnêna ahranpaa inpumpêk a ngai tawh lo. Inpumpêk sain an piang zâwk a ni. (Sâm 79:13; 95:7) Israelte Jehova ta anga phuartu thuthlung avâng chuan, chhuan thar apiang chu Jehova dânte zirtîr an ni a, chûng chu an zawm a ngai a ni.​—Deuteronomy 11:​18, 19.

Duh Thlang Thei An Ni

6. Israel mi mal tinte chuan duh thlanna eng nge an siam ṭheuh ngai?

⁶ Israelte chu hnam inpumpêk zînga mi angin lo piang chhuak mah se, Pathian rawngbâwl tûr erawh chuan mi mal tinin thu tlûkna an siam a ngai thung. Ram Tiam an luh hma khân Mosia chuan: “In hmaah nunna leh thihna, malsâwmna leh ânchhia ka dah tih tûnah hian in chungchâng thua hretu atân lei leh vân ka ko a ni; chutichuan nunna chu thlang rawh u, in nun theih nân, nangni leh in thlahte nên; LALPA in Pathian hmangaih a, a awkâ âwih a, amah vuan tlatin; amah chu in nunna, in dam reina a ni si a; tichuan in pu Abrahama te, Isaaka te, Jakoba te chhechhama pêk a tiam ramah chuan in awm dâwn a ni,” tih a hrilh a ni. (Deuteronomy 30:​19, 20) Chuvângin, Israel mi mal tinte chuan Jehova hmangaih tûr te, a âwka âwih tûr te, leh amah vuan tlat tûr tein duh an thlang tûr a ni a, an duh thlanna rah chhuah chu an seng tûr a ni bawk.​—Deuteronomy 30:​16-18.

7. Josua dam rualpuite zînga mite an thih zawh chuan eng thil nge lo thleng?

⁷ Rorêltute rorêl lai hun chanchin chuan rinawmna leh rinawm lohna rah chhuah chu chiang takin a târ lang a. Rorêltute hun hma lawk chuan, Israelte chuan Josua entîrna ṭha chu zuiin, malsâwmna an dawng a ni. “Josua dam chhûng leh upaho Josua khûma damte, LALPAN Israelte tâna thil ropui tak a tih zawng zawng hmu ṭhîntute dam chhûng chuan mipuiten LALPA rawng an bâwl ṭhîn a.” Amaherawhchu, Josua thih hnu hun engemawtiah chuan, “LALPA leh Israelte tâna a thiltihte pawh hre lo chhuan dang an lo awm ta a. Tin, Israela thlahte chuan LALPA mithmuhin thil sual an lo ti a.” (Rorêltute 2:​7, 10, 11) Chhuan thar lo lang chuan hun kal tawha an Pathian Jehova’n an tâna thilmak ropui takte a tihsak, inpumpêk tawhte zînga mi an nihna chanvo chu an hlut lo niin a lang.​—Sâm 78:​3-7, 10, 11.

An Inpumpêkna Chu Hlenin

8, 9. (a) Eng ruahmanna hian nge Israelte chu Jehova hnêna an inpumpêkna lantîr theia siam? (b) Duh thua thilpêk hlântute chuan eng nge an dawn theih?

⁸ Jehova chuan a mite hnênah hnam anga an inpumpêkna hlen theihna hun remchâng a pe a. Entîr nân, Pathian Dân chuan loh theih lohva hlan tûr inthawina, a nih loh leh thilhlan ṭhenkhat chu a phût a, a dangte erawh chu duh thua hlan tûr a ni thung. (Hebrai 8:3) Chûng inthawina zîngah chuan duh thua hlan hâlral thilhlante, chhangphut thilhlante, remna thilhlante a tel a, chûng chu Jehova duhsakna dawn nân leh a chunga lâwmthu sawi nâna hlan a ni.​—Leviticus 7:​11-13.

⁹ Chûng duh thua hlan thilhlante chuan Jehova a tilâwm a. Hâlral thilhlan leh chhangphut thilhlante chu “LALPA tâna rimtui tak” anga sawi a ni. (Leviticus 1:9; 2:2) Remna thilhlanah chuan, ran thisen leh a thau chu Jehova hnêna hlan a ni a, a sa dangte erawh chu puithiamte leh a hlântute’n an ei a ni. Chuvângin, Jehova nêna inlaichînna muanawm tak târ langtu chawhlui an kîl a tih theih a ni. Dân chuan: “LALPA tâna remna thilhlana in inthawi hunin pawm tlâk ni tûrin in hlân tûr a ni,” a ti a. (Leviticus 19:5) Israel mi zawng zawngte chu an pian ata inpumpêk tawh mah ni se, duh thua thilhlan hlanna hmanga an inpumpêkna awmze nei tak nihtîrtute chuan “pawm tlâk” nih an hlawh a, malsâwmna nasa tak an dawng a ni.​—Malakia 3:10.

10. Jehova chuan Isaia leh Malakia hun lai khân a lungnih lohzia chu engtin nge a sawi chhuah?

¹⁰ Amaherawhchu, hnam inpumpêk Israel chu Jehova lakah an rinawm lo fo mai a. Jehova chuan a zâwlnei Isaia hmangin an hnênah: “Hâlrala in thil hlan ran tête chu mi rawn lâk ngai lo va; in inthawina lamte chuan mi chawimawi ngai hek lo. Thil hlanin rawng ka bâwltîr ngai lo che u a, berawin ka tihah ngai hek lo che u,” tiin a sawi. (Isaia 43:23) Chu bâkah, phal tak leh hmangaihna avânga hlan ni lo thilhlante chuan Jehova mithmuhah hlutna rêng a nei lo. Entîr nân, Isaia awm hnu kum zabi thum vêl, zâwlnei Malakia hun lai chuan, Israelte chuan ran sawisêlkaite chu an hlân a. Chuvângin, Malakia’n an hnênah: “In chungah lâwmna rêng ka nei lo va, in kut ata thilhlan chu ka pawm hek lo vang; sipaihote LALPA chuan a ti. . . . Hneh chhuha in thil lâkte, a kebai te, a silawng te in rawn la a; chutiangin thilhlan chu in rawn la a: chûng chu in kut ata ka pawm dâwn em ni? LALPA chuan a ti,” tiin a hrilh a ni.​—Malakia 1:​10, 13; Amosa 5:22.

Hnam Inpumpêk An Nihna Hnâwlsak A Ni

11. Israel hnênah eng chanvo hlu nge pêk a nih?

¹¹ Israelte Jehova tâna hnam inpumpêk an lo nih khân, ani chuan: “Ka thu in ngaihthlâk tak zet a, ka thuthlung hi in pawm chuan khawvêl hnam zawng zawng zîngah hian ka tân ro thlan bîk in ni ang: khawvêl pum pui hi ka ta a ni si a: tichuan ka tân puithiam chi, hnam thianghlim in ni ang,” tih a tiam a. (Exodus 19:​5, 6) Thutiam Messia chu an zîng ata a lo piang anga, Pathian Ram sawrkâr zînga mi nih theihna chanvo chu an nei hmasa ang. (Genesis 22:​17, 18; 49:10; 2 Samuela 7:​12, 16; Luka 1:​31-33; Rom 9:​4, 5) Mahse, Israel mipui tam zâwkte chuan an inpumpêkna thutiam chu an hlen lo. (Matthaia 22:14) Messia chu hnâwlin, a tâwpah phei chuan an that hial a ni.​—Tirhkohte 7:​51-53.

12. Isua thusawi eng hian nge Israel chu hnam inpumpêk a nihna ata hnâwl a ni tawh tih târ lang?

¹² Isua’n a thih hma lawk khân, Juda sakhaw hruaitute hnênah: “Pathian lehkha a, ‘In satute lung duh loh kha, chu ngei chu a kila lung ṭangkai ber a lo ni ta. Chu chu Lalpa tih a ni a, kan mithmuhah a mak a ni,’ tih hi in chhiar ngai lo vem ni? Chu mi avâng chuan ‘Pathian ram chu in hnên ata lâksak a ni ang a, a rah chhuah tûr hnam hnênah pêk a ni ang,’ tih ka hrilh a che u,” a ti a. (Matthaia 21:​42, 43) Jehova’n a hnam angin a hnâwl tawh tih târ langin, Isua chuan: “Aw Jerusalem, Jerusalem! zâwlneiho thattu, i hnêna an rawn tirhte lunga lo dênghlumtu, arpuiin a notê a thla hnuaia a awp khâwm angin i fate vawi engzât nge awp khâwm ka tum kha! Nimahsela in duh si lo. En teh u, in in chu aruaka hnutchhiah che uin a awm ta,” a ti.​—Matthaia 23:​37, 38.

Inpumpêk Hnam Thar Chu

13. Jeremia dam laiin Jehova chuan hrilh lâwkna thu eng nge a sawi?

¹³ Zâwlnei Jeremia hun lai chuan, Jehova chuan a mite chungchângah thil thar engemaw a sawi a. Heti hian kan chhiar a ni: “Ngai teh, nîte chu a lo thleng dâwn, tih hi LALPA thu chhuak a ni: Chûng nîahte chuan Israel chhûngte leh Juda chhûngte hnênah chuan thuthlung thar ka siam ang. An thlahtute Aigupta ram aṭanga hruai chhuak tûra an kut ka chelh nîa ka thuthlun ang kha ni lovin, an tân hotu ka ni chungin chu ka thuthlung chu an bawhchhia a, tih hi LALPA thu chhuak a ni. Chûng nî hnua Israel chhûngte hnêna thu ka thlun tûr erawh chu hei hi a ni, tih hi LALPA thu chhuak a ni: An chhûngrilahte ka thupêk ka dah ang a, an thinlungah ka ziak bawk ang a, kei hi an Pathian ka ni ang a, anni chu ka mite an ni ang,” tiin.​—Jeremia 31:​31-33.

14. Eng hunah leh eng ṭanchhanin nge Jehova hnêna inpumpêk hnam thar chu a lo pian? Hnam thar chu hrilhfiah rawh.

¹⁴ C.E. 33-a Isua a thih a, a hnua a thisen hlutna a Pa hnêna a hlan khân, chu thuthlung thar nghahchhan lungphûm chu phûm a ni a. (Luka 22:20; Hebrai 9:​15, 24-26) Mahse, C.E. 33 Pentikost nîa thlarau thianghlim leih a nih a, hnam thar, “Pathian Israelte” a lo pian khân hman ṭan a ni. (Galatia 6:16; Rom 2:​28, 29; 9:6; 11:​25, 26) Petera chuan hriak thih Kristiante hnêna lehkha thawnin: “Thim ata chhuaka, a êng mak taka lût tûra kotu che u ṭhatna chu in entîr theih nân nangni zawng chi thlan, lal puithiamho, hnam thianghlim, Pathian mite ngei in ni si a; hmân lai khân mi rêng in ni lo va, tûnah erawh chuan Pathian mi in ni ta a,” a ti a ni. (1 Petera 2:​9, 10) Jehova leh tisa lam Israelte’n a bîk taka inlaichînna an neih chu a tâwp ta a. C.E. 33-ah chuan, Jehova’n a duhsakna chu lei lam Israel hnên ata thlarau lam Israel, Kristian kohhran, Messia Lalram ‘rah chhuak tûr hnam’ hnênah a pe ta a ni.​—Matthaia 21:43.

Mi Mala Inpumpêkna

15. Pentikost C.E. 33-ah Petera’n a thu ngaithlatute chu eng ang baptisma chang tûrin nge a fuih?

¹⁵ Vântlâng Kum Chhiar 33 hnu lamah chuan Juda emaw, Jentail emaw pawh ni se, tupawhin mi mala Pathian hnêna inpumpêkna neiin “Pa leh Fapa leh thlarau thianghlim hmingah chuan” baptisma an chan a ngai a ni.a (Matthaia 28:19) Pentikost nî chuan tirhkoh Petera chuan ngaithlatu Judate leh saphunte hnênah: “Sim ula, in sual ngaihdam nân Isua Krista hmingin baptisma chang ṭheuh rawh u; tichuan thlarau thianghlim pêk hi in hmu ang,” a ti a. (Tirhkohte 2:38) Chûng Judate leh saphunte chuan Jehova hnênah an nun an inpumpêk tawhzia lantîr nân mai ni lovin, Isua chu Jehova’n an sualte a ngaihdamna tûr a ni tih an pawmzia lantîr nân baptisma an chang a ni. Anni chuan Isua chu Jehova Puithiam Lalber leh anmahni hruaitu, Kristian kohhran Lû ber a ni tih an pawm a ngai a ni.​—Kolossa 1:​13, 14, 18.

16. Paula hun lai chuan, engtin nge rilru dik tak pu Judate leh Jentailte chu thlarau lam Israelte zînga mi an lo nih?

¹⁶ A hnu kum eng emaw zâtah, tirhkoh Paula chuan: “Atîrin Damaska khuaa mite hnênah, chu mi hnuah chuan Jerusalem khuaa mite hnênah te, Judai ram tina mite hnênah te, Jentailte hnênah te pawh, sim hming pu tlâka thil ti a, sima Pathian lam an hawina tûrin ka hril zâwk ṭhîn a ni,” tiin a sawi a. (Tirhkohte 26:20) Paula’n Isua chu Krista, Messia a nihzia Judate leh Jentailte a hmin hnu chuan, inpumpêka baptisma chang tûrin anni chu a ṭanpui a ni. (Tirhkohte 16:​14, 15, 31-33; 17:​3, 4; 18:8) Chûng zirtîr tharte chu Pathian lam hawina hmangin thlarau lam Israelte zînga mi an lo ni ta a ni.

17. Eng chhinchhiahna hna nge tâwp ṭêp tawh a, hna dang eng nge chak taka thawh mêk a nih?

¹⁷ Tûn lai hian, thlarau lam Israel a la bângte chhinchhiahna hnuhnûng ber chu a hnai tawh hle a. Chu chhinchhiahna zawh a nih chuan, “hrehawm nasa tak” tihchhiatna thlite chelhtu “vântirhkoh pali” chu an thli chelh lai thlah tûrin thuneihna pêk an ni ang. Chu mi a lo thlen hma chuan, leia chatuana nun beiseina nei “mipui tam tak” lâk khâwmna chu chak taka thawh a ni a. Hêng “berâm dang” te hian “Berâm No thisena” rinna lantîr chu duh thua thlangin, Jehova hnêna an inpumpêkzia lantîr nân baptisma an chang a ni. (Thu Puan 7:​1-4, 9-​15; 22:17; Johana 10:16; Matthaia 28:​19, 20) An zîngah chuan Kristian nu leh pate enkawl naupang tam tak an tel a. Chûng zînga mi i nih chuan, a dawta thuziak chu i chhiar duh ngei ang. (w06 7/1)

[Footnote]

Ennawn Nân

• Engvângin nge Israel naupangte chuan Jehova hnêna mi mal inpumpêkna an neih a ngaih loh?

• Engtin nge Israelte chuan an inpumpêkna thutiam an hlenzia an lantîr theih?

• Engvângin nge Jehova chuan Israel chu hnam inpumpêk a nihna ata a hnâwl a, chu chu eng anga thlâk nge ni?

• C.E. 33 Pentikost aṭangin, Judate leh Jentailte chuan thlarau lam Israelte ni tûrin eng nge an tih ngai?

[Phêk 22-naa milem]

Israel naupangte chu Pathian hnam thlan zînga mi angin an lo piang

[Phêk 25-naa milem]

Israel mi tinte chuan Pathian rawngbâwl tûrin mahnia thu tlûkna an siam a ngai

[Phêk 25-naa milem]

Duh thua thilhlante chuan Israel mite chu Jehova an hmangaihna lantîr theihna hun remchâng a pe

[Phêk 26-naa milem]

C.E. 33 Pentikost hnu lamah chuan, Krista zuitute chuan Pathian hnêna mi mal inpumpêkna an neiin, chu chu baptisma channa hmangin an lantîr a ngai