Retheihna​—Tûn Lai Dinhmun Chu

BRAZIL ram São Paulo khawpui kawngpuiahte chuan Vicent-aa chu tawlailîr bungruaa khat hnûka hmuh a ni fo ṭhîn a. Lehkha khawngte, thîr chhiate, leh plastic-te chu a la khâwm a. Khua a han thim ṭan chuan, lehkha khawng chu a tawlailîr hnuaiah phahin a mu mai ṭhîn. A riahna kawngpui lûn lai taka motor leh bus tlân thâwmte chu hre lo ang mai a ni. Tûn hma chuan hna, chênna in, leh chhûngkua a nei a​—mahse, chûngte chu a chân vek a. Tûnah chuan kawttlêrah rethei taka inchâwmin a nung a ni.

Vânduaithlâk takin, khawvêl pum puia maktaduai tam takte chu Vincent-a ang hian rethei takin an nung a. Ram retheiahte chuan, mi tam tak chu kawngpuiah leh khawpui pâwn mi rethei awmna vêngahte loh theih lohvin an khawsa a. Kutdawh​—ke baite, mit delte, hmeichhe fa sên pawmte​—chu hmuh tûr an tam hle a. Kawng ṭhuampui traffic hmunah naupangte chu motor dingte inkârah an tlân kual a, pawisa tlêm azâwng an hmuh theih inbeiseiin hmawmsawm eng engemaw chu an zuar a ni.

Chutiang retheihna awm chhan chu sawifiah a har hle. British chanchinbu The Economist chuan heti hian a sawi: “Mihringte hi tûn hma zawng aiin an hausa zâwk a, retheihna sutkian nâna mamawh damdawi lam thiamna te, khâwl thil lam thiamna te leh finnate chu tûn hma zawng aiin an nei a ni,” tiin. Tam tak chuan hêng hi an hlâwkpui ngei mai. Ram rethei tam taka khawpui liana kawngpuiahte chuan motor nalh tak tak a tam hle a. Bazârna hmunpuite chu tûn lai hmanraw chhuak thar ber bertein a khat tlat a, chûng thilte lei tûr mipui lah chu an tlachham hek lo. Brazil rama dâwr hmunpui pahnihte chuan an bungraw ṭhenkhatte hralh tla tûrin an fak nasa hle a ni. December 23 leh 24, 2004-ah chuan zan khuain an inhawng a. Chung zînga pakhat phei chuan an thil zawrh lei tûra lo kalte tihhlim nân lâm mite a ruai a ni. Chu thilthleng chuan thil lei tûra lo kal mi 5,00,000 dâwn lai a hîp khâwm a ni!

Amaherawhchu, mipui tam takte chuan ṭhenkhatin an chen hausakna chu an hlâwkpui ve lo. Hausa leh retheite inkâr inthlauhna nasa tak hian mi tam takte chu retheihna do a hmanhmawhthlâk hle tih thutâwp a siamtîr a ni. Brazilian magazine Veja chuan: “Kumin [2005] hian retheihna do hi khawvêl hruaitute ngaihtuah tûr thil pawimawh ber a ni,” tiin a sawi. Veja chuan Marshall Plan thar, a bîka Africa-a ram rethei berte ṭanpui tûra rawtna siam chungchâng pawh a sawi bawk a ni.b Amaherawhchu, chûng rawtnate chuan hmasâwnna a lantîr laiin, chu magazine bawk chuan heti hian a sawi belh a ni: “Rah ṭha a chhuah dâwn leh dâwn loh chungchângah rinhlelhna tam tak a awm a. Ram tam zâwkin chu mi atâna sum leh pai thawh an hreh chuan, chu chu a dawng tûrate hnên a thlen ṭhin loh vâng a ni ang,” tiin. Vânduaithlâk takin, eirûkna avâng leh thuneitute’n ṭûl lo taka thil an tih khawtlai avângin, sawrkârte, khawvêl pum huap tlâwmngai pâwl te, leh mi malte’n sum leh pai ṭanpuina tam tham tak an pêkte chuan a mamawh tak takte hnên chu a thleng ngai mang meuh lo a ni.

Isua chuan retheihna chu harsatna a ni zêl dâwn tih a hria a. Ani chuan: “Mi retheite chu kumkhuaa in hnêna awm an ni alâwm,” tiin a sawi. (Matthaia 26:11) Hei hi khawvêlah retheihna a awm reng dâwn tihna a ni em? Dinhmun siam ṭha chho tûrin engmah tih theih a awm lo em ni? Eng nge Kristiante’n retheite ṭanpui nân an tih theih? (w06 5/1)

[Footnote-te]