Pathian Ropuina I En Chhuahtir Ang Em?
“Kei ni chuan . . . dârthlalang angin Jehova ropuina kan ên chhuahtîr ṭhîn.”—2 KORINTH 3:18, New World Translation.
1. Mosia’n eng nge a hmuh a, a hnuah eng thil nge thleng?
MIHRING hmuh tawh inlârna mak berte zînga mi a ni a. Sinai Tlânga amah chauhva a awm laiin, Mosia chu a thil dîl dangdai tak mai pêk a ni. Mihring tumahin an hmuh ngai miah loh—Jehova ropuina hmuhtîr a ni a. Mahse, Mosia chuan Jehova chu hmaichhanah a hmu hauh lo. Pathian lan dân chu a ropui êm avângin amah hmua nung reng thei mihring tumah an awm lo. Chu ai mahin, A kal pelh hma loh chu Jehova chuan amah vênhim nân Mosia chu a “kutin” a khuh a, chutianga kal pelh nân chuan a aiawh vântirhkoh a hman a rinawm hle. Tichuan, Jehova chuan Mosia chu he Pathian inlârna ropui tak êng châm bâng hi a hmuhtîr a ni. Jehova chuan Mosia chu vântirhkoh pakhat kal tlangin a be bawk a. Chu mi hnua thilthleng chu Bible-in a târ lang a ni: “Tin, heti hi a ni a, Mosia chu . . . Sinai tlâng . . . ata a chhuk chuan, . . . [Jehova nêna] an inbiakna avâng chuan a hmai vun chu a lo êng a,” tiin.—Exodus 33:18–34:7, 29.
2. Kristiante ên chhuahtîr ropuina chungchâng eng nge tirhkoh Paula’n a ziah?
2 Chu tlângah chuan Mosia nêna awm dûn angah han inchan ta la. Engkimtitheia ropuina mawi tak hmuh a, a ṭawngkam chhuak ngaihthlâk chu a va hlimawm dâwn êm! Dân thuthlung palai, Mosia nêna Sinai Tlâng aṭanga chhuk thlâk chu chanvo ropui tak a va ni dâwn êm! Mahse, Kristian dikte chuan Mosia ên chhuahtîr dân aia ṭha zâwk kawng ṭhenkhatin Pathian ropuina an ên chhuahtîr a ni tih i hria em? Chu ngaihtuahna chawk tho thei tak thil chu tirhkoh Paula lehkha thawnah hmuh a ni. Ani chuan hriak thih Kristiante’n “dârthlalang angin Jehova ropuina [an] ên chhuahtîr” thu a ziak a. (2 Korinth 3:7, 8, 18, NW) Kawng khatah chuan, lei lam beiseina nei Kristiante pawhin Pathian ropuina an ên chhuahtîr a tih theih a ni.
Kristiante’n Pathian Ropuina An En Chhuahtîr Dân
3. Mosia hriat theih loh kawng eng angin nge Jehova chu kan hriat?
3 Engtin nge Pathian ropuina chu kan ên chhuahtîr theih? Mosia angin Jehova chu kan hmuin, a aw kan hre si lo. Mahse, Jehova chu Mosia hriat theih loh dân kawngin kan hria a ni. Isua chu Mosia thih hnu kum 1,500 dâwn lai a liam hma loh chuan Messia angin a lo la lang lo va. Chuvângin, Mosia chuan Dân chu mihringte sual leh thihna râpthlâk tak ata tlantu, Isuaa a famkim dân chu a hre thei lo a ni. (Rom 5:20, 21; Galatia 3:19) Chu bâkah, Mosia chuan Jehova thiltum ropui tak, Messia Lalram nêna inkûngkaih hnai tak, leh chu miin a rawn thlen tûr lei Paradis chungchâng chu tlêm a zâwng chauh a hria a. Chuvângin Jehova ropuina chu kan mit ni lovin, Bible zirtîrnate ṭanchhan rinna mitin kan hmu a ni. Chu bâkah, Jehova aw chu vântirhkoh hmang ni lovin; Bible, a bîk takin Isua zirtîrna leh rawngbâwlna ṭha taka târ lanna Chanchin Ṭha ziakte hmangin kan hria a ni.
4. (a) Engtin nge hriak thih Kristiante chuan Pathian ropuina an ên chhuahtîr? (b) Eng kawngin nge lei lam beiseina neite chuan Pathian ropuina an ên chhuahtîr?
4 Kristiante chuan Pathian ropuina chu an hmaia êng tihchhuahna hmangin ên chhuahtîr lo mah se, Jehova mizia leh thiltum ropui takte chungchâng mi dangte hnêna an hrilh hian an hmai chu lâwm avângin a êng chhuak a ni. Kan hun chungchângah, zâwlnei Isaia chuan Pathian mite’n “hnam tin zîngah [Jehova] ropuina thu an sawi ang,” tih a lo sawi lâwk tawh a. (Isaia 66:19) Chu bâkah, 2 Korinth 4:1, 2-ah: “He rawngbâwlna hi kan neih avângin . . . thil zahthlâk inthupte chu kan malmâk ta zâwk a, ngamthlêmna thu kan hmang lo va, Pathian thu mi bum nân kan hmang hek lo; thutak hriattîrin Pathian mithmuhin mi tin chhia leh ṭha hriatna mit kan intluntîr zâwk ṭhîn a ni,” tih kan chhiar a ni. Paula chuan hriak thih Kristian, ‘thuthlung thar rawngbâwltute’ hnêna a sawi bîk a ni. (2 Korinth 3:6) Mahse, an rawngbâwlna chuan leia chatuana nunna chang tûra beiseina nei mi chhiarsên lohte chungah nghawng a nei a. Pâwl pahnihte rawngbâwlnaah chuan, Jehova ropuina chu an zirtîrnaah chauh ni lovin, an nun dânah pawh ên chhuahtîrna a tel a ni. Pathian Ropui Ber ropuina ên chhuahtîr chu kan mawhphurhna leh kan chanvo hlu chan a ni.
5. Thlarau lama kan hausakna chuan eng nge a finfiah?
5 Tûn laiah, Pathian Ram chanchin ṭha ropui chu, Isua sawi lâwk angin lei hmun tina hrilh a ni a. (Matthaia 24:14) Hnamte, chite, mite, leh ṭawng tinte chuan chanchin ṭha chu phûr takin an chhâng lêt a, Pathian duhzâwng ti tûrin an nun chu an thlâk danglam a ni. (Rom 12:2; Thu Puan 7:9) Kristian hmasate angin, thil an hmuh leh an hriatte chu sawi lovin an awm thei lo. (Tirhkohte 4:20) Mi maktaduai ruk chuangte chuan tûn laiah Jehova ropuina chu an ên chhuahtîr a, chu chu mihring chanchina hun dang zawng aia an tam lai ber a ni. An zînga mi i ni ve em? Pathian mite thlarau lam hausakna chu Jehova malsâwmna leh vênhimna finfiahtu chiang tak a ni. Min dodâltu thiltithei takte an awm avângin Jehova thlarau chu kan chungah a awm tih a chiang lehzual a ni. Chutiang a nih chhan chu i lo en ang u.
Pathian Mite Chu An Ngawi Lo Vang
6. Jehova lama ṭang tûrin engvângin nge rinna leh huaisenna neih a ngaih?
6 Mi sual tawrawt tak chungchâng sawi tûra rorêlna court-a koh niah han inchan ta la. Chu mi sual chuan pâwl thiltithei tak a nei a, a chungchâng thu pawi engmah i laihlan loh nân a tihtheih ang apiang a ti dâwn tih i hria a ni. Chutiang mi sual dik lohna phawrh chhuak tûr chuan i huaisen hle a ngai ang a, thuneitute’n a lak ata an vênghim dâwn che tih i rin a ngai a ni. Chutiang dinhmunah chuan kan ding ve a. Jehova leh a thiltumte kan hriattîrnaah, Diabol-Setana chungchâng kan phawrh chhuak a, tual thattu leh khawvêl pum bumtu a nihzia kan lailang a ni. (Johana 8:44; Thu Puan 12:9) Jehova lam ṭang ni a, Diabola do tûr chuan rinna leh huaisenna neih a ngai a ni.
7. Setana chu eng ang khawpa mi thunun thei nge a nih a, eng nge tih a tum?
7 Jehova chu Chungnungbera a ni ngei mai a. A thiltihtheihna chu Setana aiin a chungnung zâwk daih a ni. Jehova chuan ama rawng rinawm taka kan bâwl chuan, min vênghim thei chauh ni lovin, min vênhim a châk bawk a ni. (2 Chronicles 16:9) Mahse, Setana chu ramhuaite leh Pathian hnên aṭanga inla hrang khawvêl mihringte chunga rorêltu a ni a. (Matthaia 12:24, 26; Johana 14:30) Leia paih thlâk a ni a, ‘a thinur êm êm’ avângin, Setana chuan Jehova chhiahhlawhte chu nasa taka dodâlin, chanchin ṭha hriltu zawng zawng kâ chu hup beh nân a thununna hnuaia awm khawvêl chu a hmang a ni. (Thu Puan 12:7-9, 12, 17) Chu chu engtin nge a tih? A lo berah kawng thumin a ti a ni.
8, 9. Engtin nge Setana’n hmangaihna dik lo a hman a, engvângin nge kan ṭhian kawm tûr fîmkhur taka kan thlan ang?
8 Setana’n min lâk pên a tum dân kawngkhat chu nuna kan thil ngaihsakte hmangin a ni. Hêng ni hnuhnûnga mite hi tangka ngainatute, mahni inhmangaihtute, leh mahni lâwmna mai hmangaihtute an ni a. Pathian hmangaihtute an ni lo. (2 Timothea 3:1-4) Nî tin nuna an buai pumhlûm ṭhak avângin, mi a tam zâwkte chuan an hnêna kan thlen chanchin ṭha chu ‘an hre duh lo.’ Bible thutak zir chu an tui lo ringawt mai a ni. (Matthaia 24:37-39) Chutiang rilru put hmang chu inkaichâwn theih a ni a, thlarau lam ngaihsak lohna dinhmunah min dah thei a ni. Khawvêl thilte leh nuna hlimhlâwp bâwlnate kan hmangaih chuan, Pathian kan hmangaihna chu a dai dâwn a ni.—Matthaia 24:12.
9 He mi avâng hian, Kristiante chuan an ṭhian kawm tûr chu fîmkhur takin an thlang a. “Mi fing pâwl la, i lo fing ang a, mi â pâwl erawh chu hrehawm tuar phahna a ni,” tiin Lal Solomona chuan a ziak si a. (Thufingte 13:20) Pathian ropuina ên chhuahtîrtute i “pâwl” ang u. Chutiang mite pâwl chu a va nuam tak êm! Inkhâwmna hmunah leh hun danga kan thlarau lam unaute nêna kan inkawmkhâwmin, an hmangaihna te, an rinna te, an hlimna te, leh an finna te chuan min tichak a ni. Chutiang inkawmna ṭha chuan kan rawngbâwlna chhunzawm zêl tûra kan thutlûkna chu a tinghet a ni.
10. Eng kawngin nge Setana chuan Pathian ropuina ên chhuahtîrtute lakah nuihsawhna a hman?
10 Setana’n Kristian zawng zawngte Pathian ropuina ên chhuahtîrna tihtâwp a tum dân pahnihna chu nuihsawhna hmangin a ni. He tih dân hi mak kan ti tûr a ni lo. Leia a rawngbâwl chhûngin, Isua chu nuihsawh—nuihsan, nuihza siam nâna hman, zahthlâk taka siam, leh chil hial pawh chhâk khum a ni a. (Marka 5:40, Luka 16:14; 18:32) Kristian hmsate pawh kha nuihsan an ni. (Tirhkohte 2:13; 17:32) Tûn laia Jehova chhiahhlawhte pawhin chutiang bawk chu an tuar a. Tirhkoh Petera sawi dân chuan, anni chu “zâwlnei derte” anga puh an ni ang. “Ni hnuhnûngahte chuan nuihsantute chu anmahni châkna anga awmin, nuihsan chungin an lo kal ang a, ‘A lo kal lehna thutiam chu khawiah nge? Siam tirh aṭangin engkim a awm pângngai angin . . . a la awm zêl alâwm,’ an la ti ang,” tiin Petera chuan a sawi lâwk a ni. (2 Petera 3:3, 4) Pathian mite chu thil ningkhâwng hre lo lutuk anga nuihsawh an ni a. Bible nungchang tehnate chu a hmân lai tawh nia thlîr a ni bawk. Mi tam takte tân chuan, kan thu hrilh chu âtna a ni. (1 Korinth 1:18, 19) Kristiante kan nih angin, school-ah te, hnathawhnaah te, in chhûngkhur ngeiah te nuihsawh kan tâwk thei a. Lunghnual mai lovin, Isua angin Pathian Thu chu thutak a ni tih hriain, kan thuhrilhna hmangin Pathian ropuina chu kan ên chhuahtîr zêl a ni.—Johana 17:17.
11. Engtin nge Setana’n Kristiante ngawihtîr tûrin tihduhdahna a hman?
11 Diabola’n min ngawihtîr a tum dân a pathumna chu dodâlna emaw, tihduhdahna emaw hmangin a ni. Isua chuan a hnungzuitute hnênah: “Hrehawm tuar tûrin an mantîr ang che u a, an tihlum ang che u; ka hming avângin hnam zawng zawng huat in ni ang,” a ti a ni. (Matthaia 24:9) Dik tak chuan Jehova Thuhretute kan nih angin, lei hmun tam takah tihduhdahna nasa tak kan tuar a ni. Jehova’n hmân ata tawh, Pathian rawngbâwltute leh Diabol-Setana rawngbâwltute inkâra inhuatna, a nih loh leh inhmêlmâkna a awm tûr thu a sawi lâwk tih kan hre chiang hle a. (Genesis 3: 15) Fiahna hnuaia kan rinawmna vawnna hmangin, lei leh vâna Jehova lalchungnunna dikzia kan finfiah tih kan hre bawk. He mi hriatna hian dinhmun harsa ber hnuaiah pawh min tichak thei a. Pathian ropuina ên chhuahtîr kan tum tlat chuan, eng tihduhdahna mahin mi ngawihtîr hlen thei lo vang.
12. Setana dodâlna tâwk reng chunga kan rinawm hian, engvângin nge kan lâwm ang?
12 Khawvêl thlêmna chu dovin, nuihsawh leh tihduhdahna tuar chungin i rinawm em? Chutiang i nih chuan hlim chan tûr i nei tihna a ni. Isua chuan amah zuitute chu hêng thu hi a tiam a ni: “Miin keimah avânga an hau che u a, an tihduhdah che u a, dâwta sual tinrênga an hêk hunah che u, in eng a la thâwl ang. Lâwm ulangin, nasa takin hlim rawh u; vânah in lâwmman a awm hnêm si a; chutiang bawkin in hmaa zâwlnei awmte pawh an tihduhdah ṭhîn kha,” tiin. (Matthaia 5:11, 12) I chhelna chuan Jehova thlarau thianghlim thiltithei tak chu i chungah a awm a, a ropuina ên chhuahtîr tûrin a tichak che tih a târ lang a ni.—2 Korinth 12:9.
Jehova Ṭanpuina Zâra Chhelna
13. Kan Kristian rawngbâwlnaa kan chhel chhan bul ber chu eng nge ni?
13 Kan rawngbâwlnaa kan chhel chhan bul ber chu Jehova kan hmangaih vâng leh a ropuina ên chhuahtîr chu nuam kan tih vâng a ni. Mihringte chuan an hmangaihte leh an mi zahte entawn chu an duh ṭhîn a, Pathian Jehova aia entawn phu zâwk tumah an awm lo. A hmangaihna ropui tak avângin, thutak hriattîr tûr leh thuâwih mihringte tlan tûrin a Fapa chu leiah a rawn tîr a ni. (Johana 3:16; 18:37) Pathian ang bawkin, mi zawng zawngin lo sim a, chhandamna an hmuh kan duh avângin, an hnênah thu kan hril a ni. (2 Petera 3:9) He duhna leh Pathian entawn kan tum tlatna chuan kan rawngbâwlna hmanga a ropuina ên chhuahtîr zêl tûrin min chêttîr a ni.
14. Engtin nge Jehova’n kan rawngbâwlnaa chhel tûra min tihchak?
14 Mahse, a bul berah chuan Kristian rawngbâwlnaa chhel tûra kan mamawh chakna chu Jehova hnêna mi a ni a. A thlarau, a inawpna pâwl, leh a Thu, Bible hmangin min chhawmdâwlin, min thuam nghet a ni. Jehova chu a ropuina inhuam taka ên chhuahtîrtute tân ‘chhelna Pathian’ a ni. Kan ṭawngṭaina chu chhângin, fiahnate hmachhawn thei tûrin finna min pe a. (Rom 15:5, 6; Jakoba 1:5) Chu bâkah, Jehova chuan kan tuar chhuah theih loh tûr fiahna engmah kan tawh a phal lo. Jehova kan rinchhan chuan, ama ropuina kan ên chhuahtîr zêl theihna tûrin tlân chhuahna kawng a siam ang.—1 Korinth 10:13.
15. Engin nge chhel tûra min ṭanpui?
15 Kan rawngbâwlnaa chhelna chuan Pathian thlarau kan chungah a awm tih a finfiah a ni. Entîr nân: Tuemawin chhang chi khat chu a thlâwna in tina sem tûrin a tîr che a. Chu chu i pawisa leh hun sênga ti tûra hrilh i ni. Chu bâkah, i chhang sem chu mi tlêm tê chauhvin an duh tih i hre chhuak ta thuai a; ṭhenkhat phei chuan chu chhang sem tûra i beih hram hramna chu an dodâl hial dâwn che a ni. Chu hna chu a thlaa thla têl, a kuma kum têl i thawh zêl i ring em? I ring lo ngei ang. Mahse, chanchin ṭha hrilhnaah a kuma kum têl, a kum sâwmbi têl hial pawh i hun leh i sum sêngin i thawk tawh a ni mai thei. Engvângin nge? Pathian i hmangaih vâng leh a thlarau hmanga chhel tûra a ṭanpui che vâng a ni lâwm ni? Tehrêng mai!
Hriat Reng Tûr Hna Chu
16. Kan rawngbâwlnaa chhel chu kan tân leh kan thu ngaithlatute tân eng nge a nih theih?
16 Thuthlung thar rawngbâwlna chu tehkhin rual loh thilpêk hlu a ni. (1 Korinth 4:7) Chutiang bawkin, khawvêl puma berâm dangte hlen chhuah Kristian rawngbâwlna pawh chu a hlu a ni. I rawngbâwlnaa i chhel zêl hian, Paula’n Timothea hnêna a ziak angin, “nangmah leh i thu ngaithlatute chu i chhandam,” thei a ni. (1 Timothea 4:16) Chu mi awmzia chu han ngaihtuah teh. I chanchin ṭha hrilh chuan mi dangte chantuana nun theihna hun remchâng a pe tihna a ni. Thlarau lama i ṭanpuite nên inṭhianna nghet tak i nei thei bawk. Pathian chungchâng zir tûra i ṭanpuite nêna Paradis-a chatuana nun hlimawm dân tûr chu han ngaihtuah teh! Anmahni ṭanpui tûra i thawhrimna chu an theihnghilh ngai hauh lo vang. A va lungâwithlâk dâwn êm!
17. Engvângin nge kan hun hi mihring chanchina hun danglam bîk tak a nih?
17 Mihring chanchina hun dang lam bîk takah i nung a. Pathian hnên aṭanga inmi hran khawvêlah hian chanchin ṭha chu hrilh a ni leh ngai tawh lo vang. Nova chu chutiang khawvêlah chuan a nung a, a boral lai pawh a hmu a ni. Lawng tukna hmanga Pathian duhzâwng rinawm taka a hlenna chuan amah leh a chhûngte chhanchhuahna a thlen tih a hriat chuan, a va hlim dâwn tak êm! (Hebrai 11:7) Nang pawhin chutiang hlimna chu i nei thei a ni. Khawvêl tharah hian, Lalram hmasâwn nâna i tih theih ang tâwk i ti tih inhriatna nêna hêng ni hnuhnûnga i thiltihte i han thlîr lêta i awm dân tûr han ngaihtuah teh.
18. Eng tiamkamna leh fuihna nge Jehova’n a chhiahhlawhte a pêk?
18 A nih chuan, Pathian ropuina chu i ên chhuahtîr zêl ang u. Chutiang kan tih chu chatuana kan hriat reng tûr thil engemaw a ni. Jehova chuan kan hnathawh chu a hre reng bawk. Bible chuan he fuihna hi a pe a ni: “In hnathawh leh a hming chunga hmangaihna in lantîr, mi thianghlimte rawng in lo bâwl, tûn thleng pawha in la bâwl cheu chu theihnghilh tûrin Pathian chu mi fel lo a ni si lo va. Nimahsela, tâwp thlenga beiseina famkim hmu tûrin in taihmâk pângngai ang khân taihmâk chhuah ṭheuh fo ula kan ti êm êm mai; chutichuan in inthlahdah lovang a, rinna leh nghah peihna vânga thutiamte rochung tawhte zirho in ni zâwk ang,” tih chu.—Hebrai 6:10-12. (w05 8/15)
I Hrilhfiah Thei Em?
• Engtin nge Kristiante chuan Pathian ropuina chu an ên chhuahtîr?
• Pathian mite ngawihtîr tûra Setana hman tih dân ṭhenkhat chu engte nge ni?
• Pathian thlarau chu kan chungah a awm tih finfiahna eng nge awm?
[Phêk 9-naa milem]
Mosia hmai chuan ropuina a ên chhuahtîr
[Phêk 10-naa milem]
Rawngbâwlnaah Pathian ropuina kan ên chhuahtîr