Thawhlehna—Nangmah Nghawngtu Zirtîrna Chu
“Mi felte leh fel lote thawhlehna a awm ang tih Pathian lamah ka beisei.”—TIRHKOHTE 24:15.
1. Engtin nge thawhlehna chu Sanhedrin hmaah thu buai a lo nih?
MISSIONARY-A a zin vawithumna tâwp, C.E. 56-ah chuan tirhkoh Paula chu Jerusalem-ah a awm a. Rom-ho mana a awm hnu chuan, Juda rorêlna sâng, Sanhedrin hmaa inlan tûra phâlsak a ni. (Tirhkohte 22:29, 30) Paula chuan rorêltute chu a han en vêl a, ṭhenkhat chu Saddukai leh mi dangte chu Pharisai an ni tih a hria a. He pâwl hnih hi thil langsâr tak pakhatah an inkalh tlat a ni. Saddukaite chuan thawhlehna chu an ring lo va, Pharisaite erawh chuan an ring a ni. Thawhlehna a rinzia târ lan nân, Paula chuan: “Unaute u, Pharisai ka ni, Pharisai fapa pawh ka ni; mitthi thawhleh beiseina thu-ah chhuahchhâlin ka awm a nih hi,” tiin a puang a. Chutianga sawiin, pungkhâwmho chu a tibuai ta chiam a ni!—Tirhkohte 23:6-9.
2. Engvângin nge Paula chu thawhlehna a rinna hum tûra a inpeih?
2 Chu mi hma kum engemaw zâtah chuan Damaska khua a zin kawngah, Paula chuan Isua aw a hriatna inlârna chu a hmu a. Paula chuan Isua hnênah: “Lalpa, engnge ka tih ang?,” tiin a zâwt hial a ni. Isua chuan: “Tho la, Damaska khuaah lût rawh, thil zawng zawng i tih tûra ruat apiang an hrilh ang che,” tiin a chhâng a. Damaska khua a thlen chuan, Kristian zirtîr ṭangkai tak, Anania chuan Paula chu a hmu a, ani chuan: “Min thlahtute Pathianin a duhzâwng hriaah leh Mi Feltaka [tho leh Isua] chu hmu a, a ṭawngkâ hriaah pawh a ruat tawh che,” tiin a hrilhfiah a ni. (Tirhkohte 22:6-16) Chuvângin, Paula chu thawhlehna a rinna hum tûra a inpeih pawh hi a mak lo ve.—1 Petera 3:15.
Thawhleh Beiseina Vântlâng Hmaa Puang Chhuakin
3, 4. Engtin nge Paula’n thawhlehna thlâwp tlattu a nihzia a târ lan a, a entîrna siam aṭangin eng nge kan zir theih?
3 A hnuah chuan Paula chu Ram Awptu Felika hmaah a inlan a. Chu mi ṭum chuan, Tertulla “thusawi thiam” chuan Juda mite tân Paula chungah thupawi a sawi a, pâwl hrang hruaitu leh hel niin a puh a ni. Chu chu chhâng lêtin Paula chuan tîm miah lovin: “He thu hi i hnênah ka inpuang ang, ‘pawl hrang’ an tih Kawng dân angin min thlahtute Pathian ka be ṭhîn,” tiin a puang a. Tichuan, thu buai ber chu sawiin, heti hian a chhunzawm a: “Mi felte leh fel lote thawhlehna a awm ang tih Pathian lamah ka beisei a, hênghote pawh hian chûng chu an âwih ve bawk si a,” tiin.—Tirhkohte 23:23, 24; 24:1-8, 14, 15.
4 Kum hnih vêl hnu chuan, Felika thlâktu, Porkia Festa chuan, Lal Herod Agrippa chu mi tâng Paula thu zawhpui tûrin a sâwm a. Festa chuan hêktute’n “Isua, mi pakhat thi tawh, . . . ‘A nung leh a ni,’” tia Paula thusawi an kalh thu a hrilhfiah a. Paula chuan a thiam thu sawiin: “Pathianin mitthite a kai tho tih hi engati nge âwihawm lova in ruat ni?,” tiin a zâwt a ni. Tichuan, heti hian a sawi a: “Pathian hnên aṭanga ṭanpuina ka hmuh avângin vawiin thlengin mi tête leh mi liante hnêna thu hriattîrin ka la awm reng a, zâwlneite leh Mosian lo thleng tûr an tih thu chauh lo chu thu dang sawi lovin; khatia Krista-in hrehawm a tuar ang a, tin, mitthi zîng ata a thawh leh avângin mi zâwng zâwng hnênah leh Jentailte hnênah pawh êng hmuhtîrtu hmasa ber a ni ang, an tih thu kha,” tiin. (Tirhkohte 24:27; 25:13-22; 26:8, 22, 23) Paula chu thawhlehna thlâwp tlattu a va ni tak êm! Paula angin, keini pawhin thawhlehna a awm dâwn tih rin tlatna nên kan puang ve thei a ni. Mahse, eng ang chhân lêtna nge kan beisei theih? Paula dawn ang bawk kan dawn a rinawm hle.
5, 6. (a) Paula’n thawhlehna a thlâwp tlatna chuan eng chhân lêtna nge a tihchhuah? (b) Thawhlehna kan rinna kan sawi chhuahin, eng nge pawimawh?
5 Paula missionary zin vawihnihna (C.E. 49-52 vêl) tîr lama Atheni khua a tlawh laia thilthleng kha han ngaihtuah teh. Milem pathian tam tak ringtute chu chhûtpuiin, Pathian thiltum A mi ruat hmanga leilunga felna nêna rorêlna chu ngaihsak tûrin a fuih a. Chu a mi ruat chu tu dang ni lovin Isua chu a ni. Paula chuan chu chu Isua kaihthawhna hmangin a tiam tih a hrilhfiah a. Mite chhân lêtna chu eng nge ni? “Tin, mitthi zîng ata thawhlehna thu chu an hriat veleh a ṭhenin an nuihsan a; a ṭhenin, ‘He thu hi i hnênah kan la ngaithla leh ang e,’ an ti a,” tiin kan chhiar a ni.—Tirhkohte 17:29-32.
6 Chu an chhân lêtna chu C.E. 33 Pentikost hnu lawka Petera leh Johana tawn chhân lêtna nên a thuhmun chiah a ni. Saddukaiho chuan inhnialna nasa tak an tichhuak leh a. “Tin, Petera leh Johanan mite hnêna thu an sawi lai chuan, puithiamhote, biak in hotu te, Saddukaiho te chu an hnênah an lo thleng phut a, mi an zirtîr leh Isua avânga mitthi zîng ata thawhleh thu an hrilh avângin an lungni lo êm êm a,” tiin Tirhkohte 4:1-4 chuan thil thleng chu a târ lang a ni. Mahse, mi dangte erawh chuan duh takin an chhâng lêt thung. “Thu ngaithlahote zînga tam takin an âwih a, an tam lam chu patling hlîr pawh sângnga lai an tling a.” Thawhleh beiseina chungchâng kan sawiin chhân lêtna chi hrang hrang kan beisei thei tih a chiang hle. Chu mi avâng chuan, he zirtîrna kan rinna hi kan tihchak a pawimawh hle a ni.
Rinna leh Thawhlehna
7, 8. (a) Kum zabi khatnaa Korinth kohhran hnêna lehkha thawnin a târ lan angin, engtin nge rinna chu engmah lo mai a nih theih? (b) Engtin nge thawhleh beiseina hriatthiamna dik tak chuan Kristian dikte chu a tihhran?
7 C.E. kum zabi khatnaa Kristiana inlet zawng zawngte chuan thawhleh beiseina pawm chu an âwlsam lo. Pawm harsa ti tute zînga ṭhenkhat chu Korinth kohhrana mi an ni. An hnênah Paula chuan: “A hmasa berin ka hmuh ve bawk chu ka hrilh chhâwn che u kha; khatia, Krista chu Pathian Lehkha thu ang zêla kan sualte avânga a thih a, an phûm a, Pathian Lehkha Thu ang zêla ni thum nia kaihthawha a awm . . . kha,” tiin a ziak a ni. Tichuan, Paula chuan tho leh Krista chu “unau zanga aia tam hnênah a inlâr,” tih sawiin he thu dik hi a nemnghet a, chu mi zînga mi tam zâwk chu tûn thlengin an la dam cheu tih a sawi belh a ni. (1 Korinth 15:3-8) Heti hian a chhût belh a: “Krista thu, mitthi zîng ata kaihthawhin a awm tih an hrilh si chuan, engtizia nge in zînga ṭhenkhatin, ‘Mitthi thawhlehna rêng rêng a awm lo,’ in tih ni? Mitthi thawhlehna rêng rêng a awm si loh chuan Krista pawh kha kaihthawhin a awm lo vang; tin, Krista kha kaihthawhin a awm loh chuan kan thu hrilh hi engmah lo a ni ang a, in rin pawh engmah lo a ni bawk ang,” tiin.—1 Korinth 15:12-14.
8 Ni e, thawhlehna zirtîrna chu a bulpui ber a nih avângin, chu chu thil awm tak tak anga pawm a nih loh chuan Kristian rinna chu engmah lo mai a ni ang. Dik takin, thawhlehna hriatna dik chuan Kristian dikte chu a dik lo lakah a tihrang nalh a ni. (Genesis 3:4; Ezekiela 18:4) Chuvâng chuan, Paula chuan thawhlehna zirtîrna chu Kristianna ‘thu bulah’ a telh a ni. ‘Puitlin lam pan’ chu kan tum berah i dah tlat ang u. Paula chuan “Pathianin rem a tih chuan chu chu kan ti ngei ang,” tiin a fuih a ni.—Hebrai 6:1-3.
Thawhleh Beiseina
9, 10. Bible-in thawhlehna a tih hian eng a tihna nge?
9 Thawhlehnaa kan rinna tichak lehzual tûrin, hêng zawhnate hi i ennawn ang u: Bible-in thawhlehna a tih hian eng a tihna nge? Engtin nge thawhlehna zirtîrna hian Jehova hmangaihna a chawimawi?, tihte hi. Hêng zawhnate chhânna hian Pathian chu min hnaihtîr lehzual rualin, mi dangte zirtîr tûrin min ṭanpui bawk ang.—2 Timothea 2:2; Jakoba 4:8.
10 “Thawhlehna” tih chu Grik thu mal “ding leh” tihna aṭanga lehlin a ni a. Chu ṭawngkam chu eng tihna nge ni? Bible sawi dân chuan, thawhleh beiseina tih chu mitthi chu a lo nung leh thei tih rin tlatna a ni. Bible chuan mi chu a beiseina neih ang zêlin lei lam emaw, vân lam emawah mihringin emaw, thlarau taksain emaw a tho leh tih a târ lang bawk. He thawhleh beiseina ropui taka Jehova hmangaihna, finna, leh a thiltihtheihna lang chu mak kan ti hle a ni.
11. Hriak thih Pathian chhiahhlawhte tân eng thawhleh beiseina nge pêk a nih?
11 Isua leh hriak thih a unaute thawhlehna chuan vâna rawngbâwl theihna tûr thlarau taksa a pe a. (1 Korinth 15:35-38, 42-53) Lei hi Paradis-a chantîrtu tûr, Messia Lalramah chuan rorêltu angin rawng an bâwlho dâwn a ni. Puithiam Lal Ber Isua hnuaiah chuan hriak thihte chu lal puithiam an ni dâwn a. Felna khawvêl thara mihringte chungah chuan Krista tlanna inthâwina hlâwkna chu an hmang ang. (Hebrai 7:25, 26; 9:24; 1 Petera 2:9; Thu Puan 22:1, 2) Chutih chhûng chuan, hriak thih leia la damte chuan Pathian pawm tlâka awm rêng chu an duh a ni. An thih hunah, vâna thlarau thi thei lo nuna thawhlehna hmangin, an lâwmman chu an dawng dâwn a ni. (2 Korinth 5:1-3, 6-8, 10; 1 Korinth 15:51, 52; Thu Puan 14:13) “A thihna anpuiin amah nên kan inzawm tawh si chuan a thawhlehna anpui pawhin kan inzawm bawk ang,” tiin Paula’n a ziak a ni. (Rom 6:5) Mahse, leia mihring anga tho leh tûrte chungchâng chu eng nge ni ang? Engtin nge thawhleh beiseina chuan anni chu Pathian a hnaihtîr theih ang? Abrahama entîrna aṭangin thil tam tak kan zir thei a ni.
Thawhlehna leh Pathian Nêna Inṭhianna
12, 13. Abrahama’n thawhlehna rinna tûr chhan ṭha tak eng nge a neih?
12 Abrahama, ‘Pathian ṭhian,’ anga târ lan chu rinna nei mi langsâr tak a ni a. (Jakoba 2:23) Paula’n Hebrai bung 11-a mi rinawm mipa leh hmeichhiate a târ lannaah Abrahama rinna chu vawi thum lai a ziak lang a ni. (Hebrai 11:8, 9, 17) Abrahama rinna a sawi a vawithumna chu a fapa Isaaka hlân tûra thuâwih taka a inpuahchah chungchângah a ni. Abrahama chuan Isaaka kaltlanga thutiam chi thlah chu Jehova tiamkamna a ni tih a ring tlat a. Isaaka chu inthâwina atâna a thi a nih pawhin, Abrahama chuan “mitthi pawh Pathian chuan a kai tho thei ang tih chu a ring” tlat bawk.
13 Thil awm dân a lo inher chhoh zêl chuan, Jehova chuan Abrahama rinna chakzia chu a hmu a, inthâwina atâna a aia hlan tûr ran chu a ruahman a ni. Amaherawhchu, Paula’n a hrilhfiah angin, Isaaka thiltawn chu thawhlehna entîrna ang a ni: “[Abrahama’n] thi hnu nung leh ang maiin [Isaaka] a hmu kîr leh ta rêng a ni.” (Hebrai 11:19) Chu bâkah, Abrahama chuan thawhlehna rin nachhan tûr nghet tak a nei daih tawh a ni. Abrahama leh a nupui, Sari te chuan an tar hnua Isaaka an hrin khân, Jehova chuan Abrahama chi thlah theihna chu a tinung leh a ni lâwm ni?—Genesis 18:10-14; 21:1-3; Rom 4:19-21.
14. (a) Hebrai 11:9, 10-a sawi angin, Abrahama’n eng nge a nghah? (b) Khawvêl thara Lalram malsâwmnate dawng tûrin, Abrahama chungah eng nge a thlen pawt ngai? (c) Engtin nge Lalram malsâwmnate kan dawn theih ang?
14 Paula chuan Abrahama chu mi rama châm ang leh puan ina awm chunga “khua lungphûmte nei mi, Pathian rêlbâwl leh siam chu . . . nghâk reng” angin a sawi a. (Hebrai 11:9, 10) Chu chu Pathian biak in awmna, Jerusalem khua tak tak ang a ni lo. Entîr nei khua a ni zâwk. Chu chu Pathian vân lam Lalram, Isua Krista leh a rorêlpui mi 1,44,000 hmanga din a ni. Vân chawimawina dawng mi 1,44,000 te chu “khaw thianghlim Jerusalem thar,” Krista “mo” tia koh a ni bawk. (Thu Puan 21:2) Kum 1914-ah chuan Jehova’n Isua chu vân lam Lalrama Messia anga Lalah ṭhuttîrin, a hmêlmate zînga rorêl tûrin thu a pe a ni. (Sâm 110:1, 2; Thu Puan 11:15) Lalram awpnain a thlen malsâwmnate dawng tûrin, Abrahama, ‘Pathian ṭhian’ chu a nun leh a ngai dâwn a. Chutiang bawkin, Lalram awpnain a thlen malsâwmnate kan dawn theih nân, Armageddon-a dam khawchhuak mipui tam tak zînga tel emaw, thihna aṭanga thawhlehna changte zînga kan tel emawna hmanga Pathian khawvêl thara kan nun a ngai a ni. (Thu Puan 7:9, 14) A nih leh, thawhleh beiseina nghahchhan ber chu eng nge ni?
Pathian Hmangaihna —Thawhleh Beiseina Nghahchhan Ber Chu
15, 16. (a) Engtin nge Bible-a hrilh lâwkna hmasa ber chuan kan thawhleh beiseina lungphûm a phûm? (b) Engtin nge thawhlehna rinna chuan Jehova min hnaihtîr theih?
15 Hmangaihna nghah tak kan Pa vâna mi nêna inlaichînna hnai tak, Abrahama neih ang kan rinna chak tak, leh Pathian thupêk kan âwihna chuan mi fela ruat min nihtîrin, Jehova ṭhian min nihtîr bawk a ni. Chu chuan Lalram rorêlna hlâwkpui theihna hun remchâng min pe a. Dik takin, Pathian Thua chhinchhiah hrilh lâwkna hmasa ber, Genesis 3:15 chuan thawhleh beiseina leh Pathian nêna inlaichînna nei tûrin ṭanchhan a pe a ni. Chu chuan Setana lû tihthitlinna chauh ni lovin, Pathian hmeichhe Thlah ke artui tihthitlinna pawh a sawi tel bawk. Isua bana a thihna chuan ke artui tihthitlinna a entîr a. Ni thum nia a thawhlehna chuan a hliam chu a tidam a, “thihna thuneitu . . . Diabola” chunga phuba lâkna kawng a sial a ni.—Hebrai 2:14.
16 Paula’n “Pathian chuan a mi hmangaihna chu fak tlâkin a lantîr a, mi sualte kan la nih laia Krista kan aia a thih avâng khân,” tih min hriattîr a ni. (Rom 5:8) He phu loh ngilneihna kan hlutna hian Isua leh hmangaihna ngah kan Pa vâna mi chu min hnaihtîr tak zet a ni.—2 Korinth 5:14, 15.
17. (a) Eng beiseina nge Joba’n a sawi chhuah? (b) Joba 14:15 chuan Jehova chungchâng eng nge a târ lan a, hei hian eng rilru nge a puttîr che?
17 Kristian hun hmaa mi rinawm Joba pawhin thawhlehna chu a lo beisei a ni. Setana kut chu nasa takin a lo tuar a. Thawhlehna chungchâng sawi ngai miah lo a ṭhian derte ang lo takin, Joba chuan thawhleh beiseina chu a thlamuanpui a, heti hian a zâwt a ni: “Mi a thih chuan a nung leh ang em ni?,” tiin. Chu chu chhângin Joba vêk chuan: “Ka hun ruat chhûng hi chuan ka nghâk ang, ka chhuahna a thlen thlengin,” tiin a sawi a ni. A Pathian, Jehova chu biain: “Mi ko vang a, keiin ka chhâng ang che,” a ti a. Min Siamtu hmangaihna ngah tak rilru put dân chungchângah, Joba chuan: “I kut hnathawh i ngaina a ni,” a ti. (Joba 14:14, 15) Ni e, Jehova chuan mi rinawmte thawhlehna hmanga an nun leh hun tûr chu a nghâkhlel êm êm a ni. Mi ṭha famkim lo kan ni chung pawha hmangaihna leh phu loh ngilneihna kan chunga a lantîrte ngaihtuahna chuan amah min va hnaihtîr lehzual tak êm!—Rom 5:21; Jakoba 4:8.
18, 19. (a) Nung leh tûrin Daniela’n eng beiseina nge a neih? (b) A dawta thuziakah eng nge kan ennawn ang?
18 Pathian vântirhkohvin “mi duhawm tak” tia a koh zâwlnei Daniela chuan hun rei tak chhûng rinawm takin rawng a bâwl a. (Daniela 10:11, 19) Jehova laka a rinawmna chu B.C.E. 617-a sala hruai a nih aṭanga Persia lal, Kura a lal a kum thumna, B.C.E. 536-a inlârna a dawn hnua a thih thlengin, a la ngai reng a ni. (Daniela 1:1; 10:1) Kura lal kum thumna chhûng khân, Daniela chuan lo thleng tûr hrehawmna nasa taka tâwp tûr khawvêl thuneihna indawt chu inlârnaah a hmu a ni. (Daniela 11:1–12:13) Inlârna chu a hriat thiam vek loh avângin, Daniela chuan thuchah kengtu vântirhkoh hnênah: “Aw ka lalpa, hêng thil tâwpna chu eng nge ni ang?,” tiin a zâwt a. A chhân nân vântirhkoh chuan ‘mi fingte chuan a ngaihna an hriat’ hun tûr “tâwpna hun,” chu a sawi a ni. Daniela beiseina chu eng nge ni ta ang? Vântirhkoh chuan: “I châwl ang a, i chan tâwkah chuan i awm ang,” tiin a hriattîr a ni. (Daniela 12:8-10, 13) Daniela chu Krista Kum Sâng Rorêl chhûnga “mi felte thawhleh hunah” a lo kîr leh ang.—Luka 14:14.
19 Tâwpna hunah kan lût thûk hle tawh a, ringtu kan lo nih ṭan hun aiin Krista Kum Sâng Rorêl inṭan hun kan hnaih lehzual tawh bawk a. Chuvângin, ‘Abrahama te, Joba te, Daniela te, leh mi rinawm a hmei a pate nêna inkâwm thei tûrin khawvêl tharah ka awm ve ang em?’ tiin kan inzâwt tûr a ni. Jehova hnaiha kan awm a, a thu kan âwih phawt chuan chutiang chuan kan awm ve ang. A dawta kan thuziakah hian, tho leh tûrte kan hriat theih nân thawhleh beiseina chu chipchiar lehzualin kan ennawn ang. (w05 5/1)
I Hre Chhuak Em?
• Thawhleh a beiseina a puan khân, Paula’n eng ang chhân lêtna nge a tawn?
• Engvângin nge thawhleh beiseina chuan Kristian dikte chu a dik lote lakah a tihhran?
• Engtin nge Abrahama te, Joba te, leh Daniela te chuan thawhlehna an ring tih kan hriat?
[Phêk 8-naa milem]
Paula chuan, Ram Awptu Felix-a hmaah thawhleh beiseina chu rin tlatna nên a puang