Vânduaina A Lo Thleng Phut

KUM hnih leh a chanve mi Owen-a chu an ina bual inah a infiam a. A nu leh pate’n a lâwn phâka an rin loh bual in chhûnga nepnâwi dahna chhuarah chuan a lâwn a. A chhûngah chuan a mit la tak bûr pakhat chu a hmu ta. Chu bûr chu hawngin, a chhûnga tui chu a in a. Vânduaina a lo thleng ta phut mai a ni.

Chu bûrah chuan acid thil ei chhe thei hlauhawm tak a awm a, lungchhiatthlâk takin, naupang Owen-a chu a thi ta a ni. A nu leh pa chu an lungchhe hle a. A pa, Percy-a chuan an sakhaw hruaitute hnên aṭangin thlamuanna a zawng a. “Engvângin nge he thil hi a thlen?,” tiin a zâwt a ni. An sakhaw hruaitu chuan: “Pathianin vânah vântirhkoh naupang dang a duh a nih chu,” tiin a lo chhâng a. Lungchhe takin, lusûn nu leh pa chuan chu chu thil dik lo hulhual niin an hria a ni. Chutiang vânduaina a thlen chu Pathian thiltum a ni tak tak em? Lunghnual takin, Percy-a chuan an sakhua nêna inzawmna neih tawh loh chu a rêl thlu ta a ni.

Thil awm dân chhût lêtin, Percy-a chuan: ‘Ka naute chuan na a la tuar em? Amah chu ka hmu leh ngai ang em?’ tih a ngaihtuah a ni.

Nang pawhin thih hnua thilthlengte leh nakin huna hmangaih thi tawhte nêna inhmuh leh theih a nih dâwn leh dâwn loh chu i ngaihtuah ve mai thei a. Pathian Lehkha Thu, Bible chuan hêng zawhnate chhânna hi min pe a. Chutah chuan, hetiang bawka vânduaina tuar zawng zawngte tân chhânna fiah tak leh thlamuanthlâk tak a chuang a ni. Chu ai maha pawimawh zâwk chu, Pathian thu tiam beiseina ropui tak a târ lan hi a ni​—thawhlehna chu.

He beiseina ropui tak chungchâng hriat belh tûr hian a dawta thuziak hi khawngaihin chhiar ang che. (w05 5/1)