Jehova Thu Chu Ring Rawh

“I thu ka ring si a.”​—SAM 119:42.

1. Sâm 119 ziaktu nihna leh thlarau lam chungchângah eng nge i sawi theih?

SAM 119 phuahtu chuan Jehova thu a ngaina hle a. Ani chu Juda Lal Fapa Hezekia a nih a rinawm. He thâwk khum hlaa târ lan thu sawi chhuahte hi Juda Lal a nih huna ‘LALPA vuan tlattu,’ Hezekia rilru nên a inmil a ni. (2 Lalte 18:​3-7) Thil pakhat chu a chiang a ni: A phuahtu chuan a thlarau lam mamawh a hre hle tih chu.​—Matthaia 5:3, NW.

2. Sâm 119 thupui chu eng nge nia, he hla hi engtia rem nge a nih?

² Sâm 119 sawi pawimawh ber chu Pathian thu, a nih loh leh a thuchah hlutna hi a ni.a Hriatreng a awlsam nâna tih ni âwm takin, a ziaktu chuan A Aw B indawtin hlate chu a rem chho va. A châng 176-te hi Hebrai hawrawp indawt dâna ziah thlâk a ni. Hebrai original-ah chuan, he fakna hla chhâng 22-te hian hawrawp inanga inṭan tlar 8 zêl a nei a ni. He fakna hla hian Pathian thu te, a dân te, a thuhriattîrte, a kawngte, a thununna thute, a thuruatte, a thupêkte, a rorêlnate, leh a thu sawite chungchâng a sawi a ni. He thuziakah leh a dawta thuziakah hian, Hebrai Bible thu lehlin dik hmangin Sâm 119-na sawiho a ni ang. Tûn hma leh tûn laia Jehova chhiahhlawhte thiltawn ngaihtuahna chuan he Pathian thâwk khum hla kan hriatthiamna tizualin, Pathian Thu, Bible avânga kan lâwmna a tipung sauh tûr a ni.

Pathian Thu Zâwmin Hlim Rawh

3. Sawisêlbo tih awmzia chu hrilhfiahin, entîrna pe rawh.

³ Hlimna dik tak chu Pathian dân kan zawhnaah a innghat a. (Sâm 119:​1-8) Pathian dân kan zawm chuan, Jehova chuan “kawnga mi ṭha famkimte [“sawisêlbote,” NW]” angin min ngai dâwn a ni. (Sâm 119:1) Sawisêlbo tih chuan ṭhat famkimna a kâwk lo; amaherawhchu, Pathian Jehova duhzâwng tih nasa takin kan tum tlat tihna erawh a kâwk a ni. Nova chu ‘Pathian nêna lêng dûn ṭhîn’ a nih angin, “a dam rualpuite zîngah chuan sawisêlbo a ni.” Jehova nun kawng duansak a zui avângin, chu thlahtu rinawm leh a chhûngte chu Tuilêtah chuan an dam khawchhuak a. (Genesis 6:9; 1 Petera 3:20) Chutiang bawkin, he khawvêl tâwpa kan dam khawchhuahna pawh hi ‘ṭhahnemngai taka Pathian thununna thute zawmna’ hmanga a duhzâwng tihnaah a innghat a ni.​—Sâm 119:4.

4. Kan hlimna leh hlawhtlinna chu engah nge a innghah?

⁴ ‘Thinlung dik tak pua lâwm thu kan hrilh a, a thuruatte kan zawm zêl’ chuan, Jehova chuan min kalsan ngai lo vang. (Sâm 119:​7, 8) Pathian chuan ‘dân bua thu ziak zawng zawng chu a zawm tlat theih nâna chhûn leh zâna ngaihtuah’ tûra a fuihna zâwmtu Josua, Israelte hruaitu chu a kalsan lo. Chu chuan hlawhtlinna a pein, a lo hmuingîl phah a ni. (Josua 1:8) A thih dâwn hnaihah, Josua chuan Pathian a la fak chhunzawm zêl a, Israelte chu: “LALPA in Pathianin in chungchâng a ṭha lam a lo sawi tawh zawng zawngte kha thlâwn pakhat mah a awm lo tih chu in thinlung zawng zawng leh in rilru zawng zawngin in hria e; in chungah a lo thleng ta vek a, pakhat mah thlâwn a awm lo ve,” tiin a hriatnawntîr thei a ni. (Josua 23:14) Josua leh Sâm 119 ziaktu angin, hlimna leh hlawhtlinna chu Jehova fakna leh a thu rinna hmangin kan nei thei a ni.

Jehova Thu Chuan Min Tithianghlim

5 . (a) Thlarau lama thianghlim theih dân sawifiah rawh. (b) Ṭhalai thil sual nasa tak titu tân ṭanpuina eng nge awm?

⁵ Pathian thu ang zêla kan awm dân kan vêng ṭhat chuan, thlarau lamah kan thianghlim thei a ni. (Sâm 119:​9-16) Kan nu leh pate’n entawn tûr ṭha an siam lo a nih pawhin kan thianghlim thei thova. Hezekia pa chu milem betu a ni nachungin, Hezekia chuan milem biakna kaihhnawih thilte lakah chuan ‘a awm dân a tithianghlim’ a ni. Entîr nân, tûn laia Pathian betu tleirâwl chuan sual nasa tak lo ti ta se. Inlamlêtna, ṭawngṭaina, nu leh pate ṭanpuina, leh hmangaih taka Kristian upate chhawmdâwlna chuan Hezekia anga ‘a awm dân tithianghlima, vêng ṭha’ tûrin a ṭanpui thei a ni.​—Jakoba 5:​13-15.

6. Eng hmeichhiate’n nge ‘Pathian thu anga an awm dân an tihthianghlim a, an invên ṭhat reng’?

⁶ Rahabi leh Ruthi te chu Sâm 119 phuah hma daiha lo awm tawh ni mah se, anni chuan ‘an awm dân an tithianghlim’ a ni. Rahabi chu Kanaan mi nawhchizuar a ni a; mahse, Jehova betu a nih anga a rinna avânga hriat hlawh tak a lo ni ta a. (Hebrai 11:​30, 31) Moab mi Ruthi chuan a pathiante ngei chu kalsanin, Jehova rawng a bâwl a, Israelte hnêna a Dân pêk mil chuan a nung a ni. (Ruthi 1:​14-17; 4:​9-13) Hêng Israel mi ni lo hmeichhe pahnihte hian ‘Pathian thu anga an awm dân vêng ṭhain’ Isua Krista thlahtu nih theihna chanvo duhawm tak chu an chang a ni.​—Matthaia 1:​1, 4-6.

7. Engtin nge Daniela leh Hebrai râwlthar pathumte’n thlarau lama thianghlimna vawn kawngah entawn tûr ṭha an siam?

⁷ “Mihring rilru ngaihtuahnate chu an naupan têt ata a sual” chung pawhin, ṭhalaite chuan he Setana thununna hnuaia khawvêl chhe takah ngei pawh hian kawng thianghlim an zawh thei a ni. (Genesis 8:21; 1 Johana 5:19) Babulona sala hruai Daniela leh Hebrai tlangvâl dang pathumte chu ‘Pathian thu angin an invêng ṭha reng’ a ni. Entîr nân, “lal chaw leh a uain in ṭhin te” chuan an intibawlhhlawh duh lo. (Daniela 1:​6-10) Babulon mite chuan ran thianghlim lo, Mosia Dânin a khapte chu an ei a ni. (Leviticus 11:​1-31; 20:​24-26) An ran talhte chu a thisen an chhuah tîr ṭhîn lo va, sa thisen chhuak lo ei chuan thisen chungchânga Pathian pêk dân chu a bawhchhia a ni. (Genesis 9:​3, 4) Hebrai palite’n lal chaw leh a uain an eia an in duh lo pawh chu a mak lo ve! Chûng Pathian mi râwltharte chuan thlarau lama thianghlimna an vawn avângin, entawn tûr ṭha tak an siam a ni.

Rinawmna Ṭanpuitu Pathian Thu

8. Pathian dân hre fiaha nunpui tûrin eng rilru put hmang leh hriatna nge kan mamawh?

⁸ Pathian thu ngainatna hi Jehova laka min rinawmtîr rengtu thil pawimawh tak a ni. (Sâm 119:​17-24) Thâwk khum hla phuahtu ang kan nih chuan, Pathian dân “thilmak” hriat thiam chu kan châk ngawih ngawih ang. ‘Jehova rorêlna ngaiin’ leh ‘a thuhriattîrte chu kan ngaina’ reng ang. (Sâm 119:​18, 20, 24) Jehova hnêna kan inpumpêkna a la rei lo hle a nih pawhin, ‘thlarau lam hnutê, engmah pawlh loh châkna kan insiam’ tawh em le? (1 Petera 2:​1, 2) Bible zirtîrna thu bul berte kan hriatthiam a ngai a ni; Pathian dân hre fiaha kan nunpui theih nân.

9. Pathian dân leh mihringte thil phût a inkalh hunah engtin nge kan tih ang?

⁹ Pathian thu hriattîrte chu kan ngaina mai thei a; mahse, thil engemaw avângin “mi liante” chuan min sawichhe ta se engtin nge ni ang? (Sâm 119:​23, 24) Tûn laiah, thuneitute’n mihring dânte chu Pathian dân aia dah sâng zâwk tûrin min tihluih an tum fo ṭhîn a. Pathian duhzâwng leh mihringte thil phût inkârah inmil lohna a awm hunah eng nge kan tih ang? Pathian thu kan ngainatna hian Jehova laka rinawm reng tûrin min ṭanpui ang. Isua Krista tirhkoh tihduhdahna tuarte angin: “Mihring thu aiin Pathian thu kan zâwm zâwk tûr a ni,” tiin kan sawi ang.​—Tirhkohte 5:29.

10, 11. Dinhmun khirh ber hnuaiah pawh Jehova lakah kan rinawmna kan vawn reng theih dân entîrna pe rawh.

¹⁰ Dinhmun khirh ber hnuaiah pawh Jehova lakah kan rinawm reng thei a ni. (Sâm 119:​25-32) Pathian laka rinawmna vawng reng tûr chuan, zirtîr theih nih leh ṭhahnemngai taka a ṭanpuina dîl a ngai a ni. “Rinawmna kawng,” chu kan thlang ve ngei tûr a ni bawk.​—Sâm 119:​26, 30, NW.

¹¹ Sâm 119 ziaktu ni awm tak, Hezekia chuan “rinawmna kawng” a lo thlang a. Sakhaw dik lo betute hualvêl leh rorêl khâwla mite nuihzat a hlawh chung pawhin rinawmna kawng chu a thlang a ni. Chutiang dinhmun avâng chuan ‘a nunna chu lungngaih avângin a tuiral ṭhîn’ a nih ngei a rinawm. (Sâm 119:28) Mahse, Hezekia chuan Pathian a rinchhan a, lal ṭha tak niin, ‘Jehova mithmuhah thil ṭha tak’ a ti a ni. (2 Lalte 18:​1-5) Pathiana innghahna hmangin, keini pawhin harsatnate chu rinawmna vawngtu angin kan tuar chhuak ve thei a ni.​—Jakoba 1:​5-8.

Jehova Thu Chuan Huaisenna Min Pe

12. Engtin nge Sâm 119:​36, 37 chu a mi malin kan nunpui theih ang?

¹² Pathian thu kaihhruaina zawmna chuan nuna harsatna kan tawhte tuar theih nâna mamawh huaisenna min pe a. (Sâm 119:​33-40) Jehova kaihhruaina inngaitlâwm takin kan zawng zêl ang; a dân chu ‘thinlung zawng zawnga’ kan zawm theih nân. (Sâm 119:​33, 34) Fakna hla phuahtu angin, Pathian chu: “I thuhriattîr lamah chuan ka thinlung hi thlêktîr ang che, duhâmna (a nih loh leh, dik lo taka hlâwkna) lamah ni lovin” tiin kan dîl ve a ni. (Sâm 119:​36) Tirhkoh Paula angin, “engkimah fel taka awm,” a nih loh leh rinawm taka tih kan tum a ni. (Hebrai 13:18) Min ruai tute’n thil rinawm lo ti tûrin min duh a nih chuan, Pathian kaihhruaina vuan tlat tûrin huaisenna kan insiam tûr a ni​—chutiang kawng chu Jehova’n mal a sâwm ziah ṭhîn. Dik takin, châkna ṭha lo zawng zawngte thunun thei tûrin min ṭanpui a ni. Chuti a nih chuan: “Thil engmah lo mai mai en lo tûrin ka mit mi lâktîr la,” tiin i ṭawngṭai ang u. (Sâm 119:37) Pathian huat thil engmah lo mai maite thil duhawm anga thlîr chu kan duh ngai lo vang. (Sâm 97:10) Thil dang zîngah, hei hian zahmawh lam thil leh thlarau zâwlna lam thiltihte pumpelh tûrin min chêttîr bawk a ni.​—1 Korinth 6:​9, 10; Thu Puan 21:8.

13. Engtin nge Isua zirtîr tihduhdah tuarte chuan huaisen taka thu hril tûra mamawh huaisenna an neih?

¹³ Pathian thu hriatna dik chuan huaisen taka thu hril tûrin inrintâwkna min pe a. (Sâm 119:​41-48) ‘Min sawichhetute chhâng’ tûrin kan huaisen a ngai a ni. (Sâm 119:42) Isua zirtîr tihduhdah tuar: “Lalpa . . . i bawite hi huai takin i thu hriltîr la,” tia ṭawngṭaite ang kan nih châng a awm thei a ni. Chu ṭawngṭaina rah chhuah chu eng nge ni? “An zain thlarau thianghlimin an lo khat a, huai takin Pathian thu an hril ta a.” Chu Lal Chungnungber tho chuan a thu huaisen taka hril tûrin huaisenna min pe a ni.​—Tirhkohte 4:​24-31.

14. Paula tih dân angin, engin nge huaisen taka thu hril tûrin min ṭanpui?

¹⁴ “Thutak thu” kan ngaihhlut a, ‘Pathian dân kan zawm fo’ chuan, thu hrilhna kawnga thlabâr loh nâna mamawh huaisenna chu kan nei ang. (Sâm 119:​43, 44) Pathian Thu ziak ngun taka zirna chuan ‘a thu hriattîr thute lalho hmâa sawi’ tûrin min thuam ang. (Sâm 119:46) Ṭawngṭaina leh Jehova thlarau chuan a hun taka thu inâwm tak sawi tûrin min ṭanpui ang. (Matthaia 10:​16-20; Kolossa 4:6) Paula chuan huaisen takin Pathian thu hriattîrte chu kum zabi khatnaa rorêltute hnênah a sawi a. Entîr nân, Rom Ram Awptu Felika hnênah thu a hrilh a, ani chuan “Krista Isua rinna thu chu a ngaithla a.” (Tirhkohte 24:​24, 25) Ram Awptu Festa leh Lal Agrippa te hmaah pawh thu a hril bawk. (Tirhkohte 25:​22–26:32) Jehova ṭanpuinain, keini pawh hi “chanchin ṭha . . . zahpui” ngai lo va, huaisen taka thu hriltute kan ni ve thei a ni.​—Rom 1:16.

Pathian Thu Chuan Thlamuanna Min Pe

15. Mi dangte’n min nuihzatbûr hunah, engtin nge Pathian Thu chuan min thlamuan?

¹⁵ Jehova Thu chuan thlamuanna rin tlâk tak min pe a. (Sâm 119:​49-56) Thlamuanna mamawh zual châng kan nei ṭhîn a ni. Jehova Thuhretute angin huaisen takin thu sawi ṭhîn mah ila, “chapote”​—Pathian laka chapo taka thil tite—chuan a chângin “nasa takin min nuihzabûr” a ni. (Sâm 119:51) Amaherawhchu, kan ṭawngṭai laiin, Pathian Thua thil ṭha lam sawite chu kan hre chhuak thei a; tichuan, ‘kan inthlamuan ṭhîn.’ (Sâm 119:52) Kan ṭawngṭai lai hian, dinhmun hrehawma kan awm laia kan mamawh thlamuanna leh huaisenna min petu Pathian Lehkha Thu-a dân emaw, thu bul emaw chu kan hre chhuak thei a ni.

16. Tihduhdahna tuar chung pawhin Pathian chhiahhlawhte’n eng nge an tih loh?

¹⁶ Fakna hla phuahtu nuihzattu mi chapote chu Israel mi​—Pathian tâna hnam inpumpêkte zînga mi an ni. A va han zahthlâk tak êm! Mahse, anmahni ang lo takin, Pathian dân aṭanga kal pên loh chu i tum ruh tlat ang u. (Sâm 119:51) Nazi nghaisakna an tawrh lai leh chutiang cheibâwlna an tawrh chhûng zawng chuan, Pathian chhiahhlawh sâng tam takte chuan Pathian Thua an hmuh dân leh thu bulte pênsan chu an hnial tlat a ni. (Johana 15:​18-21) Jehova thu âwih hi phurrit a ni lo, a thuruatte chu kan tân min tihahdamtu hla ang a ni.​—Sâm 119:54; 1 Johana 5:3.

Jehova Thu Avângin Lâwm Rawh

17. Pathian thu ngaihhlutna chuan eng ti tûrin nge min chêttîr?

¹⁷ Pathian thu avânga kan lâwmna chu, a thu kan âwihna hmangin kan lantîr a ni. (Sâm 119:​57-64) Fakna hla phuahtu chuan ‘Jehova thu a zâwm ang tih a sawi tawh,’ a nih loh leh a tiam tawh a, ‘zan laiah pawh a rorêl felte avânga lâwm thu hrilh tûrin a tho hial’ a ni. Zan laia kan ṭhan harh hian, chu chu ṭawngṭaia Pathian hnêna lâwm thu sawina hun remchâng a va ni dâwn êm! Pathian thu kan ngaihhlutna chuan a zirtîrna zawng tûrin min chêttîr a, ‘Jehova ṭihtu zawng zawng’​—Pathian zahna thûk tak neitute​—ṭhian hlim tak min nihtîr bawk a ni. (Sâm 119:​63, 64) Tuin nge leiah hian ṭhian ṭha zâwk hmu thei tehrêng ang?

18. ‘Mi suaksualho hruihrualte’n min zem reng laiin’ engtin nge Jehova’n kan ṭawngṭaina a chhân?

¹⁸ Kan rilru zawng zawnga ṭawngṭai a, Jehova chu min zirtîr tûra inngaitlâwm taka kan dîl hian, a khawngaihna chan tumin ‘khawngaihna kan ngên’ a nih loh leh thlêm daih kan tum a ni. A bîk takin ‘mi suaksualho hruihrualte’n min zem reng laiin’ kan ṭawngṭai a ngai zual bîk. (Sâm 119: 58, 61) Jehova chuan hmêlmate hruihrual chu a zai chat theiin, Lalram thu hril tûr leh zirtîr siam hna thawk tûrin min chhuah thei a ni. (Matthaia 24:14; 28:​19, 20) Hei hi kan rawngbâwlna khap beh a nihna ramahte hian a lang fo ṭhîn a ni.

Pathian Thu Ring Rawh

19, 20. Engtin nge tih hrehawma awm chu a ṭhat theih?

¹⁹ Pathian leh a thu rinna chuan harsatna tuarchhuak tûr leh a duhzâwng ti zêl tûrin min ṭanpui a ni. (Sâm 119:​65-72) Mi chapote chuan ‘a chungah dâwt an phuahchawp’ chung pawhin, fakna hla phuahtu chu: “Tihhrehawma ka lo awm kha ka tân a ṭha a ni,” tiin a zai a ni. (Sâm 119:​66, 69, 71) Engtin nge Jehova chhiahhlawh tute tân pawh tihhrehawma awm chu thil ṭha a nih theih?

²⁰ Tihhrehawma kan awm hian, Jehova hnênah tih tak zetin kan ṭawngṭai a, chu chuan amah min hnaihtîr zual a ni. Pathian Thu ziak zirin hun tam zâwk kan hmang mai thei a, nunpui tûrin ṭan kan la nasa zâwk thei bawk. Hei hian nun hlimawm zâwk a thlen a ni. Tihhrehawmna chu mize duhawm lo tak, dawhtheihlohna leh chapona te lan chhuahtîr nâna kan hman chuan engtin nge ni ang? Ṭhahnemngai taka ṭawngṭaina leh Pathian Thu leh a thlarau ṭanpuina hmangin, chûng ṭhat lohnate chu kan hneh theiin, ‘mihring tharin kan inthuam’ pumhlûm zual sauh thei a ni. (Kolossa 3:​9-14) Chu bâkah, harsatnate kan tawh hian kan rinna chu a chak zual ṭhîn a ni. (1 Petera 1:​6-7) Harsatnate chuan Jehova laka a innghahtîr lehzual avângin, Paula chuan chûng chu a hlâwkpui a ni. (2 Korinth 1:​8-10) Hrehawm tawrhnate’n keimahnia nghawng ṭha a neih chu kan phal em le?

Jehova Rinchhan Reng Rawh

21. Pathianin chapote a tihmualpho hunah chuan eng nge lo thleng?

²¹ Pathian thu chuan Jehova rin nachhan tûr bul ṭhut nghet ṭha tak min pe a. (Sâm 119:​73-80) Min Siamtu kan rin tak zet chuan, zah nachhan tûr engmah rêng kan nei lo vang. Amaherawhchu, mi dangte thiltih avângin, thlamuanna kan mamawhin: “Chapote chu mualphovin awm rawh se,” tia ṭawngṭai mai chu kan duh mai thei a ni. (Sâm 119:​76-78) Jehova’n chûng mite a tihmualpho hunah chuan, chu chuan an kawng sualte phawrh chhuahna leh a hming thianghlim tihthianghlimna a thlen ang. Pathian mi tiduhdahtute chuan an hlâwkpui rêng rêng lo tih kan chiang thei a ni. Entîr nân, an thinlung zawng zawnga Pathian ring tlat tu, Jehova Thuhretute chu an nuai bo ngai lo va​—an nuai bo ngai bawk hek lo vang.​—Thufingte 3:​5, 6.

22. Eng kawngin nge fakna hla phuahtu chu “meikhu ur savun peng ang” a nih?

²² Tihduhdah kan nih hian, Pathian thu chuan amaha kan rinna chu a tinghet zual sauh va. (Sâm 119:​81-88) Mi chapote’n an tihduhdah avângin, fakna hla phuahtu chu “meikhu ur savun peng ang” niin a inhria a ni. (Sâm 119:​83, 86) Bible hun lai chuan, ran vuna siam pengte chu tui, zu, leh thil tuiril dangte pai nâna hman a ni a. Hêng savun pengte hman a nih loh lai hian, in chhûng meikhu chhuahna nei lo thuk bula khai a nih chuan a sâwng thei a ni. Harsatna emaw, tihduhdahna emawte hian “meikhu ur savun peng” anga inhriatna a neihtîr che em? Chutiang a nih chuan, Jehova rinchhanin: “I ngilneihna ang zêlin mi tiharh ang che; chutichuan i kâa thuhriattîr chu ka zâwm dâwn nia,” tiin ṭawngṭai ang che.​—Sâm 119:88.

23. Sâm 119:​1-88 kan ennawnnaah eng nge kan ngaihtuah tawh a, Sâm 119:​89-176 zir hun tûr nghah pahin eng nge keimahni kan inzawh theih?

²³ Sâm 119 a chanve hmasa lam kan ngaihtuah tawh chin chuan a thu an rin avâng leh a thuruatte, a thuhriattîrte, a thupêkte, leh a dânte an ngainat avângin Jehova chuan a chhiahhlawhte chungah ngilneihna a lantîr tih a târ lang a. (Sâm 119:​16, 47, 64, 70, 77, 88) A hnêna inpumpêkte chuan a thu ang zêla an awm dân an vên ṭhat reng chu a lâwm a ni. (Sâm 119:​9, 17, 41, 42) He fakna hla mawi tak a la bâk zawngte zir hun tûr nghah pahin, heti hian kan inzâwt tûr a ni, ‘Jehova thu chu ka kawng ka tihêntîr tak zet em?’ tiin. (w05 4/15)

[Footnote]

Engtin Nge I Chhân Ang?

• Hlimna dik tak chu engah nge a innghah?

• Jehova thuin engtin nge thlarau lamah min tihthianghlim?

• Eng kawngin nge Pathian thu chuan huaisenna leh thlamuanna min pêk?

• Engvângin nge Jehova leh a thuah rinna kan neih ang?

[Phêk 24-naa milem]

Paula chuan huaisen takin ‘Pathian thuhriattîr thute chu lalho hmâah a sawi’