Ṭawngkama Indonate​—Engvângin Nge Mi A Tihnat Theih?

“In zînga indona leh inhnialnate hi khawi aṭanga lo chhuak nge ni?”​—JAKOBA 4:1.

BIBLE ziaktu Jakoba chuan he zawhna hi hmêlma hneh tuma râl bei Rom sipai rual hnêna a zawh a ni lo va; C.E. kum zabi khatnaa Juda Sicarii, a nih loh leh rawlrâla chê mihring philhmangho rilru hriat tuma a zawhna lah a ni hek lo. Jakoba rilruaa awm chu mi tlêm tê, a lo bera mi pahnih inkâra inhnialna awm chungchâng chu a ni. Engvângin nge? Indonate angin, mi mal inbeihnate chuan chhiatna a thlen vâng a ni. Hêng Bible thuziakte hi lo chhinchhiah rawh.

Thlahtu Jakoba fapate chuan an unaupa Josefa an huat avângin, salah an hralh a. (Genesis 37:​4-28) A hnuah Israel Lal Saula’n David thah a tum a ni. Engvângin nge? Davida a thîk avângin. (1 Samuela 18:​7-11; 23:​14, 15) Kum zabi khatnaah, Kristian hmeichhe pahnih, Euodii leh Suntuki te inhnialna chuan a kohhran pum remna a tikhaw lo bawk.​—Philippi 4:2.

Tûn hnai mai khân, mite chuan an inngeih lohna chu khandaih emaw, pistol emawin an chingfel ṭhîn a. A pakhat zâwk zâwk chu a thi emaw, kumkhuain a piangsual emaw ṭhîn. Tûn laiah chuan, inhnial buaite chuan a tlângpui thuin ṭawngkam khermei tak tak leh huatthla la tak takte an hmang a ni. Chûng chuan thisen êm chu chhuah lo mah se, ṭawngkama indona chuan rilru a tinain, hming a tichhia a. Hêng “indonaah” hian pawisawi lo zâwkin an tuar ṭhîn bawk a ni.

Kum engemaw zât kaltaa Anglican kohhran puithiam pakhatin puithiam dang chu biak in sum hmang dik lova a puh ṭuma thilthleng hi han ngaihtuah teh. An inhnialna chu tlâng hriat a lo niin, an rawngbâwlna kohhran chu a keh darh phah a. Kohhran mi ṭhenkhat phei chuan an duh loh zâwk puithiamin inkhâwm a kaihhruai dâwn chuan an inkhâwm loh phah hial a ni. An inhuat tawnna chu a nasat êm avângin, biak ina inkhâwm tûra an lo kalin, an inbiak loh phah a. A puhtu puithiam chu mipat hmeichhiatna lama nungchang pawlawha puh a han nih tâkah phei chuan, an inhnialna chu a nasa zual sauh a ni.

Canterbury-a Archbishop-in chu puithiam pahnihte thu buai chu a rem a, an indona chu “cancer” tia kovin, “kan Lalpa hming timualphotu tlângthanna” a ti a. Kum 1997-ah chuan puithiam pakhat zâwk chuan a hna bânsan chu a remti ta a ni. A pakhat erawh chuan a hna chawlhsan ngei ngei tûra a upat thlengin a hna a chelh a. Nimahsela, a theih chen chen chu a hna chelhin, August 7, 2001-a kum 70 piancham a thlen hunah a bâng ta a. The Church of England Newspaper chuan a bân nî chu “Mi Thianghlim” Victricius-a hminga ruai ṭheh nî a ni tih a târ lang. A nih leh tunge “Mi Thianghlim” Victricius-a chu? Sipaia a ṭan duh loh avânga nasa taka sawisakna tuar, kum zabi linaa bishop a ni. An rilru put hmang inan lohzia chu târ langin, chanchinbu chuan: “Puithiam inkâra indo duh lohna hi [Puithiam bâng ta] bân chhan a ni hauh lo,” a ti.

Hêng puithiamte hian Rom 12:​17, 18-a thurâwn awm: “Tu sual pawh sualin thungrûl suh u. Mi zawng zawng ngaiha thil mawi ngaihtuah lâwk rawh u. A theih phawt chuan nangmahni lam tal, mi zawng zawng nên inremin awm rawh u,” tih hi nunpui se chuan mahni leh mi dangte tihnatna chu an pumpelh mai tûr.

Nang ni ta la engtin nge i tih ang? Tuemawin i rilru a tihnat chein, i lungnihlohna chuan ṭawngkama indonaah a nawr lût che ang em? Nge, ṭawngkam nâte chu pumpelhin, inremna kawng i hawng zâwk dâwn? Mi dangte rilru i tihnatin, khua reia a theihnghilh mai beiseiin chu mi chu i pumpelh em ni? Nge, ngaihdam i dîl nghâl zâwk dâwn? Ngaihdam i dîl emaw, mi dang i ngaidam emaw pawh ni se, inremna siam tum chu i ṭhatpui zâwk ang. A dawt leha thuziakin a târ lan angin, Bible zilhnate chuan rei tak aṭanga awm tawh innghirnghonate pawh tireh tûrin min ṭanpui thei a ni. (w05 3/1)