Buaina Kan Tawh Hian Pathian Kan Dem Tûr A Ni Em?

A FANU puitling tawhin thluak chhûng hliam nasa tak a tawh chuan, Marion-i chuan kan zînga tam takin kan tih tûr ang bawk thil chu a ti a.a Pathian hnênah ṭanpuina dîlin a ṭawngṭai a ni. Marion-i chuan: “Hetiang khawpa hrilhhai leh mal intih châng ka neih ka hre ngai lo,” a ti. A hnua a fanu dinhmun a zual telh telh tâkah phei chuan Pathian pawh a ringhlel ta hial a. “Engvângin nge he thil hi a thlen?” tiin a zâwt a. Hmangaihtu leh ngaihsaktu Pathianin a fanu a kalsan thei chu a hre thiam thei lo a ni.

Marion-i thiltawn hi thil pângngai lo a ni lo. Khawvêl pumpuia mi tam takte chuan an mamawh lai takin Pathianin a kalsan niin an hria a. Lisa-i chuan a tupa thah a nih hnu chuan: “‘Engvângin nge Pathianin thilsual thlen a phal?’ tih zawhna hi ka buaipui reng a. Pathian ka rinna chu ka hloh ṭhak lo naa, a tla hniam sawt a ni,” a ti. Chutiang bawkin, nu pakhat chuan a fapa sênin chhiat a tawh hnuah hetiang hian a sawi a: “He thilthlengah hian Pathianin min hnêm lo. Min lainatzia a lantîr lo rêng rêng,” a ti a. “Pathian chu engtikah mah ka ngaidam lo vang,” tiin a sawi belh a ni.

Mi dangte chuan an vêla thil awm dân an thlîrin Pathian chungah an thinur a. Ram tam takah chuan retheihna leh ṭâmnain a chîm buai te, beisei tûr nei lo raltlân te, AIDS avânga naupang chhiarsen loh fahrah te, leh mi maktaduai têlin natna dang an tuar te an hmu a ni. Hêng thilte leh a anpui vânduaina dangte an tawrhin, mi tam tak chuan Pathian chu inrawlh lo anga a lan avângin an dem a ni.

Mahse, a dik a dik chuan mihringte buaina tawhte avângin Pathian chu dem tûr a ni lo. Mihringte hrehawm tawrh zawng zawngte Pathianin a tihbo thuai dâwn tih rinna tûr chhan ṭha tak a awm zâwk a ni. A dawta thuziak hi chhiar a, Pathianin min ngaihsak tak zetzia hre tûrin kan sâwm a che. (w04 7/1)

[Footnote]