‘Lâwm Nachâng Hre Rawh’
“Krista thlamuanna chuan in thinlungah ro rêl rawh se, . . . lâwm nachâng hre bawk rawh u.”—KOLOSSA 3:15.
1. Kristian kohhran leh Setana thununna khawvêl inkârah danglamna eng nge kan hmuh theih?
KHAWVEL pum puia Jehova Thuhretute kohhran 94,600-ah chuan lâwm nachâng hriatna kan hmu a. Inkhâwm apiang chu Jehova chunga lâwmthu sawina ṭawngṭainaa ṭan leh tihtâwp a ni ṭhîn. Pathian biakna leh hlim taka inkawmna an neih hian, Thuhretu a pui a pangte leh mi thar leh mi hluite kâ aṭangin “ka lâwm e,” “kei pawh le” tih emaw, ṭawngkam dang emaw chu kan hre zîng ṭhîn hle. (Sâm 133:1) Chu chu ‘Jehova hre lo leh chanchin ṭha âwih lo’ mi tam tak kâra lâr êm êm mahni hmasialna nên chuan a va inthlau tak êm! (2 Thessalonika 1:8) Lâwm nachâng hriat lohna khawvêlah kan awm a. Hei hi a mak lêm lo—he khawvêl pathian, Diabol-Setana, mahni hmasialna tichhuaktu ropui ber, a chapona leh a helna rilru put hmanga mihringte chiahpiahtu kan ngaihtuah hian!—Johana 8:44; 2 Korinth 4:4; 1 Johana 5:19.
2. Eng vaukhânna thu nge kan ngaihsak ngai a, eng zawhnate nge kan ngaihtuah dâwn?
2 Setana khawvêl hualvêla kan awm avângin, khawvêl rilru put hmangte intihchhiattîr lo tûrin kan fimkhur a ngai a ni. Kum zabi pakhatnaah khân, tirhkoh Paula chuan Ephesi Kristiante hnênah: “Hmânah khân he khawvêl dân anga in awm kha, boruaka thuneihna lal, tûna âwih lo fate chhûnga thâwk mêktu thlarau dân ang hian. Chûng âwih lo fate zîngah chuan keini pawh hmânah chuan tisa leh rilru duhzâwng tiin, kan tisa châknate angin kan awm vek a, mi dangte ang bawkin thinurna faa piang rêng kan nih kha,” tiin a hriattîr a ni. (Ephesi 2:2, 3) Chu chu tûn laia mi tam tak tân pawh a dik a ni. A nih leh, lâwm nachâng hriatna rilru chu engtin nge kan chhawmnun theih ang? Jehova’n eng ṭanpuina nge a pêk chhuah? Eng kawngtein nge kan lâwm tak zetzia kan lantîr theih?
Lâwm Nachâng Hriat Chhan Tûrte
3. Eng thilte avângin nge Jehova chungah kan lâwm ang?
3 Min Siamtu leh Nunna min Petu, Pathian Jehova chungah lâwm kan ba a, a bîk takin kan chunga phal taka a thil min pêk ṭhenkhat kan ngaihtuahin lâwmthu sawi kan ba lehzual a ni. (Jakoba 1:17) Nî tina nung dama kan awm avângin Jehova chungah kan lâwm a. (Sâm 36:9) Kan chhehvêlah hian Jehova kut chhuak tam tak, nî te, thla te, leh arsi ang chite kan hmu a ni. Kan leilunga awm nunna châwm thei bâwl hlote, kan chhehvêl boruak zînga boruak chi hrang hrang inchawih taka inchawhpawlhte, leilung pianken thil inthlâkkual reng hriatthiam har takte; hêng zawng zawngte hian min hmangaihtu kan Pa vâna mi chungah bat kan neih nasatzia a târ lang vek a ni. Lal Davida chu: “Aw LALPA ka Pathian, nangin thilmak i tihte leh, keimahni lam i ngaihtuahnate hi a tam êm êm mai a, chûng chu i hmâa tihlan sên rual a ni lo va; hriattîrin hril dâwn ila, chhiar sên rual a ni lo vang,” tiin a zai a ni.—Sâm 40:5.
4. Kan kohhrana inkawmna hlimawm tak kan neih avângin, engvângin nge Jehova chungah kan lâwm ang?
4 Paradis tak takah la awm lo mah se, tûn laia Jehova chhiahhlawhte chuan thlarau lam paradis chu an chên a ni. Kan Kingdom Hall-ah leh inkhâwmpuinaah te hian, kan rinpuite chunga Pathian thlarau rah hnathawhte chu kan hmu a. Dik tak chuan, sakhaw nei lem lo emaw, nei lo hulhual emaw te hnêna thu an hrilh hunah, Thuhretu ṭhenkhat chuan Galatia mite hnêna lehkha a thawnnaa Paula thu târ lante chu an hmang a ni. A hmasain, “tisa thiltihte” chungchâng an sawi phawt a; tichuan, an thu ngaithlatute chu an thil hriatte an zâwt a ni. (Galatia 5:19-23) Chûng chu tûn lai mihring nun phung sawina a ni tih mi tam zâwk chuan an pawm a. Pathian thlarau rah târ lante an kawhhmuh a, tualchhûng Kingdam Hall-a chu miziate an mit ngeia rawn hmu tûra sâwm an nihin, mi tam tak chuan: “Pathian in zîngah a awm tak zet,” tih an hre nghâl vat ṭhîn a ni. (1 Korinth 14:25) Chu chu tualchhûng Kingdom Hall-ah chauh hmuh theih a ni lo. I zinna apiangah, Jehova Thuhretu maktaduai ruk chuangte zînga pakhat khat i hmuh chuan, chutiang bawk hlimna leh lâwmna chu an nei tih i hmu ang. Dik takin, he mi tichangkâng thei inkawmna chu Jehova chunga kan lâwm chhan tûr a ni, chutiang ni thei tûrin a thlarau min pe si a.—Zephania 3:9; Ephesi 3:20, 21.
5, 6. Pathian thilpêk ropui ber, tlanna avânga kan lâwmna chu engtin nge kan lantîr theih ang?
5 Jehova thilthlâwnpêk ropui ber leh thilpêk famkim ber chu tlanna inthawina a pêkna a Fapa, Isua hi a ni a. Tirhkoh Johana chuan: “Pathianin chuti kauva min hmangaih chuan keini pawh kan inhmangaih tawn ṭheuh tûr a ni,” tiin a ziak a ni. (1 Johana 4:11) Ni e, tlanna chunga kan lâwmzia chu Jehova hnêna kan hmangaihzia leh kan lâwmzia hrilh mai ni lovin, kan nun dâna mi dangte kan hmangaihna lantîrna hmang pawhin kan lantîr bawk a ni.—Matthaia 22:37-39.
6 Jehova’n hmân lai Israel-te a dâwr dân ngaihtuahna aṭangin lâwmna lantîr chungchâng kan zir belh thei a. Mosia kal tlanga a Dân pêk hmangin, Jehova chuan a mite chu thil tam tak a zirtîr a ni. ‘Dâna finna leh thutak awm dân’ awmte hmangin, Paula fuihna thu: “Lâwm nachâng hre bawk rawh u” tih zui tûra min ṭanpui tûr thu tam tak kan zir thei a ni.—Rom 2:19, 20; Kolossa 3:15.
Mosia Dân Aṭanga Zir Tûr Pathumte
7. Engtin nge sâwma pakhat pêk ruahmanna chuan Israelte chu Jehova chunga an lâwmzia lantîr theihna hun remchâng a pêk?
7 Mosia Dânah chuan, Jehova chuan an chunga a ṭhatna avânga Israelte’n an lâwm tak zetzia an lantîr theih dân kawng pathum a târ lang a. Pakhatna chu sâwma pakhat pêk hi a ni. “Ran leh berâm rual zînga sâwma pakhat” leh thlai thar sâwma pakhat chu “LALPA tâna thianghlim” a ni tûr a ni. (Leviticus 27:30-32) Israelte’n an zawmin Jehova chuan malsâwmna nasa takin a vûr a. “Ka inah ei tûr a awm theih nân sâwma pakhat zawng zawng chu thawhlâwm inah rawn la rawh u, vân tukverhte chu hawnsak che uin malsâwmna dawn sên loh khawp hial ka vûr dâwn che u nge dâwn lo, mi han fiah teh rêng u, sipaihote LALPA chuan a ti.”—Malakia 3:10.
8. Sâwma pakhat pêk leh thawhlâwm pêk inkâr danglamna chu eng nge ni?
8 Pahnihnaah chuan, sâwma pakhat pêk phûtna bâkah, Jehova chuan Israelte chu thawhlâwm thawh tûrin ruahmanna a siamsak a. Mosia chu Israelte hnêna: “Ka hruaina tûr che u ram in va thlena, chu mi ram chhang in ei hun chuan Jehova hnênah thawhlâwm in thawh tûr a ni,” tih hrilh tûrin a ti a. An “chhang hmeh hmasak ber zînga mi” ṭhenkhat chu an thlahte thlengin “Jehova hnênah thawhlâwm atân” an pe reng tûr a ni. Hêngte hi pêk zât tûr chiah târ lan a ni lo tih chu lo chhinchhiah rawh. (Number 15:18-21, NW) Mahse, Israelte’n lâwmthu sawi nâna thawhlâwm an thawh hunah, Jehova malsâwmna an dawng ngei dâwn tih an chiang a ni. Chutiang ruahmanna bawk chu biak in chungchânga Ezekiela inlârnaah hmuh a ni a. “Rah hmasate zînga a ṭha ber apiang te, in thil hlan [“thawhlâwm pêk,” NW] tinrênga a ṭha ber, in thil hlan [“thawhlâwm pêk,” NW] zawng zawnga mi chu puithiamte ta tûr a ni: in ina malsâwmna a châm hlen theihna tûrin chhangphut hmehhlâwm ṭha ber chu puithiam hnênah in pe tûr a ni,” tiin kan chhiar a ni.—Ezekiela 44:30.
9. Thlai ṭo chungchânga ruahmanna hmangin Jehova’n eng nge a zirtîr?
9 Pathumnaah chuan, a ṭo an tih dân tûr Jehova’n a ruahman a ni. “In lova buh in seng hunin invau fêmte thlengin in seng vek tûr a ni lo va, a ṭo pawh in zawng tûr a ni lo. Tin, in grêp huana a ṭo in zawng tûr a ni lo va, in grêp huana a rah tla pawh in chhar khâwm tûr a ni lo va, mi rethei leh ram dang mi in zuahsak tûr a ni: Kei hi LALPA in Pathian chu ka ni,” tiin a zirtîr a ni. (Leviticus 19:9, 10) Hetah pawh hian a zât chiah phût a awm lo. Israel mi tinte chuan retheite tâna an phal zât chu an rêl tûr a ni. Lal fing Solomona chuan inhmeh takin a hrilhfiah a ni: “Mi rethei khawngaih chuan LALPA a pûktîr a ni a, a thiltih ṭhat chu a rûl ang,” tiin. (Thufingte 19:17) Chuvângin Jehova chuan mi chanhaite lainat dân leh ngaihtuah dân a zirtîr a ni.
10. Israel mite’n lâwm nachâng an hriat loh huna an tawrh a sawhkhâwkte chu engte nge ni?
10 Israelte’n thupêk an âwiha sâwma pakhat an lo kenin, thawhlâwm an thawhin, leh mi retheite thil an pêkin Jehova chuan mal a sâwm a. Mahse, lâwm nachâng an hriat tâk loh hunah chuan Jehova duhsakna an chân a ni. Chu chuan chhiatna a thlen a, atâwpah an vahvaih phah a ni. (2 Chronicles 36:17-21) A nih chuan, kan tân eng nge zir tûr awm?
Lâwmna Kan Lantîr Dân
11. Jehova hnêna lâwmna kan lantîr theih dân bul ber chu eng nge ni?
11 Jehova kan fak theihna leh a chunga kan lâwmna lantîr theih dân bul berah chuan “thilhlan” a tel bawk a ni. Dik takin, Kristiante chu Mosia Dân hnuaia mi kan ni lo va, ran a nih loh leh thlai thara inthawina kan hlan a ngai lo va. (Kolossa 2:14) Amaherawhchu, tirhkoh Paula’n Hebrai Kristiante chu: “Fakna inthawina hi Pathian hnênah i hlân fo vang u, chu chu a hming ṭanna hmuite rah chu a ni,” tiin a fuih a ni. (Hebrai 13:15) Kan theihnate leh kan neih sumte chu vântlâng rawngbâwlnaah emaw, kan Kristianpuite nêna “inkhâwmnaahte” emaw Jehova hnêna fakna inthawina hlan nâna hmangin, hmangaihnaa khat kan Pa, vâna mi Pathian Jehova chungah kan lâwm tak zetzia kan lantîr thei a ni. (Sâm 26:12) Chutianga kan tihin, Israelte’n Jehova hnêna an lâwmzia an lantîr dân aṭangin eng nge kan zir theih?
12. Kan Kristian mawhphurhna hrim hrimah chuan, sâwma pakhat pêk ruahmanna aṭangin eng nge kan zir theih?
12 A hmasa berin, kan sawiho tawh angin, sâwma pakhat pêk ruahmanna chu ngaihthah theih chi a ni lo va, Israel mi tinte’n an pe ngei ngei tûr a ni. Kristian kan nih angin, rawngbâwlnaah leh Kristian inkhâwmnaa tel tûrin mawhphurhna kan nei a. Hêng thiltihte hi ngaihthah theih a ni lo. Tâwpna hun chungchânga a hrilh lâwkna ropui takah, Isua chuan: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tih chiang takin a sawi a ni. (Matthaia 24:14, 28:19, 20) Kristian inkhâwm chungchângah, tirhkoh Paula chu: “Hmangaih leh thil ṭha tiha inchawk tho tûrin inngaihtuah tawn ang u; ṭhenkhat tih dân anga kan inkhâwmte bânsan lovin, infuih tawn zâwk ang u; ni chu lo hnai telh telha in hriatin infuih tawn nasa lehzual sauh rawh u,” tia ziak tûrin thlarauva thâwk khum a ni. (Hebrai 10:24, 25) Thuhrilh leh zirtîr siamna mawhphurhna chu lâwm taka kan pawm a, kohhran inkhâwmnaa kan unaute kan kawm ziah bawk a, chûngte chu chanvo leh chawimawina anga kan thlîrin Jehova hnênah kan lâwmzia kan târ lang a ni.
13. Thawhlâwm thawh leh thlai ṭo ruahmanna aṭangin zir tûr eng nge awm?
13 Chu bâkah, Israelte’n an lâwmzia an lantîr theihna kawng dang pahnihte—thawhlâwm thawh leh thlai ṭo chungchâng ruahmanna—ngaihtuah chu kan hlâwkpui thei a ni. A phût zât chiang taka hrilhfiah sâwma pakhat pêk nêna inang lo takin, thawhlâwm thawh leh thlai ṭo ruahmannaah chuan a zât chiah phûtna a awm lo. Chûng chuan Jehova chhiahhlawh chu a thinlunga a lâwm dân ang mila thiltih theihna hun remchâng a pe zâwk a ni. Chu mi nêna khaikhinin, rawngbâwlnaa tel leh Kristian inkhâwmnaa tel chu Jehova chhiahhlawh tinte mawhphurhna bul ber a ni tih hre mah ila, chûngah chuan thinlung zawng zawng leh châk takin kan tel em? Jehova’n kan tâna thil a tih zawng zawngte avânga kan lâwm tak zetzia lantîr theihna remchâng angin kan thlîr em? Kan mi mal dinhmunin a zir ang zêlin hêng rawngbâwlnaahte hian phal takin kan tel em? Nge, loh theih loh mawhphurhna angah kan ngai zâwk? Hêng hi, mi mala kan chhân tûr zawhnate a ni. Hetiang hian tirhkoh Paula chuan a sawi a ni: “Mi tinin mahni thiltih fiah ṭheuh zâwk rawh se, chu mi hunah chuan mi dang chung ni lovin, mahni chung chauhvah chhuan tûr a nei ang,” tiin.—Galatia 6:4.
14. A rawng kan bâwlnaah Jehova chuan eng nge min beisei?
14 Pathian Jehova chuan kan dinhmun a hre chiang êm êm a. Kan theih chin pawh a hria a ni. A chhiahhlawhte phal taka inpêkna chu a tê emaw, a lian emaw pawh ni se a hlut a. A zât inang ṭheuhva kan pêk a beisei lo va, a pêk lah kan pe thei hek lo. Tirhkoh Paula chuan Korinth Kirstiante hnêna thilpêk chungchâng sawiin: “Inpeihna chu a awm phawt chuan, mi a neih loh pui ni lovin, a neih angzia zêla a pêk chu lawm tlâk a ni si a,” a ti. (2 Korinth 8:12) He thu bul hi Pathian rawng kan bâwlnaah hman a ni bawk. Kan rawngbâwlna Jehova pawm tlâka siamtu chu kan pêk zâtah ni lovin, kan tih dânah a innghat zâwk a ni—hlim tak leh thinlung zawng zawnga a rawng kan bâwlnaah hian.—Sâm 100:1-5; Kolossa 3:23, 24.
Pioneer Rilru Neiin Chhawmnung Rawh
15, 16. (a) Pioneer rawngbâwlna leh lâwmna inkârah eng inzawmna nge awm? (b) Engtin nge pioneer thawk thei lote’n pioneer rilru an târ lan theih?
15 Jehova hnêna lâwmna lantîr theih dân kawng manhla tak chu hun bikima rawgbâwlnaa tel hi a ni a. Jehova hmangaihna leh a phu loh ngilneihna chunga lâwmna avângin, inpumpêk a chhiahhlawh tam takte chuan hun bikima Jehova rawng an bâwl theih nân an nunah inthlâkthlengna lian tham tak tak chu an siam a ni. Ṭhenkhat chuan chanchin ṭha hrilh nân leh thutak mite zirtîr nân thla tin chawhruala dârkâr 70 hmangin, regular pioneer angin rawng an bâwl thei a. Dinhmun chi hrang hrang avânga theih chin nei mi dangte chuan thu hrilh nâna thla khata dârkâr 50 zêl hmangin auxiliary pioneer angin rawng an bâwl a ni.
16 Mahse, regular ang leh auxiliary anga pioneer thawk thei lo Jehova chhiahhlawh tam takte chu eng nge ni ve? Pioneer rilru neihna leh chhawmnunna hmangin an lâwmna an lantîr ve thei a ni. Engtin maw? Pioneer thawk theite fuihna te, an fate hnêna hun bikima rawngbâwlna ûm duhna rilru tuhna te, leh an dinhmun azîra thuhrilhnaa taima taka telna te hmangin. Rawngbâwlnaa kan inpêk dân chu Jehova’n kan tâna a thiltih tawhte, a tih mêkte, leh a la tih tûrte chunga kan lâwm nasat dânah a innghat nasa hle a ni.
Kan “Sumin” Lâwmna A Târ Lang
17, 18. (a) Engtin nge kan sumin kan lâwmna kan lantîr theih? (b) Hmeithai thawhlâwm thawh Isua’n eng angin nge a chhût a, engvângin nge?
17 Thufingte 3:9-ah chuan: “I sumin LALPA chawimawi la. I thil lo pung hmasa ber zawng zawngte nên,” tih chhinchhiah a ni. Jehova chhiahhlawhte chuan sâwma pakhat an pêk a ngai tawh lo. Chutih ahnêkin, Paula chuan Korinth kohhran hnênah: “Mi tinin ui chunga pe lovin, pêk loh theih loh anga ngaia pe hek lovin, an thinlunga an tum ang zêlin pe ṭheuh rawh se; Pathian chuan hlim taka petu a ni a hmangaih ni,” tiin a ziak zâwk a ni. (2 Korinth 9:7) Khawvêl pum huap Lalram thuhrilh rawngbâwlna chhawmdâwl nâna thawhlâwm pêkna chuan kan lâwmna a târ lang bawk. Thinlunga lâwm tak takna thawhlâwm pe reng tûrin min chêttîr a, Kristian hmasate’n an tih angin chawlhkâr tinin engemaw zât kan dah khâwl thei a ni.—1 Korinth 16:1, 2.
18 Kan pêk zât chuan Jehova chunga kan lâwmna a nasat dân a târ lang lo va. Kan pêkna rilru hian a târ lang zâwk a ni. Chu chu Isua’n biak ina thawhlâwm bâwma miin thawhlâwm an thlâk lai a lo en lai khân a hmu a. Hmeithai rethei têin “dâr tangka dere pahnih” a thlâk a hmuh chuan Isua’n: “Tih tak zetin ka hrilh a che u. Hêng zawng zawng ai hian he hmeithai rethei tê hian a thlâk tam zâwk; hêng zawng zawng hian an neih liama mi thawhlâwmah an thlâk a ni; ani erawh hi chuan a duh lai tak, a intunnunna tûra a neih chhun tê a thlâk vek a ni,” a ti.—Luka 21:1-4.
19. Engvângin nge lâwmna kan lantîr dân inenfiah leh chu a ṭhat?
19 He lâwmna kan lantîr theih dân zirna hian kan lâwmna kan lantîr dân min inenfiahtîr ṭheuh rawh se. Jehova hnênah fakna inthawina chu kan hlân lehzual theiin, neih sumte hmangin khawvêl pum rawngbâwlna chu kan chhawmdâwl lehzual thei em? Kan tih theih ang tâwka kan tih phawt chuan, kan lâwmzia kan lantîrna chungah thil phal tak leh hmangaihnaa khat kan Pa Jehova chu a lâwm ngei dâwn tih kan ring tlat thei a ni. (w03 12/01)
I Hre Chhuak Em?
• Jehova chunga kan lâwm chhan tûr chu engte nge?
• Sâwma pakhat pêk te, thawhlâwm thawh te, leh thlai ṭo ruahmanna aṭang te hian eng nge kan zir?
• Engtin nge pioneer rilru chu kan chhawmnun?
• Jehova chunga kan lâwmna lantîr nân engtin nge kan ‘sum’ kan hman theih?
[Phêk 15-naa milemte]
“Thilpêk ṭha leh thilpêk famkim zawng zawng chu chung lam . . . ata a lo chhuk ṭhîn”
[Phêk 16-naa milemte]
Dân thupêk aṭanga zir tûr pathum engte nge hetah târ lan a nih?
[Phêk 18-naa thu lâk chhuah]
Eng inpêkna nge kan neih theih?