Hriat Reng Tlâk Nî Chu

CHU nî chu mihringte nakin hun a ṭha lama chatuana thlâkthlengna nî a ni a. Ni dangin mihringte nakin hun chu chutiang rêngin a nghawng ngai lo. Chu chu Isua’n leia a lo kal chhan a thawh zawh nî chu a ni. Nghaisakna bana khenbeh a ni a, a thaw tâwpna tûr chu lain: “A kin ta,” tiin a au chhuak a ni. (Johana 19:30) Eng atân nge Isua a lo kal?

Bible chuan: “Mihring Fapa hi rawngbâwlsaka awm tûrin a lo kal lo va, rawngbâwl tûr leh mi tam tak tlan nâna a nun pe tûr zawka a lo kal” thu a sawi a. (Matthaia 20:28) Mihringte rochun sual leh thihna ata chhan chhuak tûrin, Isua chuan a nunna chu a pe a ni. A ni, “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân.” (Johana 3:16) Isua inthawina chu a va hlu tak êm!

Isua thih nî chu ni hriat reng tlâk a nih chhan dang a awm a. Chu mi nî chuan, Pathian Fapa chuan a tirhkohte rinawm reng tûra ṭanpuitu tûr zirlai hlu tak takte a zirtîr a ni. A hun tâwp dâwn lama a thusawite chuan a zirtîrte thinlung a khawih tûrzia mai chu! A nih leh, Engte nge a zirtîr? Isua’n anniho a zirtîrte chu engtin nge kan hlâwkpui theih? Thuziak dawt lehah hêng zawhnate hi sawiho a ni ang. (w03 3/15)