Isua A Thih Chhan

“Mihring Fapa [chu] . . . mi tam tak tlan nâna a nun pe zâwk tûrin a lo kal a ni.”—MARKA 10:45.

ISUA chuan a thil la tawn tûr chu a hria a. Thlamuang takin a nun a hmang dâwn lo tih a hria a ni. Chu mi nêna inkalh takin, kum 30 a pêl hret chauh tihah a nun chu râpthlâk taka tihtâwp a ni dâwn tih a hria a, thihna hmachhawn tûrin a inpeih thlap a ni.

Bible chuan Isua thihna chu a dah pawimawh hle a. Lehkhabu pakhat sawi dân chuan, Isua thih chungchâng chu Kristian Grik Pathian Lehkha Thu, a nih loh leh Thuthlung Tharah vawi 175 lai tlang taka târ lan a ni. Mahse, engvângin nge Isua’n hrehawm a tawrh a, a thih a ngaih? Isua thihna chuan kan nunah nghawng pawimawh tak a neih theih avângin, chu mi kan hriat chu a ngai a ni.

▪ Isua thil beisei chu A thih dâwn kum chhûng khân, Isua chuan a zirtîrte chu nakina a tawn tûr hrehawm tawrhna leh thihna chungchâng vawi tam tak a hrilh fo va. Kalhlên Kût a hman hnuhnûng ber tûr chhim tûra Jerusalem lam pana an kal laiin, a tirhkoh 12-te hnênah: “Mihring Fapa hi puithiam lalte leh lehkhaziaktute hnênah mantîrin a awm dâwn a ni; tin, anni chuan thi tûrin a chungah thu an titlu ang a, Jentailte hnênah an pe ang; tin, anni chuan nuihza siam nân an hmang ang a, chil an chhâk ang a, an vua ang a, an tihlum ang; tin, ni thum chinah a tho leh ang,” tiin a hrilh a.a (Marka 10:33, 34) A chunga thil lo thleng tûr chu engvângin nge a hriat chian êm êm?

Isua chuan a thih dân tûr sawi lâwktu Hebrai Pathian Lehkha Thua hrilh lâwkna tam tak chu a hre chiang hle a. (Luka 18:31-33) Chûng hrilh lâwkna ṭhenkhatte rualin a thlen famkim dân hrilhfiahtu Bible chângte chu i lo ngaihtuah ang u.

Messia chunga lo thleng tûrte . . .

▪ Tangka 30-a phatsan a ni ang.—ZAKARIA 11:12; MATTHAIA 26:14-16.

▪ Vuak leh chil chhâk khum a ni ang.—ISAIA 50:6; MATTHAIA 26:67; 27:26, 30.

▪ Khenbeh a ni ang.—SAM 22:16; MARKA 15:24, 25.

▪ Nghaisakna bana khai kân a nih laiin tih-el a ni ang.—SAM 22:7, 8; MATTHAIA 27:39-43.

▪ A ruh pakhat mah titliak lova tihhlum a ni ang.—SAM 34:20; JOHANA 19:33, 36.

Isua chuan hêngte leh hrilh lâwkna dang tam takte chu a thlen famkimtîr a. Mahni mai chuan hêng thilte hi a tithei dâwn lo va. Hêng hrilh lâwkna zawng zawngte thlen famkimna hian Isua chu Pathian tirh a nihzia a târ lang a ni.b

Mahse, engvângin nge Isua tân hrehawm tawrh leh thihna hmachhawn a ngaih?

▪ Thu buai pawimawh tak ching fel tûrin Isua a thi Isua chuan Eden huana chawh chhuah lei leh vâna thu buai pawimawh tak chu a hria a. Thlarau thil siam hel hmang tak thununna avângin Adama leh Evi chuan Pathian thu âwih loh chu an thlang a. An helna chuan Pathian lalchungnunna dikna, a nih loh leh a rorêlna chungah rinhlelhna a siam a ni. An sualna chuan mihringte zîngah fiahna hnuaia Pathian laka rinawm an awm dâwn leh dâwn loh chungchângah rinhlelhna a siam tel bawk.—Genesis 3:1-6; Joba 2:1-5.

Isua chuan chu thu buai pahnih—Jehova lalchungnunna leh mihringte rinawmna—atâna chhânna ṭha ber chu a pe a. “Thi khawp hiala” thuâwihna ṭha famkim lantîrin, Pathian lalchungnunna chu a thlâwp a ni. (Philippi 2:8) Mi ṭha famkim chuan fiahna nasa ber a tâwk chung pawhin Pathian Jehova lakah rinawmna ṭha famkim a vawng thei tih pawh a finfiah bawk.

▪ Mihringte tlan nân Isua a thi Isaia hrilh lâwkna chuan thutiam Messia hrehawm tawrhna leh thihna chu mihringte sual thâwina a ni dâwn tih a sawi lâwk a. (Isaia 53:5, 10) Chu chu hre thiamin, Isua chuan inhuam takin ‘mi tam tak tlan nân a nun’ a pe a ni. (Matthaia 20:28) Inthawina atâna a thihna chuan mihring ṭha famkim lote tân Pathian Jehova nêna inlaichînna ṭha neihna leh sual leh thihna ata chhan chhuahna kawng a hawng a. Adama leh Evi hloh tâk—leia dinhmun ṭha famkima chatuana nun beiseina—neih kîr leh theihna hun remchâng min pe bawk a ni.c—Thu Puan 21:3, 4.

▪ I tih theih chu He thuziak inzawmah hian, Bible-in Isua chungchâng—a lo chhuahna, a nun dân, leh a thih chhan—a sawite chu kan bih chiang tawh a. Chûng Isua chungchânga thu dikte hriatna chuan a chungchânga ngaih dân dik lote paih bo mai aia tam a tithei a. Chûngte mila thiltihna chuan malsâwmna—tûna nun ṭha zâwk leh nakina chatuan nunna—chu min dawntîr thei a ni. Chutiang hlâwknate têl tûra kan tih ngaite chu Bible-in min hrilh a ni.

▪ Isua Krista chanchin leh Jehova thiltuma a chanvo neih chungchâng zir belh rawh.—JOHANA 17:3.

▪ Isuaah rinna nei la, i nun dân aṭangin Chhandamtu anga i pawmzia târ lang rawh.—JOHANA 3:36; TIRHKOHTE 5:31.

Jehova Thuhretute chuan “chatuana nunna” thilthlâwnpêk kan dawn theihna Pathian “Fapa mal neih chhun,” Isua Krista chanchin i zir belhna kawnga ṭanpui che chu an châk hle ang.—Johana 3:16. (w11-E 04/01)

[Footnote-te]