“I Tidik Chiah, Nun Hi A Va Nuam Êm!”

NUN awmzia dik tak hriat i duh em? Poland ram, Szczecin khawpuia chêng Jehova Thuhretute zînga mi, kum 18-a upa Magadelena-i chuan a high school kalpui Katarzyna-i chu, nun awmze dik tak hre tûrin a ṭanpui a ni. Katarzyna-i chu Pathian awm ring lo niin a insawi a; mahse, Magdalena-i chuan Bible chungchâng a sawipui a, a tui ta hle a.

Katarzyna-i chuan Magalena-i’n Bible aṭanga a hrilh zawng zawngte chu a duh hle nâng a, a pawm thlap thei lo va. Ṭum khat chu Magdalena-i nêna ṭhian dik tak chungchâng an sawikhâwmnaah, Katarzyna-i chuan: “Bible i nei a; thu bul zawm tûrte leh ṭhian dik tak hmuhna tûrte i hria a. Mahse, chûng thu bulte tûn thleng pawha la pawm duh lote hi engtin nge ni ang?” tiin a zâwt a ni.

Katarzyna-i chu London, England-a a zin chuan, thil engkim a inthlâk danglam ta. Chu mi hmuna Jehova Thuhretute branch office chu a va tlawh a, ngilneihna a chunga an lo lantîrte chuan a rilru a khawih ta hle a ni. Hawihhâwmna thiltih tê tham tak tak, a tâna kawngkhâr an lo hawnsak te leh a thusawi rêng rêng an lo bengkhawnsak te chuan a hîp ta riau mai a ni.

September 2001-a school kal ṭanleh a lo hun chuan, Katarzyna-i chuan Bible zir a titlu ta nge nge a ni. Bible thu bulte chu a hlut ta tial tial a, a nî tin nunah a chhawr ṭan ta bawk a ni. Tûn hnai mai khân, Magadalena-i hnênah chuan: “Nun thara nung ṭanah ka inchan hial a ni,” tih a hrilh a. Chu bâkah: “Vawiina kan thu zir avâng hian, ka lâwm tak zet a ni! I tidik chiah, nun hi a va nuam êm! He mi chungchânga lâwmthu sawina tûr hriat hi a ropui a ni,” tiin cellular phone hmangin thu a thawn bawk a ni. (w03 1/1)