Lalram Chanchin Puangtute Report
Mi Tin Tâna Inhawng Kingdom Hall-te
ISUA’N vântlâng rawng bâwl tûra a hnungzuitute a zirtîr khân, ‘in chunga chuanga tlângaupui’ tûrin a fuih a ni. (Matthaia 10:27) Ni e, an Kristian rawngbâwlna chu a rûk a râl ni lovin, vântlâng mithmuhah an thawk tûr a ni. He zilhna thuin a ken tel thu bul chu zuiin, Jehova Thuhretute rawngbâwlna pawh vântlâng mithmuha thawh a ni a. Chutianga vântlâng mithmuha rawngbâwlna chuan Thuhretute chu dodâlnate a hnehtîr a, fak a hlawhtîr bawk a ni.
Jehova Thuhretute kohhran inkhâwmte chu vântlâng tân inhawng mah se, mi ṭhenkhat chuan Thuhretute an pâwngpaw huat avângin Kingdom Hall-a luh chu an hreh a ni. Finland ramah chuan chutiang chiah chu a ni a. Mi dangte erawh chuan an hriat ngai lohna hmuna kal chu an pâwngpaw hreh ringawt bawk. Kingdom Hall thar sak emaw, hall awm sa chei ṭhat emaw a nihin, vântlâng tlawh theihna hun siam a ni ṭhîn a. Chutih hunah chuan, Kingdom Hall tlawh tûr leh Jehova Thuhretute rawngbâwlna hmêlhriat tûra ṭhenawmte sâwm tûrin beihpui thlâk a ni ṭhîn a ni.
Vêng pakhatah chuan, Thuhretute chuan an Kingdom Hall thar vântlâng tlawh theiha an hawn nîah megazine sem chhuah beihpui an thlâk a. Thuhretu pahnih chuan pa upa lam pakhat, Vênnainsâng leh Awake! magazine chhiar nuam a tihzia lo hrilhtu an tawng a. Unaute chuan vântlâng tlawh theiha Kingdom Hall thar an hawn chungchâng chu hrilhfiahin, an ruala kal ve tûrin an sâwm a. Chutah, tlawh a châk thu a hrilh ta a ni. An titi lo ngaithla rengtu a nupui chu, “Ka tel lovin kal suh u,” a rawn ti chhuak phawng mai a.
Kingdom Hall an thlen chuan, chu pa chuan a han melh kual vêl a, chutah: “A rawng a thim hauh loh hi. A nalhin a êng phût mai alâwm. Kingdom Hall chu a thim ruih ang tih hi min min hrilh dân a ni si a!” a ti. An nupa chuan hun engemawti chhûng an ṭhu a, chuta an thu leh hla târ chhuah ṭhenkhat chu an dîl bawk a ni.
Kohhran pakhat chuan an Kingdom Hall hlanna an neih ṭum chuan vântlâng tlawh theiha hawn a nih thu tualchhûng chanchinbua chhuah chu an duh a. Chu chu a hriatin chanchinbu editor chuan, chu thilthleng chungchâng thuziak pakhat a chanchinbua chhuah tel chu a rawt a ni. Unaute chuan an remti a; a hnu lawkah chuan phêk chanve thuziak duhawm tak chu chanchinbuah a lo chhuak a, chuta thilthleng chungchâng leh tualchhûnga Jehova Thuhretute rawngbâwlna chungchângte a sawi lang a ni.
Chu thuziak chhuah a nih hnu chuan, Thuhretu upa lam tawh pakhat chuan an ṭhenawm pakhat a tâwk a, a hnênah: “Vawiin chanchinbuah Jehova Thuhretute chanchin ṭha tak mai a chhuak asin!” tiin a lo hrilh a. Unaunu chuan thu a hrilh theih phah a, a hnuah chuan Kum Zabi Sawmhnihnaa Jehova Thuhretute (English) tih brochure chu a sem bawk a ni.
Vântlâng tlawh theiha Kingdom Hall thar hawn leh hlanna neihte chuan, Jehova Thuhretute chungchânga ngaih dân dik lote a paih bo bâkah, mi tam zâwkte inkhâwmnaa lo tel tûra sâwm tûrin thuchhuahtute chu a tiphûr a ni. Ni e, Finland pawh huamin, ram tam takah chuan, mi tam takin Jehova Thuhretute Kingdom Hall chu mi tin tân a inhawng tih an hre tawh a ni. (w02 11/1)