‘Pathian, Engati Nge He Thil Hi A Thlen I Phal?’

RICARDO-A chuan doctor nghahna pindana a nupui Maria-i nêna an ṭhut dun lai chu a la hre reng a.a A tu mah mah chuan Maria-i dam loh dân endikna result chu an chhiar ngam lo. Chutah, Ricardo-a chuan lehkha ip chu a han hawng a, damdawi lam ṭawnga ziak report chu a han en thuak thuak a. “Cancer” tih thu mal an han hmu ta chu, a awmzia an hriat chian êm avângin, an ṭap chhuak dûn ta phawng mai a.

Ricardo-a chuan, “Doctor chu mi khawngaih thei tak a ni a; mahse, Pathian kan rin a ngaihzia min hrilh ngun dânah kan dinhmun khirhzia a hre chiang hle tih a lang a ni,” a ti.

Inhemna hmanga a enkawl hma chuan, Maria-i doctor chuan a ke ding lam chu amahin a che reng tih a hmu chhuak a. Enchhinna dangte chuan cancer chu a thluak a thleng tawh tih a târ lang a ni. Chawlhkâr khat lek an hem hnuah chuan inhem pawh chu tihtâwp a ni leh ta a. Maria-i chu nikhaw hre lovin a awm ta a, a hnu thla hnihah chuan a boral ta a ni. Ricardo-a chuan, “A hrehawm tawrh a tâwp tâk avângin ka lâwm a,” a ti a, “mahse ka ngaih theih ṭhin êm avângin, ka nunna pawh tihtâwp ni ve mai se tih ka duh hial a ni. Pathian hnênah: ‘Engati nge he thil hi a thlen i phal?’ tiin chhuahchhâlna thu ka chhâk chhuak zîng hle,” a ti bawk.

Vânduaina A Thlenin, Zawhna A Tam

Ricardo-a ang bawk hian, khawvêl puma mi chhiarsên lohte chuan an duh loh chung chungin hrehawm an tuar a. Pawisawi lote hian hrehawm an tuar fo a ni. Chhum lo chat lova mihringte indonain a thlen, lungngaihna râpthlâk tak takte hi han ngaihtuah teh. A nih loh leh pâwngsualna te, naupang hman khawlohna te, in chhûng khura tharum thawhna te, leh mihringte thil sualtih dang dangte tuartu mi tam takte hrehawm tawrh zawng zawng hi han ngaihtuah teh. Mihringte chanchin tluan chhuakah hian, hleih neihna leh hrehawmna inthlentîr tawn duhna hian chintâwk a neih hmêl loh va. (Thuhriltu 4:​1-3) Tin, leilung chhiatna emaw, rilru lam, thinlung lam, leh tisa lama natna tuar emaw an awm leh bawk nên. Mi tam takin, “Engati nge Pathianin hetiang hrehawm tawrhna hi a awm a phal?” tih an zâwt pawh hi a mak lo.

Sakhaw mite tân pawh, hrehawm tawrh hi thil awlsam a ni ngai rêng rêng lo. Nang ngei pawhin, hmangaihna nei, thil engkimtithei Pathianin mihringte hrehawm tawrh a phal chhan hi i ngaihtuah ve mai thei a. He zawhna khirhkhân tak chhânna dik tak leh lungawithlâk tak hmuh chhuah hi rilru thlamuang taka kan awm nân leh Pathian nêna inlaichînna kan neih nân a pawimawh hle a. Bible chuan chutiang chhânna chu min pe a ni. Khawngaihin, thuziak dawtleha târ lan, Bible chhânna thu hi ngaihtuah ang che. (w03 1/1)

[Footnote]

[Phêk 3-naa milemte]

Doctor chuan Pathian kan rin a ngaihzia min hrilh ngun hle