“Atâwp Atâwpa I Lo Fin Theih Nân”

“Mi tam tak chuan an vânglai chu an upat huna lungngaihna thlen thei tûr zâwngin an hmang a ni,” tiin kum zabi 17-naa French thu ziaktu pakhat, Jean de La Bruyère-a chuan a sawi a. A ni, tum mumal nei lo ṭhalai chu a inkhâp thlu thei a, chu chuan lunghnualna leh inchhîrna a tawntîr thei a ni. Kawng lehlamah chuan, ṭhalai luhlul tak chuan kawng dik lo zawh zêlin, a upat huna a hlimna tûr chu a paih bo thei bawk. Thil ṭha tih lohna emaw, dân bawhchhiatna emaw a enga pawh chuan lungngaihna a thlen thei a ni.

Engtin nge chu chu kan pumpelh theih ang? Vânglai huna rilru mumal neih lohna chungchâng vaukhânin, Pathian Thu chuan ṭhalaite chu: “I vânglai hian i siamtu hre reng rawh. Ni ṭha lote a lo thlen hmâ leh ‘Lâwmna rêng rêng ka nei lo ve,’ i tihna tûr kumte a lo hnaih hmâ hian,” tiin thurâwn a pe a ni. (Thuhriltu 12:1) Ṭhalai i nih chuan, i vânglaia “i siamtu” chungchâng zir tûrin, rilru bulbâl neiin hma la ang che.

A nih leh, engtin nge Bible hian ṭhalaite chu thil âtthlâk takte pumpelh tûrin a ṭanpui? “Atâwp atâwpa i lo fin theih nân zilhna pawm la, thununna pawisa rawh,” a ti. (Thufingte 19:20) Bible chuan vânglai, a nih loh leh eng hun pawha ngaihthahna leh helna hmanga Pathian finna hnâwltute chuan rah ṭha lo tak an seng dâwn tih chiang takin a târ lang bawk. (Thufingte 13:18) Chu mi nêna inkalh tak maiin, Pathian kaihhruaina chuan nun lungâwithlâk leh hlawhtling tak, “dam nî leh kumte, thlamuanna te” a thlen a ni.​—Thufingte 3:2. (w02 10/15)