Chhiartute Zawhna

Sakhaw pâwl dang hnên aṭanga in leia Kingdom Hall-a chantîr chu rinpawlhna thiltih a ni em?

A tlângpui thuin, Jehova Thuhretute chuan sakhaw dang nêna chutianga indâwrna chu an pumpelh a. Mahse, chutianga indâwrna a awm pawhin, chu chu rinpawlhna thiltih a ni thei lo vang. Chu chu inkungkaihna awmzui tawh lova sumdâwnna thila vawikhat indâwrna anga ngaih theih a ni. Tualchhûng Jehova Thuhretute kohhran chuan sakhaw pâwl dang nêna an inhmanṭâwm tûr in an saho a ni si lo va.

Jehova mit hmuha rinpawlhna thiltih chu eng thil hi nge ni? Tirhkoh Paula kaihhruaina thu hi ngaihtuah teh: “Ring lo mite nên rual lo taka nghâwngkawl bât dûnin awm suh u; suahsualna leh felnain engnge inṭâwmna an neih? A nih loh leh thim leh êngin engnge inpâwlna an neih? Beliara leh Krista pawhin engnge inngeihna an neih? A nih loh leh ring lo leh ringtu chuan engnge chan dun an neih? Milemte leh Pathian biak in pawhin engnge inremna an neih?. . . Chuvângin, ‘“An zîng ata lo chhuak ula, A hrangin awm rawh u, thil bawlhhlawh rêng rêng pawh dek suh.” Lalpan a ti,’ chutichuan, ‘“Ka lâwm ang che u,”’” tih hi. (2 Korinth 6:​14-​17) Paula ṭawngkam “inṭâwmna” leh “inpâwlna” tih hian eng awmzia nge a neih?

Paula’n inpâwlna a tihah hian milem betute leh ring lo mite nêna biakna leh thlarau lam thiltihhona a tel chiang hle. Ani chuan Korinth mite chu “ramhuai dawhkâna mi . . . ei” lo tûrin a vaukhân a ni. (1 Korinth 10:20, 21) Chuvângin, sakhaw pâwl dang nêna biakna inṭâwmna emaw, thlarau lam inpâwlna neih emaw chu rinpawlhna thiltih a ni. (Exodus 20:5; 23:13; 34:12) Sakhaw pâwl dang lo hman ṭhin in lei chu, Kingdom Hall atâna hman tûr in neih nân mai a ni a. Kingdom Hall anga hman a nih hmain, biakna dik lo nêna a inzawmna thil zawng zawng chu thenfai vek a ni. Chutianga siam ṭhat hnuah chuan, Jehova hnêna amah biak nân chauhva hman tûr atâna hlan a ni a. Biakna dik leh dik lo inkârah inṭâwmna emaw, inpâwlna emaw engmah a awm lo.

Chutiang thil lei tûra insawi khâwmnaah, pâwl dang nêna inbiakna chu a tlêm thei ang ber leh sumdâwnna thil liau liau a ni tûr a ni. Kristian kohhran mi leh sate chuan ‘ring lo mite nên rual lo taka nghâwngkawl bât dûn lo’ tûra Paula vaukhânna thu hi an hre reng tûr a ni. Rinna chi dang neite aia ṭha zâwkah inngai lo mah ila, anni nêna inkawm emaw, an biaknaa tel emaw chu kan pumpelh a ni.a

Kohhran inkhâwmna atâna sakhaw pâwl dang neih in luah hawh chungchâng Bible thlîr dân chu eng nge ni? A luaha luah hawh chu eng lai pawha a neitu sakhaw pâwl dangte nêna inbiak pawh reng a ngai a, chu chu pumpelh tûr a ni. Chutiang in chu vawi khat lek luah hawh dâwn pawhin, upahote chuan hêng thilte hi an ngaihtuah tûr a ni: In chhûng lamah emaw pâwn lamah emaw chuan milim leh sakhaw chhinchhiahna engemaw tak a awm ang em? Engtin nge vêngchhûnga mite chuan min thlîr ang? He hmun kan hman avângin kohhran chhûnga mi tuemawin a tlûk phah ang em? tihte hi. (Matthaia 18:6; 1 Korinth 8:​7-​13) Upate chuan chûng thilte chu an chhût chiangin thu tlûkna an siam tûr a ni. Chutiang in chu leia Kingdom Hall-a chantîr tûr a nih leh nih loh chungchângah chuan anmahni leh kohhrana mi nâwlpuite chhia leh ṭha hriatna pawh an ngaihtuah tel tûr a ni. (w02 10/15)

[Footnote]

[Phêk 31-naa milem]

Juda sakhaw inkhâwmna in-a hman ṭhin he in hi leia Kingdom Hall-a tuaithar a ni