Pathian Hriatna Dika Thlamuanna

BIBLE-IN Pathian hmangaihna leh zahngaihna chungchâng a sawite hian ṭhenkhat tân zawhna khirh tak tak a siam a. Anni chuan: Pathianin suahsualna tihbo a duh a, a tihbo dân a hriat bawk a, tibo tûra thiltihtheihna a neih bawk si chuan, engvângin nge suahsualna a la pun zêl?, tiin an zâwt a ni. An buaina chu thil inmil lo ang taka lang pathum: (1) Pathian chu thil engkimtithei a ni; (2) Pathian chu a ṭhain, hmangaihna a ngah; leh (3) thil ṭha lo lo thleng zêl te thlunkhâwm hi a ni. An ngaih dân chuan, a tâwp bera thu hi hnial rual lohva a dik avângin, a dang pahnih zînga a engemaw zâwk tal chu a dik thei lo va. An tân chuan Pathianin suahsualna a titâwp thei lo emaw, a ngaihsak lo emaw a ni tlat a ni.

New York khawpuia World Trade Center tihchhiat a nih hnu ni engemaw zâtah khân, United States-a sakhaw hruaitu langsâr tak pakhat chuan: “Pathianin chhiatna râpthlâk tak leh tawrhna awm a phal chhan hi vawi tam tak . . . miin min zâwt tawh a. A chhânna chu keima lungawina tûr khawp tak ngial pawhin ka hre lo tih ka pawm a ngai a ni,” a ti.

Chu thu sawi chu chhâng lêtin, Bible school-a professor pakhat chuan, chu sakhaw hruaitu thu sawi “sakhaw ngaih dân finthlâk” chuan a rilru a khawihzia a ziak a ni. Chu bâkah, ani chuan: “Tawrhna awm chungchâng hriatthiam theihlohna hi Pathian chungchâng hriatthiam theihlohna pêng pakhat a ni,” tih ziaktu mi thiam pakhat ngaih dân pawh a thiam hle bawk. Mahse, Pathianin suahsualna awm a phal chhan chu hriatthiam theih loh a ni tak tak em?

Sualna Lo Chhuahna

Sakhaw hruaitute thu sawi nêna inkalh takin, Bible chuan Pathianin suahsualna awm a phal chhan chu thil hriatthiam theih loh niin a sawi hauh lo. Suahsualna chungchâng hriatthiam dân tûr bul ber chu Jehova’n khawvêl suaksual a siam lo tih hriat chu a ni. Ani chuan nupa hmasa berte chu ṭha famkim, sualna nei lovin a siam a. Jehova chuan a thil siamte chu a en vêl a, “ṭha a ti êm êm” a ni. (Genesis 1:​26, 31) A thiltum chu Adama leh Evi chuan lei pum pui chu Eden huan, Paradis-a chantîr a, hmangaih taka a lal chungnunna leh a vênhimna hnuaia mihring hlim taktea leilung tihkhah chu a ni.​—Isaia 45:18.

Suahsualna chu thlarau thil siam, atîra Pathian thu âwih êm êm tu, mite chibai bûkna dawn duhna lo nei ta aṭanga rawn inṭan a ni a. (Jakoba 1:​14, 15) Pathian a dodâlnaa amah zâwm tûra mihring nupa hmasa berte a hneh tâk khân, a helna chu he leiah hian a lo lang chhuak ta a ni. A chhia leh a ṭha hriatna thing rah ei emaw, khawih emaw lo tûra Pathian thupêk chiang tak chu zâwm lovin, Adama leh Evi chuan a ṭhen an lo va, an ei ta a. (Genesis 3:​1-6) Chutianga an tih chuan, Pathian thu an zâwm lo chauh ni lovin, alaka inlâk hran an duhzia an lantîr bawk a ni.

Nungchang Khawih Thu Buai Chawh Chhuah A Ni

He Eden huana helna hian nungchang khawih thu buai, lei leh vâna pawimawh ber chona chu a chawk chhuak a. Mihring helte chuan Jehova’n a thil siamte chunga a rorêlna chu ṭha taka a kenkawh leh kenkawh loh chungchângah rinhlelhna an nei a ni. A nih leh Siamtu chuan mihringte lakah thuâwihna pumhlûm phût tûrin dikna a nei em? Mite chuan an duh ang anga awm chu an ṭhatpui zâwk ang em?

Jehova chuan a rorêl dân chungchânga chona chu hmangaihna te, rorêl dikna te, finna te, leh thiltihtheihna te inbûk tâwk taka a hmanzia târ lang thei tûr zâwngin a chingfel a ni. A thiltihtheihna chu hel hmangte tihboral nghâl nân a hmang thei reng a. Dikna a neih tlat avângin, chutianga tih mai chu rorêl dikna ni pawhin a lang mai thei a ni. Mahse, chutianga tihna chuan nungchang khawih thu buai chu a chingfel dâwn tlat lo. A leh lamah, Pathian chuan sualna chu en liam mai thei reng a ni a. Tûn laia mi ṭhenkhatte tân chuan chutianga tih chu hmangaihna niin a lang mai thei a ni. Mahse, chu pawh chuan mihringte’n anmahnia ro inrêl chu an ṭhatpui zâwk dâwn nia Setana puhna chu a chhâng dâwn si lo. Chu bâkah, chutianga tihna chuan mi dangte pawh Jehova kawng pênsan tûrin a fuih lo vang maw? A rah chhuah chu tawrhna tâwpin tai nei lo a ni dâwn a ni.

A finna avângin, Jehova chuan mihringte chu anmahni duh duha engemaw chen an awm chu a phalsak ta a. Chu chuan suahsualna chu engemawti chhûng awm zuitîr mah se, mihringte chuan Pathian laka inla hrang a, chhia leh ṭha chungchânga anmahni dân siam anga nungin hlawhtling taka ro an inrêl theih leh theih loh târ lanna hun remchâng an neih phah a ni. Chu hun remchâng rah chhuah chu eng nge ni? Mihring chanchin chu indona te, hleih neihna te, inawpbehna te, leh tawrhna tein a khat a ni. Jehova laka hel avânga a hlawhchham ṭhakna chuan Eden huana thu buai chawh chhuah chu kumkhua atân a chingfel dâwn a ni.

Chutih chhûng chuan, Pathianin a hmangaihna chu tlanna inthawi nâna a hringnun petu, a Fapa, Isua Krista hmangin a lantîr a. Chu chuan thuawih mihringte chu Adama thuawih lohna avânga sualna leh thihnaa thiam loh chantîrna ata a zalêntîr thei a ni. Chu tlanna chuan Isuaa rinna lantîr apiangte tân chatuan nunna kawng a hawng a ni.​—Johana 3:16.

Mihringte tawrhna hi hun engemawti chhûng atân mai chauh a nihzia Jehova thutiam thlamuanthlâk tak kan nei a. “Rei lo tê achinah mi suaksual chu a awm tawh dâwn si lo: a ni, a awmna hmun chu en en mah la, a awm tawh lo vang. Thuhnuairawlhte erawh chuan ram hi an luah ang a, remna chênin an hmuingîl ang,” tiin fakna hla phuahtu chuan a lo ziak a ni.​—Sâm 37:​10, 11.

Himna leh Hlimna Hmabâk

Bible hrilh lâwknate chuan Pathianin natna te, lungngaihna te, leh thihna te a tihtâwp hun a hnaih tawhzia a târ lang a ni. Thil ropui tak lo thleng tûr hlimthla inlârnaa tirhkoh Johana hnêna pêk hi lo chhinchhiah teh. Ani chuan heti hian a ziak a ni: “Vân thar leh lei thar ka hmu a; vân hmasa leh lei hmasa chu an boral tawh a, tuifinriat pawh a awm tawh lo a ni. . . . Pathian ngei chu [mihringte] hnênah a awm ang . . . An mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,” tiin. Chûng thutiam zawng zawngte chu a rintlâkzia târ lan nân: “Ziak rawh, hêng thu hi a rinawmin a dik si a,” tiin Johana chu hrilh a ni.​—Thu Puan 21:​1-5.

A nih leh Eden huana helna a chhuah aṭanga pawisawi lo thi tawh mi maktaduai tam takte chungchâng kha engtin nge ni ang? Jehova chuan thihnaa muhîltate a kaihthawh leh tûr thu min tiam a ni. Tirhkoh Paula chuan: “Mi felte leh fel lote thawhlehna a awm ang tih Pathian lamah ka beisei,” a ti. (Tirhkohte 24:15) Chûng mite chuan khawvêl, ‘a chhûnga felna awma’ nun beiseina chu an nei a ni.​—2 Petera 3:13.

Hmangaihna nei pa berin a fa tâna hlâwkna tluantlin a thlen dâwn tih a hriat chuan damdawi ina inzaipui tawrhtîr a remtih ngei dâwn ang chiahin, Jehova pawhin hun engemawti chhûnga he leia suahsualna mihringte’n an tawrh chu a remti a ni. Mahse, Pathian duhzâwng titute chu chatuan daih malsâwmnain a nghâk reng a. Chu chu Paula chuan hetiang hian a hrilhfiah a ni: “Thil siam zawng zawngte chu thil lawilo thu thua awmtîrin an awm tawh (an duha awm an ni lo va, a awmtîrtu avâng a ni zâwk e); beiseina neiin thil siam zawng zawngte ngei pawh chu chhiatna bâwih ata tihchhuahin an awm ang a, Pathian fate zalênna ropuiah chuan an lût dâwn si a,” tiin.​—Rom 8:​20, 21.

Hei ngei hi chanchin thar chu a ni​—television-a kan hmuh leh chanchinbua kan chhiar ang chi ni lo, chanchin ṭha chu a ni. Chu chu min ngaihsak êm êmtu, “thlamuanna zawng zawng Pathian” hnên aṭanga lo kal, chanchin ṭha ber mai chu a ni.​—2 Korinth 1:3. (w02 10/1)

[Phêk 6-naa milemte]

Mihringte hian Pathian tel lovin hlawhtling takin ro an inrêl thei lo tih hun kal tawhte hian a târ lang

[Milem Hawhtîrtute]

Somalia chhûngkua: UN PHOTO 159849/M. GRANT; atom bomb: USAF photo; concentration camp: U.S. National Archives photo