Puithuna Thununna Hnuaia Nun

TUEMAW nên in i chhuahsan pahin in insu chawrh mai a. Lung i chhuih palh hlauh mai a. Sava chi khat chu zânah dangdai takin a hrâm a. Mang ngai i mang nawn fo va. Hêngte hi mi tam tak tân chuan thil ho mai mai a ni. Mahse, West Africa rama mi tute emaw chuan chûng chu thlarau khawvêl aṭanga thil lo thleng tûr hriattîrna emaw, hril lâwktu emaw, a nih loh leh thuchah emaw angin an thlîr a. A hriattîrna leh a hrilhfiahna azirin, vânneihna emaw, chhiatna emaw chu lo thleng thuai tûra ngaih a ni.

Puithuna hi Africa pâwnah pawh a lâr hle. Kum tam tak chhûng Pathian awm rin lohna ram lo nih tawh, China leh tûn hmaa Soviet Union lo ni ṭhîn rama mi tam takte pawhin puithuna chu an ring êm êm a ni. Khawthlang lam ramahte chuan, mi tam takin horoscope an râwn a, ni 13 chu Zirtâwpni a nih hian an hlau va; tin, zawhte dum an duh lo bawk. Hmâr lam hla taka mite chuan hmâr tâwp lama kâwl êng mawi tak (northern lights) chu indona leh hripui lêng tûr hril lâwktu angah an ngai a. India ramah chuan, AIDS chu khaw lum êm êm hnuaia intih daih nâna mipat hmeichhiatna hman ngai nia ring tlat, truck khalhtute thehdarh a ni. Japan ramah chuan leihnuai kawng siamtute chuan an siam zawh hmaa hmeichhia a luh chuan vânduaina hriltu niin an ngai a. Infiamna lamah pawh puithuna hi a lâr hle. Volleyball khêl thiam pakhat pawhin a zâwn zata a chak chhan chu mawza vâr bun lo va, a dum a bun vâng niin a sawi. Puithuna chungchâng sawi tûr a la tam hle a ni.

Nang, eng nge i ngaih ve dân? Sawifiah hleih theih si lova a rûk têa hlauhna i nei em? A finfiahna awm tak tak si lo va, upain thiang leh thiang lo an tihte hi i ring deuh hlek emaw, i la urhsûn viau emaw em? Chu chu ‘puithuna’ a nih avângin, i chhânna chuan puithunain a thunun leh thunun loh che a târ lang ang.

A thutâwp siamte leh a nî tin nun thiltihtea puithuna inkaihhruaitîrtu chu a thil hriatthiam loh a inthununtîr a ni. Chu chu a finthlâk em? Chutiang thil chiang lo leh sual thununna ni theite hnuaiah kan intulût tûr em ni? Puithuna chu mi thil pawimawh lêm lo chak lohna satliah nge ni a, thil hlauhawm tak zâwk? (w02 8/1)