Chhiartute Zawhna
“Isua hmingin” tih ṭawngkam tel lova Pathian hnêna ṭawngṭai hi a dik em?
Bible chuan ṭawngṭaia Jehova be duh Kristiante chu Isua hmingin an ṭawngṭai tûr a ni tih a târ lang a. Isua chuan a zirtîrte hnênah: “Keimaha kal lo chu tumah Pa hnênah an thleng ngai lo,” tiin a hrilh a ni. Tin, “Ka hmingin engpawh in dîl apiang chu ka ti zêl ang, Pa, Fapa avânga chawimawia a awm theih nân. Nangnin ka hmingin engpawh [in] dîl chuan chu chu ka ti zêl ang,” tih a hrilh a ni.—Johana 14:6, 13, 14.
Isua dinhmun chungnunzia sawiin, Cyclopedia of Biblical, Theological, and Ecclesiastical Literature chuan: “Ṭawngṭaina chu Palai, Isua Krista kaltlanga Pathian hnên chauhva hlan tûr a ni. Chuvângin, mi thianghlim leh vântirhkohte hnêna dîlna ṭawngṭaina hlan rêng rêng chu a lothlâwn mai a nih bâkah, Pathian sawichhiatna a ni. Thil siam chuan eng anga dinhmun sâng pawh chelh se, thil siam chibai bûkna rêng rêng chu milem biakna a ni a, Pathian dân thianghlimah chuan khap tlat a ni,” tiin a sawi a ni.
Miin thil lâwmawm tak a tawn hnuah “Isua hmingin” tih sawi tel si lovin “Ka lâwm e, Jehova” ti ringawt ta se, engtin nge ni ang? Thil dik lo a ni ang em? Ni kher lo vang. Entîr nân, Kristian pakhatin hlauhawm engemaw tawng thutin: “Jehova, min ṭanpui rawh!” tiin au chhuak ta se; “Isua hmingin” a tih loh mai avângin Pathian chuan a chhiahhlawh chu a ṭanpui loh phah hauh lo vang.
Nimahsela, a ria Pathian biak ringawt hi ṭawngṭaina a ni vek lo tih hriat reng tûr a ni. Entîr nân, a unaupa Abela a thah avânga Jehova’n a chungthu a rêl khân Kaina chuan: “I mi hremna hi a nasa êm a, ka tuar zo lo vang. Ngai teh, nangin vawiinah hian lei chung ata mi hnawt chhuak ta si a; i mithmuh phâk lohva thuhrûkin ka awm dâwn ta a; leiah hian tlân bo leh vâkvai ka lo ni dâwn ta si a; tichuan heti hi a ni ang a, tupawh mi hmu apiangin mi that mai ang,” a ti a. (Genesis 4:13, 14) Hetah hian Kaina chuan Jehova be mah se, a rilru hahzia a chhâkchhuah chu a thiltih sual rah chhuah râpthlâk tak chungchânga a vuina mai a ni.
Bible chuan: “Pathianin mi chapote a dodâl a, inngaitlâwmte erawh chu khawngaihna a pe ṭhîn,” tih min hrilh a. Mihring ang leka mi Chungnungbera biak chuan inngaihtlâwmna tlâkchhamzia a târ lang a. (Jakoba 4:6; Sâm 47:2; Thu Puan 14:7) Tin, Pathian Thuin Isua chanvo a sawite hre reng si a, Isua Krista pawm lova ṭawngṭai luih tlat chu zah lohna a ni bawk a ni.—Luka 1:32, 33.
Hei hi Jehova chuan ṭawngṭai laia awm dân tûr bîk emaw, tih dân tûr bîk emaw a siam tihna erawh a ni lo. A pawimawh ber chu thinlung awm dân hi a ni. (1 Samuela 16:7) C.E. kum zabi pakhatnaah khân, Rom sipai hotu Kornelia chu “Pathian hnênah a ṭawngṭai fo va.” Kornelia chu Jentail mi, serh tan loh a ni a, Jehova hnêna inpumpêk pawh a ni lo. Chuvângin, Isua hminga a ṭawngṭai chu a rinawm lo hle; mahse, a ṭawngṭaina chu “hriat reng tûrin Pathian hmaah a thleng chho,” tho a ni. Engvâng nge? ‘Thinlung enfiahtu’ chuan Kornelia chu “Pathian ngaihsak mi” a ni tih a hriat vâng a ni. (Thufingte 17:3; Tirhkohte 10:2, 4) “Nazaret Isua chungchâng” a hriat chuan Kornelia chuan thlarau thianghlim a dawng a, Isua zirtîr baptisma chang a lo ni ta a ni.—Tirhkohte 10:34-48.
A tâwp nân chuan, eng ang ṭawngṭaina nge Pathianin a ngaihthlâk tih chu mihringte ngaihtuah tûr a ni lo. Kristianin engemaw chânga Pathian a biak a, “Isua hmingin” tih a theihnghilh palh chuan, inthiam lohva lungngaih vak a ngai lo. Jehova chuan kan tlintâwk a hre chiang êm êm a, mi ṭanpui a duh a ni. (Sâm 103:12-14) “Pathian Fapa [chuan] . . . engpawh a duhzâwng anga kan dîl chuan . . . min ngaihthlâksak ṭhîn” tih kan ring tlat tûr a ni. (1 Johana 5:13, 14) Nimahsela, mi dang ai awha vântlâng ṭawngṭaina an hlan hunah chuan, Kristian dikte chuan Jehova thiltuma Isua chanvo Pathian Lehkha Thua târ lante chu an hria a. An ṭawngṭaina chu Isua kaltlanga Pathian hnênah hlânin, thuawih taka Isua chawimawi chu an tum tlat a ni. (w02 4/15)