Khawiah Nge I Himna A Innghah?

Africa Khawthlang lama thingtlâng khaw te tak tê pakhaah chuan Josué-a chuan a chhûngte leh a ṭhiante chu a mangṭha a.* Sum leh pai lama himna zawng tûrin khawpui lam a pan ta a. Nimahsela, a thlen hnu lawka khawppui chu awlsam taka hausak theihna hmun a ni lo tih a hriat chhuah chuan a beiseina êng chu a chuai ṭan ta.

KHAWPUI nun dâna nun zirin, Josué-a chu a beidawng ṭan ta a. Khawpui chu râl khat aṭanga a suangtuah ang hehu a lo ni lo va. A chhûngte leh a ṭhiante awmna, a kalsan tâk thingtlâng khaw tlâwm taka kîr leh chu a châk ngawih ngawih mai a ni. Mahse, an khuaa mite nuihzat a hlau bawk si. ‘Khawpuia ka va hlawhtlin loh avângin, hlawhchhampa tiin min ko mai ang,’ tiin a lungngai a ni.

Chu ai mah chuan a nu leh pate beidawn dân tûr chuan a rilru a tihrehawm zâwk a. Sum leh pai lama an rinchhan ber a ni si a. Chu a lungngaihna chu tihkian tum reng chungin, Josué-a chuan hna hniam tak a thawk a, dârkâr rei tak tak a thawk bawk a; tin, a beisei aia tlêm a hlawh bawk a ni. Hna a thawh nasat êm avângin a chau va. Tin, a hlut êm êm ṭhin Kristian rawngbâwl nâna a hun hman pawh a chawlhkâr têlin a tlahniam tial tial a ni. A chhûngte leh a ṭhiante nêna an inhlat êm avângin, a lungngaiin, mal a inti thei hle a. A duh êm êm himna chu khawpui hian a pe lo a ni tih a hmu chhuak a ni.

A hming leh a hmun chu inang lo thluah mah se, Josué-a thiltawn ang chu a thleng zîng hle a ni. Josué-a chu mahni hmasial avânga kal chhuak a ni lo​—himna zawnga chhuak mai a ni zâwk a. Ani chuan an thingtlâng khaw te tak tê ai chuan khawpuiah chuan dinhmun ṭha zâwk a hmuh theih a ring tlat a ni. Miin khawvêl thila a dinhmun a tihhmasâwn châng a awm ngei ang; mahse, chu chu himna dik tak a hmu tihna a ni lo. Josué-a tân a thleng dik lo va, amah anga dinhmun him zawng vetu mi tam zâwkte tân pawh a thlen dik a rinawm lo a ni. Chu chuan, ‘Himna hi eng nge ni?’ tih zawhna min siamtîr a ni.

Himna chu mi chi hrang hrangin kawng chi hrang hrangin an hre thiam a. Dictionary pakhat chuan himna chu “hlauhawm ata fihlîmna” leh “hlauhna emaw, lungkhamna emaw aṭanga fihlîmna” a ti a. Mi tam tak chuan tûn laiah “hlauhawm ata fihlîmna” pumhlûm a awm thei lo tih an hria a. Chuvângin, anni’n him nia an inhriat chhûng chu, an chhehvêlah hlauhawm engpawh thleng mah se, an lungawi a ni.

Chutiang mi chu i ni em? Himna chu khawiah nge i zawn? Chu chu Josué-a lo ngaih ṭhin angin, thingtlâng khuaa awm lo, khawpuia hmuh theih a ni em? A nih loh leh, sum leh pai i hmuhna leh i hmuh dân chu eng ang pawh ni se, sum leh paiah himna chu a hmuh theih em? Himna chu dinhmun sâng zâwk ûmnaah em ni a hmuh theih? I himna innghahna nia i rin chu eng pawh ni se, chu himna chuan nang leh i chhûngte tân eng chen nge a daih dâwn?

Mi tam takin himna an zawnna kawng pathum​—awmna hmun; sum leh pai; dinhmun​—te chu i lo ngaihtuah ang u. Tichuan, himna dik leh tlo tak innghahna chu kan bihchiang bawk dâwn nia. (w02 4/15)

[Footnote]

A hming dik tak hman a ni lo.