Nova Rinnain Khawvêl Thiam Loh A Chantîr

NOVA, Pathian ṭih mi, khawvêl pum huap tuilêt chhûnga nun chhanhim nâna lawng tuktu chanchin hi i lo hre tawh ngai em? Hmâ sâng thilthleng ni mah se, a chanchin hi mi tam tak chuan an hre bel hle a ni. Nimahsela, Nova nun chuan kan za atân awmzia a nei a ni tih mi tam tak chuan an hre lo.

Kum sâng tam tak liam taa thilthleng hi engvângin nge kan ngaihven ang? Nova hun lai leh kan hun lai dinhmun hian inanna a nei em? A nei a nih chuan, a entîr siam chu engtin nge kan hlâwkpui theih ang?

Nova Dam Laia Khawvêl

Bible hun chhût dân chuan, Nova chu B.C.E. 2970-a piang a ni a​—Adama thih hnu kum 126-ah apiang tihna a ni. Nova dam lai chuan, he lei hi tharum thawhnain a khat a, Adama thlah tam tak chuan an thlahtute entawn tûr siam kawng ṭha lo tak chu an zawh a ni. Chuvângin, “LALPA chuan leiah hian mihring sualzia chu nasa tak a ni tih leh, an rilru suangtuahzia rêng rêng chu sual hlîr a ni fo mai tih a lo hria,” a ni.​—Genesis 6:​5, 11, 12.

Mihringte helna ringawt chu Jehova thinrim chhan a ni lo. Genesis thuziak chuan heti hian a sawi: “Pathian fapate chuan mihring fanute chu hmêl ṭha takin an hmu a; tichuan an duhzâwng apiangte chu nupuiahte an lo nei ta ṭhîn a. . . . Chûng lai chuan Milianho [Nephilim-ho] chu leiah hian an awm a; chu mi hnuah pawh Pathian fapaten mihring fanute chu an pâwl a, an laka fate an neih ṭhin lai khân an awm bawk a: chûngte chu hmasânga mi chak, mi hmingthangte kha an ni,” tiin. (Genesis 6:​2-4) He mi châng leh tirhkoh Petera thusawi khaikhin chuan, chu “Pathian fapate” chu vântirhkoh thuâwih lote an ni. Nephilim-ho chu, tisaa inchantîr vântirhkoh hel hmanghote leh hmeichhiate thlahpawlh an ni.​—1 Petera 3:​19, 20.

“Nephilim” tih chu “Titlutu” tihna a ni a, chu chuan tualthattu an nihzia a kâwk a ni. Anni chu an chakin an nunrâwng êm êm a; tin, an pate nungchang khaw lohna chu Sodom leh Gomorra khuaa mite khaw lohna nêna tehkhin a ni. (Juda 6, 7) Chûng mite leh an thlahte chuan he leiah hian suahsualna tawrhhlelhawm tak chu an awmtîr ta chiam mai a ni.

‘A Dam Rualpuite Zînga Sawisêlbo’

Suahsualna chu a nasat êm avângin, Pathian chuan mihringte chu tihboral a tum ta a. Nimahsela, Pathian thâwk khum thu chuan heti hian a sawi: “Nova erawh chuan LALPA mit a tlung a, . . . Nova chu mi fel tak a ni a, a dam rualpuite zîngah chuan sawisêlbo a ni: Nova chu Pathian nên an lêng dûn ṭhîn a,” tiin. (Genesis 6:​8, 9) Tihchhiat phu ngawih ngawih, Pathian ngaihsak lohna khawvêla ‘Pathian nêna len dun’ chu eng angin nge thil theih a nih?

Rinhlelh rual lovin, Nova chuan, Adama dam rualpui rinna nei a pa Lameka hnên aṭangin thil tam tak a zir ang tih a hriat mai a. A fapa hmingah Nova (“Châwl” emaw, “Thlamuanna” emaw tihna) a phuah khân, Lameka chuan heti hian hrilh lâwkna thu a sawi a: “He mi ngei hian Lalpa ânchhe lawh lei avânga kan hna thawhna leh kuta kan thawh rimnaah hian min thlamuan tawh ang,” tiin. Chu hrilh lâwkna chu Pathianin lei ânchhia a lawhna a lâk bo khân a thleng famkim a ni.​—Genesis 5:29; 8:21.

Nu leh pain Pathian an ṭih avâng maiin an fate chu thlarau lam ngaihsak mi an ni nghâl dâwn chuang lo; mi tinin mahni tân Jehova nêna an inlaichînna an siam ṭheuh tûr a ni si a. Pathian pawm zâwng nun kawng ûm zêlin, Nova chu “Pathian nên an lêng dûn” a ni. Pathian chanchin a hriatte chuan A rawng bâwl tûrin Nova chu chêttîr a. Pathianin ‘tisa zawng zawng tuilêta tihboral’ a tum thu a hrilh pawh khân Nova rinna chu a nghîng lo.​—Genesis 6:​13, 17.

Chhiatna râpthlâk tak chu a lo thleng ngei dâwn tih ring tlatin, Nova chuan: “I tân fâr thingin lawng siam rawh; lawngah chuan pindante i siam tûr a ni a, a chhûng lam leh a pâwn lam chu fâr hnai i hnawih vek bawk tûr a ni,” tia Jehova thupêk chu a zâwm a ni. (Genesis 6.14) Lawng tuk dân tûr Pathian kaihhruaina zawm chu thil awlsam a ni hauh lo. Nimahsela, “chutiang chuan Nova’n a ti a.” Dik takin, “Pathianin a hnêna thu a pêk zawng zawng ang ngei chuan a ti” a ni. (Genesis 6:22) Nova chuan he hna hi a nupui leh a fapa Sema te, Hama te, leh Japhetha te leh an nupuite ṭanpuinain a thawk a. Chutiang rinna chu Jehova chuan mal a sâwm a ni. Tûn laia chhûngkuate tân entawn tûr ṭha an va ni êm!

Lawng tuknaah chuan engte nge tel? Jehova chuan Nova chu lawng lian tak tui luh theih lohna, chhâwng thum, thinga siam, meter 133 vêla sei, meter 22 vêla zâu leh meter 13 vêla sâng sa tûrin a hrilh a ni. (Genesis 6:​15, 16) Chutiang khawpa lawng lian chuan tûn laia bungraw phur lawnglian tam tak a tluk thuak ang; mahse, Nova lawng chuan nuna a chhanhim a ni.

Chutiang lawng tuk chu hna hahthlâk tak a va ni dâwn êm! Chu lawng lian tak tuk nân chuan thingkûng sâng tam tak kih tlûk a, a tukna hmuna thiar a, phel vêl a ngaih ngei a rinawm a ni. Tin, lawng tuktute lâwnna tûr thil dawh te, thing kilh zawmna tûr siam te, tui lût thei lo tûra siam nâna fâr hnai lâkkhâwm te, thil dahna tûr bâwmte leh hmanraw ṭûlte lâk khâwmte, leh thil dang tam tak a ngai ngei ang. Chu bâkah, sumdâwngtute dawn tlâwm leh hmanrua leh hlawhfa man pêkte a ṭûl dâwn a ni. Chu mai bâkah, thingzaite inrem taka siam tûr leh lawng ruhrel nghet taka siam tûr chuan thing mistri thiam tak nih a ngai ang. Han ngaihtuah teh​—lawng tuk hun chu kum 50 emaw, 60 emaw vêl a awh a nih chu!

Nova chuan an ei tûr leh ran chaw tûr a lâk khâwm a ngai leh a. (Genesis 6:21) Ran rual tam tak chu thunun a, lawng chhûnga a hruai khâwm a ngai bawk a ni. Nova chuan Pathian thupêk zawng zawng chu a ti vek a, a hna chu zo ta a. (Genesis 6:22) Jehova malsâwmna chuan a hlawhtlin pumhlûmtîr a ni.

“Felna Thu Hriltu”

Lawng a tuk mai bâkah, Nova chuan mite hnênah vaukhânna thu hrilin “felna thu hriltu” angin Pathian rawng rinawm takin a bâwl bawk a ni. Mahse, mite chuan “tui a lo lêt a, an zaa a lâk bo vek hma loh chuan engmah an ngaihsak lo va.”​—2 Petera 2:5; Matthaia 24:​38, 39, NW.

Thlarau lam leh nungchang bawlhhlawhna lama chûng lai huna mite dinhmun han ngaihtuah hian, Nova leh a chhûngte chu an thusawi âwih lo an ṭhenawmte nuihzat bûr leh sawichhiat leh deusawh an nih dân tûr chu a hriat theih mai a. Mite chuan anni chu an â taah an ruat vek ngei ang. Nimahsela, Nova chu a chhûngte hnêna thlarau lam fuihna leh chhawmdâwlna a pêkna kawngah chuan a hlawhtling êm êm a ni; anni chuan tharum thawhna te, nungchang bawlhhlawhna te, leh an dam rualpui Pathian ngaihsak lote helna nun kawng chu an zawm ve ngai loh avângin. A rinna târ langtu a ṭawngkam leh thiltih hmangin, Nova chuan chutih lai khawvêla mite chu thiam loh a chantîr a ni.​—Hebrai 11:7.

Tuilêt Ata An Him

Tui a lêt hma rei lotêah chuan Pathianin Nova chu lawng tuk peih diam tawh chhûnga lût tûrin a hrilh a. A chhûngte leh rante an luh vek hnuah, “LALPAN ani chu a khâr khum ta a,” nuihsawhna rêng rêng lak ata la chhuakin a khâr khum ta a ni. Tui a lo lêt chuan, vântirhkoh thuawih lote chu thlarauvah chang lehin, thihna chu an pumpelh thei a. Mahse, mi dangte engtin nge an awm? Lawng pâwna thil nung zawng zawng, Nephilim-ho nên lam an thi phiar a nih kha! Nova leh a chhûngte chauh chu an dam khawchhuak ta a ni.​—Genesis 7:​1-23.

Nova leh a chhûngte chu kum khat leh ni sâwm chhûng lawng chhûngah an awm a. Ramsate chaw leh tui pein, an zun leh êkte an thianfai a; tin, hunbi chhinchhiah thlap thlap zêlin an buai êm êm a ni. Genesis-ah chuan Tuilêt thlen dân chanchin chu, lawng chanchin ziakna lehkhabu ang maiin a nî leh a hun te chipchiar taka chhinchhiah thlap thlap a ni a, chu chuan Genesis thu ziak rin tlâkzia a târ lang a ni.​—Genesis 7:​11, 17, 24; 8:​3-14.

Lawng chhûnga an awm chhûng khân, Nova chuan a chhûngte chu Pathian thu zir puiin, Pathian hnêna lâwmthu sawina pawh a neihpui ang tih chu a chiang sa a. Nova leh a chhûngte avângin Tuilêt hma chanchinte chu humhim a ni tih a chiang hle. Ṭawngkama inhlanchhâwn thu rinawm tak takte emaw, hmân lai chanchin ziaka chhinchhiah an neihte chu, Tuilêt chhûnga an sawiho tûr thu ṭha ṭangkai tak a ni ngei ang.

Nova leh a chhûngte chu lei châr an rah leh theih tâk avângin an lâwm ngawt ang! Lawng aṭanga an chhuah vêleh chuan maichâm a din a, a chhûngte tân puithiamah ṭangin, anmahni Chhanhimtu hnênah chuan inthawina a hlân nghâl a ni.​—Genesis 8:​18-20.

“Nova Dam Lai Ang Bawk Kha”

Isua Krista chuan: “Nova dam lai ang bawk kha Mihring Fapa lo kal lehna chu a ni ang,” a ti a. (Matthaia 24:37) Tûn laia Kristiante pawh Nova ang bawka felna thuhriltute an ni a, mite chu inlamlêt tûrin an fuih a ni. (2 Petera 3:​5-9) Chutianga han inchan tâkah chuan, Tuilêt hma khân Nova’n eng nge a ngaihtuah dâwn tih kan ngaihtuah mai thei a. A thu hrilh chuan sâwtna a nei lo tih châng a nei em? Nin chângte a nei ve em? Bible chuan chutiang chungchâng engmah min hrilh lo. Nova chuan Pathian thu a zâwm tih min hrilh tawp mai zâwk a ni.

Nova dinhmun leh kan dinhmun inanna i hre thei em? Ani chuan dodâlna leh harsatna kârah pawh Jehova thu a awih a. Chuvângin a ni, Jehova pawhin mi fel a tih ni. Nova leh a chhûngte chuan Pathianin Tuilêt a thlentîr hun tûr chiah an hre lo. Pathian thua Nova rinna chuan a thawh rim hun chhûng zawng leh a thuhrilhna chu a thlâwn anga a lan hun chhûng zawng chuan ani chu a chhawmdâwl a ni. Hetiang hian hrilh kan ni: “Rinnain Nova chu thil lo la lang lote kawng thu-ah Pathian hrilha lo awmin, Pathian ṭih dêkin, a chhûngte chhandam nân lawng a tu a; chu chuanin khawvêl chu thiam loh a chantîr ta a, rinna avânga felna awm chu rochungtu a lo ni bawk a,” tiin.​—Hebrai 11:7.

Engtin nge Nova chuan chutiang rinna chu a neih theih? Jehova chungchâng a hriat zawng zawngte chu a chhût ṭhîn a, chu a hriatna chu a inkaihhruaitîr a ni tih a lang a ni. Rinhlelh rual lovin, Nova chuan Pathian chu ṭawngṭaiin a be ṭhîn a ni. Dik tak chuan, “Pathian nên an lêng dun” tih theih khawpin Jehova nên inlaichînna bul tak a nei a. Chhûngkaw pa a nih angin, Nova chuan a chhûngte chu a hun leh ngaihsakna chu a pe ṭhîn a. Chûng zîngah chuan a nupui te, a fapa pathumte leh a monute thlarau lam ngaihsakna pawh a tel a ni.

Nova ang bawkin, tûn laia Kristiante chuan he Pathian ngaihsak lohna kalhmang hi a tâwp thuai dâwn tih an hria a. A nî leh dârkâr erawh kan hre lo nâ a, he “felna thuhriltu” thuâwihna leh rinna entawnna chuan ‘nun humhimna’ a thlen dâwn tih kan hria a ni.​—Hebrai 10:​36-39. (w01 11/15

[Phêk 31-naa bâwm]

Thil Thleng Tak Tak A Ni Em?

Mihring chanchin zir mite chuan tuilêt thawnthu 270 lai chu khawvêl hmun hrang hranga ṭawng chi tin leh hnam chi tinte hnên aṭangin an la khâwm a. Mi thiam Claus Westermann-a chuan “Tuilêt chanchin chu khawvêl hmun tina sawi a ni a. Thil siam chanchin ang bawkin, chu thawnthu chu kan hnam ro hlu a ni. Hei hi thil mak tak a ni: khawvêl hmun tinah tuilêt nasa tak chanchin hmuh a ni tlat mai hi,” tiin a sawi. Eng nge a chhan ni ang? Chanchin sawitu pakhat Enrico Galbiati-a chuan: “Khawvêl mi chi hrang hrang awmhmun inhlat tak takte’n tuilêt thawnthu an lo neihna chuan, chutiang thawnthu lo chhuahna tûr thil thleng dik tak a awm a ni tih a târ lang,” a ti. Mahse, mi thiamte ngaih dân aia Kristiante tâna pawimawh zâwk chu hei hi a ni: Isua ngei pawhin Tuilêt chu mihringte chanchina thil thleng dik tak a nihzia a sawi tih hriat hi.​—Luka 17:​26, 27.

[Phêk 32-naa bâwm]

Hmân Lai Thawnthuah Nephilim-ho An Awm EM?

Mihring leh pathian thlah pawlh​—leh chûng inthlah pawlh aṭanga lo piang ta “mi huaisente” emaw “mihring leh pathian ni kawpte”​—thawnthu chu Grik te, Aigupta te, Ugaritic-te Hurrian te, leh Mesopotamian te pathian thuah chuan a lâr hle a. Hmân lai Grik thawnthua Pathiante chuan mihring pian hmang neiin, an hmêl ṭha hle a ni. An eiin, an bâr a, an rui a, an muhîl a, mipat hmeichhiatna an hmang a, an inhnial a, an insual a, mi an hruaipêng a, an pâwngsual bawk a ni. Thianghlim tûra ngaih ni mah se, mi an bumin, tual an that thei a ni. Achilles ang mi huaisente chu Pathian leh mihring thlah, mihringte aia thil tithei mah se, thi thei tho si anga sawi an ni. Chuvângin, Genesis-in Nephilim-ho a sawite chu chutiang thawnthu lo awm ṭanna a ni mai thei a ni.