Jehova’n Kan Dam Chhûng Nîte Chhiar Dân Tûr Min Zirtîr
“Kan dam chhûng nîte chhiar dân tûr min zirtîr ang che, finna thinlung kan neih phah hialna tûrin.”—SAM 90:12.
1. Engvângin nge “kan dam chhûng nîte chhiar dân” min zirtîr tûra Jehova ngen chu inâwm tak a nih?
PATHIAN Jehova chu min Siamtu leh Nunna Petu a ni a. (Sâm 36:9; Thu Puan 4:11) Chuvângin, kan dam chhûng nîte hman dân tûr min zirtîr tûrin amah aia thiam zâwk tumah an awm lo. Fakna hla phuahtu pawhin inâwm takin: “Kan dam chhûng nîte chhiar dân tûr min zirtîr ang che, finna thinlung kan neih phah hialna tûrin,” tiin Pathian chu a lo ngên rêng a ni. (Sâm 90:12) Chu ngenna kan hmuhna Sâm 90-na chuan ngun taka kan ngaihtuah a phu hliah hliah a. Nimahsela, chu mi hmain, he Pathian thâwk khum hla hi lo en thuak thuak ta ila.
2. (a) Sâm 90-na phuahtu chu tu nge ni a, eng huna phuah nge ni? (b) Sâm 90-na chuan kan nun kan thlîr dân chu eng angin nge a nghawng ang?
2 Sâm 90-naa a chunga thu ziak chuan, chu chu “Pathian mi Mosia ṭawngṭaina” tiin a ko va. He hla hian mihring nun derdêpzia a sawi uar avângin, Israel mite Aigupta sal tânna ata hruai chhuah an nih hnua thlalêra kum 40 an kal lai, thihnain rinawmna nei lo chhuan ho a sâng têla a tihmang laia phuah a nih a rinawm. (Numbers 32:9-13) Khawi hmuna phuah pawh ni se, Sâm 90-na chuan mihring ṭha famkim lote nun tâwizia a târ lang a ni. Chuti a nih chuan, kan hun neih hlu takte chu fing takin kan hmang tûr a ni tih a chiang hle.
3. Sâm 90-naah eng thute nge awm?
3 Sâm 90-na châng 1 aṭanga 6-na chuan Jehova chu kan chatuan awmna angin a sawi a. Châng 7 aṭanga 12-na chuan kan dam chhûng hun rei lo tê chu a pawm tlâka hmang tûra kan mamawhte a târ lang a ni. Tin, châng 13 aṭanga 17-a a sawi angin, Jehova ngilneihna leh malsâwmna dawn chu kan châk tak zet a ni. He hla thu ang hi keini Jehova chhiahhlawh tinte hian kan tawng kher lo vang. Amaherawhchu, he ṭawngṭai hla chham thu hi kan chhinchhiahin, Pathian hnêna inpumpêkna rilru put hmang târ lan chu kan entawn tûr a ni. Chuvângin, Sâm 90-na chu Pathian hnêna inpumpêkte thlîr dânin i lo bihchiang ang u.
Jehova—Kan “Awmna”
4-6. Engtin nge Jehova chu kan “awmna” tak tak a nih?
4 Fakna hla phuahtu chuan he thu hi a hmang ṭan a: “Lalpa, nang chu chhuan zawng zawng chenah kan awmna i ni ṭhîn. Tlângte pian hmâa, leilung leh khawvêl i din [“hrin,” NW] hmâ pawh khân, chatuan ata chatuan thleng pawhin nang chu Pathian i ni,” tiin.—Sâm 90:1, 2.
5 Kan tân chuan “chatuan Pathian” Jehova chu “awmna” dik tak—thlarau lam inhumhimna a ni. (Rom 16:26) “Ṭawngṭaina ngaithlatu” a nih angin, min ṭanpui tûrin a inpeih reng a; chuvângin, him nia inhriatna kan nei a ni. (Sâm 65:2) Kan mangannate chu a Fapa duh tak kal tlanga kan Pa, vâna mi chunga kan nghah avângin, ‘Pathian thlamuanna, rilru rêng rênga hriat sên loh khân, kan thinlung leh kan ngaihtuahnate chu min vênsak,’ a ni.—Philippi 4:6, 7; Matthaia 6:9; Johana 14:6, 14.
6 Tehkhin thua sawi chuan, Jehova chu kan “awmna” dik tak a nih avângin, thlarau lama himna kan nei a ni. Ani chuan ‘pindan chhûng’—a mite awmna kohhran ni âwm tak—chu thlarau lam inhumhimna atân min pe a; chuta berâm vêngtute chuan him nia inhriatna min pe nasa a ni. (Isaia 26:20;32;1, 2; Tirhkohte 20:28, 29) Chu bâkah, hun rei tak chhûng Pathian rawng lo bâwl tawh chhûngkuaa piang kan zînga mi ṭhenkhatte chuan ani chu ‘chhuan zawng zawng chena awmna hmun’ a nihzia anmahni ngeiin an hmu a ni.
7. Eng angin nge tlângte chu an “pian” a, leilung chu “hrin” a nih?
7 Tlângte “pian” hma emaw, leilung “hrin” a nih hma emawah Jehova chu a awm a. Mihringte dinhmun aṭanga thlîr chuan, he leilung leh a pianhmang zawng zawng, a insiam dân te, leh a kal hmang khirh takte siam tûr chuan thawh rim nasat a ngai viau ang. Tlângte chu ‘piang’ a, leilung chu “hrin” anga sawiin, fakna hla phuahtu chuan hêng thilte Jehova’n a siam laia a thawh rimna a hlutzia a târ lang a ni. Chutiang bawka Siamtu kut chhuakte zahna leh hlutna chu kan nei ve tûr a ni dâwn lâwm ni?
Jehova Chu Min Ṭanpui Tûrin A Inpeih Reng
8. Jehova chu “chatuan ata chatuan thleng pawhin” Pathian a ni tih awmzia chu eng nge ni?
8 “Chatuan ata chatuan thleng pawhin nang chu Pathian i ni,” tiin fakna hla phuahtu chu a zai a. “Chatuan” leh “kumkhua” tia lehlin Hebrai thu mal chuan tâwp chin nei thei mah se, hun bituk chin nei lo sawi nân pawh hman theih a ni. (Exodus 31:16, 17; Hebrai 9:15) Amaherawhchu, Sâm 90:2 leh Hebrai Pathian Lehkha Thua a lanna dangah chuan “chatuan,” “kumkhua,” leh “awm reng” tih thu malte chuan tâwp chin nei lo a kâwk a ni. (Thuhriltu 1:4) Pathian awm rengna chu kan rilru chuan a suangtuah pha lo va. Mahse, Jehova chuan awm ṭanna a nei lo va, tâwpna pawh a nei bawk hek lo vang. (Habakuka 1:12) A nung reng ang a, min ṭanpui tûrin a inpeih reng ang.
9. Fakna hla phuahtu chuan mihring dam chhûng kum sângkhat chu eng nên nge a khaikhin?
9 Fakna hla phuahtu chu mihring tâna kum sângkhat leh min Siamtu tâna hun rei lo tê khaikhin tûra thlarauva thâwk khum a ni a. Pathian biain, heti hian a ziak a: “Nang chuan mihring hi boralnaah i kîrtîr ṭhîn a; ‘Mihring fate u, kîr leh rawh u,’ i ti ṭhîn. Nanga ngaih chuan kum sângkhat hi nimin ral ta ang lek kha a ni si a, zân vên khat chhûng ang lek bawk a ni,” tiin.—Sâm 90:3, 4.
10. Engtin nge Pathianin mihring chu ‘boralnaah a kîrtîr’?
10 Mihring hi boral thei an ni a, Pathianin ani chu ‘boralnaah a kîrtîr’ a ni. Chu mi awmzia chu, mihring hi lei tihkehsawm, a nih loh leh chhut dip angin, “vaivutah” a kîr tihna a ni. Dik takin, Jehova chuan, ‘Siam i nihna leiah kîr leh rawh,’ a ti a ni. (Genesis 2:7; 3:19) Hei hi mi tinte—mi chak emaw, chak lo emaw; hausa emaw, rethei emawte—chungah a thleng a ni; mi ṭha famkim lo tumahin ‘chatuana nung tûrin an unau pawh an tlan thei lo va, Pathian hnênah tlanna an pêksak theih hek loh avangin.’ (Sâm 49:6-9) Mahse, ‘Pathianin a Fapa mal neih chhun chu amaha rinna tilangtute boral lo va, chatuana an nun theih nân’ a pêk avângin kan va lâwm tak êm!—Johana 3:16; Rom 6:23.
11. Engvângin nge kan tâna hun rei tak chu Pathian tân a rei lo hle tih kan sawi theih?
11 Jehova thlîrna aṭang chuan kum 969 chhûng dam Mathusela pawh kha ni khat a dam tling lo va. (Genesis 5:27) Pathian tân chuan kum sângkhat liam ta chu nimin ang lek a ni—dârkâr 24 chhûng ang lek chu. Fakna hla phuahtu chuan kum sângkhat chu zân râlvên hun vên khat chhûng, dârkâr li ang lekin a sawi bawk. (Rorêltute 7:19) Chutiang a nih chuan, kan tâna hun rei tak chu chatuan Pathian, Jehova tân chuan a rei lo hle a ni tih a chiang hle.
12. Engtin nge mihringte hi Pathianin ‘tui lian anga a len botîr’?
12 Chatuana Pathian awm hun chhûng nêna khaikhin chuan mihring dam chhûng chu a tâwi tak meuh a ni. Fakna hla phuahtu chuan: “Anni chu tui lian angin i lên bo ṭhîn a; ṭhang khat mû ang chauh an ni; zîngah chuan hlobet chawr chhuak ang an ni. Zîngah chuan a lo duahin a chawr chhuak a; tlai lamah chuan ah tlûkin a awm a, a vuai ṭhîn,” a ti a. (Sâm 90:5, 6) Mosia chuan Pathianin ‘tui lian anga a len bo,’ Israel mi tam tak thlalêra boralte a hmu a ni. Lehlin dangah chuan heti lai châng hi: “Thihnaa muthilhnaah i tiboral a,” tia lehlin a ni. (New International Version) Kawng leh lamah chuan, mihring ṭha famkim lote dam chhûng chu ‘ṭhang khat mut zawk’ ang lek a ni.
13. Eng angin nge ‘hlobet hring ang lek’ kan nih a, chu chu kan ngaihtuahna eng anga nghawngtîr tûr nge ni?
13 ‘Zînga duah taka chawr chhuak’ a, ni sa avânga tlai lama vuai ṭhîn hlobet ang kan ni. A ni, kan dam chhûng chu ni khat chhûnga vuai mai ṭhîn hlobet dam chhûng ang maiin a tawi a ni. Chuvângin, he ro hlu tak hi i tlakral lo vang u. He thil kal hmanga kan dam chhûng ni labângte hman dân tûrah Pathian kaihhruaina i zawng zâwk ang u.
Jehova’n “Kan Dam Chhûng Nîte Chhiar” Tûrin Min Ṭanpui
14, 15. Sâm 90:7-9 hian Israelte chungah eng anga thlen famkimna nge a neih?
14 Fakna hla phuahtu chuan Pathian hnênah heti hian a sawi zawm a: “I thinurnaa tihboralin kan awm a, i thinrimnaa tihmanganin kan awm bawk si a. Kan khawlohnate chu i hmâah i dah a, kan sual zêp rûkte chu i hmêl êngah i dah ta a. Kan dam chhûng nî zawng zawng hi i thinrimnaah a ral ṭhîn a: kan dam chhûng kumte hi thawnthu (“hmui phun,” NW) angin kan titâwp ṭhîn,” tiin.—Sâm 90:7-9.
15 Israel mi rinawm lote chu ‘Pathian thinurnaa tihboralin an awm a.’ ‘A thinrimnaa tihmanganin’ an awm a ni. Ṭhenkhat chu Pathian rorêlna avângin “thlalêrah khân tluhlumin an awm” a ni. (1 Korinth 10:5) Jehova chuan ‘an khawlohnate chu a hmâah a dah a.’ Mipui hriata an thil sual tihte chunga mawh a phurhtîr bâkah, an “sual zêp rûkte” pawh ‘a hmêl êngah a dah ta a.’ (Thufingte 15:3) Pathian thinrimna awmtîrtu an nih angin, inchhîr duh lo Israelte chuan ‘an dam chhûng nîte chu hmui phun angin an titâwp ṭhîn,’ a ni. Kan dam chhûng nî tawizia chu hmui phuna boruak chhuak ang lek a ni.
16. A rûka sual ti ṭhîn an awm chuan, eng nge an tih ngai?
16 A rûka sual ti ṭhîn kan awm chuan, hun engemaw chen chu mihringte mithmuhah kan ṭhupbo thei mai thei a. Mahse, kan sual zêp rûkte chu ‘Jehova hmêl ênga dah’ a ni ang a, amah nêna kan inlaichînna a tichhe dâwn a ni. Jehova nêna inṭhianna nei leh tûr chuan, a ngaihdamna dîla kan ṭawngṭai a ngai a, kan khawlohnate kalsan a ngai bawk a; tin, Kristian upate ṭanpuina chu lâwm taka kan dawn a ngai a ni. (Thufingte 28:13; Jakoba 5:14, 15) Chutianga tih chu kan chatuan nun beiseina tiderthâwng a, ‘kan dam chhûng nîte hmui phun anga tihtâwp’ mai ai chuan a va ṭha zâwk dâwn êm!
17. Mite chu a tlângpui thuin kum engzât nge an dam a, kan dam chhûng nîte chu engin nge a khah tlat?
17 Mihring ṭha famkim lote dam chhûng nî chungchângah, fakna hla phuahtu chuan: “Kan dam chhûng kumte chu kum sawmsarih a ni a, chakna avângin kum sawmriat pawh a ni thei e; nimahsela a reina chu thawhrimna leh lungngaihna mai a ni; a ral thuai a, keini pawh kan thlâwk bo ṭhîn a nih hi,” a ti a. (Sâm 90:10) Kum 70 chu a tlângpui thua mihring dam chhûng a ni a, kum 85 mi Kaleba chuan a chakna mak tak chu a sawi a ni. Chûng zîngah chuan chhiar tel loh tûr a awm nual a, Arona (123), Mosia (120), leh Josua (110) angte hi. (Numbers 33:39; Deuteronomy 34:7; Josua 14:6, 10, 11; 24:29) Mahse, Aigupta aṭanga lo chhuak, chhuan rinawm lo, kum 20 chin chunglam chhiar tawhte chu kum 40 chhûngin an thi fai vek a ni. (Numbers 14:29-34) Tûn laiah chuan, ram tam taka mihringte dam chhûng chu dân narânin fakna hla phuahtu sawi chhûngah a la awm a ni. Kan dam chhûng nîte chu ‘thawhrimna leh lungngaihnain’ a khat tlat a. “A ral thuai a, keini pawh kan thlâwk bo ṭhîn.”—Joba 14:1, 2.
18, 19. (a) ‘Finna thinlung kan neih phah hialna tûra kan dam chhûng nîte chhiar’ tih chu eng tihna nge ni? (b) Eng ti tûrin nge finna kan hmanna chuan min chêttîr ang?
18 Fakna hla phuahtu chu, heti hian a zai leh a: “Tuin nge i thinurna thiltihtheihzia hriaa, nangmah ṭih tûrzia anga i thinrimna chu hria le? Kan dam chhûng nîte chhiar dân tûr min zirtîr ang che, finna thinlung kan neih phah hialna tûrin,” tiin. (Sâm 90:11, 12) Pathian thinurna thiltihtheihzia emaw, a thinrim chen emaw chu tuman kan hre lo va, chu chuan Jehova kan ṭihna chu a tizual sauh tûr a ni. Dik takin, chu chuan ‘finna thinlung kan neih phah hialna tûra kan dam chhûng nîte chhiar dân tûr’ zâwt tûrin, min chêttîr tûr a ni.
19 Fakna hla phuahtu thusawite chu, an dam chhûng nî labângte chhût nân leh Pathian pawm tlâka an hman theih nâna finna an hman dân tûr a mite zirtîr tûra Jehova ngenna a ni. Kum 70 chhûng dam tûra inbeiseina chu ni 25,500 vêl dam tûra inbeiseina a ni a. Mahse, eng anga upa pawh ni ila, ‘naktûkah chuan kan chungah eng nge lo thleng dâwn tih kan hre si lo. Chhûm rei lo tê lo lang a, ral leh ta mai ṭhîn ang hi kan ni si a.’ (Jakoba 4:13-15) ‘Mi zawng zawng chungah hun leh khawrêl ang anga thil a thlen’ avângin, eng chen nge kan la dam dâwn tih kan sawi thei lo. Chuvângin, tûnah ngei hian harsatnate hmachhawn tûr te, mi dangte ṭha taka cheibâwl tûr te, leh Jehova rawngbâwlnaa theihtâwp chhuah tûr tein i ṭawngṭai ang u—vawiin ngeiah hian! (Thuhriltu 9:11; Jakoba 1:5-8) Jehova chuan a Thu te, a thlarau te, leh a inawpna pâwlte hmangin min kaihruai a ni. (Matthaia 24:45-47; 1 Korinth 2:10; 2 Timothea 3:16, 17) Finna kan hman chuan, chu chuan ‘Pathian Ram zawng hmasa’ tûr leh kan dam chhûng nîte chu Jehova chawimawi nâna hmang a, a thinlung tilâwm tûrin min chêttîr a ni. (Matthaia 6:25-33; Thufingte 27:11) Thinlung zawng zawnga amah chibai bûkna chuan kan harsatna zawng zawng chu a tiveng dâwn lo va; mahse, hlimna nasa tak min pe thei a ni.
Jehova Malsâwmna Chuan Hlimna Min Pe
20. (a) Eng kawngin nge Pathianin a ‘rilru a lamlêt’? (b) Sual nasa tak ti mah ila inlamlêtna dik tak kan lantîr chuan, Jehova’n engtin nge min cheibâwl dâwn?
20 Kan dam chhûng nî labâng zawngah hian hlim reng thei ila a va ṭha dâwn em! He mi chungchângah hian Mosia chuan heti hian ngenna a siam a: “Aw LALPA, lo kîr leh ang che; eng chen nge i thinur dâwn? I chhiahhlawhte chung thu-ah chuan i rilru lamlêt ang che. Aw, zîngah chuan i ngilneihnain [“hmangaihna rinawmin,” NW, footnote] min titlai ang che; kan dam chhûng zawng zawng hian kan hlima kan lâwm theihna tûrin,” tiin. (Sâm 90:13, 14) “Rilru lamlêt” ngai tûrin Pathianin thil a tisual lo va. Nimahsela, chutianga hrem a tumnain thil tisualtu rilru put hmang leh a nungchang a thlâk thlengtîr phawt chuan a ‘rilru a lamlêt’ a, a thinurna leh hrem a tumna ata a “kîr leh” ṭhîn a ni. (Deuteronomy 13:17) Chuvângin, sual nasa tak ti mah ila inlamlêtna dik tak kan lantîr chuan, Jehova chuan a “ngilneihnain min titlai ang” a, ‘hlima lâwm theihna tûr chhan’ kan nei ang. (Sâm 32:1-5) Tin, nun kawng fel ûmna hmangin, Pathian hmangaihna rinawm chu kan lo hria ang a, ‘kan dam chhûng zawng zawng hian kan hlimin kan lâwm thei’ ang—a ni, kan dam chhûng nî la awm zawng zawngah hian.
21. Sâm 90:15, 16-ah Mosia chuan eng nge a dîl?
21 Fakna hla phuahtu chu ṭhahnemngai takin heti hian a ṭawngṭai a: “Nangin min tihhrehawm nî leh, thil ṭha lo kan tawh kum chhûng hun angte khân min tilâwm ang che. I hnathawh chu i chhiahhlawhte hnênah lang sela, i ropuina chu an fate hnênah lang rawh se,” tiin. (Sâm 90:15, 16) Mosia chuan Israel mite chu hrehawm an tawrh ang zêl emaw, an tawrh chhûng leh thil ṭha lo an tawh kum chhûng emawa malsâwm tûrin Pathian a ngên a nih ngei a rinawm. Ani chuan Pathian malsâwmna “hnathawh” chu A chhiahhlawhte hnênah lo lang tûr leh, an fate, a nih loh leh an thlahte hnênah A ropuina lo lang tûrin a ngên a ni. Chutiang bawkin, Pathian tiam khawvêl thara thuâwih mihringte chunga malsâwmna vûr tûrin keini pawh kan ṭawngṭai ve thei a ni.—2 Petera 3:13.
22. Sâm 90:17 sawi angin, eng atân nge kan ṭawngṭai theih?
22 Sâm 90-na chu he ṭawngṭaina hmanga tihtâwp a ni: “LALPA kan Pathian mawina chu kan chungah awm rawh se: kan kut hnathawh hi kan chungah tinghet bawk ang che; a ni, kan kut hnathawh hi tinghet ang che,” tiin. (Sâm 90:17) Hêng thute hian a rawngbâwlnaa kan thawhrimna chu malsâwm tûrin kan dîl thei tih a târ lang a ni. Kristian hriak thihte angin emaw, an thawhpui, “berâm dang” angin emaw “LALPA mawina” chu kan chunga a awm avângin kan lâwm hle a ni. (Johana 10:16) Pathianin Lalram thu puangtu anga kan hnathawh leh kawng danga ‘kan kut hnathawh hi a tihngheh’ avângin kan va lâwm tak êm!
Kan Dam Chhûng Nîte I Chhiar Zêl Ang U
23, 24. Sâm 90-na chhût ngunna chu engtin nge kan hlâwkpui theih?
23 Sâm 90-na chhût ngunna chuan Jehova, kan “awmna” tak tak chunga kan innghahna chu a tipung tual tual tûr a ni. Kan dam rei lohzia ngaihtuahin, kan dam chhûng nîte chhiarna kawnga Pathian kaihhruaina kan mamawhzia kan hre chiang lehzual tûr a ni a. Pathian finna zawng a, hmang zêl tûr chuan, Jehova malsâwmna leh ngilneihna kan dawn ngei a ngai a ni.
24 Jehova chuan kan dam chhûng nîte chhiar dân tûr min zirtîr zêl ang a. A zirtîrnate hnuaia kan intukluh chuan, kan dam chhûng nîte chu chatuanin kan chhiar thei ang. (Johana 17:3) Amaherawhchu, chatuan nunna thlîr reng tûr chuan, Jehova chu kan inhumhimna a ni tûr a ni. (Juda 20, 21) Thuziak dawt leha kan hmuh tûr angin, he thu hi Sâm 91-naa thu phûrawm tak hian a tichiang êm êm a ni. (w01 11/15)
Engtin Nge I Chhân Ang?
• Engtin nge Jehova chu kan tân “awmna” a nih?
• Engvângin nge Jehova chu min ṭanpui tûrin a inpeih reng tia kan sawi theih?
• Engtin nge “kan dam chhûng nîte chhiar” tûrin Jehova’n min ṭanpui?
• Engin nge ‘kan dam chhûng zawng zawnga hlimna’ min pe thei?
[Phêk 21-naa milem]
Jehova chu ‘tlângte pian hmâ’ aṭangin Pathian a ni
[Phêk 22-naa milemte]
Jehova chuan ‘kan kut hnathawh hi a tinghet’
[Phêk 23-naa milem]
Jehova thlîrna aṭang chuan, kum 969 dam Mathusela chu ni khat pawh a dam tling lo