Chhia leh Ṭha Hriatna Sawizawi Tawhsa I Mamawh
Antarctica khawmual pana thlâwk Air New Zealand Flight 901-a hnathawktute leh a chhûnga chuang khualzin mite chu ni ropui tak leh hlimawm tak hmang tûrin an thlâwk chhuak a. Antarctica khawmual mawi tak chu chiang taka an thlîr theih nâna DC-10 thlawhna chu a han thlawh hniam chuan mite chu an phûrin, thlalâknate chu peih ṭhapin an dah hlawm a.
KUM 15 chhûng thlawhna khalhtu lo ni tawh, thlawhna captain chuan dârkâr 11,000 aia tam a lo khalh tawh a ni. An thlawh chhuah hma chuan, thlawhna computer-ah chuan an thlawh dân tûr chu ngun takin a thun lût a; mahse, a thun dik lo tih rêng a hre lo. Meter 600 aia hniam hret chhûm zînga thlâwkin, DC-10 thlawhna chuan Erebus Tlâng pang chu a su ta bur mai a, a chhûnga chuang zawng zawng, mi 257-te chu an boral ta vek a ni.
Tûn laia thlawhnate’n vân sânga kaihruaitu atâna computer a rinchhan ang chiahin, mihringte pawh hi an nun kawng kaihruaitu atân chhia leh ṭha hriatna chu pêk an ni a. Chhiatna râpthlâk tak tâwk Flight 901 chanchin chuan kan chhia leh ṭha hriatna chungchângah thil ropui tak min zirtîr thei a ni. Entîr nân, thlawhna him leh him loh chu zin kawng kaihruaitu khâwlin hna a thawh ṭhat leh ṭhat loh, leh zin kawng kaihhruaina dik leh dik lova a innghah ang bawkin, kan thlarau lam, rilru lam, leh taksa lam ṭhatna pawh nungchang kaihhruaina dik takin a hruai, chhia leh ṭha hriatna dik leh dik lohvah a innghat a ni.
Lungchhiat thlâk tak maiin, chutiang kaihhruaina dik tak chu a bo thuai emaw, ngaihthah emaw a ni ṭhîn. American mi zirtîrtu pakhat chuan heti hian a sawi: “Tûn laiah chuan, United States-a school naupang tlângpui chuan ziak leh chhiar an thiam lo va, geography lamah pawh harsatna an tawhzia kan hre zîng ta hle. Tin, chhia leh ṭha thliar hran kawngah pawh harsatna an nei bawk a ni. Zirna lama harsatnate zîngah hian ziak leh chhiar thiam lohna leh lehkha thiam lohna mai bâkah, nungchang lama buaina nasa tak pawh kan telh ngei tûr a ni,” a ti. Chu bâkah, “tûn lai naupangte hi nungchang lam kaihhruaina chiang lo nuaih kârah an awm a. Tuemaw chu ‘chhia leh ṭha’ tih a awm leh awm loh han zâwt ila, chhân ngaihna hre lo, zâm hmêl, leh chiang lo nuaih hmêl chu i hmu nghâl mai ang. . . . Chutianga chian lohna chu college an kal hnuah a zual zâwk mah lehnghâl,” tiin a sawi belh a ni.
Hetianga chian lohna awm chhan pakhat chu, nungchang chungchânga tehkhâwngte chu mi mal duhzâwng emaw, hnam duhzâwng emaw azir a ni tih ngaih dân a hluar êm vâng a ni. Thlawhna khalhtute chuan kaihhruaina nghet rinchhan lo va, chhinchhiahna insawn reng, a chânga lang thei lo rinchhana an zin chhuah chuan an chungah eng thil nge lo thleng thei tih han ngaihtuah teh! Erebus Tlânga chhiatna râpthlâk tak thleng ang kha a thleng zîng ngawt ang. Chutiang bawkin, nungchang lam tehkhâwng nghet tak an zui tawh loh avângin, khawvêl hian a rah chhuah lungngaih thlâk tak tak leh thihna chu a seng a, nupa inkâra rinawm lohna avânga chhûngkaw kehdarhna leh mi maktaduai tam takin AIDS emaw, mipat hmeichhiat hmanna avânga inkaichhâwn theih natna dang emaw chu an vei a ni.
Nungchang tehkhâwng chu mi mal duhzâwng azir a ni tih chu khawvêl thilah chuan a fin thlâk pawh a ni mahna; mahse, a nihna takah chuan chutiang mite chu hmân lai Ninevi khuaa mi, mahni ‘ding lam leh vei lam’ pawh thliar hrang thei lote ang mai an ni. Nungchang tehkhâwng chu mi mal duhzâwng azir a ni titute chu Israel kalpêng, “thil ṭha lo chu thil ṭha tia, thil ṭha chu thil ṭha lo” titute ang an ni bawk.—Jona 4:11; Isaia 5:20.
Chuti a nih chuan, kan chhia leh ṭha hriatna chu min kaihruaitu rinawm tak ni tûra sawizawi nân khawi lam dân leh thu bul fiah takte nge kan râwn tâk ang? Chu kan mamawh tak chu Bible-in a phuhru thei tih mi nuai tam takte chuan an hmu chhuak a ni. Nungchang thianghlimna aṭanga hnathawh ṭhat sawimawina thlengin; fate zirtîr aṭanga Pathian chibai bûk thlengin, Bible chuan thil pawimawh engmah hmaih a nei lo. (2 Timothea 3:16) A rin tlâkzia chu kum zabi tam tak chhûng fiah a ni tawh. Bible-a nungchang tehkhâwngte chu lei leh vâna thuneitu ber, min Siamtu siam a nih avângin, mi zawng zawng tân a hman tlâk a ni. Chuvângin, chhia leh ṭha hre lova awmna tûr chhan a awm lo.
Nimahsela, tûn laiah chuan, i chhia leh ṭha hriatna chuan tûn hma zawng aiin beihna a tuar nasa zâwk a. Engtin nge chu chu a nih theih? Engtin nge i chhia leh ṭha hriatna chu i vênhim theih ang? A ṭan dân ṭha tak chu, chu beihna lo chhuahna leh a beih dânte hriat hmasak chu a ni. He mi chungchâng hi thuziak dawt lehah sawiho a ni ang. (w01 11/01)