Khawvêl Hi Hmun Ṭha Zâwkah I Siam Thei Em? — Vênnainsâng ONLINE LIBRARY

Khawvêl Hi Hmun Ṭha Zâwkah I Siam Thei Em?

“Politics chuan mipui a inzawmkhâwmtîr thei lo. Hnam dân leh nungchang ṭha ngaihhlutnate awmtîr leh tûrin a inthuam ṭha lo bawk. Sawrkâr thil tum ṭha ber pawhin hmân laia mi ang inneihna ngaih pawimawhna chu a awmtîr thei lo va, pate chu an fate chunga mawhphurhna a lâktîr thei lo bawk a, tûn hmaa mite’n an lo tawrh tawh thinurna leh lungngaihna chu a tawrhtîr leh châwk ṭhîn a . . . Min tibuaitu nungchang chhiatna zawng zawng deuhthaw chu dân hmanga paih bo theih a ni lo.”

TUN hmaa U.S. sawrkâr ṭanpui ṭhîntu thusawi, a chunga târ lan khi i pawm em? I pawm a nih chuan, duhâmna te, chhûngkuaa hmangaihna pianpui neih lohna te, nungchang bawlhhlawhna te, inngaihthahna te, leh mipui inzawmkhâwmna ei chhe thei thil dangte avânga lo awm buaina tam takte tihvenna chu eng nge ni ta ang? Mi ṭhenkhat chuan a tihvenna awm lo anga an ngaih avângin, an nî tin nunah theihtâwp chhuahin an buai ringawt mai a ni. Mi dangte chuan engtik nîah emaw chuan, hruaitu fing tak leh mipui tiphûr thiam tak, sakhaw hruaitu emaw chu a lo lang ang a, anni chu kawng dikah a hruai ang tih an ring a ni.

Dik tak chuan, kum sânghnih kalta khân, mite chuan Isua Krista chu Pathian tirh leh rorêltu ṭha ber a nih an rin avângin lala siam an lo tum tawh a. Amaherawhchu, Isua’n an thil tum a hriat chuan a insaseng thuai a. (Johana 6:14, 15) A hnuah chuan, Rom ram awptu hnênah: “Ka ram chu he khawvêla mi hi a ni lo,” tiin a hrilhfiah a ni. (Johana 18:36) Nimahsela, tûn laiah Isua awm dân latu an tlêm hle a—a hnungzuia inchhâl sakhaw hruaitute zîngah tak ngial pawh an awm mang lo a ni. An zînga ṭhenkhat chuan sawrkâr hotute kaltlang emaw, anmahni ngeiin ram inawpna lama nihna chelhin emaw he khawvêl hi hmun ṭha zâwka siam an tum a ni. Chu chu 1960 leh 70 chho bâwrvêla thilthleng aṭangin a hmuh theih a ni.

Khawvêl Siam Ṭhat Tuma Sakhaw Thawhrimnate

1960 chho bâwrvêl tâwp lamah chuan Latin-America ramtea theologian ṭhenkhat chuan retheite leh hnuaichhiahte tân hma an la a. Chu mi tihlawhtling tûr chuan liberation theology an din a, chu pâwl atân chuan Krista chu Bible-a sawi dân zâwnga chhandamtu mai ni tawh lovin, politics lam leh ei leh bâr lama chhandamtu pawh a ni tel ta hial a ni. United States-ah chuan, nungchang hlutna ei chhiata awm ngaimawh êm êm kohhran hruaitu tam tak chuan Moral Majority pâwl an din a. An tum ber chu, chhûngkaw ṭhatna tûra dân zam duh mi chu ram inawpna lama nihna chelhtîr hi a ni. Chutiang bawkin, Mosolman ram tam takah chuan, Koran thu zawm ngheh lehzualna hmangin eirûkna tihbo leh a eirutute paihthlâk chu an tum a ni.

Chutianga an thawh rimna avâng chuan khawvêl hi hmun ṭha zâwk a lo ni ta em? A tlângpui thua sawi chuan, liberation theology lâr êm êmna ramahte pawh nungchang a tla chhe zêl a, rethei leh hausa inkâr inthlauhna pawh a zau zêl bawk a ni.

Moral Majority pâwl chuan United States-a a thil tumte a hlen chhuah theih loh avângin, pâwl dintu Jerry Falwell-a chuan 1989-ah chu pâwl chu a titâwp ta a, a aiah pâwl dang alo ding ta thung a ni. Nimahsela, “moral majority,” tih thu mal phuahtu Paul Weyrich-a chuan Christianity Today magazine-ah chuan: “Inthlana kan chak pawhin, pawimawh kan tih êm êm kan thil tumte chu kan hlen chhuak thei chuang lo,” tiin a ziak. “Mihring nun dân phung chu a tlachhe hle a ni. Nun dân phung tlâkchhiatna nasa tak nêk chêpin kan awm a, chu tlâkchhiatna chu a nasat êm avângin, politics pawh a chiahpiah hneh êm êm a ni,” tiin a ziah belh bawk.

Chanchin ziaktu leh thu ziaktu Cal Thomas-a chuan politics hmanga mipuite nunphung tihchangkân tumna a hlawhchham nachhan ber nia a hriat chu heti hian a sawi a ni: “Inthlâkthlengna dik tak chu mi mal aṭanga lo awm a ni a, inthlannaa hnehna aṭanga lo awm a ni lo; kan harsatna ber chu ei leh bâr leh ram inawpna lamah a ni lo va, nungchang leh sakhaw lamah a nih zâwk avângin,” tiin.

A nih leh, tehfung dik tak awm lohna leh mahni tâna chhia leh ṭha thutâwp insiam ṭheuhna khawvêlah hian engtin nge nungchang leh thlarau lam harsatnate chu i tihven ang? Sakhaw mi emaw, mi lo emaw pawh nise, mi challangte leh thil tum ṭha nei mite chuan he khawvêl hi hmun ṭha zâwka an siam theih si loh chuan, tuin nge siam thei tâ ang le? Thuziak dawt leha kan hmuh tûr angin, a chhânna a awm a. Chu chu Isua’n a Lalram chu he khawvêla mi a ni lo a tih chhan ber chu a ni. (w01 10/15)

[Phêk 2-naa Milem Hawhtîrtute]

[Phêk 3-naa Milem Hawhtîrtute]