Abrahama​—Rinna Kawnga Entawn Tûr

“[Abrahama] ringtu zawng zawng pa.”​—ROM 4:11.

1, 2. (a) Abrahama chu tûn laia Kristian dikte zîngah eng anga hriat reng nge ni? (b) Engvângin nge Abrahama chu “ringtu zawng zawng pa” tia koh a nih?

ANI chu hnam chak tak thlahtu, zâwlnei, sumdâwng, leh hruaitu a ni a. Chuti chung chuan, a rinna nghîng thei lo avâng chuan tûn lai Kristiante zîngah pawh hriat hlawh ber a ni: chu a rinna avângin Pathian Jehova’n ṭhianah a vuah a ni. (Isaia 41:8; Jakoba 2:23) A hming chu Abrahama a ni a, Bible chuan “ringtu zawng zawng pa,” tiin a ko a ni.​—Rom 4:11.

² A nih leh Abrahama awm hmaa mi, Abela te, Enoka te, leh Nova te pawhin rinna chu an lantîr tho lo vem ni? Lantîr e; mahse, he leia hnam zawng zawngte malsâwmna tûr thuthlung chu Abrahama nêna siam a ni. (Genesis 22:18) Chutiang chuan, tupawh thutiam Chi thlaha rinna nei apiangte pa a lo ta a ni. (Galatia 3:​8, 9) Abrahama rinna chu entawn tûr a nih avângin kan pa angin engemaw chen chu a ngaih theih a ni. A nun pumhlûm mai chu rinna târ lanna anga ngaih theih a ni, fiahna a tawn nasat êm avângin. A rinna fiahna turu ber mai​—a fapa Isaaka hlân tûra thupêk​—a tawn hma hun rei takah pawh Abrahama chuan fiahna tênau deuh zâwk tam tak a lo tawng tawh a. (Genesis 22:​1, 2) Tûnah chuan chûng a rinna fiahna tawn hmasak ṭhenkhatte lo zirin, tûn laia zir tûr min pêk theihte i lo en ang u.

Ur Chhuahsan Tûra Thupêk

3. Abrama pian leh mûrna chungchâng Bible-in eng nge min hrilh?

³ Bible chuan Genesis 11:​26-ah chuan Abrama (a hnua Abrahama lo ni ta) chanchin chu hetiang hian min hrilh ṭan a: “Tera chuan kum 70 a nihin fapa Abrama te, Nahora te, Harana te a nei a,” tiin. Abrama chu Pathian ṭih mi Sema thlah a ni. (Genesis 11:​10-24) Genesis 11:​31 sawi dânin Abrama chu a chhûngte nên khawpui hausa tak “Kaldai-ho khua Ur,” Euphrates Lui chhak lama awmah chuan an khawsa a.a Chuvângin, puan ina khawsa, mi vâkvai ang mai maia seilian a ni lo va, sum leh pai leh nawm chenna hmun khawpuiah a seilian zâwk a ni. Chu Ur khua dâwrpuiahte chuan ram dang aṭanga lâk luh bungruate lei tûr a awm ngei ang. Kawngpui sîrah chuan pindan 14 nei in lian, fai ṭha tak tak, a chhûnga tui lâkna leh tui chhe paihnate pawh siam fel thlapte chu a ding thluah mai a ni.

4. (a) Ur khawpui khân Pathian dik betute tân eng chona nge a siam? (b) Engtin nge Abrama khân Jehovaah a rinna a nghah theih?

⁴ Khawvêl thila hausakna zawng zawng bâkah, Ur khua chuan Pathian dik rawngbâwl duh apiangte tân chona nasa tak a siam a ni. Chu khawpui chu milem biakna leh puithuna âtthlâk takah a inrawlh thûk em êm a. A ram hmuh theih chin zawng zawng mai chu thla pathian Nanna chawimawina in sâng hlîrin a khat a ni. Abrama chu he sakhuana tenawm taka tel ve tûr hian tihluih a ni nasa ang tih chu rinhlelh rual a ni lo. Chûng tiluitute zîngah chuan a chhûngte pawh an tel ngei ang. Juda thurochhiah ṭhenkhatin a sawi dân chuan, Abrama pa, Tera ngei chu milem siamtu a ni. (Josua 24:​2, 14, 15) Engapawh chu ni se, Abrama chu chûng sakhuana tenawm tak vuantu chu a ni ve lo. A pu tar tawh tak Sema chu a la dam a, Pathian dik a hriatna chu a hrilh ve ngei ang. Chuvâng chuan, Abrama chuan Nanna ni lovin Jehovaah chuan a rinna a nghat zâwk a ni!​—Galatia 3:6.

Rinna Fiahna

5. Abrama Ur khawpuia a la awm reng lai khân Pathianin eng thupêk leh thutiam nge a pêk?

⁵ Abrama rinna chu fiah a ni a. A hnênah Pathian a rawn inlâr a, hetiang hian thu a rawn pe a: “I khaw lam ata leh i laichînteho zîng ata leh i pa in ata chhuak la, ram ka la entîr tûr che lamah kal rawh: tichuan chi ropui takah ka siam ang chia, mal pawh ka sâwm ang chia, i hming ka tiropui bawk ang; tin, nang malsâwmna ni ang che: tin, malsâwmsaktu apiang che chu mal ka sâwm ang a, ânchhe lawhtu che chu ânchhia ka lawh ang; nangmahah chuan leia hnam tin an la intithawveng ang,” tiin.​—Genesis 12:​1-3, NW; Tirhkohte 7:​2, 3.

6. Engvângin nge Ur khawpui chhuahsan tûr chuan Abrama tân rinna tak tak a ngaih?

⁶ Abrama chu upa tawh tak, fa nei lo a ni lehnghâl si a. ‘Engtin nge chi ropui takah’ siam a nih theih ang? Chu bâkah, a kalna tûra a hrilh ram hi khawi ram nge ni ang? Chûngte chu Pathianin a la hrilh si lo. Chuvâng chuan khaw hausa tak Ur leh a nawmna zawng zawng kalsan tûr chuan Abrama chuan rinna tak tak a neih a ngai a ni. Family, Love and the Bible tih lehkhabu chuan hmân lai hun chungchâng hetiang hian a sawi a: “Chhûngkaw zînga mi tuemawin sual khûn khân tak an tihsuala a hremna râpthlâk ber mai chu hnawhchhuah, chhûngkaw ‘mi’ nihna aṭanga tuithlâr . . . a ni a. Chuvângin Abrahama’n Pathian kohna a hmuh a, a ram chang ni lo, a laichînte nên lam a kalsan khân Pathian a rinzia leh a thu a âwihzia târ lanna mak chungchuang a ni,” tiin.

7. Tûn laia Kristiante’n Abrama tawn ang fiahnate engtin nge an tawn ve theih?

⁷ Tûn laia Kristiante pawhin chutiang bawk fiahna chu an tawng mai thei. Abrama ang bawkin, theocratic thilte aia khawvêl thil hausaknate ngai pawimawh hmasa tûrin nêksâwr kan ni mai thei. (1 Johana 2:16) Inkawmhona ṭha lova min hruailuh tumtu, kan chhûngkhat zînga kawm serhte pawh tiamin, chhûngkaw zînga ring lotute dodâlna te pawh kan tawng mai thei. (Matthaia 10:​34-36; 1 Korinth 5:​11-13; 15:33) Chuvângin, Abrama chuan kan tân entawn tûr ṭha tak a siam a ni. Chhûngkaw inzawmna hial pawh tiamin, thil dang zawng zawng aiin Jehova nêna inṭhian ṭhatna chu a dah hmasa zâwk a ni. Pathian thutiam lo thlen famkim dân tûr, a thlen famkim hun tûr leh a hmun tûr pawh engmah a hre chiang lo. Amaherawhchu, chûng thutiamte rinchhana nun chu a inhuam a ni. Tûn lai kan nuna Lalram dah hmasa tûra min fuihtu ṭha a va ni êm!​—Matthaia 6:33.

8. Abrama rinna khân a chhûngkaw hnai vaite chu engtin nge a nghawng a, chuta ṭang chuan Kristiante’n eng nge an zir theih?

⁸ A nih leh Abrama chhûngkaw hnai vaite engtin nge an awm ve le? Abrahama rinna leh rin tlatna chuan a nupui, Saraii, leh a vahpa fahrah Lota te chungah chuan nghawng a nei a ni ngei ang, anni pawh chuan Pathian kohna chu âwihin Ur khawpui chu an chhuahsan ve a ni. Tin, chu mi hnuah Abrama unaupa Nahora leh a fa ṭhenkhatte pawh chuan Ur khawpui chu chhuahsanin, Haran-ah an inbêngbel a, chutah chuan Jehova chibai an bûk a ni. (Genesis 24:​1-4, 10, 31; 27:43; 29:4, 5) Abrama pa, Tera ngei pawhin a fapa ruala kal chhuah chu a pawm hial bawk! Bible pawhin, ani chu Kanaan khaw lam pana pêm, chhûngkaw pa ber angin a sawi hial a ni. (Genesis 11:31) Keini pawh kan chhûng leh khatte hnêna fing thiam taka thu kan hrilh chuan hlawhlinna nasa tak kan nei lo vang tih tunge sawi thei?

9. Abrama khân a zin hmain eng inbuatsaihna nge a siam ngai a, chutah chuan engvângin nge inpumpêkna a ngaih?

⁹ A pêm chhuah ṭan hmain Abrama chuan thil tih tûr tam tak a nei a. A in hmun lo ram leh a thil neihte a hralh a ngai a; puan inte, sabengtungte, chaw, leh thil mamawh dangte a lei a ngai bawk a. Chutianga hman hmawh taka inbuatsaihna avâng chuan sum leh pai pawh a hmuh tûr ang a hmuh loh phah mai thei bawk a; mahse, Jehova thu zawm chu a duh a ni. A inbuatsaihna chu a zo va, Abrama ran rual chu zin chhuak mai tûra inpeih diamin Ur khaw pâwna a ding a: chu mi nî chu ni pawimawh tak a va ni dâwn êm! Ran rual chuan Euphrates Lui dung chu zui zêlin, hmâr thlang lam a pan zêl a. Chawlhkâr engemaw zât hnu, kilometer 1,000 vêl a zin hnuah chuan, Mesopotamia hmâr lama khawpui pakhat Haran an tih chu an thleng ta a, chu khawpui chu ran rual zinte chawlhna hmunpui a ni.

10, 11. (a) Abrama Harana a chawlh lailâwk chhan kha engvâng nge ni? (b) Nu leh pa upa tawhte enkawltu Kristiante hnênah eng fuihna nge pêk theih a nih?

¹⁰ Abrama chu Harana a inbenbel chhan chu a pa upa tawh tak, Tera a ngaihtuah vâng a nih a rinawm hle. (Leviticus 19:32) Tûn laia Kristian tam takte pawhin chutiang bawka nu leh pa hrisêl lo emaw, upa tawh te emaw enkawl tûra mawhphurhna an nei a, ṭhenkhat phei chu chutiang ti tûr chuan an insiamrem a ngai hial a ni. Chutianga tih a ngaih huna a titute chuan an inpumpêkna chu “Pathian lâwmzâwng a ni” tih an ring tlat thei a ni.​—1 Timothea 5:4.

¹¹ Hun a ral zêl a. “Tera dam chhûng chu kum 205 a ni a; tin, Tera chu Haran khuaah chuan a thi ta a.” A pa a chân avângin Abrama chu a lungngai hle a; mahse, a sûn hun chhûng a zawh veleh a zin kawng chu a chhunzawm leh nghâl a. “Abrahama chu Haran khua ata a chhuah lai chuan kum 75 mi a ni a. Tin, Abraman a nupui Saraii leh, a nau fapa Lota leh an sum deh chhuah zawng zawng leh Haran khuaa an mi neih tâkte chu a hruai a; Kanaan rama kal tûrin an chhuak a.”​—Genesis 11:32; 12:​4, 5.

12. Harana a châm chhûng khân Abrama’n eng nge a tih?

¹² Thil mak tak mai chu, Harana a châm chhûng khân Abrama chuan “sum deh chhuah” a nei hman kha a ni. Ur khawpui a chhuahsan lai khân bungrua chân nei mah se, Haran a chhuahsan chuan mi hausa tak a ni hman tho va. Pathianin mal a sâwm vâng tih a chiang hle a ni. (Thuhriltu 5:19) Pathian chuan tûn laia a mite chu hausakna tiam vek lo mah se, Lalram avânga ‘in emaw, unaupate emaw, farnute emaw, kalsan’ tate mamawh phuhrûk tûra a thutiamah chuan a rinawm tlat a ni. (Marka 10:​29, 30) Abrama chuan ‘mi pawh a nei’ bawk a, chu chu chhiahhlawh tam tak a neihte chu an ni. Jerusalem Targum leh Chaldee Paraphrase lehkhabute chuan Abrama chu ‘sakhaw thlâktîrtu’ ti hialin a sawi. (Genesis 18:19) Nang pawh i rinna chuan i ṭhenawm te, hna thawhpui te, a nih loh leh school kalpuite hnêna thu hril tûrin a chêttîr ve che em? Abrama chuan Pathian thupêk chu theihnghilh a, Harana inbenbel ai chuan, chuta a châm chhûng chu ṭangkai takin a hmang zâwk a ni. Mahse, chuta a châm tûr hun chhûng chu a tâwp ta. “Chutichuan Abrama chu LALPAN a hnêna a sawi angin a kal ta a.”​—Genesis 12:4.

Euphrates Lui Kânin

13. Engtikin nge Abrama chuan Euphrates Lui a kân a, chu chu engvânga pawimawh êm êm nge ni?

¹³ Abrama chu a zin chhuah a ngai leh ta a. Haran kalsanin, a ran rual chu khawthlang lam kilometer 90 vêla hlaah a kal ta a. Tin, hmân lai sum dâwnna hmunpui Karkemis hmuna Euphrates lui a kân hmain Abrama chu a châwl phawt a nih a rinawm a ni. Heti lai hmun hi ran ruala zinte’n lui an kânna hmunpui a ni.b Eng hunah nge Abrama leh a ran rual chuan he lui chu an kân? B.C.E. 1513 Nisan 14-a Judate’n Aigupta an chhuahsan hma kum 430-a thleng tawh a ni tih Bible chuan a târ lang a ni. Exodus 12:41 chuan heti hian a sawi: “Heti hi a ni a, kum 430 a lo ral chuan, chu mi nî ngei chuan heti hi a ni a, LALPA mipuiho zawng zawngte chu Aigupta ram ata an chhuak ta a,” tiin. Chuti a nih chuan, Abrama thuthlung chu B.C.E. 1943, Nisan 14, Abrama’n thuawih taka Euphrates lui a kân aṭang khân a inṭan a nih ngei a rinawm ta a ni.

14. (a) Abrama khân a rinna mitin eng nge a hmuh? (b) Tûn laia Pathian mite hi eng kawngin nge Abrama aia nasaa mal sâwm an nih?

¹⁴ Abrama chuan khawpui hausa tak chu a hnuchhawn a. Mahse, “khua lungphûmte nei mi,” mihringte awptu tûr felna sawrkâr chu a hmu lâwk thei a ni. (Hebrai 11:10) Ni e, hriattîrna tlêm tê chauh dawng mah se, Abrama chuan mihring boral mêkte chhan chhuah nâna Pathian thil tum bul ṭhenkhat chu a hre thiam ṭan ta a. Tûnah chuan, Abrama neih Pathian thil tumte hriatthiamna aia nasa hriatthiamna kan nei a ni. (Thufingte 4:18) “Khawpui,” a nih loh leh Lalram sawrkâr, Abrama beisei chu tûnah chuan atakin a lo thleng ta​—1914 aṭang khân vânah din a ni tawh a ni. Chuvângin, Jehova rinna leh rinchhanna kan lantîr tûr a ni dâwn lâwm ni?

Ram Tiama Khawsak Inṭanna

15, 16. (a) Engvângin nge Jehova maichâm siam tûr khân Abrama tân huaisen a ngaih? (b) Engtin nge tûn lai Kristiante hi Abrama anga an huaisen theih ang?

¹⁵ Genesis 12:​5, 6 chuan tihian min hrilh: “Kanaan ram chu an thleng ta a. Tin, Abrama chu, chu mi ramah chuan Sekem hmun thlengin, More sasua thleng chuan a kal zêl a,” tiin. Sekem chu Jerusalem hmâr lam kilometer 50-a hlaa awm a ni a, “ram thianghlim paradise” tia sawi phairuam ram ṭha taka awm a ni. Chutichung pawh chuan, “chûng lai chuan Kanaanhote chu chu mi ramah chuan an awm” a ni. Kanaanhote chu nungchang lamah an bawlhhlawh êm avângin, chûng an bawlhhlawhnate aṭanga a chhûngte vênghim tûrin Abrama chuan theihtâwp a chhuah a ngai ngei ang.​—Exodus 34.11-16.

¹⁶ A vawihnihna atân, “LALPA chu Abrama hnêna a inlâr a, ‘He ram hi i thlahte hnênah ka la pe ang,’ a ti a.” A va phûrawm êm! A thlah lo la awm tûrte neih tûr thila lâwm tûr chuan Abrama tân rinna a neih a ngai a ni. Chuti chung pawh chuan, Abrama chuan “chutah chuan a hnêna inlâr LALPA tân chuan maichâm a siam” a ni. (Genesis 12:7) Bible zirlai pakhat chuan: “Chu mi rama maichâm a siamna chuan a rinna avânga a neih dikna ṭanchhanin, chu ram chu a la tih entîrna a ni,” a ti. Chutianga maichâm sak chu a huaisen thlâk hle bawk. Chu maichâm chu a hnua Dân thuthlungin a sawi, lung chher miah lohva siam chu a ni. (Exodus 20:​24, 25) Chuvângin, Kanaan mite hman maichâm nên chuan a inang lo hle dâwn a ni. Chutiang chuan, Abrama chuan Pathian dik, Jeova chibai bûktu a nihzia chu huaisen taka lantîrin, huatna leh taksa lam tâna hlauhawm awm theite lakah a inpho chhuak a ni. Keini chungchâng chu eng nge ni ve le? Kan zînga ṭhenkhat​—a bîk takin naupangte​—hian kan ṭhenawmte emaw, school kalpuite emaw hnênah Jehova chibai bûktu kan nihzia kan lantîr hreh em? Huaisenna kawnga entawn tûr Abrama siam chuan Jehova chhiahhlawh kan nih hi chhuang tûrin min fuih ṭheuh rawh se!

17. Abrama khân Pathian hming puang chhuaktu a nihzia engtin nge a târ lan a, chu chuan tûn laia Kristiante chu eng nge a hriatnawntîr?

¹⁷ Abrama chuan a kalna apiangah Jehova chibai bûkna chu a dah hmasa ber ziah a. “Tin, chuta ṭang chuan Babel chhak lama tlângah chuan a insawn a, chutah chuan a puan in a zâr a, a thlang lamah chuan Bethel chu a awm a, a chhak lamah Ai khua a awm a, chutah chuan LALPA tân maichâm a siam leh a, LALPA hming chu a lam a.” (Genesis 12:​8) Hebrai thumal “hming chu a lam,” tih hi “hming chu a puang chhuak (a hril)” tihna pawh a ni. Abrama chuan a ṭhenawm Kanaan mite zîngah chuan Jehova hming chu huaisen takin a puang chhuak a ni tih a chiang a. (Genesis 14:​22-24) Hei hian tûn laia ‘a hming ṭanna’ kawnga kan tih theih tâwka tam tih tûr kan neih chu min hriatnawntîr a ni.​—Hebrai 13:15; Rom 10:10.

18. Abrama leh Kanaan rama chêngte inlaichîn dân kha eng nge ni?

¹⁸ Abrama chu hêng hmunah hian a khawsa rei lo va. “Abrama chu chhim ram lam pan cheuvin a insawn ta zêl a”​—Juda tlâng ram chhim lam ram ro zâwk lamah chuan. (Genesis 12:9) A insawn kual zêl a, a insawnna hmun thar a piangah chuan Jehova chibai bûktu a ni tih a tilang zêl a; chutiang chuan Abrama leh a chhûngte chuan “leiah hian mikhual leh khualzin mai an ni tih an inhriattîr,” a ni. (Hebrai 11:13) Chûng hun chhûng zawng chuan, an ṭhenawm milem biate nêna inhnai lutuk lo tûrin an invêng reng bawk a ni. Chutiang bawkin tûn laia Kristiante pawh ‘khawvêla mi nih loh,’ an tum tûr a ni. (Johana 17:16) Kan ṭhenawmte leh hna thawhpuite laka ngil kan neih a, kan hawihhâwm êm êm laiin, Pathian laka inmihran khawvêl thlarau lantîr nungchangin min tihbuai loh nân kan fîmkhur êm êm a ni.​—Ephesi 2:​2, 3.

19. (a) Engvângin nge vahvaih reng chu Abrama leh Saraii te tân chona a nih? (b) Abrama tân eng chona dang nge lo inher chhuak?

¹⁹ Abrama leh Saraii te tân chuan chutianga vahvaih reng mai chu thil awlai a ni dâwn lo tih hi i theihnghilh ngai lo vang u. Ur bazaara thil ṭha ṭhate ei lovin, anmahni ran rual ami ngei an ei zâwk a; in ṭha tak aiin puan inahte an chêng zâwk bawk a ni. (Hebrai 11:9) Abrama chu a buai reng a; a ran rual leh a chhiahhlawhte enkawl tûr a ngah êm êm a ni. Saraii pawhin chutiang hun laia hmeichhe thawh ṭhin: chhangphut hmeh te, chhang siam te, la kaih te, leh puan ṭhui te chu a thawh ve ngei a rinawm bawk. (Genesis 18:​6, 7; 2 Lalte 23:7; Thufingte 31:19; Ezekiela 13:18) Mahse, fiahna thar a la rawn inher chhuak leh ta cheu mai. Abrama leh a chhûngte chuan an nunna atâna hlauhawm tak mai dinhmun dang chu an tawng thuai dâwn. Chûng chonate do thei tûr khawp chuan Abrama rinna chu a chak tâwk ang em le? (w01 8/15)

[Footnote-te]

I Chhinchhiah Em?

• Engvângin nge Abrama chu “ringtu zawng zawng pa” tia koh a nih?

• Kaldai ram Ur khawpui chhuahsan tûrin Abrama’n engvângin nge rinna a neih a ngaih?

• Abrama khân Jehova chibai bûkna a dah pawimawh hmasa ber a ni tih engtin nge a lantîr?

[Phêk 20-naa map]

(A lan dân tûr dik tak hriat nân, a lehkhabu en rawh)

ABRAMA ZIN KAWNG

Ur

Haran

Karkemis

KANAAN

Great Sea

[Milem Hawhtîrtu]

Based on a map copyrighted by Pictorial Archive (Near Eastern History) Est. and Survey of Israel

[Phêk 19-naa milem]

Ur khawpuia nun nuam tak kalsan tûr chuan Abrama tân rinna a ngai

[Phêk 22-naa milem]

Puan ina chêngin, Abrama leh a chhûngte chuan “leiah hian mikhual leh khualzin mai an ni tih an inhriattîr”