Jehova I Hriat Avângin Lâwm Rawh
“Pathian thu hriaa zâwmte hi mi hamṭha an ni.”—LUKA 11:28.
1. Engtikin nge Jehova’n mihringte a biak pawh ṭan?
JEHOVA chuan mihringte a hmangaih a, an chungchâng a ngaihven êm êm a ni. Chuvângin, anmahni a be pawp ṭhîn pawh hi thil mak a ni lo. Chutianga a biakpawhna chu Eden huan aṭangin a inṭan a. Genesis 3:8 sawi dânin ṭum khat chu Adama leh Evi chuan: “Tlai ni nêma” Jehova “lêng thâwm chu an lo hria a.” Ṭhenkhat chuan nî tin hetiang hunah hian Jehova chuan Adama a be ṭhîn tih he thuziak hian a lantîr an ti a ni. Enga pawh chu ni se, Pathian chuan mipa hmasa ber chu kaihhruainate pêk nân mai ni lovin, a mawhphurhnate hlen chhuak tûra a hriat ngaite zirtîr nân hun a hmang ṭhîn tih Bible chuan chiang takin a sawi a ni.—Genesis 1:28-30.
2. Engtin nge nupa hmasa berte kha Jehova kaihhruaina aṭanga an inlâk hran a, chu chuan eng nge a rah chhuah?
2 Jehova chuan Adama leh Evi chu nunna a pe a, ramsate chung leh lei pumpuia thuneihna a pe a ni. Nimahsela, khap pakhat a nei—a chhia leh a ṭha hriatna thing rah ei chu. Setana lakah tlâwmin, Adama leh Evi chuan Pathian thupêk chu an bawhchhe ta a. (Genesis 2:16, 17; 3:1-6) Anmahni thuin a ṭha leh ṭha lo an thlang a, zalên taka thiltih chu an thlang ta a ni. Tichuan, âtthlâk takin hmangaihnaa khat anmahni Siamtu kaihhruaina ata chu an inlahrang ta. Chu mi sawhkhâwk chu an tân leh an thlah lo la awm tûrte tân chuan râpthlâk tak a ni. Adama leh Evi chu an lo tar a, a tâwpah chuan thawhlehna beisei tûr rêng nei lovin an thi hlen ta a. An thlahte chuan sualna leh a rah chhuah thihna chu an rochung ta zêl a ni.—Rom 5:12.
3. Engvângin nge Jehova’n Kaina a biak a, Kaina’n engtin nge a chhân lêt?
3 Eden huana helna a awm chung pawhin, Jehova chuan a mihring siamte chu a be chhunzawm zêl tho va. Adama leh Evi te fatîr Kaina chu suala tlûk lûh mai theihna dinhmun derthâwng takah a ding a. Jehova chuan suala a tlûk luh teuhzia hrilhin, ‘thil ti ṭha’ tûrin a hrilh a ni. Kaina chuan chu zilhhauna chu hnâwlin, a unaupa a that ta a. (Genesis 4:3-8) Chutiang chuan, he leia mihring lo piang hmasa pathumte chuan, anmahni nunna petu ngei, an ṭhatna tûra a mite zirtîrtu Pathian kaihhruaina fel leh fiah tak chu ngainêp takin an lo hnâwl ta a ni. (Isaia 48:17) Chu chuan Jehova a tihbeidawn tûrzia mai chu aw!
Hmân Lai Mi Rinawmte Hnênah Jehova A Inpuang
4. Adama thlahte chungchângah Jehova’n eng nge a rin ngheh tlat a, chu a rin nghehna avâng chuan eng beiseina thuchah nge a puan chhuah?
4 Mihringte a biakpawhna chu titâwp thei reng mah se, Jehova chuan a titâwp lo. Adama thlahte zînga tute emaw chuan A kaihhruaina chu an la ngaithla dâwn tih a ring tlat a ni. Entîr nân, Adama leh Evi chunga rorêlna a puan khân, “chi” lo la awm tûr chu Rulpui, Diabol-Setana do tûrin a rawn ding ang tih Jehova chuan a sawi lâwk a. A tâwpah Setana lu chu tih thitlinin a awm dâwn a ni. (Genesis 3:15) Chu hrilh lâwkna chu “Pathian thu hriaa zâwmte” tân chuan beiseina thuchah lâwmawm tak a ni.—Luka 11:28.
5, 6. C.E., kum zabi pakhatna hma lam khân engtin nge Jehova’n a mite a lo biak pawh ṭhin a, chu chu anni’n engtin nge an lo hlâwkpui?
5 Jehova chuan hmân lai mi rinawm Nova te, Abrahama te, Isaka te, Jakoba te leh Joba te hnênah chuan a duhzâwng chu a hriattîr a. (Genesis 6:13; Exodus 33:1; Joba 38:1-3) Chu mi hnuah Mosia kal tlangin Israel hnam pum pui tân a dân bulte chu a zam ta a ni. Israel mite chuan chu Mosia Dân chu kawng tam takin an hlâwkpui a. Chu dân chu an zawm avângin, Israel chu Pathian mi thlan bîk, hnam dang zawng zawngte laka tih hran an lo ni ta a ni. Chu Dân chu an zawm phawt chuan khawvêl thilah mai ni lo, thlarau lamah pawh mal a sâwm ang a, lalrama puithiam, hnam thianghlimah a siam ang tih Pathianin Israel mite chu a tiam a ni. Dân chuan hrisêlna ṭha an neih theih nân ei leh in chungchâng leh zun ram thiar chungchâng thlenga zawm tûr a pe a. Nimahsela, chu dân chu an zawm loh chuan rah râpthlâk tak a chhuah tûr thu pawh Jehova chuan a vâukhân lâwk bawk a ni.—Exodus 19:5, 6; Deuteronomy 28:1-68.
6 Tichuan, Bible thuah chuan Pathian thâwkkhum lehkhabu dangte telh belh a ni ta zêl a. Chûng Bible-a hmân lai chanchin ziahna chuan Jehova’n hnamte leh mite a enkawl dân chungchâng min hrilh a. Hla thua chham chuah lehkhabute chuan a mize mawi takte a sawifiah a. Tin, hrilhlâwkna lam lehkhabute chuan nakina Jehova duhzâwng lo thlen famkim dân tûr min hrilh bawk a ni. Hmân laia mi rinawmte chuan chûng Pathian thâwk khum lehkha thute chu ngun taka zirin, an nunah a takin an hmang a. Mi pakhat chuan hetiang hian a lo ziak a ni: “I thu hi ka ke atânte hian khâwmvâr a ni a, ka kawng atân êng a ni,” tiin. (Sâm 119:105) Chûng a thu ngaithla duhte chu Jehova’n thiamna leh finvârna a pe ṭhîn.
Êng Chu A Êng Deuh Deuh
7. Isua chuan thilmakte ti mah se, engtia hriat lâr zâwk nge a nih a, engvâng nge?
7 Kum zabi pakhatna lai vêlah khân, Juda sakhaw hruaitute chuan Dânah chuan mihring thurochhiahte an belh ta a. Dân chu hman khaw loh a ni ta a, chûng an mihring thurochhiah belhte avâng chuan finvârna bul ni tawh lovin, phurritah a lo chang ta zâwk a ni. (Matthaia 23:2-4) Nimahsela, C.E., 29 chuan Isua chu Messia angin a lo lang ta a. A rawngbâwlna chu mihringte tâna a nun pêk mai bâkah, “thutak hriattîr” pawh a ni bawk a ni. Thilmakte a ti nâ a, “Zirtîrtu” tia hriat lâr zâwk a ni. A zirtîrna chu mite rilru tuamtu thlarau lam thim rawn chhun tlangtu êng zung ang mai a ni. Amah Isua ngeiin: “Kei khawvêl êntu ka ni,” a ti a ni.—Johana 8:12; 11:28; 18:37.
8. C.E., kum zabi pakhatnaah eng Pathian thâwk khum lehkhabute nge ziah a nih a, chu chu Kristian hmasate’n engtin nge an hlâwkpui?
8 Chu mi hnu chuan Isua dam lai chanchin ziahna Chanchin Ṭha bu pali leh, Isua thih hnua Kristianna lo darh dân chanchin ziahna, Tirhkohte lehkhabu chu belh a ni leh ta bawk a ni. Chûng bute leh hrilh lâwk thu chuanna bu, Thu Puan bute pawh chu thlarauva thâwk khum Isua zirtîrte ziah a ni a. Chûng thu ziakte leh Hebrai Pathian Lehkha Thu inkawp aṭangte chuan Bible bu pum pui hi a lo chhuak ta a ni. Chu thâwk khum lehkhabu belhkhâwmte ṭanpuinain Kristiante chuan thutak chu ‘mi thianghlim zawng zawng nên chuan a zauzia te, a seizia te, a sânzia te, a thûkzia te an hre chiang’ thei ta a. (Ephesi 3:14-18) “Krista rilru” an lo nei thei ta a ni. (1 Korinth 2:16) Amaherawhchu, chûng Kristian hmasate chuan Jehova thiltumte chungchâng zawng zawng chu an hre thiam vek lo. Tirhkoh Paula chuan a rinpuite hetiang hian lehkha a thawn a: “Tûnah zawng [thîra siam] dârthlalangah kan hmu riai ruai a ni,” tiin. (1 Korinth 13:12) Chutiang thîra siam dârthlalangah chuan chiang lo deuhvin, thil lan dân tlângpui chauh a hmuh theih ṭhîn a. Pathian Thu hriatthiamna kimchang zâwk chu lo la thleng tûr chauh a ni.
9. “Ni hnuhnûngte” chhûngin eng finvârna nge thleng?
9 Tûnah hian, “hun khirh takte” awmna hun “ni hnuhnûngahte” tia sawi hunah kan awm tawh a ni. (2 Timothea 3:1) Zâwlnei Daniela chuan ni hnuhnûng chhûng hian “hriatnate a pung dâwn” tiin a hrilh lâwk tlat a. (Daniela 12:4) Chuvângin, min Bepawhtu Ropui, Jehova, chuan mi thinlung ṭhate chu a thu awmzia man thiam tûrin a ṭanpui a ni. Tûnah chuan mi tam takte chuan Isua Krista chuan kum 1914 khân hmuh theih lohvin vânah lalṭhuthleng a luah tawh tih an hre thiam tawh a. Tin, he leia suahsualna zawng zawng hi a tibo vek ang a, he lei pum pui hi paradis-ah a chantîr thuai dâwn tih pawh an hre bawk a ni. Chu Lalram chanchin ṭha pawimawh tak mai chanchin chu tûnah hian khawvêl pum puiah hrilh mêk a ni.—Matthaia 24:14.
10. Kum zabi tîr aṭanga tun thlenga miten Jehova fuihna chu engtin nge an chhânlêt?
10 Ni e, hmân lai ata tawh tûn thlengin Jehova chuan a duhzâwng leh thil tumte chu khawvêla mite a hriattîr a. Bible-a chhinchhiah chuan Pathian finna ngaihthla a, a taka nunpuitute chu malsâwm an nih thu a sawifiah a. Tin, Pathianin hmangaih taka a fuihna hnâwl a, Adama leh Evi nun kawng ṭha lo zawhtu mi dangte chanchin pawh a sawi bawk. Isua’n entîr nei kawng pahnih chungchâng a sawi khân he dinhmun hi a tehkhin a ni. Kawng pakhat chuan boralnaah a hruai a. Chu kawng chu zau leh nuam tak a ni a, Pathian Thu hnâwltu mi tam takin an zawh a ni. Kawng pakhat dang chuan chatuan nunnaah a hruai thung a. Chu kawng chu a bumboh nâ a, Pathian Thu pawmtu leh chu mi mila nung tlêm tête’n an zawh a ni.—Matthaia 7:13, 14.
Kan Neih Achunga Lâwmna
11. Bible kan hriatna leh rinna chuan eng nge a lantîr?
11 Nunna kawng thlangtu zînga mi i ni em? I nih phawt chuan chu ta kal reng chu i duh ngei ang a. Engtin nge i kal reng theih ang? Bible thutak hriatnain i nuna malsâwmna a thlente chu chhût ṭhîn la; ngaihlu hle ang che. Chanchin ṭha i han chhânglêt ringawt mai pawh hi Pathian malsâwmna lantîrna chu a ni pang mai a. Chu chu a Pa hnêna Isua a ṭawngṭai khân a lantîr chiang hle a ni. Hetiang hian a ṭawngṭai a: “Aw ka pa, lei leh vân Lalpa, nangin mi fing leh mi bengvârte hnênah hêng thu hi i zêp a, nausênte hnêna i puan avâng hian ka fak a che,” tiin. (Matthaia 11:25) Sangha mantute leh chhiah khawntute chuan Isua zirtîrna chu an man thiam a, sakhaw hruaitu lehkha thiam sâng tak takte erawh chuan an man thiam lo thung. Isua chuan tihian a sawi zawm a: “Pa mi tîrtuin a hîp loh chuan tumah ka hnênah an lo kal thei lo vang,” tiiin. (Johana 6:44) Bible i lo hriat a, i rin a, a zirtîrnate i zawm chuan Jehova’n a hîp che tihna a ni a. Chu chu hlimna tûr chhan ṭha tak a ni.
12. Eng kawngtein nge Bible-in min tihfinvâr?
12 Pathian Thu-in a kente chu mi tizalen thei thutak leh finvârna min pe thei thilte a ni a. Tichuan tupawh Bible hriatna mila nungte chu puithuna aṭang te, zirtîrna dik lo aṭang te, leh mi maktaduai tak tamte awpbettu thimna aṭangtea chhuahin an awm a ni. Entîr nân, soul chungchânga thudik hriatna chuan mitthiin min tina ang tih hlauhna emaw, kan hmangaih thi tate chuan hrehawm an tuar ang tih hlauhna emaw ata min chhuah a. (Ezekiela 18:4) Vântirhkoh suaksual chungchâng thudik hriatna chuan thlarau zâwlna hlauhawm tak pumpelh tûrin min ṭanpui bawk. Tin, thawhlehna chungchâng zirtîrna chuan hmangaihte chân tawhte a thlamuan bawk a ni. (Johana 11:25) Bible hrilh lâwknate chuan eng ang fakauva tâwpna hunah nge kan awm tawh tih min hrilh a, hun lo la awm tûr atâna Pathian thutiamahte rinngamna min pe bawk a ni. Chatuana nun kan beiseina chu a tinghet bawk a ni.
13. Pathian Thu zawmna chu engtin nge tisa lamin kan hlâwkpui?
13 Bible-a Pathian dân bulte chuan kan taksa tâna ṭha tûr zâwnga nun dân min zirtîr a. Entîr nân, kan taksa tibawlhhlawh thei, sahdah leh damdawi hman sualna te pumpelh dân kan zir a ni. Tin, zu ruih kan pumpelh bawk. (2 Korinth 7:1) Nungchang lama Pathian dânte zawmna chuan mipat hmeichhiat hmanna aṭanga kai chhâwn theih natna lak ata min humhim bawk. (1 Korinth 6:18) Sum ngaina mi ni lo tûra Pathian min fuihna kan zawm avângin, mi tam takin hausak ûmna avânga an neih theih loh rilru thlamuanna chu kan nei bawk a ni. (1 Timothea 6:10) Pathian Thu a taka i nunpui avângin eng kawngtein nge i hlâwkpui ve le?
14. Thlarau thianghlimin kan nunah eng thununna nge a neih?
14 Pathian Thu mila kan nun chuan, Jehova thlarau thianghlim kan dawng a. Krista mizia ang, mize ngaihnatawm tak tak, zahngaihna leh lainatna angte chu kan nei ṭhîn a ni. (Ephesi 4:24, 32) Pathian thlarau chuan a rah—hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insûmtheihna te—min pe bawk a ni. (Galatia 5:22, 23) Hêng ziate hian hlimna leh mi dangte nêna inlaichînna awmze nei tak a siam a; mi dangte tih hian chhûngkaw zînga mite pawh a huam vek a ni. Tin, harsatna kan tawn pawha huaisen taka hma chhawn thei tûrin chakna min pe bawk. I nuna thlarau thianghlimin ṭha zâwka hna a thawh dân i hmu thiam em?
15. Pathian duhzâwng nêna inmila nun chu engtin nge kan hlâwkpui?
15 Pathian thu nêna inmila kan nun chuan Jehova nêna kan inlaichînna kan tinghet a. Ani chuan min hre thiamin, min hmangaih a ni tih kan rinna chu a nghet tial tial a ni. Hun harsa kan tawn hunah pawh min chhawmdâwl zêl tih thiltawnte aṭangin kan hre bawk. (Sâm 18:18) Tin, kan ṭawngṭainate a chhâng ngei a ni tih kan hre thiam a ni. (Sâm 65:2) A kaihhruainate chu kan tâna ṭha tûr a ni tih hriain, chûngah chuan kan innghat tlat a ni. Chumai bâkah, a hun takah chuan Pathianin a mi rinawmte chu ṭha famkimin a siam ang a, chatuan nunna a pe ang tih beiseina ropui tak chu kan nei bawk a ni. (Rom 6:23) “Pathian hnaih rawh, tichuan anin a hnaih ang che u.” (Jakoba 4:8) Amah i hnaih poh leh Jehova nêna in inlaichînna chu nghet deuh deuhvin i hre ve em?
Tehkhin Rual Loh Rohlu
16. Kum zabi pakhatnaa Kristian ṭhenkhatte khân eng inthlâkdanglamna nge an neih?
16 Kum zabi pakhatnaa thlarauva hriak thih Kristiante zînga ṭhenkhat chu tûn hmaa inngaih hmangte, uirête, mawngkawhurte, rûk hmangte, mi duhâmte, zu ruih hmangte, mi hau hmangte, leh hlêprute an lo nih ṭhin thu Paula chuan a hriatnawntîr a ni. (1 Korinth 6:9-11) Mahse, Bible thutak chuan nasa takin anni chu a inthlâk danglamtîr a; “tlenfai” an ni tawh a ni. Bible aṭanga i zir, mi tizalên thei thutak tel lova i nun awm dân tûr chu han ngaihtuah chhin teh. Thutak chu tehkhin rual loh rohlu a ni tak zet a ni. Jehova’n min biakpawh avâng hian a va han lâwmawm êm!
17. Jehova Thuhretute chu engtinnge Kristian inkhâwmnaah thlarau lama châwm an nih?
17 Chu lovah, malsâwmna dang, hnam tin leh chi tin kan inuauna hi han ngaihtuah leh teh! “Bâwih rinawm, fing tak” chuan thlarau lam chaw, Bible-te, magazine-te, leh thu leh hla chhuah dang tam tak ṭawng chi hrang hrangin a hun takah min pe zêl a ni. (Matthaia 24:45-47) Kum 2000 chhûnga kohhran inkhâwmah chuan, ram hrang hranga Jehova Thuhretute chuan Hebrai Pathian Lehkhabu bu lian tak tak pariat aṭanga thu pawimawh tak takte chu an ennawn a. Insight on the Scriptures-a târ lan Bible-a chuang mi 40 laite nungchang chu an zir bawk a ni. The Greatest Man Who Ever Lived tih lehkhabu hmun lia ṭhena hmun khat vêl leh Pay Attention to Daniel’s Prophecy! bu pum pui deuhthaw an zir bawk. Zirtûr thuziak 52-te bâkah, chutiang ang tluk deuh bawka pawimawh Vênnainsâng magazine aṭanga lâk thuziak sawmthum paruk lai an zir bawk a ni. Chu chang a la ni lo cheu, Jehova mite chu Kan Lalram Rawngbâwlna bu 12 leh Bible thu chi hrang hrang ṭanchhan kâr tina vântlâng thusawite hmanga châwm an la ni cheu bawk. Thlarau lam hriatna chu a va hnianghnâr êm!
18. Eng kawngin nge Kristian kohhran kal tlanga ṭanpui kan nih?
18 Khawvêl pum puia kohhran 91,000 aia tamte chuan inkhâwm leh inkawmkhâwmna kaltlangin ṭanpuina leh fuihna a pe chhuak a ni. Tin, thlarau lama min ṭanpui inhuam reng kan Kristianpui mi puitling tak takte ṭanpuina kan dawng bawk a ni. (Ephesi 4:11-13) Thutak hriatna kan dawn hi kan hlâwkpui tak zet a ni. Jehova hriat leh a rawngbâwl hi a hlimawm a. “LALPA Pathiana nei mite chu lâwm takin an awm ṭhîn,” tia ziaktu, fakna hla phuahtu thute hi a va han dik tehlûl êm!—Sâm 144:15. (w01 7/1)
I La Hre Reng Em?
• Kristianna awm hmain Jehova’n tunge a biakpawh ṭhîn?
• Kum zabi pakhatnaah, leh tûn lai hunah engtin nge thlarau lam êng chu a en zual deuh deuh?
• Jehova hriatna nêna inmila nunna aṭangin eng malsâwmnate nge lo awm?
• Engvângin nge Pathian kan hriat avângin kan lâwm ang?
[Phêk 8, 9-naa milemte]
Jehova chuan Nova te, Abrahama te, leh Mosia te hnênah a duhzâwng a hriattîr
[Phêk 9-naa milem]
Kan hunah hian, Jehova chuan a Thu hriatthiamna êng a chhuah
[Phêk 10-naa milemte]
Hnam tin leh chi tin kan inunauna chungchânga malsâwmna kan dawn hi ngaihtuah teh!