Thlarau Lama Chak Tak Chhûngkua Dinin
“Lalpa thununnaah leh zilhnaah chuan enkawl zâwk rawh u.”—EPHESI 6:4.
1. Chhûngkaw tâna Pathian thil tum eng nge ni a, chutiang ni lovin eng nge thleng ta zâwk?
“CHI TAM TAK thlaha lo pungin, leilung hi luah khat ula.” (Genesis 1:28) Chûng thu chu Adama leh Evi hnênah sawiin Pathian Jehova chuan chhûngkaw ruahmanna chu a lo din a ni. (Ephesi 3:14, 15) An hma lam hun thlîrin, nupa tuak hmasa ber chuan an thlahte zawng zawngin lei an luah khah hun—an chhûng leh khat lainate, mi ṭha famkim hlîr, an Siamtu Ropui chibai bûka, lei paradis-a hlim taka an chêng tûr chu an mitthla thei a ni. Mahse Adama leh Evi chu sualah an tlu a, lei pawh Pathian ṭihtu mi felten an luah khat ta lo. (Rom 5:12) Chhûngkaw nun chu rang takin a tlachhe ta zâwk a, huatna te, tharum thawhna te, leh “hmangaihna pianpui” neih lohna te chu a hluar ta êm êm zâwk a ni, a bîkin tûn “ni hnuhnûngahte” hian a tam lehzual.—2 Timothea 3:1-5; Genesis 4:8, 23; 6:5, 11, 12.
2. Adama thlahten eng theihna nge an neih a, mahse thlarau lama chak tak chhûngkua din tûrin eng nge ṭûl?
2 Adama leh Evi chu Pathian anpuia siam an ni a. Misual ni tawh mah sela, Jehova’n Adama chu fa neih a la phalsak a ni. (Genesis 1:27; 5:1-4) Adama thlahte chuan an pa ang bawkin chhia leh ṭha hriat theihna an nei a, a dik leh dik lo thliar hran dân pawh an zir thei a ni. An Siamtu biak dân tûr chungchângah leh, amah chu an thinlung zawng zawng, thlarau zawng zawng, rilru zawng zawng leh chakna zawng zawnga an hmangaih a pawimawhzia pawh an zirtîr theih a. (Marka 12:30; Johana 4:24; Jakoba 1:27) Chu mai ni lovin, ‘dik taka ti tûr leh khawngaihna ngaina tûr leh Pathian nêna thuhnuairawlh taka lêng dûn tûrin’ an zirtîr theih bawk a ni. (Mika 6:8) Amaherawhchu, misual an nih avângin thlarau lama chak tak chhûngkaw din tûr chuan theihtâwp a chhuah a ngai a ni.
Remchânnate Lei Rawh U
3. Nu leh paten Kristian naupang ni tûra an fate enkawl seilian tûrin engtin nge ‘remchânnate an lei’ theih ang?
3 Hêng hun harsa leh buai takah hian, naupangte chu “LALPA hmangaihtute” nihtîr tûr leh “sual haw” tak taktute nihtîr tûr chuan nasa taka thawhrim a ngai a. (Sâm 97:10) Nu leh pa fingte chuan he hna khirh tak hi ti thei tûrin ‘remchânnate an lei’ tûr a ni. (Ephesi 5:15-17) Fa nei i nih chuan, hei hi engtin nge i tih theih ang? Pakhatnaah chuan, dah pawimawh hmasak bîk mumal tak nei la, “thil ṭha bîkte chu” ngaihsakin, i fate thu hrilh leh zirtîr pawh dah pawimawh hmasa ang che. (Philippi 1:10, 11) Pahnihnaah chuan, i nun dân tihniam deuh rawh. Thil ṭûl tak tak lo eng engemawte chu i tih tawh loh a ngai mai thei a. A nih loh leh, hun tam tak sênga enkawl ngai chi i thil neih engemaw chu i paih a ngai mai thei bawk. Kristian nu leh pa i nih angin, Pathian ṭih mi ni tûra theihtâwp chhuaha naupang i enkawlna chu i inchhîr ngai lo vang.—Thufingte 29:15, 17.
4. Engtin nge chhûngkua an inpumkhat reng theih ang?
4 I fate bula hun i hman hi, a bîkin thlarau lam thilah a nih phei chuan a manhla êm êm a, chhûngkaw inpumkhatna kawng ṭha berte zînga pakhat a ni. Mahse, hei hi a remchân hun huna tihah dah suh. In hun hmanho dân tûr chu duangsa thlap rawh. Hei hi in khata chênho va, mahni ṭûl ṭûl mahni nia tih mawp mawp mai tihna a ni lo. Naupangte chu mi mal taka nî tin ngaihsak an nih chuan an ṭhang ṭha zâwk ṭhîn. Hmangaihna leh ngaihsakna nasa tak lantîr a ṭûl bawk. Nupate chuan fa neih an rêl thlûk hma pawhin he mawhphurhna pawimawh tak hi urhsûn takin an ngaihtuah dûn tûr a ni. (Luka 14:28) Tichuan fa enkawl chu hna hrehawm tak angin an ngai lo vang a. Chanvo hlu tak angin an ngai zâwk dâwn a ni.—Genesis 33:5; Sâm 127:3.
Thu leh Thiltihin Zirtîr Rawh
5. (a) Naupangte Jehova hmangaih tûra zirtîrna kha eng aṭangin nge a inṭan? (b) Deuteronomy 6:5-7 hian nu leh pate hnênah eng thurâwn nge a pêk?
5 Jehova hmangaih tûra i fate i zirtîrna chu nangman amah i hmangaihna aṭangin a inṭan a ni. Pathian i hmangaihna nasa tak chuan a kaihhruaina zawng zawngte rinawm taka zâwm tûrin a chêttîr ang che. Chu chuan ‘Lalpa thununna leh zilhnaa’ fate enkawl chhoh a huam tel a ni. (Ephesi 6:4) Pathian chuan nu leh pate chu an fate tâna entawn tûr siam tûr te, anmahni be pawp tûr leh zirtîr tûrin thurâwn a pe a. Deuteronomy 6:5-7 chuan heti hian a sawi: “LALPA in Pathian chu in thinlung zawng zawngin, in rilru zawng zawngin, in chakna zawng zawngin in hmangaih tûr a ni. Tin, hêng thu, vawiina ka pêk che u hi in thinlungah a châm reng ang a; in fate ṭhahnemngai takin in zirtîr ang a, in ina in ṭhut lai te, kawnga in kal lai te, in mut lai te, in thawh hun tein in sawi ṭhîn tûr a ni,” tiin. Zilh fo leh sawi nawn fovin, Pathian thupêkte chu in fate thinlungah in tuh thei a. Chutiang chuan, in fate chuan Jehova in hmangaihna chu an lo man thiam ang a, anni pawhin amah hnaih ve an lo duh phah dâwn a ni.—Thufingte 20:7.
6. Naupangten mi tih dân entawnin thil an zir a, chu chu nu leh paten engtin nge remchângah an hman theih ang?
6 Naupangte hian thil zir hi nuam an ti hle a. Ngaithlatu fing leh thlîrtu fing tak an nih avângin in tihdân pawh an zir thuai mai ang. Sum leh pai ûm mi in ni lo tih an hmuh chuan, chu chuan Isua thurâwn zawm dân zir tûrin naupangte chu a ṭanpui a. Khawvêl thil lungkham lova ‘Pathian Ram zawng hmasa zâwk’ tûrin in zirtîr tihna a ni. (Matthaia 6:25-33) Mi tihmasâwn thei zâwnga Bible thutak te, Pathian kohhran te, leh upa ruatte chanchin te sawia in titipui ṭhin chuan, in fate chu Jehova zah tûr leh thlarau lama a ruahmannate ngaihlu tûrin in zirtîr a ni. Naupangte hian thil mu mal lo hi an man rang ṭhîn hle a, chuvângin ṭawngkaa in sawi rêng rêng chu thlarau lam thil in ngaihhlutna thûk tak lantîr thei, thiltih leh rilru put hmangin a thlâwp zêl tûr a ni. Nu leh pate tân chuan, entawn tûr ṭha an siam avângin an faten thinlung zawng zawngin Jehova an hmangaih ve ta tih han hmuh chu malsâwmna nasa tak a ni!—Thufingte 23:24, 25.
7, 8. Naupangte an sên têt aṭanga zirtîr a hlutzia eng thiltawnin nge lantîr a, hlawhtlintîrtu chu tunge ni?
7 An naupan têt aṭanga fate zirtîr hlutzia chu Venezuela-a thil thleng aṭang hian a hmuh theih a ni. Nupa tuak la naupang tak, Felix-a leh Mayerlin-i te chungchâng a ni a. Pioneer rawngbâwltu an ni. An fapa Felito-a a lo pian chuan, Jehova betu dik ni tûra enkawl seilian tûrin theihtâwp chhuah pawh an inhuam a ni. Tichuan, Mayerlin-i chuan Jehova Thuhretute lehkhabu chhuah, Ka Bible Thawnthu Lehkhabu tih chu Felito-a hriatah a chhiar ri ṭan ta a. Naupang chumchiap mai a la nih lai pawhin, Felito-a chuan he lehkhabua chuang Mosia leh mi dang lemte chu a hre hrang thei ni hian a lang tlat mai a ni.
8 Naupang tê a nih lai aṭangin Felito-a chuan amahin thu a hril ṭan a. Lalram thuchhuahtu nih a duhna chu a tihlawhtling a. Tichuan hun a lo kal zêl a, regular pioneer a rawn ni chho ta bawk a ni. A nu leh pate chuan: “Kan fapa hmasâwn chhoh dân kan thlîr hian, Jehova leh a kaihhruaina vâng chauha lo thleng a ni tih kan hre thiam a ni,” tiin an sawi.
Naupangte Chu Thlarau Lama Ṭhang Tûrin Ṭanpui Rawh
9. Bawi rinawm leh fing hmanga thlarau lam kaihhruaina kan dawng hi engvângin nge kan lâwm ang?
9 Naupang enkawl seilen dân tûr ziahna magazine engemaw zât, lehkhabu za tam tak, leh Internet web site sâng tam tak te a awm a. Newsweek chanchinbu-in naupang chungchânga special issue a tihchhuah chuan: “Hêng thuziak hrang hrangte hi a inkalh” ngun hle a, “chu aia mah lungchhiat thlâk zâwk chu, rin tlâk nia i ngaih thuziak a lo dik lo hulhual ṭhîn chu a ni,” tiin a sawi. Jehova’n chhûngkaw inkaihhruaina leh thlarau lam hmasâwnna tûr ṭhahnem tak min pe hi kan lâwm takzet a ni! Bawi rinawm leh fing hmanga min châwmna zawng zawng hi i hmang ṭangkai vek em le?—Matthaia 24:45-47.
10. Chhûngkaw Bible zirna sâwt tak chu engvângin nge nu leh pa leh naupangte tân hlâwkna a nih ve ve?
10 Thil ṭûl pawimawh tak pakhat chu, boruak zângkhai tak kâra chhûngkaw Bible zirna a hun pangngaia neih zat zat hi a ni. Hlâwkpui theih, hlimawm, leh mi tichak thei ni tûr chuan inbuatsaihna ṭha tak neih a ngai a. An fate zalên taka thu an sawitîr chuan, nu leh paten an fate thinlung leh rilruah eng nge awm tih an hre thei dâwn a ni. Chhûngkaw bible zirna a sâwt leh sâwt loh hriat theihna pakhat chu, chhûngkaw member zawng zawngin bible zir hun an nghâkhlel nge nghâkhlel lo tih enin a ni.
11. (a) Nu leh paten an fate chu eng tiam chinte nge nei tûra an ṭanpui theih? (b) Japan hmeichhe naupangin a tiam chin thleng tûra a beihna rah chhuah chu eng nge ni?
11 Chutiang bawkin Pathian Lehkhathua tiam chin neih hian thlarau lama chak tak chhûngkua a siam ve thei a, nu leh pate pawhin chutianga ti tûr chuan an fate chu an ṭanpui tûr a ni. Thil tum ṭha tak tak zîngah chuan nî tina Bible chhiar te, chanchin ṭha puangtu nih te, inpumpêka baptisma chang thei khawpa hmasâwn chhoh te a tel a. Thil tum dang lehah chuan pioneer thawh te, Bethel-a rawngbâwl te, leh missionary thawh te a tel thei bawk. Primary school-a a kal laiin Japan naupang pakhat, Ayumi-i chuan a pâwlpui zawng zawngte hnêna thuhril vek chu thil tumah a nei a. A zirtîrtu leh a pâwlpuite tuina chawh thawh nân, an school library-ah Bible lehkhabu chhuah engemaw zât dah a dîl a, an lo phalsak a. Chuvâng chuan, primary school-a kum ruk a kal chhûngin Ayumi-i chuan Bible zirpui 13 a neih theih phah a ni. Chûng Bible zirlaite zînga hmeichhe pakhat chu, a chhûngte dang hmeichhe pathum nên Kristian baptisma chang tawh an lo ni ta bawk.
12. Naupangten Kristian inkhâwmnate an hlâwkpui theih dân ber eng nge ni?
12 Thlarau lama hrisêl ṭha tûr chuan inkhâwm zat zat a ngai bawk a. Tirhkoh Paula chuan a rinpuite chu ‘ṭhenkhat tih dân anga an inkhâwmte bânsan lo tûrin’ a fuih a ni. Kristian inkhâwmnaa tel zat zat hi naupang leh puitling pawhin nasa taka an hlâwkpui avângin, inkhâwm bânsan chu i chîng lo vang u. (Hebrai 10:24, 25; Deuteronomy 31:12) Naupangte chu ngun taka ngaithla tûrin zirtîr tûr an ni a. Zawhna chhân hian kan hlâwkpui ber avângin, inkhâwmna atâna lo inpuahchah lâwk chu a pawimawh takzet a ni. Naupang tê chuan thu tlêm sawiin emaw paragraph-a tlar tawi tê chhiarin emaw zawhna chu a chhâng ṭan thei a, mahse naupangte chu anmahni irâwm chhuak ngei ṭawngkam hmanga zawhna chhâng tûra zirtîr a hlâwk ber. Nangni nu leh pate u, awmze nei taka zawhna chhâng zat zatin entawn tûr in siam em le? Chhûngkaw member tinin mahni Bible, hlabu, leh zir lai copy neih ṭheuh chu a ṭha bawk a ni.
13, 14. (a) Engvângin nge nu leh paten rawngbâwlnaah an fate an thawhpui ang? (b) Thlawhhma rawngbâwlna chu naupangte tâna hlâwk tak leh hlimawm tak ni tûrin engin nge ṭanpui ang?
13 Nu leh pa fingte chuan an fate vânglai chakna chu Jehova rawngbâwl nâna hmang tûrin an kaihruai ang a, thuhril chu an nuna thil pawimawh tak pakhat nihtîr tûrin an ṭanpui bawk ang. (Hebrai 13:15) Nu leh pate chuan rawngbâwlnaah an fate an thawhpui chauhvin naupangte chuan rawngbâwltu, “thutak thu fel taka hmang chu zak tûr a ni lo” tih hre thiam tûrin zirna an nei thei tih an hre tûr a ni. (2 Timothea 2:15) Tichuan, a nih leh, eng nge i chanchin ni ve ta? Fa nei i nih chuan, thlawhhma rawngbâwlna atâna inpuahchah tûrin i fate chu i ṭanpui em? Hetianga i tih hian, an tân rawngbâwlna chu hlimawm tak, awmze nei tak leh ṭangkai tak a lo ni thei dâwn a ni.
14 Rawngbâwlnaa nu leh pate leh an fate thawhho chu engvângin nge a hlâwk êm êm? Hetianga an tih hian naupangte chuan an nu leh pate tih dân ṭha an chhinchhiahin an entawn thei a. Chu mi rual chuan, nu leh pate pawhin an fate rilru put hmang te, nungchang te, leh theihna te an en nghâl thei bawk a ni. Rawngbâwlna chi hrang hrangah i fate chu hruai ngei ngei rawh. A theih phawt chuan, i fate chu mahni thuhril bag neih hrantîr ṭheuh la, fai tak leh ṭha taka enkawl tûrin zirtîr ang che. I zirtîr a, i fuih reng bawk chuan, rawngbâwlna ngaihhlutna tak tak an lo nei chho ang a, naupangte chuan thuhril hna chu Pathian leh ṭhenawmte hmangaihna lantîrna kawng a ni tih an lo hre thiam dâwn a ni.—Matthaia 22:37-39; 28:19, 20.
Thlarau Lam Hrisêlna Vawng Ṭha Rawh
15. Thlarau lama chhûngkaw hrisêlna vawn ṭhat reng chu thil pawimawh tak a ni si a, chutiang tih theih dân kawng ṭhenkhat chu engte nge ni?
15 Chhûngkaw thlarau lam hrisêlna vawn ṭhat hi a pawimawh êm êm a ni. (Sâm 119:93) Tih dân kawng khat chu hun remchâng apianga chhûngkuaa thlarau lam thil sawiho hi a ni. Nî tin Bible châng in sawiho ṭhîn em? Thlawhhma rawngbâwlnaa in thiltawnte emaw, Vênnainsâng leh Awake! magazine chhuak thar bera thu engemaw te chu “kawnga in kal laite” pawhin in sawipui ṭhîn em? Nî tin nungdama in la awm avâng leh a châwmna tam takte avângin, Jehova hnênah ṭawngṭaiin, “in mut lai te, in thawh hun tein” lâwm thu sawi nachâng in hria em? (Deuteronomy 6:6-9) In thiltih engkima Pathian in hmangaihna lo lang chu in faten an hmuh chuan, thutak chu an ta nihtîr thei tûrin a ṭanpui dâwn a ni.
16. Naupangte anmahnia chhui zauna nei ṭhîn tûra fuih chu eng nge a hlutna?
16 A châng chuan, naupangte hian harsatna emaw thil thleng engemaw chingfel tûrin kaihhruai an ngai ṭhîn a. Thil tih dân tûr hrilh zêl lovin, Pathianin eng angin nge a thlîr tih te hre tûra anmahnia chhui zauna nei ṭhîn tûrin fuih zâwk rawh. “Bawi rinawm” hmanga min pêk hmanrua leh lehkahbu chhuah zawng zawngte hmang ṭangkai tûra zirtîrna chuan, naupangte chu Jehova nên inlaichînna bul tak nei tûrin a ṭanpui dâwn a ni. (1 Samuela 2:21) Chu bâkah, an Bible chhui zauna chu chhûngkaw member dangte an hrilh ve leh phei chuan, thlarau lama chhûngkaw hrisêlna chuan a ṭhat phah lehzual a ni.
Jehova Rinchhan Tlat Rawh
17. An fate Kristian ni tûra enkawl seilenna kawngah engvângin nge nu leh pa malte chu an beidawn mai loh vang?
17 Nu leh pa malten engtin nge thlarau lama chak tak chhûngkua an din ve theih ang? Hêng mite hian naupang enkawl chungchângah harsatna an tâwk tam lehzual a ni. Mahse, nu leh pa malte u, lunghnual mai suh u! Nu leh pa mal tam tak, Pathian ring tlat thuâwih taka a thurâwn zâwmtute, leh thlarau lama chak tak fa enkawl seilian theituten an lo târlan tawh angin, a hlawhtlin theih a ni. (Thufingte 22:6) Mahse, Kristian nu leh pa malte chuan Jehova an rinchhan tlat a ṭûl a, ani’n a lo ṭanpui ngei ang tih an ring tlat tûr a ni.—Sâm 121:1-3.
18. Nu leh paten rilru leh taksa lama an fate mamawh engte nge an ngaihsak tûr ni a, mahse eng nge an dah pawimawh ber tûr?
18 Nu leh pa fingte chuan ‘nuih hun a awm a, lâm hun a awm’ tih an hria a ni. (Thuhriltu 3:1, 4) Naupang rilru leh taksa ṭhan ṭhat nân chuan hun âwl te, intihhlimna ṭha leh inchawih tâwk te a ṭûl êm êm a. Mi tihmasâwn thei rimawi, a bîkin Pathian fakna hla sakte chuan naupang chu rilru put hmang ṭha tak nei tûrin a ṭanpui ang a, chu chuan Jehova nêna an inlaichînna tihnghehna kawngah chanvo pawimawh tak a chang a ni. (Kolossa 3:16) Naupan lai hi puitlin huna Pathian ṭih mi ni tûra inbuatsaih hun lai a ni bawk a, tichuan nun nawmna chu lei paradis-ah chatuanin a inchhunzawm thei dâwn a ni.—Galatia 6:8.
19. An fate enkawl tûra an beihnate chu Jehova’n mal a sâwm ang tih engvângin nge nu leh paten an rin ngheh theih?
19 Jehova’n Kristian chhûngkua zawng zawng hi thlarau lama chak reng tûr leh inpumkhat tlat tûrin a duh vek a. Pathian kan hmangaih tak tak a, a Thu zâwm tûra theihtâwp kan chhuah bawk chuan, kan beihnate chu mal min sâwm ang a, a kaihhruainate zâwm tûra chakna kan mamawh angte pawh min pe bawk ang. (Isaia 48:17; Philippi 4:13) Tûna i fate zirtîrna hun remchâng i neih hi a rei dâwn lo va, a awm nawn dâwn tawh hek lo. Pathian Thua thurâwnte hi zâwm tûrin theihtâwp chhuah la, tichuan, thlarau lama chak tak chhûngkua din tûra i beihnate chu Jehova’n mal a sâwm dâwn che nia. (w01 5/15)
Eng Nge Kan Zir Tâk Le?
• Naupang zirtîrnaah engvângin nge remchânnate lei zêl a pawimawh êm êm?
• Nu leh paten entawn tûr ṭha an siam chu engvângin nge a ṭûl?
• Naupangte thlarau lama ṭhang chho tûra ṭanpui kawng ṭhenkhat chu engte nge ni?
• Thlarau lama chhûngkaw hrisêlna chu engtin nge a vawn ṭhat reng theih?
[Phêk 30-naa milem]
Thlarau lama chak tak chhûngkua chuan Pathian Thu an zir zat zat a, Kristian inkhâwmah an tel zat zat a, rawngbâwlnaah an thawkho bawk