Pathian Hlim Chu Hlimpui Rawh

“A tâwp berah chuan unaute u, lâwm takin awm rawh u, . . . tichuan hmangaihna leh remna Pathian chu in hnênah a awm dâwn zuk nia.”​—2 KORINTH 13:11.

1, 2. (a) Engvângin nge mi tam takin hlimna an neih loh? (b) Hlimna hi eng nge ni a, engtin nge kan neih theih?

LUNGNGAIHNAA khat kan tûn lai hunah hian mi tam tak chuan hlimna tûr chhan rêng an hmu lo. Lungchhiatnain anmahni emaw, an hmangaihte a den châng chuan: “Hmeichhe hrin tawh mihring phawt chu rei lo tê damin, buainaa khat a ni,” titu hmân lai mi Joba ang hian rilru an pu ve mai thei a ni. (Joba 14:1) Kristiante pawh hêng “hun khirh takte” avânga lungngaihna leh hrehawmna ata hi an bâng bîk lo va; engemaw chânga Jehova chhiahhlawh rinawmte an lunghnual hi thil mak a ni lo.​—2 Timothea 3:1.

² Mahse, Kristiante chu fiahna kârah pawh an hlim thei a ni. (Tirhkohte 5:​40, 41) An hlim theih dân hriatthiam nân, hlimna hi eng nge ni tih lo ngaihtuah hmasa ila. Hlimna chu “thil ṭha neihna emaw, beiseina emaw avânga rilru leh thinlung phûrna” tia sawifiah a ni.a Chuvângin, Pathian khawvêl thara hlimna kan neih tûrte suangtuah chunga tûna malsâwmna kan dawn zawng zawngte hi kan chhût phawt chuan kan hlim thei a ni.

3. Eng kawngin nge mi tinin hlimna tûr chhan eng emaw tal an nei ṭheuh a tih theih?

³ Mi tin hian hlimna tûr chhan malsâwmna eng ngemaw tak chu an nei ṭheuh mai. Entîr nân, chhûngkaw pa chuan a hna a chân hlauh mai a. A hmangaihte châwm a duh bawk si, a rilru a hah ngei ang. Mahse, chuti chung pawh chuan taksa lama hrisêl leh chak ṭha a nih chuan a lâwm tûr a ni. Hna a hmu a nih pawhin, a thawk rim thei dâwn si a. A lehlamah thung chuan Kristian hmeichhia chuan natna engemaw mi tichak lo êm êm mai vei pawh a ni thei. Mahse, zahawmna leh huaisenna nêna a natna tuar tûra ṭanpuitu a chhûngkaw mite leh ṭhiante ṭanpuina avângin a lâwm thei bawk. Dinhmun hrang hrang ni mah se, Kristian dik zawng zawngte chu “Pathian hlim,” Jehova leh “hlim tak Thuneitu tak chauh,” Isua Krista hriatna chanvo avângin an hlim thei a ni. (1 Timothea 1:11; 6:​15, NW.) Ni e, Pathian Jehova leh Isua Krista chu an hlim êm êm a ni. He khawvêl dinhmun hi atîra Jehova ruahman dân nên a inthlau hle chung pawhin an hlimna chu an hloh chuang lo. An entîrna siam chuan hlimna kan insiam dân tûr chungchângah thil tam tak min zirtîr a ni.

An Hlimna An Hlauh Ngai Lo

4, 5. (a) Mihring hmasa berte an hel khân Jehova’n engtin nge a tih? (b) Eng kawngin nge Jehova’n mihringte lakah rilru puthmang ṭha a neih?

⁴ Eden huanah khân, Evi leh Adama khân hrisêlna ṭha tak leh rilru ṭha famkim an nei a. Chi thlah chhâwn tûr leh huan anmahni hual vêltu enkawl tûr an nei a. Chûng zawng ai chuan Jehova nêna inlaichînna chanvo hlu tak an nei bawk a. Hma lam huna hlim taka awm zêl chu Pathian thil tum a ni. Mahse, kan nu leh pa hmasate chu chûng thilpêk ṭhaah chuan an lungawi tâwk lo va; “a chhia leh ṭha hriatna thing” aṭang chuan thei ei phal loh chu an lo ru ta a. Chu thuawih lohna chu keini an thahte’n tûn laia hlim lohna kan tawn zawng zawngte inṭanna chu a lo ni ta a ni.​—Genesis 2:​15-17; 3:6; Rom 5:12.

⁵ Nimahsela, Jehova chuan Edama leh Evi te lâwm nachâng hriat lohna avânga a hlimna hlauh chu a phal lo va. An thlah ṭhenkhat tal chuan a rawng an la rawn bâwl a ring tlat a ni. Chu a rinna chu a ngheh êm êm avângin, Adama leh Evi chuan fa tîr êm pawh an la neih hma hauhvin an thlah thuâwihte chhandamna tûra a thil ruahhman chu a puang chhuak nghâl hial a ni! (Genesis 1:31; 3:15) Chu mi zawh kum za têl chu an thlahte tam zâwk chuan Adama leh Evi hniak hnung an zui a; mahse, Jehova chuan chutiang thuawih lohna nasa tak avâng pawh chuan mihringte chu a hawisan mai lo. Chutih a hnêkin, amah an hmangaih avânga amah tihlâwm tumtu, ‘a thinlung tilâwmtu,’ mite chu a ngaihsak zâwk a ni.

6, 7. Engin nge Isua chu lâwm reng tûrin ṭanpui?

⁶ Isua chungchâng ve thung​—engtin nge hlimna a neih le? Vâna thlarau thilsiam chak tak niin, Isua chuan he leia mite thiltih engkim mai hi a hmu thei a. An fam kim lohna chu chiang reng mah se, Isua chuan anmahni chu a hmangaih êm êm a ni. (Thufingte 8:31) Chu mi hnua he leia a lo kal a, mihring ‘zînga a awm’ tak tak pawh khân, mihringte a thlîr dân a dang chuang lo. (Johana 1:14) Enging nge Pathian Fapa ṭha famkimina chu chuti khawpa misual hringfate a ṭha zâwng thlîrtîr thei le?

⁷ A bul berah chuan amah leh mi dangte lakah beisei chintâwk a nei a. Khawvêl mi zawng zawngte hi an inlettîr vek dâwn lo tih a hria a ni. (Matthaia 10:​32-39) Chuvângin, mi ṭha tak pakhat lek pawhin Lalram thuchah ṭha taka a chhânlêt chuan a lâwm êm êm a ni. A zirtîrte nungchang leh rilru put dân chuan duhthusâm tling lo hle ṭhîn mah se, an thinlungin Pathian duhzâwng tih an duh takzet tih Isua chuan a hre reng a, chuvâng chuan anni chu a hmangaih a ni. (Luka 9:46; 22:​24, 28-32, 60-62) Chu mi hriatthiam theih takin, vâna a Pa hnêna a ṭawngṭainaah chuan: “anni chuan i thu an zâwm ta a,” tiin a zirtîrte kawng ṭha zawh chu a chham chhuak a ni.​—Johana 17:6.

8. Kan hlimna chhawmdâwl a ngaih hun a lo thlen a, Jehova leh Isua kan entawn theih dân kawng ṭhenkhatte han sawi teh.

⁸ He mi chungchânga Pathian Jehova leh Isua Krista entawn tûr siam ngaihtuah hi kan hlâwkpui ṭheuh a ni. Thilte kan beisei anga a lo thleng lo a nih pawh lungngai lutuk lovin, Jehova kan entawn zual thei em? Kan dinhmun tawn azir zêla a ṭha zâwng thil thlîrin, leh keimahni leh mi dangte laka a awm tâwka beiseiin Isua hniak hnung chu kan zui lehzual thei em? Tûnah chuan hêng dân bul ṭhenkhatte hi Kristian ṭhahnemngaite thinlunga duhawm tak​—thlawhhma rawngbâwlna​—hmuna a taka a hman theih dân i lo en ho ang u.

Rawngbâwlna Chungchânga Thlîr Dân Ṭha Nei Rawh

9. Engtin nge Jeremia hlimna kha tihthar a nih a, chu a entîrna chuan engtin nge min ṭanpui theih?

⁹ Jehova chuan a rawngbâwlnaa hlim tûrin min duh a. Kan hlimna chu kan rah chhuah chungah a innghat tûr a ni lo. (Luka 10:​17, 20) Zâwlnei Jeremia chuan bial rah chhuah theih miah lohna hmunah kum engemaw zât thu a hril a. A ṭha lo zâwnga mite chhânlêtna a hmuh châng chuan, a hlimna a hlauh ṭhîn. (Jeremia 20:8) Mahse, chu a thuchah hrim hrim mawina a ngaihtuah châng chuan, a hlimna chu tihthar a lo ni leh a ni. Jeremia chuan Jehova hnênah tihian a sawi a: “I thute chu tihlan a ni a, ka ei a, i thute chu ka tân hlimna leh ka thinlung hlimna a ni; aw LALPA, . . . i hming kan pu ta si a,” tiin. (Jeremia 15:16) Ni e, Jeremia chu Pathian thu hrilhna chanvo a neihah chuan a hlim hle a ni. Keini pawh chutiang chu kan ni ve thei a ni.

10. Kan thawhna biala mite chuan ngaihven lo hle mah se, engtin nge rawngbâwlnaah chuan kan hlim reng theih ang?

¹⁰ Mi tam zâwkin chanchin ṭha chu ngaithla duh lo mah se, thlawhhma rawngbâwlnaa tel kan nih avângin hlimna tûr chhan tam tak kan nei a. Jehova chuan mi ṭhenkhat tal chuan amah an rawn be dâwn tih a ring nghet tlat tih kha theihnghilh hauh suh ang che. Jehova ang bawkin, keini pawhin mi ṭhenkhat tal chuan Lalram thuchah chu an la rawn hrethiamin an la pawm ang tih ringin kan bânsan tûr a ni lo. Mihring dinhmun hi a inthlâk danglam reng tih hi kan theihnghilh tûr a ni lo va. Rin loh tak maia engemaw chânna emaw, buaina chhuak emaw te chuan mi neinung berte pawh nun awmzia ngun takin a ngaihtuahtîr thei tlat asin. Chutiang miin ‘a thlarau lam ngaihtuah mi’ a lo nih chuan amah ṭanpui tûrin i awm angem? (Matthaia 5:3) Tihah chuan in bial chûnga tuemaw chuan a tûk lawka i tlawh leh chuan thutak chu a lo ngaithla duh tawh mai thei asin!

11, 12. Khawpui lian vak lo pakhatah eng thil nge thleng a, chu thil thleng aṭang chuan eng nge kan zir theih?

¹¹ Kan bial ruahman dân pawh chuan thil awmdân a tidanglam thei ve bawk. He entîrna hi lo ngaihtuah teh. Khawpui lian lo tak pakhatah hian nupa tuak naupang tak takte leh an fate chu inpawh takin an chêng a. Jehova Thuhretute’n an va tlawh chuan, in tina mite chuan “Kan ngaihven zâwng a ni lo!” tiin an lo chhâng vek a. Tuemawin Lalram thuchah chu an lo ngaihven deuh chuan, ṭhenawmte chu Thuhretute nêna inhmuh lehzel duh lovin an lo beidawng nghâl mai ṭhîn. Chuvângin chuta thu hril chu a khirh tak zet a ni. Mahsela, Thuhretute chuan bânsan mai lovin, an hril chhunzawm zêl a. Chu chuan eng nge a rah chhuah?

¹² Hun a lo ral zêl chuan chu mi khuaa naupang tam tak chu an lo puitlingin, nupui pasal an rawn nei a, chu khuaah chuan an inbêngbel zêl a. An nunphung chuan hlimna tak tak a thlen lo tih hrethiamin an zînga lo puitling tawh ṭhenkhatte chuan thutak an zawng ṭan ta a ni. Tichuan Thuhretute chanchin ṭha puan chhuah ṭha taka an lo chhân lêt tâkah chuan an duh chu an hmu ta. Tichuan, kum tam tak hnuah chuan kohhran tereuhtê chu a lo ṭhang ṭan ta a ni. Beidawng lo va thu hril ṭâng ṭângtu, Lalram thu puanghhuaktute lâwm dân tûr chu han ngaihtuah teh! Chu Lalram thuchah ropui tak hril ṭâng ṭângna chuan keini pawh hlimna min thlen ve rawh se!

Rinpuite’n An Chhawmdâwl Ang Che

13. Kan lunghnual chângin tu hnênah nge kan hawi theih?

¹³ Nêksâwrna emaw, leilung chhiatna emaw a lo thlenin, tu hnên lam nge i hawi ang? Jehova chhiahhlawh inpumpêk mi maktaduai tam takte chuan ṭawngṭaiin Jehova an pan hmasa ber ṭhin a, chutah an Kristian unaute an pan leh ṭhîn. Isua ngei pawhin khawvêla a awm lai khân a zirtîrte chhawmdâwlna kha a ngaihlu êm êm a. A thih hma chiah zân pawh khan “thlêmna ka tawh chhûng zawng nangni mi awmpuitu in ni,” tiin anni chu a hrilh a ni. (Luka 22:28) Chûng a zirtîrte chu mi ṭhafamkim lo chu an ni teh meuh va; mahse, an rinawm nghehna chu Pathian Fapa tân chuan thlamuantu a ni. Keini pawhin kan chibaibûkpite hnên aṭangin chakna kan nei ve thei a ni.

14, 15. Engin nge nupa tuak khatte chu an fapa thih tuar thei tûrin ṭanpui a, an thil tawn aṭangin eng nge kan zir theih?

¹⁴ Kristian nupa Michel-a leh Diane-i te chuan an unaute chhawmdâwlna hlutzia a takin an hria a. An fapa kum 20-a upa Jonathana, Kristian ṭha leh fel tak mai chu thluak natnain a tlâkbuak tlat mai. Doctorte chuan chhan tumin theih tâwp an chhuah chung pawhin Jonathan-a taksa chuan chhiat lam a pan telh telh a; tichuan chawhnu tlângher lamah chuan a boral ta nge nge a. Michel-a leh Diene-i chu an lungngai tâwpkhâwk a ni. Chu mi nî-a Rawngbâwlna Inkhâwm chu a tâwp ṭêp tawh tih an hria a. Mahse, thlamuanna an mamawh lutuk chuan, anmahni awmpuitu upa pakhat chu Kingdom Hall-a kalpui tûrin an sâwm ta a. Jonathana thih thu kohhrana hriattîr a nih hnu chiah chuan an thleng ve a. Inkhâwm bân chuan an kohhran unaute chuan an kuahin thlamuanna thu an fah mawlh mawlh hlawm a. Diane-i chuan tihian a sawi leh a: “Hall-a kan luh chuan kan ruak vek a; mahse, unaute hnên aṭanga thlamuanna kan dawnte chuan min tungnung a ni!” tiin. Unaute chuan kan tawrhnate an la bo thei lo na a, nêksâwrna kan tawrh lai tuar thei tûrin min ṭanpui a ni.​—Rom 1:​11, 12; 1 Korinth 12:​21-26.

¹⁵ An thil tawn avâng Michel-a leh Diane-i te chuan an unaute an hnaih phah sawt a. Anmahni pahnih pawh an inhnaih phah sawt bawk a ni. Michel-a chuan tihian a sawi a: “Tûn hma zawng aiin ka nupui duh tak chu hmangaih lehzual dân ka hriat phah a. Kan lunghnual châng chuan Bible thutak leh Jehova min enkawl dân chungchâng kan sawi dûn ṭhîn. Tûnah chuan Lalram beiseina chuan kan tân awmzia a nei lehzual a ni,” tiin.

16. Unaute hnêna kan mamawhte hriattîr hmasak chu engvângin nge a pawimawh?

¹⁶ Ni e, kan Kristian unaute chu harsatna kan tawh huna “min thlamuantute” an ni thei a, chu chuan lâwm reng tûrin min ṭanpui a ni. (Kolossa 4:11) Mahse, kan thinlung ngaihtuahnate an hriat theih loh avângin, chhawmdâwl kan ngaih chânga hriattîr chu a ṭha a ni. Tichuan, kan unaute’n thlamuanna min pêk theih apiang chu Jehova hnên aṭanga lo kal anga thlîrin, thinlung taka kan ngaihhlutna chu kan sawi chhuak thei a ni.​—Thufingte 12:25; 17:17.

In Kohhran Thlîr Rawh

17. Nu mal pakhatin eng harsatna nge a tawh a, amah ang mite chu engtin nge kan thlîr?

¹⁷ Rinpuite chu i belh chian poh leh, anmahni i ngaihlu sawt zêl ang a, anmahni nêna inṭhianna aṭangin hlimna i hmu bawk dâwn a ni. In kohhran han thlîr teh. Eng nge i hmuh? Hmeithai a fate thutaka hruai tuma bei fan fan i hmu em? A entîr siam ṭha tak chu i ngaihtuah ngun ngai em? Chu mi chungchânga harsatna a tawh ṭhenkhatte chu ngaihtuah chhuahsak han tum teh. Nu mal pakhat Jeanine-i chuan hêngte hi a sawi: khawharna, hnathawhpui mipate ṭha ti lo chunga hîp tuma biak ṭhat, leh sum leh paia nasa taka inhrêkna te hi. Mahse, chûng zawng zawng aia harsa a fate rilru lam mamawh enkawl a ni, naupang tinte hi an danglam vek sia a ti. Heti hian a sawi belh a: “Pasal awm loh lang lo tûra inchhûngkhur chu fapa kuta dah mai duhna pumpelh hi thil harsa tak a ni. Fanu ka nei a, ka harsatna tawhte tihbuaitîr lutuk loh tûr tih hriatreng chu har tak a ni,” tiin. Pathian ṭih nu leh pa mal sâng tam tak dangte angin, Jeanine-i chuan nilêng ṭhak ṭhaka hna thawkin inchhûng a enkawl a ni. A fate chu Bible a zirtîr bawk a, rawngbâwlnaah hruaiin a zirtîr bawk a; tin, kohhran inkhâwmnaah a hruai bawk ṭhîn. (Ephesi 6:4) Chu chhûngkua rinawmna vawn tlat tuma bei ṭâng ṭâng nî tin a hmuh chuan Jehova chu a va hlim dâwn êm! Chutiang mi kan zînga kan nei chuan hlimna min thlen lâwm ni? Thlen tehlul mai.

18, 19. Kohhran mite kan ngaihhlutna kan tihpun theih dân han sawi teh.

¹⁸ In kohhran chu han thlîr kual leh teh. Hmeithai emaw, parawl emaw inkhâwm “ṭhulh ngai lo” i hmu mai thei. (Luka 2:​37, NW.) Khawhar châng an nei ṭhîn em? Dâwn lâwm ni. An kawppuite chu an ngai ngawih ngawih ṭhîn asin! Mahse, Jehova rawngbâwlnaah an buai reng a, mi dangte chu an ngaihtuah hmasa ṭhîn a ni. Chûng an rilru nghehna leh ṭhatnate chuan kohhran hlimna a tipung a ni. Kum 30 chuan full-time-a rawngbâwl tawh Kristian pakhat chuan heti hian a sawi: “Fiahna nasa tak tak tuar chhuak unaupa leh unaunu upa tak tak Jehova rawng rinawm taka la bâwl zêlte hmuh hi ka hlimna ber a ni!” tiin a sawi. Ni e, kan zînga Kristian tar tawhte hi naupang zâwkte fuihtu ropui tak an ni.

¹⁹ A nih leh tûn hnai mai kohhran rawn zawm, mi tharte ve thung hi le? Inkhâwmnaa an rinna an han puangchhuakte hian min tiphûr lo vem ni? Bible an zir ṭan aṭanga an hmasawnziate han ngaihtuah la. Jehova chu an chungah a lâwm teh ang chu. Keini kan lâwm ve em? An beihnate chu kan fakin, kan pawmzia kan târ lang em?

20. Engvângin nge kohhrana mi tinte hian chanvo pawimawh tak an nei ṭheuh a tih theih?

²⁰ Pawm lai nei i ni em? Nge Ṭhalai? A nih loh leh nu leh pa mal em ni i nih zâwk? Pa nei lo (a nih loh leh nu nei lo) i ni em? Hmeithai emaw, pathlawi emaw i ni em? Hun rei tak chhûng kohhran bêl tawh i ni nge tûn hnai maia rawn zawm thar i nih? Eng pawh ni la, i entawn tûr rinawm tak siam chuan kan zain min tichak hle tih hria ang che. Tin, Lalram hla sa a i aw i chhuah te, chhânna i pêk te, leh Theocratic Ministry School-a chanvo i chelhte hian kan hlimna a tipung a ni. Chu ai maha ropui zâwk Jehova thinlung a tilâwm a ni.

21. Eng tihna tûr chhan tam tak nge kan neih a; mahse, eng zawhnate nge lo awm?

²¹ Ni e, he harsatna khawvêlah ngei pawh hian, kan Pathian hlim chibai bûknaah hian kan hlim thei a ni. He Paula fuihna thu: “Lâwm takin awm rawh u, . . . tichuan hmangaihna leh remna Pathian chu in hnênah a awm sâwn zuk nia,” tih hi chhânlêtna tûr chhan tam tak kan nei a ni. (2 Korinth 13:11) A nih leh, leilung chhiatna emaw, nghaisakna emaw, a nih loh leh sum leh pai, ei leh bâr lama harsatna namên lo tâwk ta ila engtin nge ni ang? Chutiang dinhmun hnuaiah pawh chuan hlimna neih theih a ni em? A dawt leha thuziak i ngaihtuah hunah i chhânna i ngaihtuah dâwn nia. (w01 5/1)

[Footnote-te]

I Chhâng Thei Em?

• Hlimna hi engtin nge hrilhfiah a nih?

• A ṭha zâwnga rilru put hmang neih chuan lâwm reng tûrin entin nge min ṭanpui theih?

• Kan kohhran thu hrilna biala thil a ṭha zâwnga thlîr dân neih chuan engtin nge min ṭanpui theih?

• Eng kawngtein nge in kohhrana unaute chu i ngaihhlut ang?

[Phêk 12-naa milem]

In kohhrana mite’n eng harsatnate nge an tawn?