Kristianna Dikin A Hneh!
“Chuti kauva nasa chuan Lalpa thu chu a darh a, a hneh ta zêl a.”—TIRHKOHTE 19:20.
1. Kum zabi pakhatna chhûnga Kristianna darh dân han sawi teh.
THLARAU thianghlim thiltihtheihnaa tihchaka awmin, Kristian hmasate chuan dan rual lohva ṭhahnemngaihna nên Pathian thu an puang chhuak a. Historian pakhat chuan: “Rom-ho awpna hnuaiah a maka makin Kristianna chu a darh a. Kum 100 vêlah chuan Mediterranean chheh vêl ram zawng zawng deuhthawah Kristian-ho an awm vek tawh a ni,” tiin.
2. Engtin nge Setana’n chanchin ṭha chu a beih a, chu mi chungchâng chu engtia sawi lâwk nge a nih?
2 Diabol-Setana chuan Kristian hmasate chu a dangbet thei lo va. Chuvângin, kawng dang—kalpênna—hmangin chanchin ṭha chu a bei ta zâwk a ni. He thil thleng tûr hi Isua’n buh tak leh buh lem tehkhin thu hmangin a lo hrilh lâwk diam tawh a ni. (Matthaia 13:24-30, 36-43) Tirhkoh Petera pawhin kohhran chhûng aṭangin zirtîrtu derte an lo chhuak ang a, pâwl hrang an rawn din ang tih a sawi lâwk bawk. (2 Petera 2:1-3) Tirhkoh Paula pawhin chu kalpênna chu Jehova nî lo thlen hmaa awm tûr a nih thu chiang takin a sawi bawk a ni.—2 Thessalonika 2:1-3.
3. Tirhkohte an thih hnu khân eng thil nge lo thleng?
3 Tirhkohte an thih zawh hnu chuan, chanchin ṭha chu milem betute zirtîrna leh mihring finnate’n a rawn hliahkhuh ta a. Sawilâwk ang chiahin, zirtîrtu derte chuan thutak chu la kawiin thutak thianghlim tak chu an rawn tibawlhhlawh zo ta bawk a. Tichuan, zawi zawiin Kristianna dik tak chu a lem, Kristianna ram tia koh chuan a rawn luahlân ta a ni. Kohhran rawngbâwltu pâwl a lo ding a, chu pâwl chuan Bible chu mi narânte hmuh phâk lohva dah an tum a. Chutianga Kristiana inchhâlte chu pung zêl mah se, an biakna chu a thianghlim lo. Kristianna ram chu khaw tinah lo pungin inkaihhruaina chak tak leh Khawthlang nunphung thununtu ber a lo ni chho ta a; mahse, Pathian malsâwmna a dawng lo va, a thlarau a dawng hek lo.
4. Engvângin nge Pathian thil tum tâwptîr tûra Setana ruahmanna chu a hlawhchham?
4 Nimahsela, Jehova thil tumte tâwptîr tuma Setana ruahmanna chu a hlawhchham dâwn tih a chiang sa a ni a. Kalpênna hun hrehawm ber lai pawhin, Kristianna dik chu ṭhenkhatte zîngah a la nung reng tho a ni. Bible ziak chhâwngtute chuan dik taka ziak chhâwn tumin theihtâwp an chhuah a. Chutiang chuan, zirtîr tûra thuneihna nei nia inchhâl tam takte’n a thute chu dik lo takin hrilhfiah mah se, a Bible taka erawh chu a him pial reng a ni. Kum zabi tam tak chhûng chuan mithiam, huai taka Pathian Thu letlinga, sem darhtu Jerome-a leh Tyndale-a te an awm bawk a. Mi maktaduai tam takte chuan Bible leh Kristianna lem chu an lo hmêlhriat phah ta a ni.
5. Zâwlnei Daniela’n ‘hriatna dik’ chungchângah eng nge a lo sawilâwk?
5 A tâwpah chuan, Daniela bua sawi lâwk angin, ‘hriatna dik chu a pung’ ta a. Chu punna chu ‘tâwpna hunah’ a thleng a ni—kan tûn lai hunah ngei hian. (Daniela 12:4) Thlarau thianghlim chuan khawvêl pum puiah thutak ngainatute chu Pathian dik leh a thil tum hriatna dik nei tûrin a kaihruai a. Kalpêngte’n kum za tam tak an zirtîr hnuah pawh, Pathian thu chuan a la hneh cheu zêl! Tûn laiah chanchin ṭha chu hmun tina hrilh a ni a, khawvêl thar duhawm tak beiseina chu mite hnênah hriattîr reng a ni bawk. (Sâm 37:11) Tûnah chuan tûn lai huna Pathian thu darh dân i lo zir ang u.
Tûn Laia Pathian Thu Darh Dân
6. Kum 1914-ah khân eng thutakte nge Bible Zirlaite’n an hriat thiam?
6 Kum zabi 19-na tâwp lamah, Bible thutak chuan Bible Zirlai mi tlêm tê, tûn laia Jehova Thuhretute tia koh chu, a tiphûr êm êm a. Kum 1914-ah chuan Bible awmzia an rawn hre ṭan a. Pathian thil tum chungchânga thutak mak tak takte chu an lo hrethiam ta a ni. Chatuan nunna kawng hawng tûra, he leia a Fapa rawn tirh phah hial khawpa Jehova hmangaihna chuan anni chu a hneh êm êm a ni. Pathian hming leh miziate an lo hriain an ngaihlu bawk a. Chubâkah, “Jentailte nî” chu a kin tawh a, mihringte malsâwmtu tûr Pathian Ram inawpna chu a hnai tawh a ni tih pawh an hre thiam ta bawk a ni. (Luka 21:24, King James Version) Chanchin ṭha ropui tak a va ni êm! Chûng thutak thiltithei tak takte chu mi tin hnênah, hmun tinah hrilh tûr a ni. Chu chuan thih leh dam a hril dâwn si a!
7. Engtin nge Bible thutakin tûn laiah a hneh?
7 Chûng thlarau-hriak thih Kristian tlêm tête chu Jehova’n mal a sâwm a. Tûnah chuan, Kristianna dik pawmtute chu maktaduai ruk chuang lai an ni tawh a ni. Pathian thu chu khaw tinah a darh zêl bawk a, tûnah chuan Jehova Thuhretute chu ram 235 laiah an awm tawh a ni. Chu mai ni lovin, Bible thutak chuan a thiltihtheihna chu hmangin, dodâltu zawng zawng, sakhaw mi leh thil dangte pawh a hneh zêl a. He khawvêl pum puia thuhrilna hna hian Isua chu Lalram thiltihtheihna neiin a awm tih hnial rual lohvin a finfiah a ni.—Matthaia 24:3, 14.
8. Jehova Thuhretute punna chungchângah mi ṭhenkhatin eng nge an sawi?
8 Kum zabi pakhatnaa Kristianna pun nasat thu historian-te’n an sawi ang chiahin, tûn laia Jehova mite punna thu pawh hi mithiam tam takin an sawi ve a ni. United States-a mithiam pahnih chuan heti hian an ziak dûn a: “Kum 75 kal ta chhûng khân Jehova Thuhretute chu namên lovin an pung a . . . khawvêl pum huapin an pung a ni,” tiin. Africa Khaw chhaka chanchinbu pakhat chuan Thuhretute chu “khawvêla pung chak berte zînga pakhat leh, Bible zirtîrna an vawn ngheh tlat avânga khawvêl puma sakhaw zah kai ber pâwl,” niin a sawi a ni. Catholic chanchinbu pakhat, Europe rama chhuah chuan, “Jehova Thuhretute pun nasatzia” a sawi lang bawk. Engin nge chutiang khawp chuan puntîr le?
Tûn Laiah Thlarau Thianghlimin Hna A Thawk
9. (a) Tûn laia Pathian thuin a hneh chhan bul ber eng nge ni? (b) Engtin nge Jehova’n a lamah mite a hîp?
9 Tûn laia Pathian thuin a hnehna chhan bul ber chu, kum zabi pakhatna ang chiaha Jehova thlarauvin chak taka hna a thawh vâng a ni a. Isua chuan: “Pa mi tîrtuin a hîp loh chuan tumah ka hnênah an lo kal thei lo vang,” tiin a sawi. (Johana 6:44) Pathianin rilru dik tak pu mite thinlung chu a hîp ṭhîn tih he thu hian a lantîr a ni. A Thuhretute thu hrilna hmangin, Jehova chuan “hnam tinrêng thil duhzâwngte”—he leia mi tluang, berâm ang rilru pute—chu amah be tûrin a hîp a ni.—Hagaia 2:6, 7.
10. Eng ang mite’n nge Pathian thu chu lo chhânglêt?
10 Kâwlkil thlenga Pathian thu theh darh tûrin thlarau thianghlim chuan Pathian mite chu a tichak mai ni lovin, chanchin ṭha lo dawngsawng tûrin mi tinrêngte chu a chêttîr bawk a. Pathian thu pawmtute chu “chi tina mite, ṭawng tina mi te, mi tina mi te, hnam tina mi te” an ni tak meuh a ni. (Thu Puan 5:9; 7:9, 10) Mi hausa leh rethei, lehkha thiam sâng leh thiam lote an ni hlawm a. Mi ṭhenkhatin hun râlmuang leh nuam taka thutak an pawm laiin, ṭhenkhat chuan indona leh tihduhdahna nasa tak kârah an pawm thung. Eng sawrkâr hnuaiah pawh, hnam tin zîngah, concentration camp aṭanga hmun nuam ber ber, lal in thleng pawhin, khawi hmuna mite pawhin chanchin ṭha chu duh takin an lo chhânglêt a ni.
11. Engtin nge thlarau thianghlimin Pathian mite nunah hna a thawh a, eng danglamna chiang tak nge hmuh theih?
11 Mi chi hrang hrang inpawlh an ni chung pawhin Pathian mite chu inngeih dial dialin an awm a. (Sâm 133:1-3) Pathian rawngbâwltute nunah thlarau thianghlimin hna a thawk a ni tih hei hian a tichiang lehzual a ni. A thlarau chu a ṭha zâwngin a chak êm êm a; hmangaihna te, hlimna te, remna te, dawhtheihna te, leh mize duhawm dang dangte nun chhuahpui thei tûrin a chhiahhlawhte chu a ṭanpui a ni. (Galatia 5:22, 23) Hun rei tak tawha zâwlnei Malakia thu sawi lâwk chu tûn laiah hian chiang takin kan hre thiam ta. Hetiang hian a lo sawi a: “Tichuan. . .mi fel leh mi suaksual, Pathian rawngbâwltu leh bâwl lotu chu in thliar thei tawh ang,” tiin.—Malakia 3:18.
Pathian Thuin Ṭhahnemngai Taka Rawngbâwltute A Hneh
12. Jehova Thuhretute’n thuhrilh rawngbâwlna hi eng angin nge an ngaih a, an thuhrilnaah eng ang chhân lêtna nge an rin lâwk sa?
12 Tûn laia Jehova Thuhretute hi biak ina inkhâwm mai mai ṭhînte ang an ni ve lo. Thuhril rawngbâwlnaah taima takin an tel a ni. Kristian hmasate ang bawkin, Pathian duhzâwng ti tûrin lâwm takin an inpe a, Jehova Lalramin thil min tiam chungchâng te chu mi dang hrilh tûr an zawng reng a ni. Anni chu Pathian rawngbâwlpuite, a thlarau thianghlim mila mi dangte Jehova rawngbâwlnaa hruaikhâwmtute an ni. Chutianga an tih chuan, ring lotu mihringte chunga Jehova zahngaihna leh hmangaihna chu an lantîr ve a. Huatna te, nuihsawhna te, leh tihduhdahnate tuar chung pawhin hei hi an lantîr ṭâng ṭâng a ni. Isua chuan mite’n chanchin ṭha an lo chhânlêt dân tûr hrang hrang chungthuah a zirtîrte chu thu a hrilh lâwk sa vek a. Hetiang hian a sawi: “‘Bâwih a pu aiin a ropui lo,’ tih thu ka hrilh tawh che u kha hre reng rawh u. Annin kei mi tihduhdah tawh chuan nangni pawh an tiduhdah ang che u; ka thu an zawm tawh chuan nangni thu pawh an zâwm ang,” tiin.—Johana 15:20.
13. Kristianna ramina an thil tlâkchham, Jehova Thuhretute zînga hnianghnâr tak si chu eng nge ni?
13 Tûn laia Jehova Thuhretute leh kum zabi pakhatnaa Kristianna dik pawmtute inanna hi mak kan ti lo thei lo. Tûn laia Jehova Thuhretute leh Kristianna ram inthlauhzia pawh hi thil mak a ni. Kristian hmasate thuhrilnaa an taimâkzia a ziah hnuah, mithiam pakhat chuan: “Tûn laia kohhran kal phung hi a inthlâk danglam a, Kristian baptisma chang tawh zawng zawngin thuhril rawngbâwlna hi an tih ngei ngei tûr anga an ngaih a, ring lo mite nun dân ṭha ber ai pawha ṭhaa an nung a nih chauh loh chuan, hma kan sâwn vak a rinawm loh hle a ni,” tiin a sawi. Kristianna ramina an thil tlâkchham tak mai chu Jehova Thuhretute zîngah chuan a hnianghnâr êm êm si! An rinna chu rinna nung, rinna dik, leh Bible thutaka innghat rinna a ni a, a ngaithla duh apiangte hnênah hrilh zêl an duh a ni.—1 Timothea 2:3, 4.
14. Isua’n a rawngbâwlna chu eng angin nge a ngaih a, tûn laiah a zirtîrte pawhin eng rilru puthmang nge an lantîr ve?
14 Isua khân a rawngbâwlna a la urhsûn êm êm a, a ngai pawimawh ber a ni. Pilata hnênah pawh: “Thutak hriattîr hi ka pian chhan leh khawvêla ka rawn kal chhan a ni,” tiin a sawi. (Johana 18:37) Pathian mite pawhin Isua rilru ang chiah chu an pu ve a ni. Bible thutak chu an thinlunga vawng rengin, mi a theih anga tam hrilh dân kawng an zawng ṭâng ṭâng bawk. Chûng zînga kawng ṭhenkhatte chuan thuhrilhna kawnga remhriatna chhinchhiah tlâk tak a lantîr a ni.
15. Engtin nge mi ṭhenkhatin chanchin ṭha hrilhnaah remhriatna an lantîr?
15 America Chhim lam ram pakhatah chuan, Amazon Lui pêng kam vêla chêngte hnênah thutak hrilh tumin Thuhretute chu lawngin an kal chho va. Mahse, kum 1995-a tualchhûng buaina a chhuah tâkah chuan, tualchhûng mite chu luia zin an khap ta a. Tuina nei mite hnêna Bible thu leh hla chhuahte pêk zêl tum tlatin, Thuhretute chuan thu chhuahte chu lui tui len thlâktîr an tum ta a. Tichuan, lehkha an ziak a, Vênnainsâng leh Awake! magazine te nên plastic saidawiûm chhûngah an thun a. Chu mi zawhah luiah chuan an theh thla ta ṭhîn a ni. Chutiang ringawt chuan kum li leh a chanve chhûng, tualchhûng mite luia zin an phal leh hma zawng chu an thawn a. Chu lui kama chêng zawng zawngte chuan thu leh hlate an thawn reng avângin Thuhretute chu lâwmthu an hrilh mawlh mawlh a ni. Bible zirlai nu pakhat chuan mittui tla ṭeuh chungin: “Ka hmu leh ngai tawh dâwn lo che u emaw ka ti asin. Mahse, saidawiûm chhûnga thu leh hlate ka dawn ṭan aṭang chuan, min la theihnghilh lo a ni tih ka hre ta!” a ti a ni. Chu lui dunga chêng ve mi dangte pawhin magazine-te chu an chhiar nawn an chhiar nawn ṭhîn tih an sawi bawk. Chu lui dunga khaw tam tak chuan “dâk in” an tih mai, li vir tê tak tê hi an nei a, chutah chuan tui luangin thil a hnâwlte rêng rêng chu hun engemawti chhûng a awm khâwm ṭhîn a. Tui luangin chhak lam aṭanga “lehkha” a rawn len thlâk leh thlâk loh hriat nân chu lai hmun chu tuina neite’n an va en ṭhîn a ni.
16. Engtin nge thu hril tûra kan chhuah ringawt pawh hian engemaw châng chuan zirtîr siamna kawng a hawn theih?
16 Chanchin ṭha hrilhna hi Pathian Jehova’n a kaihruai a, a vântirhkoh thiltithei takte pawhin an thlâwp tlat bawk a ni. (Thu Puan 14:6) A châng chuan thu hril tûra kan chhuah ringawt pawh hian, beisei loh takin zirtîr siamna hun remchâng tak a tawn theih a ni. Nairobi, Kenya ramah, thlawhhma rawngbâwlnaa kal Kristian hmeichhe pahnih chuan an thawh tûra ruahman bial chu an thawk zo tawh a. Vawilehkhatah nu pakhat hian anmahni a rawn pan a, phûr tak maiin: “Nangmahni ang mite tawng thei tûr hian ka ṭawngṭai reng ṭhîn asin,” a rawn ti a. Thuhretute chu inkawmna nei tûrin a inah a sâwm a, chu mi ni la la chuan Bible zirna an ṭan ta nghâl a ni. Engati nge chuti taka hman hmawha Kristian pahnihte chu a rawn pan le? Kâr hnih vêl kal tawhah khân chu nu chu a fasênin a boralsan a. Tichuan, mipa naupang pakhatin “Hmangaih Thi Tawhte Tân Eng Beiseina Nge Awm?” tih tract a keng a hmuh chuan a duh ta êm êm a, a dîl ta a. Chu mipa naupang chuan a lo pe phal lo va, mahse tract petu Thuhretute chu a kawh hmuh ta zâwk hi a lo ni a. Chu nu chuan hma a sâwn chak hle mai a, a fa thihna pawh chu a tuar thiam ta tial tial bawk a ni.
Pathian Hmangaihna-in A Hneh Tûr A Ni
17-19. Tlanna hmangin Jehova’n mihringte hnênah eng hmangaihna nge a lantîr?
17 Khawvêl puma Pathian thu darhna chu Isua Krista tlanna inthawina nên a inzawm tlat a. Tlanna ang bawkin, thu hril rawngbâwlna hi Jehova’n mi tinte a hmangaihna lan chhuahtîrna a ni. Tirhkoh Johana chu hetianga ziak tûr hian thlarauva thuam a ni a: “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” tiin.—Johana 3:16.
18 Tlanna ruahmanna hmanga Jehova hmangaihna lantîr hi han ngaihtuah teh. Kum tlûklehdingâwn tam tak chhûng, Pathian chu a Fapa mal neih chhun, “Pathian thilsiam bula” nên inpawh takin an lo awm dûn tawh a. (Thu Puan 3:14) Isua chuan a Pa chu a hmangaih êm êm a; Jehova pawhin “leilung pian hma pawhin” a Fapa chu a hmangaih tawh a ni. (Johana 14:31; 17:24) Jehova chuan mihringte’n chatuana nunna an neih theih nân a Fapa hmangaih tak chu a thih a remti a ni. Mihringte hmangaihna lantîrna ropui tak a va ni tehlul êm!
19 Johana 3:17 chuan: “Khawvêl thiam loh chantîr tûrin Pathianin a Fa khawvêlah a tîr lo, khawvêl amah avânga an dam theihna tûrin a tîr a ni zâwk e,” tiin a sawi a. Chutiang chuan, Jehova’n rorêl tûrin emaw, thiam loh chantîr tûrin emaw ni lovin, hmangaihna avânga chhandamna hna thawk tûrin a Fapa chu a rawn tîr a ni. Hei hi Petera thu sawi: ‘[Jehova] chuan tuma boral duh lovin, mi zawng zawng lo sim a duh a ni,’ tih nên hian a inmil hle a ni.—2 Petera 3:9.
20. Eng kawngin nge chhandamna leh chanchin ṭha hrilhna chu a inkûngkaih?
20 Jehova chuan chhandamna atâna nghahchhan mumal tak, ama’n nasa taka tuar phah hial khawpa a lo ruahman tawh chu mi tam thei ang berin hlâwkpui tûrin a duh a. Tirhhkoh Paula chuan hetiang hian a ziak a ni: “‘Tupawh Lalpa hming lam apiangte chu chhandamin an awm ang,’ tih a ni a. A nih leh, an rin lohva chu engtin nge an lam ang? A thu an hriat lohva chu engtin nge an rin ang? Thu hriltu awm lovin engtin nge an hriat ang?” tiin.—Rom 10:13, 14.
21. Thu hrilh rawngbâwlnaa tel theihna hun remchâng kan neih hi engtin nge kan ngaih ang?
21 Khawvêl pum huap thuhrilh leh zirtîr rawngbâwlnaa tel ve chu chanvo ropui a va ni êm! Hna awlsam tak chu a ni hauh lo; mahse, a mite’n rinawm taka thutak an nunpui leh, chanchin ṭha mi dangte an hrilh a hmuh hian Jehova chu a hlim takzet a ni! Chuvângin, i dinhmun chu engpawh lo ni sela, Pathian thlarau leh thinlunga amah i hmangaihna chuan he rawngbâwlnaa tel tûr hian chêttîr che rawh se. Tin, tûna khawvêl pum puia thil thleng famkim mêk kan hmuhte hi, “vân tharte leh lei thar” ropui tak, “a chhûnga felna awmte” min hruai thleng tûra a thutiam chu Pathian Jehova’n a hlen chhuak thuai dâwn tih finfiahna chiang tak a ni tih hre reng bawk ang che.—2 Petera 3:13.
(w01 4/1)
I Hre Chhuak Thei Em?
• Engvângin nge kalpênnain chanchin ṭha thu hriltute a tihtâwp theih loh?
• Engtin nge kan hun laiah hian Pathian thuin a hneh?
• Eng kawngtein nge tûn laiah Pathian thlarauvin hna a thawh?
• Engtin nge tlanna leh chanchin ṭha hrilhna chu a inzawm?
[Phêk 22-naa graph/milem]
(A lan dân tûr dik tak hriat nân, a lehkhabu en rawh)
Kum zabi 20-naa Lalram thu puang chhuaktute punna zât
Chawhruala Thuchhuahtu awm zât (maktaduai bi zêlin)
6.0
5.5
5.0
4.5
4.0
3.5
3.0
2.5
2.0
1.5
1.0
0.5
1900 1910 1920 1930 1940 1950 1960 1970 1980 1990 2000
[Phêk 21-naa milemte]
JEROME
TYNDALE
GUTTENBERG
HUS
[Milem Hawhtîrtu]
Gutenberg and Hus: From the book The Story of Liberty, 1878
[Phêk 21-naa milem]
Bible Zirlaite’n kum 1920 bâwr chho vêlah chanchin ṭha an puang chhuak
[Phêk 22, 23-naa milemte]
Khawvêl pum puia mite’n chanchin ṭha an chhânglêt
[Phêk 24-naa milem]
Isua Krista tlanna inthawina ang bawkin, thuhrilh rawngbâwlnain Pathian hmangaihna a chawilâr