Êng Thlangtute Tân Chuan Chhandamna
“LALPA chu ka êng leh mi chhandamtu a ni; tunge ka ṭih ang?”—SAM 27:1
1. Nunna thlen thei eng ruahmanna nge Jehova’n a siam?
JEHOVA chu he leilunga nunna awmtîr theitu ni êng lo chhuahna Hnâr a ni a. (Genesis 1:2, 4) Ani chu thihna thlentu Setana khawvêl thimna nuaibotu tûra thlarau lam êng Siamtu a ni bawk. (Isaia 60:2; 2 Korinth 4:6; Ephesi 5:8-11; 6:12) Êng thlangtute chuan fakna hla phuahtu ang bawkin: “LALPA chu ka êng leh mi chhandamtu a ni; tunge ka ṭih ang?” tiin an sawi thei a ni. (Sâm 27:1) Nimahsela, Isua hun laia thil thleng ang bawkin, thim thlangtute chuan rorêlna râpthlâk tak chauh lo chu beisei tûr an nei lo.—Johana 1:9-11; 3:19-21, 36.
2. Hmân laia, Jehova êng hnâwltute leh a thu ngaithlatute chungah khân eng nge thleng?
2 Isaia hun lai chuan, Jehova thuthlunpui mi tam zâwk chuan êng an hnâwl a. Chuvângin, Isaia pawhin Israel hmâr lam lalram hnam tihchhiatna chu a hmuh phah a ni. Tichuan, B. C. E 607-ah, Jerusalem leh a biak in chu tihchhiat a ni a, a chhûnga chêng Juda mite chu sala hruai an ni bawk a. Mahse, Jehova thu ngaithlatute chu chûng hun laia kalpêngte do zo tûra tihchak an ni. B.C.E 607-a thil thlengah chuan Jehova’n amah ngaithlatute chu an dam khawchhuak ang tih a tiam a ni. (Jeremia 21:8, 9) Tûn laia êng hmangaihtute chuan tûn hmaa thil lo thleng tawhte aṭangin thil tam tak an zir thei a ni.—Ephesi 5:5.
Ênga Awmte Hlimna
3. Tûn laiah, eng rinngamna nge kan neih a, eng “hnam fel” nge kan hmangaih a, chu “hnam” chuan eng “kulhpui nghet tak” nge a neih?
3 “Khawpui nghet tak kan nei a; ani chuan chhandamna chu kulh bangte leh kulhpuite tân a ruat ang. Hnam fel thutak zâwmtu chu a luh theihna tûrin kulh kawngkhârte chu hawng rawh u,” (Isaia 26:1, 2) Hei hi Jehova ringtute hlîm ṭawngka chhuak a ni. Isaia hun laia Juda mi rinawmte chuan an rama mite pathian dik lote ni lovin, Jehova chu himna hnâr awmchhun a ni tih an ring tlat a ni. Tûn lai hunah pawh chutiang bawka rinngamna chu kan nei a. Chu bâkah, Jehova “hnam fel”—“Pathian Israel”—chu kan hmangaih a ni. (Galatia 6:16; Matthaia 21:43) A rinawm êm avângin Jehova pawhin he hnam hi chu a hmangaih a. A malsâwmnain, Pathian Israel chuan “kulhpui nghet tak,” khawpui ang mai inawpna pâwl a nei a, chu chuan a ṭanpuiin a vênghim tlat a ni.
4. Eng ang rilru puthmang nge kan neih tûr?
4 Chu “khawpui” chhûnga chêngte chuan, ‘[Jehova] chunga rilru nghattu chu, amah an rin avângin, thlamuang tak maia awm tûrin a vêng ang’ tih an hrechiang êm êm a ni. Jehova chuan amah ring tak taktu leh a dân bul fel tak zâwmtu apiangte chu a ṭanpui ṭhîn. Chuvângin, Judai rama mi rinawmte chuan Isaia fuihna: “LALPA chu kumkhuain ring rawh u: LALPA JEHOVA-ah chuan kumkhaw lungpui a awm si a,” tih hi an ngai pawimawh hle a ni. (Isaia 26:3, 4; Sâm 9:10; 37:3; Thufingte 3:5) Chutiang rilru puthmang neite chuan “LALPA JEHOVA” chauh chu himna Lungpui angin an en a. Amah nên “remna” an chên a ni.—Philippi 1:2; 4:6, 7.
Pathian Hmêlmate Mualphona
5, 6. (a) Hmân lai Babulon kha engtin nge tihmualpho a nih? (b) Engti kawngin nge “Babulon Khaw Ropui” chu tihmualpho a nih?
5 A nih leh Jehova ringtute chuan hrehawm tuar ta se, engtin nge ni ang? An hlau tûr a ni lo. Jehova chuan chûng thilte chu hun engemawti chhûng lek atâna awm a remti a. Ani chuan a tâwpah tihdamna a thlen ṭhîn a, hrehawmna thlentute erawh chuan a rorêlna an hmachhawn ṭhîn a ni. (2 Thessalonika 1:4-7; 2 Timothea 1:8-10) Mit ngeia hmuh theih, “Khawpui sâng tak” chungchâng hi han ngaihtuah teh mah. Isaia chuan heti hian a sawi a: “[Jehova] chuan sâng taka awmte chu a titlâwm ta si a, khawpui sâng tak chu: chu chu a dah hniam a, lei thleng rawkin a dah hniam a, vaivut thleng rawkin a titlu a. Kê chuan a rap bet ang; retheite kê leh pachhiate pên ngei chuan,” tiin. (Isaia 26:5, 6) Heta khawpui sâng tak a tih hi Babulon a nih hmêl hle a. Chu khawpui chuan Pathian mite chu a tirethei chiang hle a ni. Mahse, a chungah eng nge lo thleng? B. C. E 539-ah chuan Medo-Persia kutah an tlâwm ta a ni. A va mualphothlâk êm!
6 Kan hunah hian Isaia hrilh lâwkna thu chuan kum 1919 aṭanga “Babulon Khaw Ropui” chunga thil thleng chu fiah takin min hrilh a ni. Khawpui sâng tak mualphona chu Jehova mite thlarau lam saltânna aṭanga chhuahtîr an nih khân a thleng a. (Thu Puan 14:8) Chu mi hnua thil thleng chu a mualpho thlâk lehzual a. Chûng Kristian pâwl tlêm tête chuan tûn hmaa anmahni lo mantute chu ‘an rapbet’ ve ta thung a ni. Kum 1922-ah chuan Kristianna ram tâwpna a thlen tûr thu an puang ṭan a; tin, Thu Puan 8:7-12-a vântirhkoh pali tawtawrâwt hâm thu leh Thu Puan 9:1–11:15-a chungpikna chi thum hrilhlâwk thu an puangzâr bawk a ni.
“Mi Fel Kawng Chu Dikna a Ni”
7. Jehova êng lam hawitute chuan eng kaihhruaina nge an dawn a, tu hnênah nge beiseina an nghah a, eng nge an ngaihhlut?
7 Jehova chuan a êng lam hawite tân chhandamna a ruahmansak a, an kawng pawh a kaihruai ṭhîn tih Isaia chuan heti hian a târ lang leh a: “Mi fel kawng chu dikna a ni a: nang thinlung dik tak pu chuan mi fel kawng chu i tirual ṭhîn. A ni, aw LALPA, i rorêlna kawngah chuan kan nghâk reng chia; kan nunna duhzâwng chu i hming lam leh nangmah hriat rengna lam hi a ni,” tiin. (Isaia 26:7, 8) Jehova chu dikna Pathian a nih avângin amah chibai bûktute chuan a tehna felte chu an zâwm tûr a ni. Chutianga an tih chuan, Jehova’n anni chu a kaihruai a, an kawng a timâm ṭhîn. Chûng mi thuhnuairawlhte chuan a kaihhruaina ngaih pawimawhna hmangin Jehova an rinzia leh a hming—amah “hriat rengna”—chu an ngaihhlut takzetzia an lantîr a ni.—Exodus 3:15.
8. Eng rilru puthmang entawntlâk tak nge Isaia’n a târ lan?
8 Isaia chuan Jehova hming chu a ngaihlu a ni. Chu chu he a thusawi zawm aṭang hian a lang chiang hle a ni: “Ka nunnain zânah ka duh chia; a ni, ka kawchhûnga ka thlarau awm hian zîng takah ka zawng ang che; i rorêlnate chu leia a lo awm apiangin khawvêla awmte chuan felna chu an zir ṭhîn si a,” tihah hian. (Isaia 26:9) Isaia chuan ‘a nunna’—a taksa pumpuiin Jehova chu a duh a ni. Zâwlneiin zân reh hunte chu Jehova hnêna ṭawngṭai nâna a hman ṭhîn dân te, a ngaihtuahna chhûngril ber a chham chhuah dân te leh ṭhahnemngai taka Jehova kaihhruaina a dîl dân te chu han mitthla teh. A va entawn tlâk êm! Chu bâkah, Isaia chuan Jehova rorêlna aṭangin felna a zir bawk a. He mi kawngah hian, ani chuan Jehova duhzâwng hrethiam tûra harhvân reng a ngaihzia min hriatnawntîr a ni.
Ṭhenkhatin Thim An Thlang
9, 10. Jehova’n a hnam rinawm lote chungah eng ngilneihna thil tihte nge a lantîr a, mahse engtin nge an lo chhânlêt?
9 Jehova chuan Juda mite chungah ngilneihna a lantîr a; mahse, lungchhiatthlâk takin an chhânglêt vek lo. A châng chuan, mi tam zâwk chuan Jehova thutak êng aiin, hel leh kalpên an thlang zâwk ṭhîn a ni. Isaia chuan: “Mi suaksual chu duhsakin awm mah sela, felna a zir chuang hlei lâwng e: dikna ramah chuan dik lo takin a ti ang a, LALPA ropuina a hmu chuang lo vang,” tiin a sawi a.—Isaia 26:10.
10 Isaia hun laia Jehova’n a hmelmate kut ata Judai ram a chhanhim khân mi tam zâwk chuan an pawm duh lo a. A thlamuanna pea mal a sâwm pawhin lâwmna an nei hek lo. Chuvângin, Jehova chuan “lal dangte” rawng bâwl tûrin a hnuchhawn ta a, a tâwpah chuan Juda mite chu B.C.E 607-ah Babulon sala an tân a phal ta hial a ni. (Isaia 26:11-13) Nimahsela, a tâwp atâwpah hnam la bângte chu an in leh lovah an kîr leh ta tho a ni.
11, 12. (a) Juda-ho mantute khân eng hma lam hun beisei nge an neih? (b) Kum 1919-ah tûn hmaa Jehova chhiahhlawh hriakthihte lo mantute’n eng hma lam hun beiseina nge an neih?
11 A nih leh Juda-ho mantute chungchâng kha eng nge ni ve? Isaia chuan hrilh lâwkna thu ang chiahin heti hian a chhâng a: “Anni chu an thi ta a, an nung tawh lo vang; chuvângin nangin anni chu i hremin i tichhia a, an hriat rengna zawng zawng pawh i tiboral ta,” tiin. (Isaia 26:14) Ni e, B.C.E 539-a a tlûkchhiat hnu kha chuan Babulon chuan beisei tûr rêng a nei tawh lo a. Khawpui pawh a awm tawh hek lo. “A ral ta a,” a lalram zau tak pawh chu ram chhe vek tûra ruat a ni ta bawk a ni. He khawvêl mi ropuite chunga beiseina nghatte tân vaukhânna a va ni êm!
12 He hrilh lâwkna hi Pathianin a chhiahhlawh hriak thihte 1918-a thlarau lam sala an tân a phal a, 1919-a chhuah leh an nih khân a thleng famkim a ni. Chuta ṭang chuan tûn hmaa anmahni lo mantute, a bîk takin Kristianna ram hma lam hun chu a lungngaihthlâk hle a. Jehova mite tâna malsâwmna inchhêk khâwl erawh chu a nasa hle thung a ni.
“He Hnam Hi I Tipung Ta”
13, 14. Kum 1919 aṭangin Jehova chhiahhlawh hriak thihte chuan eng malsâwmna nasa tak nge an dawn?
13 Kum 1919-ah Pathian chuan a chhiahhlawh hriak thih inlamlêtte chu malsâwmin a tipung ta a. A hmasa berin, Pathian Israel la bângte lâkkhâwmna chu thawh a ni a; chu mi hnuah, “berâm dâng,” pâwla “mipui nasa tak” chu lâkkhâwm ṭan an ni. (Thu Puan 7:9; Johana 10:16) Chûng malsâwmnate chu Isaia hrilh lâwkna thuin heti hian a sawi a ni: “He hnam hi i tipung ta a, aw LALPA, he hnam hi i tipung ta; nang chu chawimawiin i awm ta: he ram hi a ramrî zawng zawng i tizau ta. LALPA, an mangan laiin an zawng ruai ṭhîn chia, i hremna chu an chunga a tlâk laiin an ṭawngṭai mawlh mawlh a,” tiin.—Isaia 26:15, 16.
14 Tûn laiah, Pathian Israel ramri chu khawvêl pumah a inzâr pharh tawh a, mipui (tam) nasa tak, tûna nuai sawmruk vêl laia lo pung tâte chuan chanchin ṭha chu phûr takin an puang a ni. (Matthaia 24:14) Jehova malsâwmna a va ni teh lul êm! A hming a va tiropui êm! Tûnah chu hming chu ram 235-ah hriat a ni ta si a—a thutiam thlenfamkimna ropui tak a ni.
15. Kum 1919-ah thawhlehna nêna tehkhin eng thil nge thleng?
15 Juda-ho chuan Babulon sal aṭanga chhuak tûrin Jehova ṭanpuina an mamawh a ni. Ṭanpuina tel lo chuan an theihnain a tlin lo. (Isaia 26:17, 18) Chutiang bawkin, kum 1919-a Pathian Israel chhanchhuahna pawh kha Jehova ṭanpui vâng chauh a ni. A tel lo chuan chûng chu a thleng thei hauh lo bawk. Chu an dinhmun inthlâk danglam mak tak mai chu Isaia chuan thawhlehna nên hetiang hian a tehkhin hial a: “I mitthite chu an nung leh ang a; ka mi ruangte chu an tho leh ang. Vaivuta awmte u, harh ula, hlim takin zai rawh u: i daifîm chu thlaite daifîm ang a ni a, lei hian mitthite chu a paih chhuak dâwn si a,” tiin. (Isaia 26:19; Thu Puan 11:7-11) Ni e, mitthite chu an tholeh ngei ang!
Hun Hlauhawma Humhimna
16, 17. (a) B.C.E 539-a Juda mite khân Babulon chhiatna ata an dam khawchhuah nân eng nge an tih ngai? (b) Tûn laia “pindan chhûng” chu eng nge ni a, engtin nge kan hlâwkpui theih?
16 Jehova chhiahhlawhte chuan englai pawhin a humhimna an mamawh a. Mahse, nakin lawkah, a tâwp berna atâna Setana khawvêl chungah a kut a lek dâwn a, chutih hunah chuan amah chibaibûktute chuan tûn hma zawng aiin a ṭanpuina an mamawh lehzual ang. (1 Johana 5:19) Chu hun hlauhawm tak mai chungchângah chuan, heti hian Jehova’n min vaukhân lâwk a: “Hawh u, ka mite u, in pindan chhûngahte lût ula, in kawngte chu inkhâr khum rawh u: lungnih lohna hi a kian hmâ loh chu mitkhapkâr lek biru rawh u. Ngai teh u, LALPA chu, an sualna avânga leia awmte hrem tûrin a awmna ata a lo chhuak dâwn a ni: lei pawh hian a thisente chu a tilang ang a, mi an thahte chu a khuh tawh lo vang,” tiin. (Isaia 26:20, 21; Zephania 1:14) He vaukhâna hian B.C.E 539-a Babulon chhiatnaa Juda mite dam khawchhuah dân tûr a târ lang a. A ngai pawimawh apiangte chuan mahni inah tawmin, kawtthlêra hnehtu sipaiho lak ata chu inhumhim mai tûr an ni.
17 Tûn laiah pawh, hrilh lâwkna thua “pindan chhûng” chuan khawvêl pum puia Jehova mite kohhran sâng tam tak nên inzawmna a nei thei ngei ang. Chûng kohhrante chu tûnah pawh inhumhimna hmun, upate’n hmangaih taka an enkawlna hnuaia Kristiante’n an unaute zînga himna an hmuh theihna a la ni reng a ni. (Isaia 32:1, 2; Hebrai 10:24, 25) Hei hi thuawih leh awih loh azira dam khawchhuah theih hun, he thil kalhmangte tâwpna a hnaih tawhzia han thlîr hian a dik lehzual a ni.—Zephania 2:3.
18. Nakin lawkah engtin nge Jehova’n “tuipuia dragon” a tihboral ang?
18 Tâwpna hun chungchângah Isaia chuan: “Chumi nîah chuan LALPA chuan, a khandaih hriam ṭha tak, lian pui, rinawm tak chuan, liviathan rûlpui chak tak leh liviathan rûlpui chhawkawlh nghut chu a hrem ang a, tuipuia drakon awm chu a that bawk ang,” tiin a lo hrilh lâwk a. (Isaia 27:1) Tûn lai huna “Leviathan” chu eng nge ni? “Rûlpui tar,” Setana leh a thil kalhmang suaksual tak, Pathian Israel do nâna a thil hmante hi a nih hmel hle. (Thu Puan 12:9, 10, 17; 13:14, 16, 17) Kum 1919-ah Leviathana chuan Pathian mite a man chu a thlah a. Nakinah chuan an zaa an la bo vek ang. (Thu Puan 19:19-21; 20:1-3, 10) Chutiang chuan, Jehova’n “tuipuia dragon” chu a tiboral ang a. Chutih laia Jehova mite chunga Leviathana hmanraw hman rêng rêng chu a hlawhtling tluan chhuak lo vang. (Isaia 54:17) Chu mi hriat chu a va thlamuanthlâk êm!
“Grêp Huan Mawi Tak”
19. Tûn laia la bângte dinhmun eng nge ni?
19 Hêng zawng zawng hi Jehova êng aṭanga thlîr chuan, hlimna tûr chhan tin rêng kan nei a ni lâwm ni? Nei teh meuh mai! Isaia chuan Jehova mite hlimzia heti hian mawi takin a sawi chhuak a: “Chu mi nîah chuan, grêp huan mawi tak chawimawiin hla sa rawh u. Kei LALPA hi a vêngtu ka ni; mitkhapkâr tinin tui ka leih ang a, tuman an khawih loh nân achhûn azânin ka vêng ang,” tiin. (Isaia 27:2, 3) Jehova chuan a “grêp huan,” Pathian Israel la bângte leh ṭhahnem ngai taka an thawhpuite chu a ngaihtuah reng a ni. (Johana 15:1-8) Chu chuan rah chhuah ṭha tak, a hming ropuina leh he leia awm a chhiahhlawhte zîngah hlimna nasa tak a thlen a ni.
20. Engtin nge Jehova’n Kristian Kohhran a humhim?
20 A chhiahhlawh hriak thihte chunga tûn hmaa Jehova thinrimna—chu a thinrimna avânga kum 1919-a thlarau lam sala an tân a phalna—chu a tâwp tâk avângin kan hlim hle thei a ni. Jehova ngeiin: “Ka thin a rim tawh lo va: buar leh hnimhlîngneite lo awm mah se ka thlo vang a, hmun khatah ka hâl ral ang. Kei min rem duh chuan ka ângchhûngah lo tlu lût se, mi rem rawh se,” tiin a sawi a ni. (Isaia 27:4, 5) A grêpte’n “huan mawi tak” an chhuah zêl theih nân Jehova chuan buar ang maia anmahni tichhe thei rêng rêng chu thlovin, a tiral vek zêl a ni. Chuvângin, tumahin Kristian kohhran himna tûr chu i tiderthâwng lovang u! Kan zain ‘Jehova ângchhûngah tlu lûtin,’ a duhsakna leh humhimna i zawng zâwk ang u. Chutianga kan tih chuan, thil pawimawh tak Isaia pawhin vawihnih lai a sawi lan, Pathian nên remna kan siam tihna a ni.—Sâm 85:1, 2, 8; Rom 5:1.
21. Engti kawngin nge lei chung hi “rahin” a khah?
21 Malsâwmna chhunzawm zêlah chuan: “Hun lo la thleng tûrah chuan Jakob-ho chuan zung an kai ang a; Israel-ho chu an kuhmûmin an pâr ang: tichuan lei chung hi rahin a tikhat ang,” tih a ni. (Isaia 27:6) He châng hi kum 1919-ah a thleng famkim tawh a, chu chuan Jehova thiltihtheihzia finfiahna mak tak a lantîr a ni. Kristian hriak thihte chuan lei hi “rahin,” thlarau lam chaw ṭha-in an lo tikhat ta a. Khawvêl bawlhhlawh tak kârah pawh Pathian tehfung chungnung tak chu hlim takin an vawng tlat a. Tin, Pathian Jehova pawhin nasa taka puntîrin mal a sâwm zêl bawk. Chutianga an thawh avângin, berâm dang, an thawhpui mi maktaduai tam takte chuan, “achhûn azânin a biak inah chuan a rawng an bâwl” phah a ni. (Thu Puan 7:15) Chu mi “rah” ei theihna leh midangte hnêna hrilhna chanvo hlu tak kan neih chu i theihnghilh ngai lovang u!
22. Êng pawmtute’n eng malsâwmna nge an dawn?
22 He hun khirh tak, thimin leilung a khuh a, thim chhah mupin mite a khuh mêk laia Jehova’n a mite chunga thlarau lam êng a pêk chhuah avâng hian kan lâwm hle lâwm ni? (Isaia 60:2; Rom 2:19; 13:12) Tu pawh chu êng pawm a piangte tân chuan chu êng chu tûna remna leh lâwmna leh nakin huna chatuan nunna a ni bawk a ni. Chuvângin, chhan ṭha tak neiin, keini êng hmangaihtute chuan Jehova fak nâna kan thinlung hawngin: “LALPA chu ka nunna kulhbîng a ni; tunge ka hlauh vang? . . . LALPA chu nghâk reng rawh; chak takin awm la, i thinlung chu intihuai rawh se; a ni, LALPA chu nghâk reng rawh,” tiin fakna hla phuahtu kan zaipui a ni.—Sâm 27:1, 14. (w01 3/1)
I Hre Chhuak Thei Em?
• Jehova mite awpbettute chungah eng nge lo thleng dâwn?
• Isaia bu-ah eng punna chungchâng nge hrilh lâwk a nih?
• Khawi ‘pindan chhûngah’ nge kan awm reng tûr ni a, engvângin nge?
• Engvângin nge Jehova mite dinhmun chuan a hming ṭhatna a thlen?
[Phêk 18-naa bâwm]
THU LEH HLA CHHUAH THAR
He zirlai pahniha kan sawiho tam zâwk hi kum 2000/2001 district inkhâwmpui thusawia sawi lan tawh a ni a. Thusawi a zawh chuan thu leh hla chhuah thar, Isaiah’s Prophecy—Light for All Mankind I tih chu tlângzarh a ni a. He lehkhabu phêk 416 laia chhahah hian Isaia bu hma lam bung 40 chu a châng indawt thliah thliaha sawifiah a ni.
[Phêk 14-naa milem]
Jehova “khawpui nghet tak,” a inawpna pâwlah chuan mi felte chauh awm phal a ni
[Phêk 15-naa milem]
Isaia chuan “zânah” Jehova a zawng
[Phêk 17-naa milem]
Jehova chuan a “grêp huan” a vênghim a, rah a chhuahtîr