Governing Body leh Legal Corporation Inkâr Danglamna
JANUARY 1885 aṭangin, Watch Tower Bible and Tract Society of Pennsylvania chuan kum tin inkhâwm chu a nei ṭan a. Kum zabi 19-na tâwp lama hriak thih Kristiante lâk khâwmna neih mêk lai chuan, he corporation kaihruaitute leh an zînga nihna chelhtute chuan van lam beiseina an nei a ni. Chu chu corporation kal phung a lo ni chho zêl a.
Mahse, chhiar tel loh pakhat a awm. Kum 1940-ah, Hayden C. Covington-a—lei lam beiseina nei, “berâm dang” zînga mi, dân lam panga Society thurâwn petu—chu kaihruaitute zînga mi ni tûra thlan tlin a ni. (Johana 10:16) Kum 1942 aṭanga 1945 thlengin Society vice president-ah a ṭang a. Tichuan, chutih laia Jehova duhzâwng anga lang, Pennsylvania corporation kaihruaitute chu hriak thih Kristiante an ni tûr a ni tih nêna inrem tûrin bânna a theh lût ta a. Lyman A. Swingle chuan corporation-a Hayden C. Covington-a kaihruaitu nihna chu a luah chhâwng a; tin, Frederick W. Franz-a chu vice president atâna thlan tlin a ni.
Engvângin nge Jehova chhiahhlawhte chuan Watch Tower Bible and Tract Society of Pennsylvania kaihruaitute leh an zînga nihna chelhtute chu hriak thih Kristiante chauh ni thei tûra an ngaih? Chutih lai chuan, Pennsylvania corporation kaihruaitute leh an zînga nihna chelhtute chu, thlarauva hriak thihte chauhva din, Jehova Thuhretute Governing Body nên a inthlunzawm tlat vâng a ni.
Chhinchhiah Tlâk Tak Kum Tin Inkhâwm
October 2, 1944, Pittsburgh-a neih kum tin inkhâwmah chuan, Pennsylvania corporation mi leh sate chuan rawtna thu paruk an pu lût a, chûng chu an thuthlung siam ṭhat nân an pawm a ni. An thuthlung chuan Society rawngbâwlna atâna thawhlâwm thawh zât azira vote thlâk theihna pêk tur tih ruahmanna a lo keng tel ṭhîn a; mahse, chu chu rawtna an put luh a pathumna chuan a hnâwl thla a ni. Chu kum tin inkhâwma report an pêk pakhat chuan: “Society mi leh sa chu mi 500 aia tam tûr a ni lo . . . Chuta thlan tûrte chu hun bikima Society rawngbâwl emaw, Jehova Thuhretute company-a [kohhrana] hunbi neia rawngbâwltu emaw an ni tûr a ni a, Lalpa thlarau lantîrtu an ni bawk tûr a ni,” a ti a ni.
Chuta ṭang chuan, Society kaihruaitu nihna chelhtu tûrte thlannaah chuan, Jehova hnêna inpumpêk tak zet mite chauhvin vote an thlâk thei tawh a; Lalram rawngbâwlna hmasâwn nâna thawhlâwm an thawh zâtin awmzia a nei tawh lo. Chu chu, Isaia 60:17 sawi lâwk, zawi zawia hmasâwnna a awm tûr thu nên a inrem a ni. Chu mi chângah chuan: “Dâr aiah rangkachak ka rawn la ang a, thîr aiah pawh tangkarua ka rawn la ang, thing aiah pawh dâr, lung aiah pawh thîr: thlamuanna chu i hotuah ka ruat bawk ang a, felna chu nangmah phûttuah ka ruat ang,” tih kan chhiar a ni. ‘Hotute’ leh ‘phûttute’ chungchâng sawiin, he hrilh lâwkna hian Jehova mite zînga pâwl inenkawl dân tihhmasâwnna a kâwk a ni.
He theocratic kalhmang mil tûra inawpna pâwl sâwi danglamna rahbi pawimawh tak chu, Daniela 8:14-a sawi, “zîng leh tlai sânghnih leh zathum” tâwp hunah a lo thleng a. Chutih lai chuan, “hmun thianghlim chu thenfai” a lo ni ta a ni.
Mahse, kum 1944-a chhinchhiah tlâk tak kum tin inkhâwm zawhah pawh, zawhna pawimawh tak chhân lohvin a la awm cheu a ni. Chu chu, Governing Body chu Pennsylvania corporation kaihruaitu pasarihte nêna a inthlunzawm tlat avângin, Governing Body-ah hriak thih Kristian pasarih aia tam a awm theih loh tihna em ni? tih hi a ni. Chu bâkah, kaihruaitute chu corporation mi leh sate thlan an nih avângin, corporation chuan an kum tin inkhâwmnaah Governing Body member ni tûrte chu an thlang tihna em ni? Watch Tower Bible and Tract Society of Pennsylvania corporation kaihruaitute leh an zînga nihna chelhtute chu Governing Body memberte nên thuhmun nge an nih a, danglamna an nei? tih zawhnate pawh a awm bawk.
Theihnghilh Rual Loh Kum Tin Inkhâwm Dang
A chunga zawhnate hi October ni 1, 1971-a kum tin inkhâwmah chhân a ni. Chu mi ṭum chuan, thusawitu pakhat chuan “bawi rinawm, fing tak” aṭanga din, governing body chu Watch Tower Bible and Tract Society of Pennsylvania din hma kum za tam tak khân a lo awm tawh tih a kawhhmuh a. (Matthaia 24:45-47) Pennsylvania corporation a lo pian chhuah hma kum zabi 18 ai maha tam, C. E. 33, Pentikost nî khân governing body pakhat chu din a ni. Atîr chuan, governing body chu mi 7 ni lovin, tirhkoh 12-te hmanga din a ni a. “Jerusalem khuaa tirhkohte leh upate” chuan hma an hruai avângin, a hnuah governing body chu tihpun a ni tih a lang a ni.—Tirhkohte 15:2.
Kum 1971-a chu thusawitu vêk chuan Watch Tower Society mi leh sate’n hriak thih Governing Body member tûrte an thlang thei lo tih a hrilhfiah bawk. Engvângin nge an thlan theih loh? “‘Bawi’ pâwlte governing body zînga tel tûr chu mihring ruat a nih loh vâng a ni a. Kristian kohhran dik Lu leh ‘bawi rinawm, fing tak’ pâwl te Lal leh Hotu, Isua Krista chu a ruattu a nih zâwk vâng a ni,” a ti a. Chuvângin, Governing Body member-te chu legal corporation mi leh sate thlan tlin theih an ni lo tih a chiang hle a ni.
Thusawitu chuan thu pawimawh tak chu, heti hian a sawi zawm a: “Society Kaihruaitu Pâwl-ah chuan president te, vice president te, secretary-treasurer te, leh assistant secretary-treasurer te an awm a; mahse, governing body chuan chutiang chu a nei ve lo. Chairman chauh a nei a ni,” tiin. Kum tam tak chhûng chu, Pennsylvania corporation-a president chu Governing Body member challang ber a lo ni ṭhîn a. Chutiang chu a ni tawh tûr a ni lo. Theihna leh thiltawn neih dân inang lo mah se, Governing Body member-te chu mawhphurhna lamah an intluktlâng ṭheuh tûr a ni. Thusawitu chuan: “Society . . . president nihna nêna kawp kher ngai lovin, . . . governing body chairman nihna inthlâk kual dân azirin, governing body member tupawh chairman an ni thei,” tiin a belh chhah a ni.
Chu theihnghilh rual loh, 1971-a kum tin inkhâwm chuan, thlarauva hriak thih Governing Body member-te leh Pennsylvania corporation kaihruaitute danglamna a hai lang chiang hle. Chutichung pawhin, Governing Body member-te chu Society kaihruaitute leh nihna chelhtute an la ni ta zêl a. Amaherawhchu, tûn laiah zawhna a lo awm ta a ni: Watch Tower Bible and Tract Society of Pennsylvania kaihruaitute chu Governing Body member-te an ni ngei tûr a ni tih sawina Bible châng a awm em? tih chu.
A awm lo. Pennsylvania corporation chu Jehova Thuhretute hman, dân phal pâwl awm chhun a ni lo. A dang tam tak an nei a ni. Chûng zînga pakhat chu Watchtower Bible and Tract Society of New York, Incorporated hi a ni a. Chu chuan United States-a kan rawngbâwlna a tiawlsam a ni. Chu corporation kaihruaitute leh nihna chelhtute chu “berâm dang” zînga mite ni deuh vek mah se, Jehova chuan mal a sâwm tak zet a ni. Britain ramah chuan International Bible Students Association tih chu dân phal pâwl anga hman a ni a. Tin, ram dangahte chuan Lalram tihhmasâwn nân, dân phal pâwl dang hman a ni. Chûng pâwl zawng zawng chuan, leilung tluanchhuaka chanchin ṭha hrilhna chu an ṭanpui ṭheuh va, chanvo an nei ṭheuh a ni. Khawi hmunah pawh awmin, kaihruaitute emaw, nihna chelhtute emaw chu a tu pawh ni se, chûng dân phal pâwlte chu theocratic hmanga kaihhruai a ni a, Governing Body hmanrua mai a ni. Chuvângin, chûng dân phal pâwlte chuan Lalram tihhmasâwnna kawngah thawh tûr an nei a ni.
Dân phal pâwl neih hi kan tân a ṭangkai a. Chu mi kan neihna hmangin, Pathian Thu-in min phût angin, tualchhûng leh ram dânte kan zâwm a ni. (Jeremia 32:11; Rom 13:1) Dân phal pâwlte avângin Bible te, lehkhabu te, magazine te, brochure te, leh thu leh hla dangte chhut phalna kan nei thei a, chu chuan Lalram chanchin kan puanna a tiawlsam lehzual a ni. Chutiang pâwlte chu in leh lo neih nân te, chhawmdâwlna thawn chhuah nân te, inkhâwmpui hmanna tûr in hawh nân te, leh thil dang dangah te chuan dân phal hmanrua angin a hman theih bawk. Chutiang dân phal pâwlte rawngbâwlna avângin kan lâwm hle a ni.
Jehova Hming Dah Pawimawh Ber
Kum 1944-ah chuan, corporation thil tum tilang chiang tûrin Watch Tower Bible and Tract Society of Pennsylvania thuthlung Article II-na chu siam ṭhat a ni a. Chu thuthlungin a sawi dânin, Society thil tumte zîngah chuan he thil tum bul ber hi a tel a ni: “Pathian Engkimtitheia, JEHOVA hming, a thu leh a ṭhat chungchuanna hriattîrna tûra Isua Krista hnuaia Pathian Lalram chungchâng chanchin ṭha chu hnam zawng zawngte hnêna hrilh nân,” tih hi.
Kum 1926 aṭangin “bawi rinawm” chuan Jehova hming chu a dah pawimawh ta ber a. Chhinchhiah tlâk bîk chu, 1931-a Bible Zirlaite’n Jehova Thuhretute tih hming an lo put ṭan kha a ni. (Isaia 43:10-12) Pathian hming dah pawimawhna, Society thu leh hla chhuahte zîngah chuan Jehovah (1934), “Let Your Name Be Sanctified” (1961), leh “The Nations Shall Know That I Am Jehovah”—How? (1971) tih lehkhabute a tel a ni.
Kum 1960-a Sâpṭawnga a bu puma chhuah Bible, New World Translation of the Holy Scriptures, chanchin chu a bîka sawi tûr a ni. Chu Bible-ah chuan Hebrai Pathian Lehkha Thu-a Tetragrammaton lanna apiangah Jehova hming a chuang a. Fîmkhur taka chhui hnuah a ṭûl avângin, Pathian hming thianghlim chu Kristian Grik Pathian Lehkha Thu-a hmun 237-ah dah luh a ni bawk. Jehova chuan “bawi” leh a aiawh Governing Body chu leilung tluanchhuaka a hming hriattîr nâna thu leh hla chhuahnate leh dân phal pâwlte an hman a phal avângin kan va lâwm êm!
Pathian Thu Thianghlim Semchhuahnain Hma A Sâwn
Jehova mite chuan, a hming chu mite an hriattîr a, Bible ṭanchhan thu leh hla chhuah maktaduai têl leh Bible ngei chhuaha sem chhuakin, a Thu thianghlim chu an chawisâng a ni. Kum 1900 chho bâwr vêl ṭantirh lamah chuan, Watch Tower Society chu Benjamin Wilson-a Kristian Grik Pathian Lehkha Thu, Grik leh Sâpṭawnga ziak kawp, The Emphatic Diaglott chu chhuchhuak tûra dikna neitu a lo ni a. Tin, Society chuan Bible Zirlaite King James Version chu a chhuah leh a, chutah chuan thu belhna phêk 500 lai a tel a ni. Kum 1942-ah, marginal reference tel King James Version a chhuah leh a. Tin, 1944-ah chuan, Pathian hming chuanna kum 1901-a mi, American Standard Version chu a chhu ṭan bawk. Society-in kum 1972-a a chhutchhuah, Stephen T. Byington-a The Bible in Living English-ah chuan Jehova hming a chuang bawk a ni.
Jehova Thuhretute hman, dân phal pâwlte chuan hêng Bible lehlin zawng zawngte chhutnaah leh semchhuahnaah an ṭanpui a. Chhinchhiahtlâk ber erawh chu, hei hi a ni; Watch Tower Society leh hriak thih Thuhretu ho khat hmanga din, New World Bible Translation Committee-te thawhho tlatna hi. He Bible hi a bu pum emaw, a ṭhen emawa ṭawng 38-a copy 106,400,000 chuang chhutchhuah a nih tawh avângin kan lâwm hle a ni. Watch Tower Bible and Tract Society of Pennsylvania chu Bible society a ni tak meuh mai!
‘Bawi rinawm’ chu ‘a pu neih zawng zawng chunga hotua siam’ a ni a. Chu mi zîngah chuan U.S.A. ram, New York State-a in leh lo zawng zawng leh khawvêl puma hman mêk branch office 110-te a tel a ni. Bawi pâwl mi leh sate chuan an hnêna kawltîrte an hman dânah Pathian hmaah mawhphurhna an nei tih an hria a. (Matthaia 25:14-30) Mahse, chu chuan “berâm dang” zînga hotu nih tlingte chu dân lam leh inrêlbâwlna lama mawhphurhna pêk an phalna a dang chuang lo. Dik takin, chu chuan, Governing Body member-te chu ‘ṭawngṭai leh rawngbâwla awm tlat zêl’ tûrin hun a siam a ni.—Tirhkohte 6:4.
He khawvêl dinhmunin rem a tih chhûng chu, “bawi rinawm, fing tak” aiawh Governing Body chuan, dân phal pâwlte chu a hmang ang. Hêng hi a remchâng hle a; mahse, a pawimawh ber a ni lo. Dân phal pâwlte chu sawrkâr thupêk avânga tihtâwp theih ni mah se, thuhrilhna chu chhunzawm zêl a ni ang. Tûnah ngei pawh, khuahkhirhna awmna leh dân phal pâwl hman lohna ramahte chuan, Lalram chanchin chu puan a ni tho va, zirtîrte siam a ni bawk a, Pathian inawpna chu a pung reng a ni. Hetiang a nih chhan hi, Jehova Thuhretute’n an phun a, tuiin an châwm a, ‘Pathianin a ṭhantîr’ vâng a ni.—1 Korinth 3:6, 7.
Hma lam kan thlîr hian, Jehova chuan a mite thlarau lam leh tisa lam mamawh chu a ngaihtuah dâwn tih kan ringngam a ni. Amah leh a Fapa, Isua Krista chuan Lalram thuhrilh rawngbâwlna kan hlen chhuah theihna tûrin vân aṭangin kaihhruaina leh ṭanpuina min pe zêl ang. Chuvângin, Pathian chhiahhlawh kan nihna anga kan thil tihhlawhtlin engkim chu ‘chakna ni lovin, thiltihtheihna ni hek lovin, Jehova thlarau avânga’ tih a ni zâwk a ni. (Zakaria 4:6) Chuvângin, he tâwpna huna hna thawh tûr min pêk hi Jehova min pêk chakna hmangin kan thawk zo dâwn tih hriain, Pathian ṭanpuina kan dîl a ni! (w01 1/15)