Indona Sawh Khâwkte Tihvenna

ABRAHAM-a chu kum 20 chhûng zet rawlrâla râl bei pâwlah a lo ṭang a.a Mahse, tûnah chuan indona a bânsan tawhin, indonaah a tel tawh ngai lo vang. Tûn hmaa a hmêlma ṭhenkhatte phei chu a ṭhian kawmngeih tak an lo ni ta. Ani chu engin nge tidanglam? Bible-in a tidanglam a ni. Bible chuan Abraham-a chu beiseina leh hriatthiamna thûk tak a pe a, mihringte buaina chu Pathian thlîrna aṭanga thlîr tûrin a ṭanpui bawk. Tin, Bible chuan indo a châknate a lâk bosak a, a manganna te, a lungchhiatna te, a mi huatna te, leh a hrehawm tawrh te chu zâwi zâwiin a intidam zêl a ni. Tichuan, thinlung atâna damdawi chak tak chu Bible-ah a awm tih a hmu chhuak ta a ni.

Bible-in rilru lam hliamte chu tidam tûrin engtin nge a ṭanpui? Bible-in Abraham-a chunga thilthleng tûr chu tidang lam thei lo mah se, Pathian Thu chhiarna leh rilrua chhûtna chuan a ngaihtuahnate chu Siamtu ngaihtuahna nên a inremtîr a ni. Tûnah chuan nakin hun beiseina neiin, ngaihpawimawh zâwk tûr thar a nei tawh a. Pathian tâna thil pawimawhte chu a tân pawh a lo pawimawh ve ta zêl a ni. Chutianga thil a lo thlen chuan, a thinlung hliamte chu a dam ṭan ta a. Chu chu, Bible-in inthlâk dang lam tûra a ṭanpui dân a ni.

Tualchhûng Indonaah Telin

Abraham-a chu kum 1930 chho bâwr vêl khân, Africa ramah a lo piang a. Khawvêl Indopui pahnihna a tâwp hnuah a ram chu ṭhenawm ram chak takin a awp a; mahse, a ram mipuite chuan zalênna an duh a ni. Kum 1961-ah chuan Abraham-a chu zalênna sual pâwlah telin, ṭhenawm ram chak tak chu râwlrâla chein, a do a.

“Anni chu kan hmêlmate an ni a. Thah min tum avângin, thah ve tumin kan pên chhuak a ni,” tiin Abraham-a chuan a sawifiah a ni.

Abraham-a nun chu a derthawng zing hle a; chuvângin, kum 20 chhûng zet silai kenga a beih hnu, kum 1982-ah chuan Europe ram lamah a tlân chhia a ni. Chutih lai chuan kum 50 a la tling lo deuh va, a nun kawng chhui lêtna hun remchâng tak a nei a ni. Tichuan, a duhthusâm thil tum chu engtin nge a lo awm tâk? Nakin lam hunin eng nge a thlen dâwn? tihte a ngaihtuah a ni. Abraham-a chuan Jehova Thuhretute zînga ṭhenkhat chu a tawng a; tichuan, an inkhâwmnaah a inkhâwm ṭan ta a. Tûn hma kum engemaw zât kalta khân, Africa ramah Thuhretu pakhatin tract pakhat a pêk chu a hre chhuak leh a. Chu tract chuan he leia paradis lo awm tûr thu leh vân sawrkârin mihringte chungah ro a rêl tûr thu a sawifiah a ni. Chu chu a ni thei tak tak ang em?

Abraham-a chuan: “Bible aṭang chuan tûn hmaa indo nâna hun ka lo khawhral zawng zawngte kha engmah lo mai a ni tih ka hria. Pathian Ram sawrkârna chauhvin mi zawng zawngte chungah diknain ro a rêl dâwn a ni,” tiin a sawi a ni.

Baptisma changa Jehova Thuhretu a nih hnu lâwkah, Africa ram aṭangin Robert-a tia hriat chu Abraham-a awmna Europe khawpuiah chuan a rawn tlân chhe ve a. Robert-a leh Abraham-ate chu a inep zâwngin chu indonaah an tel ve ve a ni. Chutih lai chuan, Robert-a chuan nunin a tum dik tak chungchâng a ngaihtuah ṭhîn a. Amah hi sakhaw mi tak niin, Bible châng ṭhenkhat a chhiarna aṭangin Pathian hming chu Jehova a ni tih a lo hresa a. Abraham-a inkhâwmna kohhrana Thuhretute’n Bible hre thiam lehzual tûra ṭanpui tûrin an sâwm a, chu sâwmna chu a pawm nghâl a ni.

Robert-a chuan: “Atîr tê aṭangin, mihrang an ni tih pawma Jehova leh Isua hming Thuhretute hman dân chuan min khawih hle a. Chu chu Bible aṭanga ka lo hriat dân nên pawh a inrem hle a ni. Thuhretute chu uluk takin an inchei a, eng hnam pawh ni se, mi tinte chungah ngil an nei êm êm a ni. Chûng thilte chuan keimahah nghawng nasa tak a nei a ni,” tiin a sawi a ni.

Hmêlmate Chu Ṭhian Ṭha An Lo Ni Ta

Tûn hmaa inhmêlma Robert-a leh Abraham-a te chu tûnah chuan ṭhian ṭha tak an lo ni ta. Jehova Thuhretute kohhran pakhatah, hun kima chanchin ṭha hriltu niin rawng an bâwl dun a ni. Abraham-a chuan: “Indo lai chuan, ṭhenawm rama mi​—mi tam zâwk chu sakhaw pakhat vuan​—te an inhuat tawn theih chhan ngaihtuah châng ka nei ṭhîn. Tin, Robert-a leh kei ngei pawh sakhaw pakhat vuan ni mah ila kan indo tlat a. Mahse, tûnah chuan kan pahnihin Jehova Thuhretu kan ni tawh a, kan rinna chuan min tipumkhat a ni,” tiin a sawifiah a ni.

“Chu chu a danglamna a ni. Tûnah chuan inunauna tak tak awmtîrtu rinna pakhat kan vuan tawh a. Kan indo tawn ngai lo vang,” tiin Robart-a pawhin a lo belhchhah ve bawk. Bible chuan hêng tûn hmaa inhmêlmate thinlung chu hneh tûrin thiltihtheihna a nei a ni. Inhuatna leh inhmêlmâkna chu zâwi zâwiin inrinna leh inṭhian ṭhatnaah a chang ta a ni.

Abraham-a leh Robert-a te an indo lai khân, hmun dangah ṭhalai pahnih pawh ṭhenawm ram indonaah an lo indo reng a. Mahse, damdawi chak tak angin Bible chuan rei lo têah an inhuatna thinlung chu a tihdamsak a ni. Engtin nge?

That La, Martar-in Thi Rawh

Gabriel-a chu sakhaw ngaihsak tak chhûngkhua aṭanga seilian a ni a, a pianna ram chu indona thianghlimah a inhnamhnawih tih zirtîr a ni. Chuvângin, kum 19 mi a lo nih chuan, sipaiah a ṭang a, râl hma tâwng tûrin a dîl a ni. Thla 13 chhûng chu râl hrânna lai berah a awm a, a châng chuan hmêlmate nên kilometer khat leh a chanve lekin an inhlat a ni. Ani chuan: “Kan hotupain hmêlmate’n zâninah min bei dâwn tih min hrilh ṭum chu ka la hre reng a. Chu chuan min tiphûr hle a; tichuan, zân khuain laipui kan kap chhuak reng a ni,” tiin a sawi a. Ani chuan ram ṭhenawma mite chu a hmêlma anga ngaiin, thi tlâkah a dah hmiah a ni. “A tam thei ang ber thah ka tum a. Chu mi hnuah, ka ṭhian tam takte anga martar-a thih ka duh a ni,” tiin a sawi bawk.

Amaherawhchu, a hnuah Gabriel-a chu a beidawng ta a. Tlâng ramah a tlân chhia a, ram râl muangah lût tûrin ramri chu a rûk a râlin a kân a; tichuan, Europe khawmual lamah a zin chhuak ta a ni. Pathian hnênah nun harsat lutuk chhan leh buainate hi a hremna a nih leh nih loh a zâwt reng ṭhîn a. Ṭum khat chu, Jehova Thuhretute nên an inbe pawh hlauh mai a, anni chuan tûn lai nun buaina hlira a khah chhante chu Bible aṭangin an kawhhmuh a ni.​—Matthaia 24:​3-​14; 2 Timothea 3:​1-5.

A zir nasat poh leh Bible-in thutak a paizia a hre chiang lehzual a ni. “Lei paradis-ah chatuanin kan nung thei tih ka zir a. Mak tak maiin, chu chu ka naupan lai aṭanga ka thil châk êm êm chu a ni,” a ti a. Bible chuan Gabriel-a chu hnêmin, tûn hmaa a thinlunga buaina awmte pawh a tihvensak a ni. A rilru chhûng ril bera hliam pawh a dam ṭan ta a. Chuvângin, tûn hmaa a hmêlma hlun, Daniel-a a hmuh leh khân huatna chhe tê mah a nei tawh lo a ni. A nih leh, Daniel-a chu engin nge Europe ramah lo kaltîr?

“I Awm Tak Tak A Nih Chuan, Khawngaih’in Min Ṭanpui Rawh!”

Daniel-a chu Catholic mi leh sate zînga seilian a ni a, kum 18 mi a nihin sipaia ṭang tûrin an thlang a. Ani chu Gabriel-a telna indonaah, thawn a ni a; mah se, a inep zâwngin an ṭang a ni. Indona hmun an va hnaih chuan, Daniel-a khalh lai tank chu bomb-in an rawn deng a. A thiante chu an thi a, ani chu nasa taka inhliamin an man ta a ni. Ram râl muanga thawn a nih hmain damdawi inah leh camp-ah thla tam tak an kawl a. A khawhar a, a retheih êm avângin intihhlum a tum hial a ni. Tin, Daniel-a chuan Pathian hnênah: “I awm tak tak a nih chuan, khawngaih’in min ṭanpui rawh!” tiin a ṭawngṭai a. Chu mi tûk chiah chuan, Jehova Thuhretute chu an va lêng a, a zawhna tam tak chu an chhânsak vek a ni. A tâwpah chuan, râltlân angin Europe khawmualah a kal chhuak ta a. Chutah chuan Thuhretute nên inkâwmin, Bible a zir leh a. Tichuan, a manganna leh a lungchhiatna chu a thu zir chuan a tiveng ta a ni.

Tûnah chuan, Gabriel-a leh Daniel-a te chu inṭhian ṭha tak an ni a, Jehova Thuhretute zînga baptisma chang tawh an nih angin, thlarau lam inunaunaah an inpumkhat tlat tawh a ni. “Jehova ka hmangaihna leh Bible ka hriatna chuan a thil thlîr dân anga thlîr thiam tûrin min ṭanpui a ni. Daniel-a chu ka hmêlma a ni tawh lo rêng rêng a. Tûn hma chu nise, ka that hmiah mai tûr. Mahse, Bible chuan a inkalh chiah​—a tâna thih inhuam tûrin min zirtîr zâwk a ni,” tiin Gabriel-a chuan a sawi a ni.

Daniel-a chuan: “Sakhaw hrang hranga mite leh ram hrang hranga mite an inthah lai ka lo hmu tawh a. Tin, sakhaw pakhat vuantute pawh an indovin, an inthat ṭhîn a ni. Chutiang ka hmuh chuan, Pathian chu a mawhphurtu-ah ka lo ngai ṭhîn a. Mahse, tûnah chuan indona zawng zawng phênah Setana a awm tih ka hre ta. Gabriel-a nên rinnaa unau kan ni tawh a. Râlthuam lekin kan inbei tawh ngai lo vang!” tiin a sawi a ni.

“Pathian Thu Hi A Nung A, Thil A Ti Thei”

Engvangin nge Abraham-a te, Robert-a te, Gabriel-a te, leh Daniel-a te chu chhinchhiah tlâk taka an inthlâk dang lam? An thinlunga awm nghet tlat, lungchhiatna leh inhuatna te chu engtin nge an thaibo theih?

An vaiin, ‘nung leh thil ti thei’ Bible aṭanga thutak chu an chhiar a, an chhût a, an zir bawk a ni. (Hebrai 4:​12) Bible ziaktu chu, ngaithlaa zir duhte thinlung a ṭha lama thunun dân hretu, mihringte Siamtu a ni a. “Pathian Lehkha Thu zawng zawng hi Pathian thâwk khuma pêk a ni a, zirtîr kawngah te, thiam loh chantîr kawngah te, zilh kawngah te, felna zirtîr kawngah te a sâwt bawk a ni.” A chhiartuin Bible a inkaihruaitîr phawt chuan nungchang ṭha zâwk a nei ang a, Jehova thil thlîr dânte a zir ṭan ang. Chu kalphûng chuan indona sawh khâwkte a tihven mai bâkah, hlâwkna tam tak a thlen a ni.​—2 Timothea 3:​16.

Pathian Thu chuan hnam tin chi tinte chu, a ṭha zâwk leh a chhe zâwk an awm loh thu a sawifiah a. “Pathianin mi duhsak bîk a nei lo. . . . nimahsela, hnam tin zîngah tupawh amah ṭiha fel taka ti apiang a lâwmzâwng mi an ni ṭhîn.” He thu chhiara a pawm apiangte chu hnam leh chi inhuatna rilru zâwi zâwia dahbo tûrin ṭanpui an ni.​—Tirhkohte 10:​34, 35.

Bible hrilh lâwkna chuan, Pathianin tûn lai mihring inawpna kalhmang hi a Messia Lalramin a thlâk thleng thuai dâwn tih a târ lang a ni. He sawrkârna hmangin Pathian chuan, “indonate chu kâwlkil thlengin a tireh” ang. Indona chawk chhuaktu pâwlte leh indo tûra mite fuihtu pâwlte chu paihbo vek a ni ang. Pawisawi lo indonaa thite chu an lo tho leh ang a, lei paradis-ah nunna pêk an ni ang. Indo hmangte emaw, mi nghaisak hmangte emaw avânga tlân chhia an awm tawh lo vang.​—Sâm 46:9; Daniela 2:​44; Tirhkohte 24:15.

Chu mi huna khawsa mihringte chanchin chu, Bible chuan: “Inte an sa ang a, chûngah chuan an awm reng bawk ang; grêp huante an siam ang a, a rah an ei bawk ang. Mi dang awmna tûrin in an sa tawh lo vang . . . A thlâwnin an thawk rim lo vang a, vânduaina mai tûrin fa an hring hek lo vang,” tiin, a sawi a ni. Tin, tihdam loh chhiatna emaw, hliamna emaw a awm bawk lo vang. Chutiang beiseinate rinna chuan mi thinlunga awm, lungngaihna leh manganna te chu zâwi zâwiin a labo dâwn a ni.​—Isaia 65:​21-​23.

Chuvângin, Bible chu thinlung atâna damdawi chak a ni tak meuh mai. A zirtîrnate chuan indona sawh khâwkte chu a tidam a. Tûn hmaa inhmêlmate pawh khawvêl puma inuanunaah a inpumkhattîr tawh a ni. Mihringte thinlung ata inhuatna te, lungngaihna te, lungchhiatna te, leh manganna te lâkbo vek a nih thleng, Pathian kalhmang thar thlengin, he tihvenna hi a awm reng ang. Siamtu chuan “tûn hma thilte chu hriat rengin a awm tawh lo vang a, rilruah pawh a lût tawh hek lo vang,” tiin min tiam a ni.​—Isaia 65:17. (w01 1/1)

[Footnote-te]

[Phêk 4-naa thu lâk chhuah]

“Bible aṭang chuan tûn hmaa indo nâna hun ka lo khawhral zawng zawngte kha engmah lo mai a ni tih ka hria”

[Phêk 5-naa thu lâk chhuah]

Bible chuan tûn hmaa inhmêlmate thinlung chu hneh tûrin thiltihtheihna a nei

[Phêk 6-naa thu lâk chhuah]

Inhuatna leh inhmêlmâkna chu zâwi zâwiin inrinna leh inṭhian ṭhatnaah a chang ta

[Phêk 6-naa thu lâk chhuah]

A chhiartuin Bible a inkaihruaitîr phawt chuan nungchang ṭha zâwk a nei ang

[Phêk 7-naa milem]

Tûn hmaa inhmêlmate pawh khawvêl puma inuanunaah an inpumkhat tawh

[Phêk 4-naa Milem Hawhtîrtu]

Râl tlânho awm khâwmna: UN PHOTO 186811/J. Isaac