Kristian Berâm Vêngtute U, ‘Inhawng Hle Rawh U’!

“LALPA chu mi vêngtu a ni a; ka tlachham lo vang,” tiin Davida chuan a Pathian a rinchhanzia a sawi chhuak a. Thlarau lama sawiin, Jehova chuan ani chu “hlobet hring dup hmunahte” leh “chawlhna tui kamahte,” leh “felna kawngahte” chuan a hruai ṭhîn a ni. Amah dotute’n an hual vêl lai pawhin: “Thil ṭha lo rêng rêng ka hlau lo vang; nang ka hnênah i awm si a,” tia sawitîr tûrin Davida chuan Jehova ṭanpuina leh fuihna a dawng ṭhîn a ni. Chutiang Berâm vêngtu Ropui a neih avângin, Davida chuan ‘LALPA ina kumkhuaa awm’ chu a tum tlat a ni.—Sâm 23:1-6.

Pathian fapa mal neihchhun pawhin Jehova hmangaih enkawlna chu a dawng bawk a; chu chu he leia a châm chhûnga a zirtîrte a dâwrnaah sawisêl bovin a lan chhuahtîr a ni. Chuvângin, Pathian Lehkha Thu pawhin ani chu, “berâm vêngtu ṭha,” “berâm vêngtu ropui tak,” leh “berâm vêngtu lalber,” tiin a sawi hial rêng a ni.—Johana 10:11; Hebrai 13:20; 1 Petera 5:2-4.

Jehova leh Isua Krista chuan anmahni hmangaihtute chu an la vêng reng a. Chu an berâm vênna ṭhenkhat chu, berâmpu hnuaia kohhrana berâm vêngtute a pêknaah hmuh theih a ni. Paula’n: “Pathian kohhranho, ama thisena a leite chu châwm tûrin, nangmahni leh in hote zawng zawng chungah chuan fîmkhur rawh u, Thlarau Thianghlimin an chunga hotuah a siam che u hi,” tia a sawi hian chutianga berâmpu hnuaia berâm vengtute enkawlna chungchâng a sawi a ni.—Tirhkohte 20:28.

Jehova leh Isua entawn tûr siamte mila berâmte enkawl chu thil awlsam a ni lo; mahse, chu chu tûn hma zawng aiin a pawimawh zâwk tawh a ni. Kum thum kaltaa baptisma chang thar mi maktaduai khat chuangte kha han ngaihtuah teh! Khâng mi tharte khân kum tam tak rawngbâwlna aṭanga hmuh theih thlarau lam dinhmun nghet tak an nei lo. Chu bâkah, Thuhretu zînga naupangte emaw, tleirâwlte emaw chu han ngaihtuah bawk teh. Anni chuan an nu leh pate ngaihsakna chauh ni lo, berâmpu hnuaia kohhrana berâm vêngtute ngaihsakna pawh an mamawh a ni.

Kristian zawng zawngte chu pâwn lam aṭanga nêksâwrna hnuaiah an awm vek a, chumi zîngah chuan ṭhiante nêksâwrna pawh a tel a ni. Khawvêl hlimhlâwp bâwlna kawng ûm tûra thlemna chak tak chu do tlat tûrin Kristian zawng zawngte chuan taihmâk an chhuah tûr a ni. Ram ṭhenkhatah chuan, Lalram thuchhuahtute chu an thuchah ken mite’n an ngaihven loh avângin an beidawng mai thei a. Ṭhenkhatte chu natna khirh takin a tlâkbuak thei bawk. Tin, sum leh paia harsatna chuan mi dangte chu Lalram ngaihtuah hmasak harsa a tihtîr cheu thei bawk. Thutaka rei tak lo awm tawhte tiamin, kan zain, berâmpu mi hmangaih theite ṭanpuina chu kan mamawhin, kan phû ṭheuh a ni.

Chêttîrtu Dik

Kum zabi pakhatnaa Kristiante chu: ‘Inhawng hle rawh u’! tia fuih an ni a. (2 Korinth 6:11-13) Kristian upate chuan an berâmte an enkawlnaah he fuihna hi an zâwm tûr a ni. Mahse, engtin nge an zawm theih ang? A nih leh, berâm vêngtu lo la ni tûr, kohhranho rawngbâwltu tam takte ve thung hian engtin nge an zawm theih ang?

Kristian upate chu berâmte tâna malsâwmna ni tûr chuan, an tih tûr a nih vâng mai aia tamin a chêttîr tûr a ni. Upate chu hetianga fuih an ni: “In zînga Pathian pâwlho awm chu enkawl rawh u; tih tûr a nih vâng ni lovin, Pathian thu anga châk chung zâwkin, hlêpna bawlhhlawh duh vâng ni hek lovin, rilrua duh tak zâwkin,” tiin. (1 Petera 5:2) Chuvângin, berâm vênnaa ṭangkai tak ni tûr chuan, mi dangte ṭanpui duhna leh châkna a ngai a ni. (Johana 21:15-17) Chu chu, berâmte mamawh hmu a, ṭanpui vat tihna a ni. Tin, mi dangte nêna kan indâwrnaah Kristian mize ṭha, Pathian thlarau rah kan tih ṭhinte lantîr tihna a ni bawk.—Galatia 5:22, 23.

Berâm vênnaah chuan in lama unaute va tlawhna pawh a tel bawk.a Nimahsela, upa ‘inhawng takte’ chu an inhmang nasa hle a ni; chu chu, a châng chânga berâmte tlawh mai bâka tam an thawk tihna a ni. An berâmte vêng tûrin hun remchâng apiang an hmang ṭangkai a ni.

Berâmpu Ni Ve Tûra Mi Dangte Zirtîrna

An kum chu eng ang pawh ni se, “kohhran hotua ṭan duh chuan . . . hna thawh ṭha a duh a ni.” (1 Timothea 3:1) Kohhranho rawngbâwltu tam takte chuan chanvo dang chelh an duhna an lantîr a. Chuvângin, upate chuan hêng unaupa ‘kohhran hotua ṭang’ duhte chu lâwm takin an ṭanpui ṭhîn. Hei hi berâm vêngtu ṭangkai tak ni tûra zirtîr tihna a ni.

Pathian tehna sâng a vawn tlat avângin, Ezekiela 34:2-6-a sawi ang chi berâmpu suak enkawlna hnuaiah Jehova Kristian kohhran chu a awm ve lo. Chûng berâmpu suakte chu Jehova mit hmuhah an hmusitawm a, hmuhsit âwm rêng pawh an ni. Berâmte châwm lovin, anmahni an inchâwm zâwk si a. Dam lote an ṭanpui lova, mangangte an thlamuan lo va, an hliamte an tuamsak lo va, a nih loh leh an berâm hlauhte an hruaikîrleh hek lo. Berâm vêngtu ai mahin, chinghnia an ang zâwk mah a, berâmte chungah an nunrâwng êm êm a ni. Chûng an ngaihthah berâmte chu enkawltu nei lovin, an darh a, an vâkvai mai mai a ni.—Jeremia 23:1, 2; Nahum 3:18; Matthaia 9:36.

Chutiang berâm vêngtu rinawm lote ang lo takin, Kristian berâm vêngtute chuan Jehova entîr siam chu an zui a. Berâmte chu thlarau lam “hnim hring” leh ‘chawlhna tui kama’ kal turin an ṭanpui a ni. Jehova Thu a nihna ang taka hre thiam tûr leh mahni nuna hmang tûra ṭanpuiin, “felna kawngahte” hruai an tum hrâm hrâm ṭhîn a. “Zirtîr thiam [zirtîr tûra tling]” an nih avângin hei hi hlawhtling takin an tithei a ni.—1 Timothea 3:2.

Upate chuan kohhran inkhâwmnaah an zirtîr deuh ber a. Mahse, a mi mal pawhin an zirtîr bawk a ni. Mi dangte’n thusawi an thiam zâwk laiin, ṭhenkhat erawh chuan a mal mala mite zirtîr an thiam zâwk thei ngei ang. Mahse, zirtîrna kawng khata thiamna neih tlêm zâwk avâng maiin, chu mi chu zirtîrtu tling lo a ni chuang lo. Upate chuan berâm tlawhna pawh tiamin, kawng awm thei apiang hmangin an zirtîr a ni. Berâm tlawhna ṭhenkhat chu hun nei thlapa tih a ni ṭhîn. Mahse, berâm tlâwhna tam tak chu remruat sa lêm lova tihtheih a ni a, chu chuan hlâwkna nasa tak a thlen thei bawk.

Eng Lai Pawha Zirtîrtu leh Berâm Vêngtute

Doctor chuan a hna thawk tûr chuan hriatna leh thiltawn a neih a ngai a. Mahse, damlo chuan ngilneihna, zahngaihna, ngaihsakna, leh ngaihven tak zetna a chunga lantîr a nih chauhvin, chu chu a hre thiam ṭhîn. Hêng hi a miziaah a chhawm tel tûr a ni. Chutiang bawkin, chûng chu zirtîrtu ṭha leh berâmpu ṭhate ni tin mizia a ni tûr a ni. Zirtîrtu dik tak chu a vêla mite a ṭûl hun apianga zirtîr tûrin a inpeih reng ang. Thufingte 15:23 chuan: “A hun taka chhânna dik hriat hi a va lâwmawm êm!” a ti a. ‘A hun tak’ chu kohhrana thu a sawi lai emaw, in tina thu a hrilh lai emaw, a nih loh leh Kingdom Hall emaw, phone emawa mi a biak lai emaw pawh a ni thei. Chutiang bawkin, berâm vêngtu ṭha chuan berâmte tlawh hunah chauh ni lo, eng hunah pawh mize ṭha lantîr an tum reng a ni. ‘Inhawng takin’ berâmte châwm theihna hun remchâng awm apiang chu a hmang ṭangkaiin, an mamawh enkawlnate chu a hun takah a pe ṭhîn ang. Chu ngei mai chu a ni, berâmte mithmuha duhawm tak nihtîrtu chu ni.—Marka 10:43.

Tûna upa ni ta, Walfgang-a chuan kohhranho rawngbâwltu leh a nupuiin an chhûngkua an tlawh lai chu hetiang hian a sawi chhuak a: “Kan fate an ngaihsak avâng leh hun nuam tak kan hmanho avângin kan fate chu an hlim êm êm a. Chu mi chungchâng chu tûn thlenga an titi a la ni,” tiin. A ni, he kohhranho rawngbâwltu hian ngaihsakna a lantîr a; a ‘inhawng’ a ni.

‘Inhawn theihna’ kawng remchâng dang leh chu i ngaihsak a ni tih i hriattîr theihna kawng eng pawh: anmahni va kan te, fuihna thu thawn te, a nih loh leh telephon-a biakte chu a ni. An mamawh hunin ṭanpui la, thil sawi duh an neih chuan, ngun takin ngaithlâksak ang che. Thil ṭha lam, tualchhûng kohhran leh hmun danga theocratic rawngbâwlnate chu phûr takin sawipui rawh. Jehova hmangaihtute tâna buatsaih hmabâk ropui tak chu thlîr tûrin ṭanpui bawk rawh.—2 Korinth 4:16-18.

Berâm Tlawhna Mai Bâkah

A hun thlapa unaute in lama tlawh chu thil pawimawh tak mi mah se, berâmte tlawhna zînga tel thil pawimawhte zînga pêng khat chauh a ni tih hre reng ang che. Chuvângin, berâm vêngtu ṭha chu engtik hunah leh eng dinhmunah pawh, nêlawm tak niin ‘a inhawng’ a ni. A unaute nêna inlaichînna ṭha a siam chuan, manganna an tawn hunah pawh an unaupa mi hmangaih thei tak, Kristian berâm vêngtu chuan a ngaihsak reng tih hriain, thil sual rêng an hlauh a ngai lo vang.—Sâm 23:4.

Ni e, nangni Kristian berâm vêngtu zawng zawngte u, ‘inhawng hle rawh u.’ In unaute chu fuih ula, chhâwk zângkhai ula, in theih ang angin thlarau lamah tungding ula, hmangaihna tak tak lantîr ula, rinnaa ding nghet tûrin ṭanpui rawh u. (Kolossa 1:23) Kristian berâm vêngtu ‘inhawng takte’ an neih avângin, berâmte chuan engmah an tlachham lo vang. Davida ang bawkin, Jehova ina kumkhuaa awm an tum tlat ang. (Sâm 23:1, 6) Eng dang nge mi hmangaih tak berâm vêngtu chuan a duh theih?

[Footnote]

[Phêk 31-naa bâwm]

Kristian Berâm Vêngtute Chuan

•Duh tak leh châk tak chungin rawng an bâwl

•Berâmte an châwm a, an enkawl

•Berâm vêngtu ni ve tûrin mi dangte an ṭanpui

•Damlote an kan a, an ngaihsak

•An unaute ṭanpui tûrin an inpeih reng