“Chûng Chu A Lo Thleng Tûr Rêng A Ni”

“Isuan . . . an hnênah, ‘. . . chûng chu a lo thleng tûr rêng a ni; nimahsela tâwpna chu a la ni rih lo vang’”—MATTHAIA 24:4-6.

1. Kan tuina chu engin nge thunun ang?

I nun-ah leh i hma huna i ngaihvenna chu i ringhlel hauh lo va. Chuvângin kum kalta 1877-a C.T. Russell-a ngaihtuahna la tlattu chungchâng thu pawh chu i ngaihven ngei ang. A hnu-a Watch Tower Society nghahchhan rem chhotu ni ta Russell-a chuan Kan Lalpa Lo Kîr Lehna Awmdân leh a Thiltum (English) chungchâng a ziak a; he lehkhabu tê phêk 64 nei hian Isua lokîrlehna, a nih loh leh lokallehna chungchâng a sawi a ni. (Jo­han­a 14:3) Vawikhat chu Oliv Tlânga-a awm laiin, tirhkohte chuan a lokîrlehna chungchâng chu: “Chûng chu engtikah nge a lo awm ang? i loawmlehna [a nih loh leh ilo “kallehna,” King James Version] leh khawvêl tâwpna chhinchhiahna chu engnge ni ang?” tiin, an zâwt a.​—Matthaia 24:3.

2. Isua thu sawi lâwkte kha engvângin nge ngaih dân inkalh tam tak a awm?

² Isua chhânna chu engnge ni a, chu chu i hrethiam em? Chûng chu Chanchin Ṭha pathum ziak-ahte hmuh a ni. Professor D. A. Carson chuan hetiangin: “Bible bung tlêmtê hian a letlingtute zîngah Matthaia bung 24-na leh Marka bung 13 leh Luka 21-a inmil tih pawm lohna tam zâwk a awm tîr,” ti a sawiin, mihring ngaih dân inmillohna kawng dang mai a ni​—tiin, a ngaih dân a sawi zawm a ni. Kum zabi hnuhnungah hian, chutiang thlîrna tam tak chuan rinna tlâkchham an ngaihtuah a ni. Chanchin Ṭha-a kan chhiar-ah chuan Isua chuan chutiang anmahni hlanna chu a nei ngai lo va, a thu sawite chu a hnu-a tihdanglam, a nih loh leh a thu sawi lâwkna thu ṭhelhte chu​—Bible ziaktu ngaih dân leh tum, a thu ziak thawnthu ngaih dân nghet nei tûra zirna siam, thlîr dân a ni. Ngaih dân sawichhuaktu pakhat pawhin Chanchin Ṭha Marka chu “Maháyána-Buddhist finna thlîr dân aṭangin” a thlîr ve bawk!

3. Engtin nge Jehova Hriatpuituten Isua hrilh­lâwk­na an hriatthiam?

³ Jehova Hriatpuitute erawh chuan Bible dikna leh rintlâkna chu an pawm tlat a, a thih hma ni thum nî a Oliv Tlânga a hnêna awm tirhkoh palite hnêna a thu sawi pawh chu an pawm a ni. C.T. Russell hun aṭangin, Pathian mite chuan chuta Isua’n hrilhlâwkna thu a pêkte chu chiang zâwka hriatthiamna an nei chho zêl a. Kum rei lotê kalta-ah Vênnainsâng (English) chuan he hrilhlâwkna an ngaih dân thui zâwk pawh a tichiang a ni. I nuna a nghawng chhuah hmu-in, chu hriattîrna chu i rilru-ah i vawng rêng em?a I lo ennawn ang u.

Hlenchhuahna Lungchhiatthlâk Lo Thleng Mai Tûr Chu

4. Tirhkohten engvângin nge hma lam hun chungchâng an zawh?

⁴ Tirhkohte chuan Isua chu Messia a ni tih an hre reng a. Chuvângin, a thihna chungchâng te, a thawhlehna te, leh a lokîrleh thute a sawifiah an hriatin, ‘Isua a thih a a kal bo chuan, Messia-in a tih tûra beisei thil mak takte chu engtin nge a hlen chhuah theih ang? tiin, mak an ti hle a. Chu bâkah, Isua’n Jerusalem leh biak in tâwpna chungchâng a sawi pawh chu: ‘Engtikah nge ni ang a, engtin nge chung chu a lo thlen ang? tiin, mak an ti ngei ni tûr a ni. “Chûng chu engtikah nge a lo awm ang? Chûng zawng zawng chu a thlen dâwn hun-ah chhinchhiahna eng nge awm ang?” tiin, chûng thilte chu hriatthiam tumin an zâwt a ni.​—Marka 13:4; Matthaia 16:​21, 27, 28; 23:​37–24:2.

5. Kum zabi pakhatnaa thlenfamkimna hmuh chu engtin nge Isua’n a chhân lêt?

⁵ Isua chuan indo, ṭâm tla, hri lêng, lîr nghing, Kristiante huat leh tihduhdahna, krista dêrte, leh Lalram chanchin ṭha puandarhnate a awm tûr thu leh tichuan tâwpna chu lo thleng tûr a nih thu a sawi lâwk a. (Matthaia 24:​4-14; Marka 13:​5-13; Luka 21:​8-19) Hei hi Isua’n C.E. 33-na tîr lamah a sawi a. Kum zabi sâwm ral chhûngin, a zirtîr harhvâng takte chuan khâng hrilh lâwk thute kha awmze nei takin a thleng mêk tih an hre chiang thei a ni. C.E. 66-70-a Juda inawpna kalhmangte tâwpna tûra Rom-ho kutah hruai a niin, hmân lai chanchin chuan chutih hun lai-in chhinchhiahna chu a thleng famkim tih a tichiang a ni. Engtin nge chûng chu a lo awm?

6. C.E. 66-ah Rom ho leh Juda ho inkârah engnge thleng?

⁶ C.E. 66 Juda nipui sensat hun laiin, Juda Sakhaw atchilh mi fîr tak takte chuan hma hruaiin Jerusalema biak in bula inkulh Rom sipaite chu an bei thut a, tharum thawhna chu ram hmun dangah pawh a darh vek a. Judate chanchin a ziakna-ah, Professor Heinrich Graetz chuan: “Suria Governor Cestius Gallus-a Rom sipaite zahna chawisân nâna thawktu chu, . . . a vêla helna pun lun zêl chu tihreh tûma bei lo chuan a ngawi mai mai thei lo va; a sipai rual tam takte a khâwm a, a ram ṭhenawm lal chuan a sipai rualte chu ama duh thu-in a thawn bawk a,” tiin, a sawi. Chûng sipai 30,000 te chuan Jerusalem chu an hual ta a ni. Engemaw chen an inbeih hnu chuan Judate chu biak in bula bang hnunglamah chuan an inhnûkdâwk ta a ni. “Inzawm zata ni nga Rom hovin kulh an beih chhûng chuan, Juda-ho silai mit nei-in a khawih hmaa tawlh kîr tûra thu pêk reng an ni a. Biak in hmar lam bang ṭhenkhat an tihchhiat hlawhtlinna chu a ni rukna nî chauh­vah a ni.”

7. Engvângin nge Isua zirtîrte kha Juda tam te lak aṭanga danglam taka an chêt?

⁷ Pathianin an mahni leh an khawpui thianghlim chu a vêng him ang tih ngaih dân nghet tak an lo neih tawh si avângin, Juda ho rilru chiai dân tûr chu han ngaihtuah teh! Nimahsela, Isua zirtîrte erawh chu chhiatna nasa takin Jerusalem a nghah reng thu chu vaukhân lâwk an ni. Isua chuan: “I râlten i vêlin lei kulh an siam ang a, an hual ang chia, i vêlin chhuah theih lohvin an awm chhan ang chia, i chhûnga i fanaute, nangmah nên leiah an paih vak ang che, i chhûng­a lung intiang rêng rêng an zuah lo vang,” tiin, a sawi lâwk a ni. (Luka 19:​43, 44) Nimahsela, C.E. 66-a Jerusalem chhûnga Kristiante tân khân thihna a ni kher em?

8. Eng thu lungchhiatthlâk tak nge Isua’n a sawi lâwk a; tin, an mahni avânga nîte tihtawi tûr thlante chu tute nge an ni?

⁸ Oliv Tlânga tirhkohte a chhânna-ah Isua chuan: “Chûng nî chu hrehawmna nî a ni dâwn si a, chutianga nasa rêng rêng chu Pathian siam leilung pian tirh ata tûn thlengin a la awm ngai lo va, engtikah mah a lo awm leh tawh hek lo vang. Tin, Lalpan chûng nîte chu titawi suh sela mihring rêng rêng damin an chhuak lo vang; mahsela, mi thlan, a ruatate avâng chuan nîte chu a titawi a ni,” tiin, a sawi. (Marka 13:​19, 20; Matthaia 24:​21, 22) Tichuan, nîte chu tihtâwi a niin, “thlante” chu an him a. Chûngte chu tute nge an nih le? Juda helhote Jehova biakna humhalh a; mahse, a fapa hnâwl situte chu an ni lo chiang a ni. (Johana 19:​1-7; Tirh­koh­te 2:​22, 23, 36) Thlan dik tak lo ni tate chu Juda leh Juda lote pawh, tupawh Isua chu Krista leh chandamtu Isuaa rinna lantîr apiangte an ni. Pathian chuan chutiang mite chu a thlang a, Pentikost C.E. 33-ah an ni chu thlarau lama hnam thar “Pathian mite”-ah a din a ni. (Galatia 6:16; Luka 18:7; Tirhkohte 10:​34-45; 1 Petera 2:9)

9, 10. Engtin nge Rom ho beihna chu “tihtâwi” a nih a, a rahchhuah engnge?

⁹ Nîte chu “tih tawi” a niin, Je­ru­sa­lem­a awm hriak thih thlante chu an him em le? Professor Graetz chuan: “[Cestius Gallus] chuan mi huaisen thatho takte beih chhunzawm chu finthlâk-ah a ngai lo va; tin, nipui ruah lo thleng mai tûr hun laia thiltum neia hun rei tak a ruala châmbân chu . . . sipaite châwmna dawnna chu a dang chat thei ngei ang. Chu mi avâng chuan hnungtawlh chu a finthlâk zâwk ang, tiin, a ngai a ni ngei tûr a ni.” tiin, thurâwn a siam a ni. Eng pawh Cestius Gallus-a ngaihtuah ang zêl chuan, Rom sipaite chu khawpui aṭangin an tawlh kîr a, Judate an ûm zuina aṭang chuan an tawlh kîr ta a ni.

¹⁰ Mak tak mai a Rom ho tawlh kir leh chuan “mi”​—Isua zirtîrte din hmun hlauhawm taka Jerusalem chhûnga awmte tân kawng a hawn saka​—an himna tûrin. Chanchin ziak chuan he vânneihna kawngka a inhawn lai hian, Kristiante chu ram dangah an tlânchhia niin a chhinchhiah a. Hma lam hun hre lâwk tûr leh amah betute dam khawchhuahna tihchian nâna Pathian theihna lantîrna a va ni chiang êm! A nih leh, ring lotu Juda-ho Jerusalem leh Juda a la châm bângte chungah engnge thleng ve?

A Ruala Tawn Tûr Chu

11. “Tûn lai chhuante” chungchâng Isua’n engnge a sawi?

¹¹ Juda mi tam takte chuan an sakhaw biak dân kalhmanga an biak in-a a laipui ber chu tâwp nei lo va chhunzawm tûr niin an ngai a ni. Amaherawhchu, Isua chuan: “Theipui kûngah hian . . . zir rawh u: A ṭang a lo no va, a hnah a lo chawr chuan nipui a thaw dâwn tih in hre ṭhîn; Chutiang bawkin nangni pawhin chûng zawng zawng chu in hmuh hun chuan amah chu a lo hnai tawh a, kawngka bul ngeiah a awm tih hria ang che u. Tih tak meuhvin ka hrilh a che u, chûng zawng zawng chu a thlen kim hma loh zawng tûn lai chhuan te hi an ral lo vang. (Hawrawp kan tihawn a ni.) Lei leh vân a ral ang a, ka thu erawh chu a ral lo vang,” tiin, a sawi a ni.​—Matthaia 24:​32-35.

12, 13. Engtin nge zirtîrte’n “tûn lai chhuante” Isua sawi chu an hriatthiam?

¹² Kum tîr aṭanga C.E. 66 thlengin Kristiante chuan chhinchhiahna thlenfamkimna tîr chu tam tak an hmu dâwn a ni​—indo, ṭam tla, leh Lalram chanchin ṭha puandarhnate chu. (Tirhkohte 11:28; Kolossa 1:23) A nih loh leh engtikah nge tâwpna chu a lo thlen ang? Isua thusawi: ‘Tûn lai chhuante (Greek ṭawngin ge·ne·aʹ) hi an ral lo vang’ a tih hian engnge awmzia a neih? Isua chuan Juda hel hrat mipuihote, kohhran hruaitute pawh tiamin ‘chhuan sual tak leh uirê hmang takte’ tiin, a ko fo ṭhîn. (Matthaia 11:16; 12:​39, 45; 16:4; 17:17; 23:36) Chuvângin, Oliv Tlânga “tûn lai chhuan” chungchâng a sawi nawn leh khân, dik takin Juda ho zawng zawng an hmân lai chanchin thlengin a huam tel lo va; tin, “chi thlan” an ni nachungin a zuitute a sawina a ni hek lo. (1Petera 2:9) “Tûn lai chhuan” a tih hian hun thu a sawina a ni hek lo.

¹³ Chutih ahnêkin, Isua chuan thlenfamkimna chhinchhiahna a pêk hretu Juda ho lokîrlehte a a sawina a ni a. Luka 21:​32-a mi “tûn lai” chungchâng hrilhfiahna-ah hian Professor Joel B. Green chuan: “Chanchin ṭha pathumna-ah hian, “tûn lai chhuante” chu rual taka mipui ho Pathian thiltum dotute a kâwk a. . . . mipui luhlul taka chung lam thiltum hawisantute [a kâwk] a ni” tiin, a sawi.b

14. Chu “chhuan” chuan thiltawn engnge a neih a, chu chuan Kristiante tân rah chhuah danglam engtin nge a neih?

¹⁴ Juda dodâltu chhuan suaksual chhinchhiahna thleng famkim hmutute chuan tâwpna pawh an tawng dâwn a ni. (Matthaia 24:​6, 13, 14) Chuta an tih chu! C.E. 70-ah Lal Vespasian-a fapa Tita hruaiin Rom sipaite chu an lo kîr leh a. Khawpuia Juda ho hreawmnaa khuahkhirh nawn lehte chu rinna piah lam lek lek a ni.c Mit ngeia hmutu Flavius Josephus chuan Rom hovin khawpui an tihchhiat lai chuan, Juda mi 11,00,000 vêl an thi a, ṭhenkhat 1,00,000 vêl sala man an ni a; chûng zînga a tam zâwk chu râpthlâk taka chaw nghei emaw, Rom ho ennawm chhuahna pindan chhûng emawa thi mai tûr an ni. Dik takin, C.E. 66-70-a hreawmna chu Jerusalem leh Juda kalhmanga an tawn tawh zawng zawng leh an tawn leh tûrah pawh a la râpthlâk ber a ni. Krista hrilh lâwk vaukhânna ngaihsaktu leh C.E. 66-a Rom sipaiten an kiansan hnu-a Jerusalem tlânchhiatsantu Kristiante tân chuan rahchhuah ṭha danglam a va ni tehlul êm! C.E. 70-ah Kristian hriak thih “thlan bîkte” chu an “him,” a nih loh leh zuah an ni.​—Matthaia 24:​16, 22.

Thlenfamkimna Dang Lo Thleng Tûr

15. Isua hrilhlâwkna chuan C.E. 70-na hnu-ah thlenfamkimna ropui zâwk a nei dâwn tih eng­tin nge kan chian theih?

¹⁵ Nimahsela, chu chu a tâwpna a ni lo. A hma-in Isua’n khawpui chu tihchhiat a nih hnu-ah, Jehova hminga a lo kal tûr thu a sawi a. (Matthaia 23:​38, 39; 24:2) Chu mi hnu-ah Oliv Tlânga a hrilhlâwkna chiang tak-ah hei hi fiah zâwkin a sawi leh a ni. “Hrehawmna nasa tak” lo thleng tûr sawifiahin, chumi zawh-ah chuan Krista der an lo lan tûr thu leh Jerusalem chu hun zauh chhûng atâna hnamte rahbehin an awm tûr thu a sawifiah a. (Matthaia 24:​21, 23-28; Luka 21:24) Thlenfamkimna dang nasa zâwk lo thleng tûr chu a ni thei em le? Thei tih chu chhânna dik a ni. Thu Puan 6:​2-8 (C.E. 70-a Jerusalema hreh­awm­na zawh hnu-a ziah) leh Matthaia 24:​6-8 leh Luka 21:​10, 11 kan khaikhin chuan, indo, ei tûr tlâkchhamna, leh hri lêng chu nasa zâwkin a pung zêl a. He Isua thute thlenfamkimna nasa zâwk hi kum 1914 Khawvêl Indopui 1-na aṭang khân a la thleng ta reng a ni.

16-18. Thil lo thleng tûr engnge kan beisei?

¹⁶ Kum sâwm tam Jehova Hriatpuitute chu thlenfamkimna chhinchhiahna thleng mêk chuan “hrehawm nasa tak” chu a lo la thleng tûr a ni tih a tichiang tih chu zirtîr an ni. Tûn lai “chhuan” suaksualten chûng hrehawmna chu an hmu dâwn a ni. C.E. 66-a Gallusa’n Jerusalem hrehawmna kawng a hawng ang chiah khân, bul ṭanna thil thleng (sakhaw dik lo zawng zawng beihna) a awm leh dâwn a nih hmêl a ni.d Ti­chuan, hun tlazep a rei zâwng chiah hriat loh zawh-ah chuan tâwpna chu a lo thleng dâwn a ni.​—C.E. 70-a thleng ang chiah khawvêl pumpui huap tihchhiatna chu.

¹⁷ Kan hma lawka hrehawmna lo thleng tûr chu sawiin Isua’n: “Chûng ni hrehawm hnu lawkah chuan nî tihthimin a awm ang a, thla a êng tawh lo vang a, vân aṭangin arsite a lo tla ang a, vân thiltihtheihnate chu tihnghîn a ni ang; chutih hunah chuan Mihring Fapa chhinchhiahna chu vânah a lang ang. Chu mi hun-ah chuan leia chi tinin an âwmte an inchûm ang a, Mihring Fapa hi thiltihtheihna leh ropuina nasa tak nên vân chhûm chunga lo kal an hmu ang,” tiin, a sawi a ni. (Matthaia 24:​29, 30.)

¹⁸ Tichuan, Isua ngeiin, “chûng ni hrehawm hnuah” chuan van lam chhinchhiahna thil ṭhenkhat a thleng dâwn tih a sawi a. (Joela 2:​28-32; 3:15 khaikhin rawh.) Hei hian thuawih lo mihringte chu a tihlauvin a tikhûr ang a; mi tam takin “an âwmte an inchûm ang.” Mi tam takte chu “thlabâr avâng leh khawvêla thil lo thleng tûr chu ngaihtuah avângin an thidang ang.” Nimahsela, hei hi Kristian dikte chunga thleng tûr a ni ve lo! An ni chu an ‘dâk chhuak ang a, an chhandamna tûr chu a hnaih tâk avângin.’​—Luka 21:​25, 26, 28.

Rorêlna Lo Awm Tûr!

19. Berâm leh kêl tehkhin thu thlen famkim hun tûr engtin nge kan rin ngheh theih le?

¹⁹ Matthaia 24:29-31-in a hrilh lâwk (1) mihring Fapa lokallehna, (2) he lokallehna hi ropuina nasa tak nên a ni dâwn (3) vântirhkohten amah an rawn zui ang a; tin, (4) leia hnam zawng zawng ten amah an hmu ang tih hre reng ang che. Isua chuan hemi chungchâng hi berâm leh kêl tehkhin thu-ah khân a sawi nawn a ni. (Matthaia 25:​31-46) Chuvângin, he tehkhin thu hian hreawmna inṭanna zawha, Isua chu a vântirhkohte nên lo kal hun-ah, ṭhutthlengah chuan rorêl tûra ṭhut hun chungchâng a sawi a ni tih kan hre thei a ni. (Johana 5:22; Tirhkohte 17:31; 1 Lalte 7:7; Daniela 7:​10, 13, 14, 22, 26; Matthaia 19:28 khaikhin rawh.) Tu-in nge rorêl ang a, engnge a rahchhuah ni ang? Tehkhin thu hian I­sua’n hnam zawng zawngte hnênah ngaihtuahna a lantîr ang a, chutiang chuan a vân lam lal­ṭhut­phah hma-ah chuan an kal khâwm ang tih a lantîr a ni.

20, 21. Isua tehkhin thua berâmte chungah engnge thleng dâwn? (b) Hma lam hun-ah kêlte’n engnge an tawn dâwn?

²⁰ Berâm ang mite chu Krista duhsakna ding lamah thliarhran an ni ang. Engvângin nge? A chhan chu an hun remchâng neihte chu a unaute tâna thil ṭha tih nân an hmang ṭhîn a​—Isua van lam Lalram a chanvo nei ve tûr Kristian hriak thihte chungah chuan. (Daniela 7:27; Heb­rai 2:9​—3:1) Tehkhin thu nêna inmilin, berâm ang Kristian maktaduai tam takte chuan Krista thlarau lam unaute chu thlâwpin leh anmahni ṭanpuiin hna an thawk mêk a ni. A rahchhuah chu, hêng mipui nasa takte hian Bible rin­chhan beiseina “hrehawmna nasa tak” a dam khawchhuah leh lei lam Pathian Lalram, Paradis-a chatuana nun chu a ni.​—Thu Puan 7:​9, 14; 21:​3, 4; Johana 10:16.

²¹ Kêlte tân chuan rah chhuah danglam chu a va ni dâwn êm aw! Matthaia 24:​30-ah chuan an ni chuan Krista lo kal hun chuan ‘an âwmte inchûm’ anga hrilhfiah a ni. Chutianga tihna tûr chhan an nei a ni, khawvêl boral mêk chu thlanga Isua zuitute chu hnâwlin, Lalram chanchin ṭha chu hnâwlna chhinchhiahna an neih dâwn avângin. (Matthaia 10:​16-18; 1 Johana 2:​15-17) Isua’n​—he leia a zirtîrte’n ni lovin​—tute nge kêlte chu a tichiang a. “Chûng chu kumkhaw hremna-ah an kal ang,” tiin, an ni chu a sawi a ni.​—Matthaia 25:46.

22. Isua hrilh lâwk thu englai ber nge kan ngaihtuahna thui zâwk pêkna tlâk?

²² Matthaia 24 leh 25-naa hrilhlâwkna hriatthiamnaa kan hmasâwnna chu mi a tiphûr hle a ni. Chuvângin, Isua hrilhlâwkna kan rilru thui zâwk pêkna tlâk pêng khat a awm​—‘tiṭiautu ten­awm, . . . hmun thianghlima ding’ chu. Isua chuan a zuitute chu hemi chungchângah hian hriatthiamna hmang tûr leh a ṭûl anga che tûra inpeih reng tûrin a ngên a ni. (Matthaia 24:​15, 16) Chu “tiṭiautu tenawm” chu engnge ni? Engtik-ah nge hmun thianghlimah chuan a din dâwn? A nih leh engtin nge tûna kan nun leh hma lam nun beiseina a inkaihhnawih dân? A dawt leha thu ziakin hei hi a sawifiah ang.

[Footnote-te]

I Hre Chhuak Thei Em?

◻ Matthaia 24:​4-14 hian kum zabi pakhatna-ah eng thenfamkimna nge a neih?

◻ Matthaia 24:​21, 22-a a târlan angin, tirhkohte hun-ah engtinnge nî chu tihtâwi a nih a, mihringte zuah an nih?

◻ Matthaia 24:​34-ah “chhuante” nihphûng engnge a sawi?

◻ Oliv Tlânga hrilhlâwkna a pêk khân thlenfamkimna dang, ropui zâwk a nei dâwn tih engtin nge kan hriat theih?

◻ Engtik-ah leh engtin nge berâm leh kêl tehkhin thu a thlen famkim ang?

[Phêk 12-naa milem]

Rom-a Tita kulh kum hlûn maia thil awm zawng zawngte chuan, Jerusalem chhiatna aṭanga an thil lâkkhâwm zawng zawngte a lantîr a ni.

[Credit Line]

Soprintendenza Archeologica di Roma