ZIRLAI 47
Baptisma Chang Tûrin I Inpeih Tawh Em?
Bible sawihona aṭangin Jehova chungchâng thil tam tak i hre tawh a. I thu zirte nunpui tûrin inthlâk danglamna ṭhenkhat i nei tawh ngei a rinawm a ni. Chutichung pawhin, Jehova hnêna inpumpêka baptisma chang tûra dâltu che thil engemaw a la awm mai thei. He zirlaiah hian baptisma chang tûra min dâltu tlânglâwn tak ṭhenkhat leh chûngte i hneh theih dân sawiho a ni ang.
1. Baptisma i chan hmain Bible hriatna eng zât nge i neih ngai?
Baptisma chang thei tûr chuan ‘thutak hriatna’ i neih a ngai a. (1 Timothea 2:4) Mahse, baptisma i chan hmain Bible chungchâng zawhna zawng zawngte chhânna i hriat vek a ngai tihna erawh a ni lo. Baptisma channa rei tawh Kristiante pawhin an la zir zêl a ni. (Kolossa 1:9, 10) Mahse, Bible zirtîrna bul puite i hriatthiam erawh a ngai a. Kohhran upate chuan Bible hriatna eng emaw chen i neih leh neih loh hre tûrin an ṭanpui ang che.
2. Baptisma chan hmaa i tih ngai ṭhenkhat chu engte nge ni?
Baptisma i chan hmain, ‘i sim a, i hawi kîr leh’ a ngai a. (Tirhkohte 3:19 chhiar rawh.) Chumi awmzia chu i thil sual tihte avângin i inchhîr a, Jehova hnênah a ngaihdamna i dîl tihna a ni. Nungchang ṭha lote hnâwl tum tlatin, Pathian lâwm zâwnga nun i tum tlat bawk a. Chu bâkah, kohhran inkhâwma telna leh baptisma la chang lo thuchhuahtu anga thu hrilhnaa telin kohhran thiltihahte i tel ṭan tawh bawk a ni.
3. Engvângin nge hlauhna chu i indâltîr loh vang?
Ṭhenkhat chuan Jehova hnêna an thutiamte an hlen theih loh an hlau va. Thil tihsual châng chu i nei ngei ang; Bible-a târ lan mi rinawm a hmei a pate pawhin an nei si a. Mahse, Jehova chuan amah betute chu ṭha famkim tûrin a beisei lo. (Sâm 103:13, 14 chhiar rawh.) Theih tâwp i chhuahna chungah a lâwm a, a ṭanpui ang che! A nihna takah chuan, Jehova chuan thil engmahin “[a] hmangaihna ata chu min ṭhen thei lo vang” tih min tiam a ni.—Rom 8:38, 39 chhiar rawh.
ZIR BELHIN HMUH BELH RAWH
Jehova hriat chian lehzualna leh a ṭanpuina pawmna hmanga baptisma chang tûra harsatna eng pawh i hneh theih dân hria ang che.
4. Jehova hre chiang lehzual rawh
Baptisma i chan hmain Jehova chungchâng eng chen nge i hriat ngai? Amah hmangaih lêt tûr leh tihlâwm duh tûr khawpa i hriat chian a ngai a ni. Khawvêl puma Bible zirlaite’n chutianga an tih dân hriat nân, VIDEO chu chhuah la. Tichuan, a hnuaia zawhna hi sawiho vang che u.
Video-ah khân mi ṭhenkhat chu baptisma chan inpeih tûrin engin nge ṭanpui?
Rom 12:2 chhiarin, hêng zawhnate hi sawiho vang che u:
Bible zirtîrna emaw, Jehova Thuhretute’n thutak an zirtîr tih emaw chungchângah rinhlelhna i nei em?
I nei a nih chuan, eng nge i tih theih?
5. Baptisma chang tûra harsatna awm theite chu hneh rawh
Jehova hnêna inpumpêka baptisma chang tûra thu tlûkna kan siam hian harsatna kan tâwk ṭheuh a ni. Entîrna pakhat hriat nân, VIDEO chu chhuah la, a hnuaia zawhnate hi sawiho vang che u.
Video-ah khân, Narangerel-i tân Jehova rawng bâwl tûrin eng harsatnate nge hneh ngai?
Engtin nge Jehova a hmangaihnain chûng harsatnate chu hneh tûra a ṭanpui?
Thufingte 29:25 leh 2 Timothea 1:7 chhiarin, he zawhna hi sawiho vang che u:
Engin nge harsatnate hneh tûra huaisenna min pe?
6. Jehova tanpuina rinchhan rawh
Jehova chuan amah tilâwm tûrin a ṭanpui ang che. VIDEO chu chhuah la, a hnuaia zawhnate hi sawiho vang che u.
Video-ah khân, Bible zirlai chu baptisma chang lo tûrin engin nge dâl?
Jehova a rinna tichak tûra ṭanpuitu eng nge a zir?
Isaia 41:10, 13 chhiarin, he zawhna hi sawiho vang che u:
Engvângin nge i inpumpêkna thutiam chu i hlen thei ang tih i rin tlat theih?
7. Jehova hmangaihna avânga i lâwmna tizual rawh
Jehova hmangaihna chungchâng i ngaihtuah tam poh leh a chunga i lâwmna a nasa lehzual ang a, chatuana a rawng bâwl i duh lehzual ang. Sâm 40:5 chhiarin, he zawhna hi sawiho vang che u:
Jehova malsâwmna i dawnte zînga eng atân nge i lâwm zual bîk?
Zâwlnei Jeremia chuan Jehova a hmangaihin a thu a ngaina a, Jehova hming put theihna chanvo avângin a lâwm hle a ni. Ani chuan heti hian a sawi: “I thute chu ka tân lâwmna leh ka thinlung hlimna a ni; Aw LALPA, . . . i hming kan pu ta si a,” tiin. (Jeremia 15:16) Hêng zawhnate hi chhâng rawh:
Engvângin nge Jehova Thuhretu pakhat nih chu chanvo hlu tak a nih?
Jehova Thuhretu pakhat anga baptisma chan chu i duh em?
Baptisma chang lo tûra dâltu che a awm em?
Baptisma chang thei tûrin eng nge i tih ngai nia i hriat?
MI ṬHENKHAT SAWI DAN: “Baptisma channain a ken mawhphurhnate mila ka nun theih ka ring lo.”
Chutiang chuan i inring ve em?
KHAIKHAWMNA
Pathian Jehova ṭanpuinain baptisma chang tûra harsatna eng pawh i hneh thei.
Ennawnna
Baptisma chang thei tûrin Bible hriatna eng zât nge i neih ngai?
Baptisma i chan hmain eng inthlâk danglamnate nge i siam ngai mai thei?
Engvângin nge hlauhna chu i indâltîr loh vang?
HRIAT BELH NAN
Baptisma chang tûra i thu tlûkna siam innghahna tûr chu ngaihtuah rawh.
“Baptisma Chang Tûrin I Inpeih Tawh Em?” (Vênnainsâng, March 2020)
Nangmah dâl theitu che harsatna hneh dân hria ang che.
“Baptisma Channa Tûr Engin Nge Min Dâl?” (Vênnainsâng, March 2019)
Pa pakhatin baptisma chang tûra harsatna lian takte a hneh dân en rawh.
Ataa-a chuan a tîrah baptisma chan a hreh a. He rahbi pawimawh tak rap tûra amah hmintu chu en rawh.