ZIRLAI 22
Engtin Nge Chanchin Ṭha I Hrilh Theih?
Bible thutak i han zir hian, ‘Hei hi mi zawng zawngin an hriat a ngai!’ tiin i ngaihtuah mai thei. Ni e, hei hi mi zawng zawng hriat ngai chu a ni ngei mai! Mahse, i thu zirte mi dangte hnêna hrilh chu i tîm pawh a ni mai thei. Chu tîmna i hneh theih dân leh hlim taka Bible-a chanchin ṭha i hrilh ṭan theih dân chu i lo sawiho vang u.
1. Engtin nge i hmêlhriatte hnênah i thu zirte chu i hrilh theih?
Isua zirtîrte chuan: “Thil kan hmuh leh kan hriatte kha sawi lovin kan awm thei lo,” an ti a. (Tirhkohte 4:20) Anni chuan thutak hi an ngaihhlut êm avângin mi a tam thei ang berte hnêna hrilh chu an duh a ni. Chutianga hrilh chu i duh ve em? I duh a nih chuan, i chhûngte leh i ṭhiante hnêna i thu zirte zah thiam taka hrilh theihna hun remchâng chu zawng ang che.—Kolossa 4:6 chhiar rawh.
Thu i hrilh ṭan theih dân kawng ṭhenkhatte
I chhûngte nên in tîtî laiin, Bible thu pakhat heti hian hmêlhriattîr ang che: “Tûn kârah he thu ngaihvenawm tak hi ka zir asin,” tiin.
Dam lohna, a nih loh leh lungkhamna nei i ṭhian pakhat hnênah mi tichak thei tak Bible châng pakhat hmuh rawh.
I chanchin zâwttu che i hnathawhpui hnênah i Bible zirna, a nih loh leh kohhran inkhâwma i thu zir pakhat hrilh rawh.
I ṭhiante chu jw.org website hmuh rawh.
Mi dangte chu i Bible zirnaa ṭhu ve tûrin sâwm la, a nih loh leh jw.org-a Bible zirna neih dîl dân chu kawh hmuh rawh.
2. Engvângin nge kohhranho ruala thu hrilh chu thiltum ṭha tak a nih?
Isua zirtîrte chuan an hmêlhriatte hnêna chanchin ṭha hrilh mai aia tam an ti a. Isua chuan anni chu thu hril tûrin “khaw tinah . . . a hmaah pahnih zêlin a tîr” a ni. (Luka 10:1) Chutianga thu hrilh rawngbâwlna huaihawtna chuan mi a tam thei ang berte chu chanchin ṭha hriat theihna hun remchâng a pe a. A huhova thu hrilhna chuan zirtîrte chu hlimna nasa tak a thlen bawk. (Luka 10:17) Chutianga kohhranho ruala thu hrilh chu thiltumah i nei thei ang em?
ZIR BELHIN HMUH BELH RAWH
Tîmna hneh a, chanchin ṭha hrilhna aṭanga hlimna i neih theih dân tûr chu ngaihtuah rawh.
3. Jehova’n a awmpui ang che
Thu hrilhnaa tel duh mi ṭhenkhat chu mi dangte ngaih dân tûr leh an chhân lêt dân tûr an ngaihtuah hian an tîm mai thei.
I thuzirte mi dangte hnêna hrilh chu i tîm em? Engvângin nge?
VIDEO chu chhuah la, a hnuaia zawhna hi sawiho vang che u.
Engtin nge hêng Thuhretu ṭhalaite hian an hlauhna an hneh?
Isaia 41:10 chhiarin, he zawhna hi sawiho vang che u:
Thu i hrilh ngam loh hunah, engtin nge ṭawngṭainain a ṭanpui ang che?
I lo hre tawh em?
Jehova Thuhretu tam tak chu tûn hmain mi dangte hnênah chanchin ṭha an hrilh ngam an inring ngai lo. Entîr nân, Sergey-a hi tlâktlai lo nia inhriatna a neih avânga mi dangte biak harsa ti tak a ni a. Mahse, a hnuah Bible a zir a. Heti hian a sawi: “Hlau chung chungin mi dangte hnênah ka thu zirte ka hrilh ṭan a. Mak tak maiin, mi dangte hnêna Bible chungchâng ka hrilhna hian inrintâwkna min neihtîr a. Mi dangte hnêna ka thurinte ka hrilhna hian ka rinna a tinghet a ni,” tiin.
4. Mite zah thiam tak ni rawh
Chanchin ṭha i hrilh hunah, i thusawi tûrte chauh ni lovin, i sawi dân tûrte pawh ngaihtuah tel ang che. Timothea thawn hnih 2:24 leh 1 Petera 3:15 chhiarin, hêng zawhnate hi sawiho vang che u:
Engtin nge mi dangte hnêna Pathian thu i hrilh hunah hêng Bible chângte hi i nunpui theih?
I ṭhiante, a nih loh leh i chhûngkaw zînga ṭhenkhat chuan i thusawi chu an pawm lo mai thei a. Chutiang hunah chuan eng nge i tih theih? Eng nge i tih loh vang?
Engvângin nge mi dangte hnêna an rin tûr sawi tawp mai aiin, thiam taka zawhnate zawh chu a ṭhat zâwk?
5. Chanchin ṭha hrilhna chuan hlimna a thlen
Jehova’n Isua chu chanchin ṭha hril tûrin a ti a. Engtin nge Isua’n chu hna chu a thlîr? Johana 4:34 chhiarin, hêng zawhnate hi sawiho vang che u:
Chaw ṭha chuan kan nun a châwmin, min tihlim bawk. Engtin nge Isua chuan chanchin ṭha hrilh pawh tiamin, Pathian duh zâwng tih chu chaw nêna a khaikhin?
Chanchin ṭha hrilhna aṭangin eng hlimnate nge i neih theih i rin?
Thurâwnte
Chawlhkâr chhûng inkhâwmah mite i biak ṭan theih dân kawngte zawng rawh.
Bible zirpuitu che hnênah chawlhkâr chhûng inkhâwma school chanvo i neih theih dân tûr zâwt rawh. School chanvote chuan mi dangte hnêna i thu zirte hrilh thiam lehzual tûrin a ṭanpui ang che.
Zawhna leh hnial kalhna tlânglâwn takte chhân lêt dân tûr i inzir theih nân, he lehkhabua “Mi Ṭhenkhat Sawi Dân,” a nih loh leh “Mi Ṭhenkhat Zawhna,” tih section-te hi hmang ang che.
MI ṬHENKHAT ZAWHNA: “I va vâng ve?”
Engtin nge he hun remchâng hi i thu zirte hrilh theihna hun remchângah i hman theih ang?
KHAIKHAWMNA
Mi dangte hnêna chanchin ṭha hrilhna chuan hlimna a thlen a, chutianga tih ṭan chu i rin aiin a awlsam thei.
Ennawnna
Engvângin nge mi dangte hnênah chanchin ṭha kan hrilh?
Engtin nge chu chu zah thiam takin i tih theih?
Engtin nge thu hril tûra i tîmna eng pawh chu i hneh theih ang?
HRIAT BELH NAN
Kan jw.org contact card hmanga chanchin ṭha hrilh theih dân tûr awlsam tak kawng li chu en ang che.
Chanchin ṭha hrilhnaa ṭanpui theitu che mize pali chhiar rawh.
“Mihring Mantu Ni Tûrin I Inpeih Em?” (Vênnainsâng, September 2020)
Bible-a entîrna pakhatin kan la naupang a nih pawhin chanchin ṭha hrilhnaa huaisenna kan neih theih dân en rawh.
Jehova chungchâng hre lo i chhûngte hnêna thu i hrilh theih dân chhiar rawh.
“Ring Lotu Kan Chhûngte Thinlung Thlenin” (Vênnainsâng thuziak)