ZIRLAI 12

Engin Nge Bible Zir Zêl Tûrin Ṭanpui Ang Che?

Chhut Chhuah Edition

Bible zirna chu zin kawng nuam tak a ni a. Mahse, chu chu engtik lai pawhin a awlsam reng lo thei a ni. A châng chuan, i zir chhunzawm zêl thei ang em tih i ngaihtuah mai thei a. Engvângin nge zir zawm zêl tûra ṭan lâk chu manhla tak a nih? Engin nge harsatnate tâwk chung pawha zir zawm zêl tûrin ṭanpui thei che?

1. Engvângin nge Bible zir chu thil hlu tak a nih?

“Pathian thu hi a nung a, thil a ti thei.” (Hebrai 4:12) Pathian ngaihtuahnate leh i chunga a rilru put hmangte a târ lan avângin Bible chu a hlu hle. Chu chuan hriatna chauh ni lovin, finna leh beiseina dik tak hmu tûrin a ṭanpui che a ni. A pawimawh ber chu, Bible chuan Jehova ṭhian ni tûrin a ṭanpui che a. Bible i zir hian a thiltihtheihna chuan i nunah nghawng ṭha a neihtîr i phal tihna a ni.

2. Engvângin nge Bible thutak a hlutna hriat chu thil pawimawh tak a nih?

Bible-a thutakte hi ro hlu tak ang a ni a. Chuvângin, Bible chuan “thu dik [thutak] chu lei la, hralh leh tawh suh,” tiin min fuih a ni. (Thufingte 23:23) Bible thutak hlutna kan rilrua kan vawn tlat chuan, harsatnate kan hmachhawn hunah pawh zir chhunzawm zêl tûrin theih tâwp kan chhuah ang.—Thufingte 2:4, 5 chhiar rawh.

3. Engtin nge Jehova’n zir zawm zêl tûrin a ṭanpui theih che?

Jehova chu nangmah Siamtu engkimtithei leh i Ṭhian a nih angin, a chungchâng zir tûra ṭanpui che a duh a. Ani chuan chutianga zir ‘tum tûr leh bei tûrin nangmahah a thawk,’ a nih loh leh a chêttîr thei che a ni. (Philippi 2:13 chhiar rawh.) Chuvângin, zirna nei tûr leh i thu zirte nunpui tûra chêttîrtu mamawh châng i neih hunah a ṭanpui thei che a. Harsatna, a nih loh leh dodâlnate hmachhawn tûra chakna i mamawh belh a nih chuan a pe thei che a ni. Bible zirna i chhunzawm zêl theih nân, Jehova hnênah ṭawngṭaiin a ṭanpuina dîl ziah ang che.—1 Thessalonika 5:17.

ZIR BELHIN HMUH BELH RAWH

I buai hle emaw, mi dangte hnên aṭangin dodâlna i tâwk emaw a nih pawhin Bible i zir zawm zêl theih dân hria ang che. Tichuan, zir zawm zêl tûra Jehova’n a ṭanpui dân tûr che ngaihtuah rawh.

4. I Bible zirna chu ngai pawimawh hle rawh

A châng chuan, nunah kan buai êm avângin Bible zirna hun kan nei lo angin a lang thei a. Engin nge ṭanpui thei che? Philippi 1:10, 11 chhiarin, hêng zawhnate hi sawiho vang che u:

Nuna “thil ṭha bîkte [“thil pawimawh zâwkte,” NWT]” zînga ṭhenkhat chu engte nge nia i hriat?
Engtin nge i Bible zirna chu i dah pawimawh ber theih ang?

A. Milem: Lung leh ṭiauvuta khat bâlṭîn lem. 1. Ṭiauvut leh lung lian tak takte. 2. Ṭiauvuta khat ṭêp bâlṭîn. 3. Ṭiauvut chunga awm lung lian tak tak chu leiah an tla.

B. Milem: 1. Ṭiauvut leh lung lian tak tak a tam lam inang. 2. Chu Bâlṭîn tho chu lung lian tak takin a khat ṭêp. 3. Ṭiaute chu lung kârah an tla a, bâlṭîn chu a tlâng rualin a khat. Ṭiauvut tlêmtê bâltîn pâwnah a awm.

Bâlṭîna ṭiauvut i dah hnuah, lung dah i tum a nih chuan lungte chu a leng lo vang
Lung i dah hmasa a nih chuan, ṭiauvut zawng zawng deuhthaw dah luh theihna tûr hmun âwl i nei ang. Chutiang chiah chuan, i nunah “thil pawimawh zâwkte” i dah hmasa a nih chuan, chûng chu i thawk zo thei ang a, thil dang atân pawh hun i la nei thei ang

Bible kan zirna hian kan thlarau lam mamawh—Pathian hriaa amah biak kan ngaihna—a phuhru. Matthaia 5:3 chhiarin, he zawhna hi sawiho vang che u:

Bible zirna kan ngaih pawimawhna chu engtin nge kan hlâwkpui?

5. Dodâlna hmachhawn chung pawhin zirna neih tum tlat rawh

A châng chuan, Bible zirna i neih avângin mi ṭhenkhatin tihlunghnual che an tum mai thei. Francesco-a thiltawn hi chhinchhiah ang che. VIDEO chu chhuah la, tichuan a hnuaia zawhnate hi sawiho vang che u.

VIDEO: Chhelna Lâwmman A Dawng (5:22)

‘Chhelna Lâwmman A Dawng’ tih video-a mi. Francesco-a chuan a ṭhian ngainat takte chu a kawm tawh loh tûr thu a hrilh hnuah a kalsan.

Video-ah khân, Francesco-a’n a thu zirte chu a ṭhiante leh a chhûngte hnêna a hrilh khân engtin nge an chhân lêt?
A chhelna chu engtin nge lâwmman pêk a nih?

Timothea thawn hnih 2:24, 25 chhiarin, hêng zawhnate hi sawiho vang che u:

Engtin nge i thu zir chu i chhûngte leh i ṭhiante’n an ngaih?
Hêng Bible chângte ṭanchhan hian i chunga lungni lo tuemaw chu engtin nge i chhân lêt ang? Engvângin nge?

6. Nangmah ṭanpui tûrin Jehova rinchhan rawh

Jehova kan hnaih hian amah tihlâwm kan duhna chu a pung a. Chutichung pawhin, a tehnate mila nung tûra insiamrem chu harsa kan ti thei. Chutianga i awm chuan beidawng mai suh. Jehova’n a ṭanpui ang che. VIDEO chu chhuah la, tichuan a hnuaia zawhnate hi sawiho vang che u.

VIDEO: Jehova’n Inthlâk Danglam Tûrin Min Ṭanpui (3:56)

Video-ah khân, Jim-a’n Jehova tilâwm tûrin eng inthlâk danglamna nge a siam?
A entawn tûr siam chungchângah engin nge i rilru khawih?

Hebrai 11:6 chhiarin, hêng zawhnate hi sawiho vang che u:

Tihtakzeta amah “zawng tute”—amah hriat tum leh tihlâwm tuma theih tâwp chhuahtute chungah Jehova’n eng nge a tih dâwn?
Hei hian Bible zir tûra theih tâwp i chhuahna Jehova’n a hmuh huna a awm dân chungchâng eng nge a hrilh che?

MI ṬHENKHAT ZAWHNA: “Engvângin nge Bible i zir?”

Engtin nge i chhân ang?

KHAIKHAWMNA

Bible zirna neih chu awlsam reng lo mah se, chu chuan chatuana hlim tûrin a ṭanpui thei che a. Jehova rinchhan zawm zêl la, ani chuan lâwmman a pe ang che.