ZIRLAI 18

Ngaithlatute Tâna Thu Bengvârthlâk

1 Korinth 9:19-23

KHAIKHAWMNA: Ngaithlatute ngaihtuahna chu chawk tho la, thu manhla tak ngaithla nia inhriatna nei tûrin ṭanpui rawh.

Ngaithlatute lo hriat tawhsa thute chu ngaihtuah rawh. Tûn hmaa an lo hriat tawhsa thute sawinawn mai ai chuan, i thu khel chu thlîr dân dang aṭanga thlîr tûrin ṭanpui zâwk rawh.

An hriat tawhsa thute chu rang deuh hlekin sawi la, thu thar deuhte chu muang dapin sawi ang che.
Zir bingna leh chhût ngunna. A thu pawimawh laite hrilhfiah nân an hriat ṭhan loh thil emaw, tûn lai thilthleng emaw chu a theih hunah telh ṭhîn ang che. Chûng thute leh i thusawi tûr inzawm dân chu ngun takin ngaihtuah rawh.

I thusawi tûr i endik laiin, ‘eng nge, engvâng nge, eng hunah nge, khawiah nge, tu nge tih leh engtin nge,’ tih zawhna ang chite inzâwtin i ngaihtuahna chawk tho ang che. Thu i sawi laiin, chûng zawhnate zînga ṭhenkhat inzâwt a, a chhânna pein i thusawi chu nung tak nihtîr rawh.
I thusawi a ṭangkaina târ lang rawh. Ngaithlatute hnênah Bible thute’n an nî tin nuna ṭanpuina a pêk theih dân hrilhfiah ang che. Ngaithlatute tâna pawimawh dinhmun te, rilru put hmang te, leh thiltih engemaw bîkte chu sawipui rawh.