ZIRLAI 8

Mite Zirtîr Thei Tehkhin Thute

Matthaia 13:34, 35

KHAIKHAWMNA: I thu zirtîr chu ngaithlatute rilru la tûr tehkhin thu hriat awlsam takte hmanga tiphuisuiin, thu pawimawh takte chu zirtîr rawh.

Tehkhin thu hriat awlsam takte thlang rawh. Isua angin, thu pawimawh takte hrilhfiah nân an thil hriat ṭhante hmang la, thu khirh takte hrilhfiah nân thu hriat awlsam takte chu hmang rawh. I tehkhin thu tihnawk theitu thu chipchiar takte chu belh suh. I tehkhin thu hman chuan i thu zirtîr tum nên inzawmna nghet tak a nei tûr a ni a. A nih loh chuan, ngaithlatute chuan a inzawmna an hre thiam lo vang a, a ngaihna an hre lo vang.

Thil chîk mi tak ni ang che. I chhehvêla thilthlengte chu chîk la, Kristian thu leh hla chhuahte chu zir chiang la; tichuan, zirtîrtu thiamte thusawi chu ngaithla ang che. Chutianga i tih laiin, i zirtîrna tiphuisui lehzual tûra i hman theih tûr tehkhin thute chu chhinchhiahin file-ah dah ṭha rawh.
Ngaithlatute chu rilruah dah tlat rawh. Ngaithlatute thiltih ṭhin leh ngaihven zâwngte telna tehkhin thute chu thlang rawh. I tehkhin thute chuan ngaithlatute a tihzah loh nân leh lungni lova a siam loh nân fîmkhur ang che.
A pawimawh lai zirtîr rawh. Tehkhin thu chu thusawia thu pawimawh vak lote tâna hmang lovin, thu pawimawh laite tâna hmangin zirtîr rawh. Ngaithlatute chu i tehkhin thu chuah ni lovin, chu mi aṭanga i zirtîr tum ber chu hriat rengtîr ang che.