Kohhranho Rawngbâwltute Chuan Hna Pawimawh Tak An Thawk

PHILIPPI khuaa kohhran hnênah tirhkoh Paula chuan heti hian a ziak a: “Paula leh Timothea, Krista Isua bâwihte chuan Krista Isuaa mi thianghlim Philippi khuaa awm zawng zawngte hnênah, kohhran hotute leh rawngbâwltute hnênah nên,” tiin. (Phil. 1:1) Kohhranho rawngbâwltute chu chibai a bûk tih chhinchhiah ang che. Hêng mite hian chutih hun laia kohhran upate chu ṭanpuiin, chanvo pawimawh tak an chelh tih a lang a. Tûn laiah pawh chutiang tho chu a ni. Kohhranho rawngbâwltute chuan upate ṭanpuitu hna chu kawng tam takin an thawk a, chu chuan kohhranah ruahmanna fel tak a awmtîr a ni.

² In kohhrana kohhranho rawngbâwltute chu i hria em? I ṭhatna tûr leh kohhran pum ṭhatna tûra an hnathawhte chu i hria em? Chûng mipate thawhrimna chu Jehova chuan a ngaihlu hle a. Paula chuan heti hian a ziak a ni: “Kohhranho rawngbâwl lam hna thawk ṭha tawhte chuan dinna ṭha tak leh Krista Isuaa rinna kawngah chuan huaina nasa tak an insiam si ṭhîn,” tiin.—1 Tim. 3:13.

KOHHRANHO RAWNGBAWLTUTE TLIN NGAI BIBLE THIL PHUTTE

³ Kohhranho rawngbâwltute chu Kristian nun entawn tlâk neitu, mawhphurhna la thei mi rin tlâk, chanvote ṭha taka thawk mi ni tûra beisei an ni. Chu chu, Paula’n Timothea hnêna a lehkha thawna kohhranho rawngbâwltute neih ngai miziate a ziahah hian a lang a ni: “Chutiang bawkin Kohhranho rawngbâwltute chu mi zahawm an ni tûr a ni; kamtam te, uain heh te, hlêpna bawlhhlawha duhâm mi te an ni tûr a ni lo; chhia leh ṭha hriatna thiangin rinna thurûk chu pawm mi an ni zâwk tûr a ni. Tin, chûngte pawh chu fiahin awm hmasa rawh se, chumi hnuah sawisêlbo an lo nih chuan kohhranho rawngbâwl lam hna thawk rawh se. Kohhranho rawngbâwltute chu an fate leh anmahni in chhûng khawsak rêl felin nupui pakhat nei ni rawh se,” tihah hian. (1 Tim. 3:8-10, 12, 13) Kohhranho rawngbâwltute tâna tehna sâng takte zawmna chuan, mawhphurhna sâng tak chelh tûra ruat mipate chungchânga dik lo taka puhna awm thei tûrte lakah kohhran chu a vênghim a ni.

⁴ An naupang emaw, an upa emaw pawh ni se, kohhranho rawngbâwltute chu thla tin hian rawngbâwlnaah taima takin an tel ṭhîn a. Isua entawnin, rawngbâwlnaah ṭhahnem an ngai a. Chutianga ṭhahnemngaihna lantîrin, Jehova’n mite chhandam a duhna chu an lan chhuahtîr a ni.—Is. 9:7.

⁵ Kohhranho rawngbâwltute chu an silhfen leh inchei dân, ṭawngkam hman, mizia, leh nungchangah entawn tlâk an ni bawk a. Rilru fel tak puin an awm a, chu chuan mite zah a kaitîr a ni. Chu bâkah, Jehova nêna an inlaichînna leh kohhrana an rawngbâwlna chanvo hlute chu an ngai pawimawh hle bawk.—Tit. 2:2, 6-8.

⁶ Hêng mipate hi ‘fiaha awm tawhte’ an ni a. Kohhranho rawngbâwltu an nih hma pawhin, mi inpe tak an ni tih an lantîr tawh reng a ni. Pathian Ram chu an nunah an dah pawimawh ber tih leh an hmaa rawngbâwlna chanvo hlu awm apiang chu thawk tûrin ṭan an la tih an lan chhuahtîr tawh a. Kohhrana mi dangte tân entawn tlâk an ni tak zet a ni.—1 Tim. 3:10.

RAWNG AN BAWL DAN

⁷ Kohhranho rawngbâwltute chuan kohhrana unaute ṭanpuina ṭangkai chi hrang hrang an pe a, chuvângin kohhran upate chuan zirtîr nân leh berâm enkawl nân hun tam zâwk an hman theih phah a ni. Kohhranho rawngbâwltute hnêna chanvo an pêk hunah upate chuan an theihna leh kohhran mamawhte azirin an pe ṭhîn.

⁸ Kohhranho rawngbâwltute hnathawh ṭhenkhat lo ngaihtuah ta ila: Mahni leh rawngbâwlnaa hman tûr thu leh hla chhuah kan neih theih nân kohhranho rawngbâwltute zînga pakhat chu thu leh hla chhuahte enkawl tûra ruat a ni a. Kohhranho rawngbâwltu dangte chu kohhran sum leh pai emaw, thuhrilhna bial record emaw enkawl tûra ruat an ni thei bawk. Ṭhenkhat chu aurinna hmanrua leh microphone enkawl tûrte, inkhâwma lo kalte lo lâwmtu attendant te, leh kawng danga upate ṭanpui tûra ruat an ni thei bawk a ni. Kingdom Hall enkawlna leh vawn fainaah hnathawh tûr tam tak a awm a, chûng mawhphurhnate chu kohhranho rawngbâwltute hnêna pêk a ni ṭhîn.

⁹ Kohhran ṭhenkhatah chuan, hêng chanvote atân hian kohhranho rawngbâwltu pakhat ṭheuh ruat theih a ni mai thei a. Hmun dangah chuan kohhranho rawngbâwltu pakhatin chanvo tam tak a chelh pawh a ni thei bawk. A châng chuan, chanvo engemaw pakhat chu kohhranho rawngbâwltu pakhat aia tamin an chelh thei bawk a ni. Hêng mawhphurhna ṭhenkhatte thawk tûr hian kohhranho rawngbâwltu a indaih tâwk loh chuan, upate chuan hêng hna pawimawhte thawk tûr hian kohhrana unaupa entawn tlâk baptisma chang tawh chu an ruat pawh a ni thei a ni. Chutiang chuan, kohhranho rawngbâwltu an nih huna ṭangkai tûr thiltawnte an neih phah thei dâwn a ni. Unaupate hman tûr an awm lo a nih chuan, unaunu entawn tûr ṭha siamtu chu thil ṭhenkhata ṭanpui tûrin sâwm a ni thei a, kohhranho rawngbâwltu erawh a ni lo vang. Entawn tûr ṭha siamtu tih chu mi chu a nungchangah leh Pathian a biaknaah entawn tlâk tak tihna a ni. Ani chu inkhâwmna leh rawngbâwlnaa a tel dânah te, a chhûngkaw nunah te, intihhlimna a thlanah te, a silhfên leh inchei dânah te, leh thil dang dangahte pawh mi dangte tâna entawn tûr ṭha a ni tûr a ni.

¹⁰ Kohhran upate an tlêmna kohhranahte chuan baptisma chang tûrte tâna thurin lam hawi zawhnate ennawnpui tûrin kohhranho rawngbâwltu puitling takte chu hman an ni thei a. Chûng zawhnate chu Thu Belhna “Ṭhen 1: Kristian Thurinte” tihah a hmuh theih a ni. “Ṭhen 2: Kristian Khawsak Dân,” tihah hi chuan mi mal thil rilru tina hma thei takte a tel avângin, kohhran upain hei hi chu a enpui tûr a ni.

¹¹ Chhan ṭha a awm chuan, upate chuan kohhranho rawngbâwltute zînga chanvo ṭhenkhat chu a khât tâwka inchelh chhâwktîr chu ṭha an ti mai thei a. Amaherawhchu, tawn hriat ngah tûr leh thiam nâl tûrin unaupate chuan hun engemaw chen chanvo ngai an chelh chu an hlâwkpui thei bawk a ni.

¹² Tualchhûng dinhmun azirin, kohhranho rawngbâwltu, ‘an sâwtna lantîrte’ hnênah chuan mawhphurhna dangte pawh pêk belh a ni thei ang. (1 Tim. 4:15) Kohhran upa a indaih loh chuan, kohhranho rawngbâwltu chu group overseer ṭanpuitu atân, a nih loh leh dinhmun ṭhenkhatah chuan upate kaihhruaina hnuaiah group servant anga ruat pawh a ni mai thei. Kohhranho rawngbâwltute chu Nun leh Rawngbâwlna Inkhâwmah chanvo ṭhenkhat chang tûra ruat an ni thei a; a ṭûl a nih chuan, Kohhrana Bible Zirna kaihruai tûr leh vântlâng thusawi nei tûra tih an ni mai thei bawk. Mamawhna bîk a awm a, chanvo chang tûra an tlin chuan kohhranho rawngbâwltute hnênah chuan chanvo dangte pawh pêk belh theih a ni. (1 Pet. 4:10) Kohhranho rawngbâwltute chu upate ṭanpuinaah inhuam takin an inpe tûr a ni.

¹³ Kohhranho rawngbâwltute leh upate hnathawh chu inang lo mah se, an hnathawh chu Pathian hnêna rawngbâwlna thianghlim a ni a, kohhran ṭha taka a kal chhoh nân a pawimawh a ni. A hnuah, kohhranho rawngbâwltute chuan an mawhphurhnate ṭha taka an thawh a, berâm vêngtu leh zirtîrtu nih an tlin chuan, upa ni tûra rawt an ni thei ang.

¹⁴ Unaupa tleirâwl emaw, baptisma chang thar emaw i nih chuan, kohhranho rawngbâwltu nih theih i tum em? (1 Tim. 3:1) Kum tin hian mi tam takte chu thutaka an lo luh avângin, kohhrana mawhphurhnate la thei tûr thlarau lama puitling tak unaupate chu mamawh an ni a. Mi dangte ṭanpui duhna nei chhovin, chutiang mi chu i rawn ni thei a ni. A tih theih dân kawng khat chu Isua entawn tûr siam ṭha tak chhût ngun hi a ni. (Mt. 20:28; Joh. 4:6, 7; 13:4, 5) Mi dangte pêkna aṭanga hlimna lo awm chu i tawn hunah mi dangte ṭanpui châkna i neihna chu a pung ang. (Tirh. 20:35) Chuvângin, mi dangte ṭanpui tûr te, Kingdom Hall enkawlnaa ṭanpui tûr te, a nih loh leh Nun leh Rawngbâwlna Inkhâwma mi dang aiawha chanvo ti tûrtein inpe ang che. Tlin tuma ṭan lâknaah chuan mi mala inzirna hun duan ṭha neihna aṭanga thlarau lam miziate neih chhoh pawh a tel a. (Sâm 1:1, 2; Gal. 5:22, 23) Chu bâkah, tlin tuma ṭan latu unaupa chuan kohhrana chanvote pêk a nih hunah rin tlâkna leh rinawmna a lantîr ṭhîn bawk.—1 Kor. 4:2.

¹⁵ Kohhranho rawngbâwltute chu kohhran ṭhatna tûra thlarau thianghlimin a ruatte an ni. An tih tûrte an thawh laia lo thlâwpin, kohhrana mi tinte chuan an thawhrimna an ngaihhlutzia an lantîr thei a. Chutiang chuan, kohhran chuan chhûngkaw fel tak ni reng tûra Jehova min pêk thilte avânga a lâwmzia a lantîr a ni ang.—Gal. 6:10.