Pathian Ruahmannaa Krista Chanvo Pawmna

“A TIRIN Pathianin lei leh vân a siam a,” a thil siam zawng zawngte chu “ṭha a ti êm êm a.” (Gen. 1:1, 31) Jehova chuan mihringte chu hma lam hun beiseina ropui tak neiin a siam a. Mahse, Eden huana helna chuan mihringte hlimna chu hun engemaw chen a tikhaihlak a. Chuti chung pawhin, he lei leh mihringte tâna Jehova thiltum chu a inthlâk danglam chuang lo. Pathian chuan Adama thlahte zînga thuâwihte tân chhan chhuahna a awm tur thu a târ lang a. Biakna dik din thar leh a ni ang a, Pathian chuan mi suaksual chu a thiltih suaksual zawng zawng nên lam a tiboral ang. (Gen. 3:15) Thilte chu atîra a awm ang khân, a ‘ṭha êm êm’ leh dâwn a ni. Chu chu Jehova’n a Fapa, Isua Krista hmangin a rawn tipuitling ang. (1 Joh. 3:8) Chuvângin, Pathian ruahmannaa Krista chanvo kan pawm chu a pawimawh hle a ni.—Tirh. 4:12; Phil. 2:9-11.

KRISTA CHANVO CHU

² Pathian ruahmannaa Krista chanvo kan han ngaihtuah hian, a chanvo chelh hian hmêlhmang hrang hrang a nei tih kan hria a. Ani chu mihringte Chhandamtu, Puithiam Lalber, Kristian kohhran Lû, leh tûnah chuan Pathian Lalrama Lalber a ni a. Hêng a chanvo chelhte chhût ngunna hian Pathian ruahmanna min ngaih hlut zualtîrin, Isua Krista kan hmangaihna a tizual bawk. Bible chuan a chanvo hrang hrangte hi a sawi fiah a ni.

³ Krista’n leia rawng a bâwl chhûng khân, thuâwih mihringte Pathian nêna an inrem leh theihna chu Isua hmanga tihpuitlin a ni ang tih a lo chiang ta a. (Joh. 14:6) Mihringte Chhandamtu a nih angin, Isua chuan mi tam tak tlan nân a nun a pe a ni. (Mt. 20:28) Chuvângin, Isua chu Pathian duh zâwng nun kawnga entawn tûr ṭha mai a ni lo. Mihringte tâna Jehova thiltum hlen chhuahnaa mi pawimawh ber a ni a. Pathian duhsakna kan hlawh leh theihna kawng awmchhun a ni. (Tirh. 5:31; 2 Kor. 5:18, 19) Inthawina atâna Isua thihna leh a thawhlehna chuan thuâwih mihringte tân Pathian vân lam Lalram rorêlna hnuaia chatuan malsâwmna dawn theihna kawng a hawng a ni.

⁴ Puithiam Lalber a nih angin, Isua Krista chuan ‘kan chak lohnate min hriatpui theiin,’ he leia amah zuitu inpumpêkte sual a thawisak thei a ni. Tirhkoh Paula chuan: “Puithiam Lalber kan chak lohnate min hriatpui thei lo nei ka ni si lo; keimahni anga kawng tinrênga thlêmna tâwk tawh, sual erawh chu sual lo, nei kan ni zâwk e,” tiin a hrilhfiah a. “Chutichuan zahngaihna kan hmuh theihna . . . tûrin, khawngaih lalṭhutphah chu huai takin i hnaih ang u,” tia sawiin, Isua Krista ringtute chu Pathian nêna inrem leh theihna tura ruahmanna siam hmang ṭangkai ngei turin a fuih a ni.—Heb. 4:14-16; 1 Joh. 2:2.

⁵ Isua chu Kristian kohhran Lû a ni bawk a. Kum zabi khatnaa a hnungzuitu dik takte ang thovin, tun laiah pawh mihring hruaitu kan mamawh lo. Isua chuan thlarau thianghlim leh Krista hnuaia thawk berâm vêngtu tling takte hmangin kaihhruaina min pe a, anni chuan Pathian berâmte an enkawl dânah Isua leh a Pa vâna mi lakah mawhphurhna an nei a ni. (Heb. 13:17; 1 Pet. 5:2, 3) Jehova chuan Isua chungchâng lo sawi lâwkin, “Ngai teh, ani chu mi tin tân hretuah ka ruat a, mi tin tân hruaitu leh hotuah ka ruat a ni,” a ti a. (Is. 55:4) Isua chuan a zirtîrte hnenah: “‘Hruaitute’ tihin awm hek suh u’ in hruaitu chu pakhat chauh a ni, Krista chu,” tia sawiin, he hrilh lâwkna hi amahah a thleng famkim tih a nemnghet a ni.—Mt. 23:10.

⁶ Isua chuan a rilru put hmang leh min ṭanpui a duhzia târ lan nân: “Nangni thawk rim leh phurrit phur zawng zawngte u, ka hnênah lo kal ula, keiman ka chawlhtîr ang che u. Ka nghâwngkawl bât ula, ka hnênah zir rawh u; thuhnuairawlh leh rilrua inngaitlâwm tak ka nih hi: tichuan, in thlarau tân chawlhna in hmu ang. Ka nghâwngkawl chu a nuam a, ka phur pawh a zâng a ni,” tiin sâwmna a pe chhuak a ni. (Mt. 11:28-30) Isua Krista chuan Kristian kohhran chu thuhnuairawlh tak leh mi tihahdam thei zâwnga kaihruaiin, a Pa, vâna mi Pathian Jehova entawntu “berâm vêngtu ṭha” a nihzia a lantîr a ni.—Joh. 10:11; Is. 40:11.

⁷ Korinth khuaa mite hnêna a lehkha thawn hmasa zâwkah, Paula chuan Krista chanvo chelh dang chu heti hian a sawi leh a: “A hmêlma zawng zawng a ke hnuaia a dah hma loh chuan ani chu lalah a awm tûr rêng a ni si a. Tin, a hnuaia engkim dahin a awm hun chuan Fapa ngei pawh chu a hnuaia engkim dahtu hnuaiah chuan dahin a awm bawk ang, Pathian chu engkima engkim a nih theihna tûrin,” tiin. (1 Kor. 15:25, 28) Isua chu leia a lo kal hmain, Pathian thil siam hmasak ber niin, Pathian “mi themthiam” angin a lo awm tawh a. (Thuf. 8:22-31) Pathianin leia a rawn tirh khân, engtik lai pawhin Pathian duh zâwng a ti reng ṭhîn. Fiahna nasa ber tuar chhuakin, thih thlengin a Pa lakah a rinawm reng a ni. (Joh. 4:34; 15:10) A Fapa chu thih thleng pawha a chunga a rinawm avângin, Pathianin vân nun chang tûra kai thovin, vâna Lalrama Lal nihna a pe ta a. (Tirh. 2:32-36) Chutiang a nih avâng chuan, Krista Isua chuan lei ata mihringte rorêlna leh suahsualna zawng zawng nuaibo tûrin thlarau thil siam thiltithei tak chhiar sên lohte kaihhruaina hna ropui tak Pathian pêk chu a dawng a ni. (Thuf. 2:21, 22; 2 Thes. 1:6-9; Thup. 19:11-21; 20:1-3) Chutih hunah chuan, Krista hnuaia Pathian vân lam Lalram chu leilung pum pui chunga rorêltu awmchhun a ni tawh ang.—Thup. 11:15.

A CHANVO KAN PAWMNAA THIL TEL CHU

⁸ Kan Entawn tûr, Isua Krista chu a ṭha famkim a. Ani chu min enkawl tûra ruat a ni. Hmangaihna nêna min enkawlna hlâwkpui thei tûr chuan Jehova laka kan rinawm reng leh a inawpna pâwl hmasawn zêl ruala kê kan pên ve zêl a ngai a ni.

⁹ Kum zabi khatnaa Isua hnungzuitute chuan Pathian ruahmannaa Krista chanvo chelh chu an pawm thlap a. Chutianga an pawmzia chu Krista lû nihna hnuaia lungrual taka thawkho va, thlarau thianghlim hmanga a pêk kaihhruainate zâwmin an lantîr a ni. (Tirh. 15:12-21) Tirhkoh Paula chuan hriak thih Kristian kohhran inpumkhatna chungchângah: “Hmangaiha thu dik tak sawiin, engkimah amahah kan ṭhang lian thei zâwk ang: amah chu Lû a ni, Krista chu. Amah azârah taksa pumhlûm chuan inzawmna tinrêng thawh avânga rem taka inchuktuah leh inzawm khâwmin, pêng tin thawhzia ang ṭheuhvin hmangaihnaa insiam ṭha tûrin taksa chu a lo tipung ṭhîn a ni,” tiin a ziak a ni.—Eph. 4:15, 16.

¹⁰ Kohhran chhûnga mi tinte’n Krista kaihhruaina hnuaia ṭha tak leh inrem taka an thawhho hian, ṭhan chhohna leh hmangaihnaa “phuar famkimna” chu a awm ṭhîn.—Joh. 10:16; Kol. 3:14; 1 Kor. 12:14-26.

¹¹ Bible hrilh lâwkna thlen famkim nâna khawvêla thilthlengte chuan kum 1914 aṭang khân Isua Krista hnênah Lalram thuneihna pêk a ni tawh tih chiang takin a finfiah a. Tûnah hian hmêlmate kârah ro a rêl mêk a ni. (Sâm 2:1-12; 110:1, 2) Chu chuan tûna leia awmte tân eng awmzia nge a neih? Isua chuan nakin lawka a hmêlmate chunga Pathian rorêlna a rawn kenkawh hunah, hotute Hotu leh lalte Lal a nihna chu a rawn lantîr ang a. (Thup. 11:15; 12:10; 19:16) Tichuan, mihringte hel ṭantirh laia Jehova’n chhan chhuahna a lo tiam chu Krista duhsakna changtu, a ding lama awmte chuan an dawng ang. (Mt. 25:34) Pathian ruahmannaa Krista chanvo kan pawm chu kan va nihlawh tak êm! He tâwpna hunah hian Krista kaihhruaina hnuaia khawvêl pum huap rawngbâwlna hlen chhuahnaah hian i inpumkhat tlat ang u.