Sum leh Pai Enkawl Dân

Kan chhûngte mamawh kan pêk theih nân sum leh pai kan mamawh ṭheuh va. (Thufingte 30:8) Tihah chuan, “tangka sum himna a ni” si a. (Thuhriltu 7:12) Nupa anga sum leh pai chungchâng sawi chu a harsa mai thei; mahse, in inneihnaah sum leh pai hi buaina thlentu nihtîr suh. (Ephesi 4:32) Nupate tân sum leh pai hman dân tûr ngaihtuah hunah inrinna leh thawhhona neih a ngai a ni.

1 NGUN TAKIN RUAHMANNA SIAM RAWH

BIBLE SAWI DAN CHUAN: “Nangni zîngah tupawhin in sâng sak tum ula, atîrin ṭhuin sak zawhna khawp sum in neih leh neih loh hre tûrin, a man tûr chin tunge chhût lo vang che u?” (Luka 14:28) In sum leh pai hman dân tûr chungchânga ruahmanna in siam dun chu a pawimawh hle. (Amosa 3:3) Thil lei ngai leh in sênso theih zât tûr chungchângah thu tlûkna siam rawh. (Thufingte 31:16) A leina tûr i neih avângin thil engemaw chu i lei tûr tihna a ni kher lo. Leiba neih loh chu tum tlat la. Pûk chawpin thil lei suh.—Thufingte 21:5; 22:7.

I TIH THEIH CHU:

• Thla tâwpah sum hman bân in neih chuan, eng anga tih tûr nge tih chungchângah thu tlûkna siam dûn rawh u

• In indaih loh erawh chuan, in sênso titlêm tûrin ruahmanna chiang tak siam rawh u. Entîr nân, dâwra chaw ei aiin in lamah ei rawng in bâwl thei ang

2 RILRU INHAWNGIN A TAK RAMAH CHENG RAWH

BIBLE SAWI DAN CHUAN: “Mi tinin mahni ṭhenawm hnênah thudik tak sawi ṭheuh ula.” (Zakaria 8:16) I kawppui hnênah chuan i sum lâk luh zât leh hman zât chungchângah thudik tak sawi ang che.

Sum hman dân tûr chungchânga thu tlûkna lian tham i siam dâwn apiangin, i kawppui râwn ziah rawh. (Thufingte 15:22) Sum leh pai chungchânga inbiak pawhna chuan in inkâra remna awm tûrin a ṭanpui ang. I sum lâk luhte chu nangma mi mal sum anga thlîr lovin, chhûngkaw sum angin thlîr zâwk rawh.—1 Timothea 5:8.

I TIH THEIH CHU:

• Inrâwn kher ngai lova in hman theih chin tûr ruat rawh u

• Sum leh pai chungchâng sawi nân buaina a lo chhuah thleng nghâk suh u