Engvângin Nge I Zir Zawm Zêl Ang?

1. Engtin nge Bible zir zawm zêl chu i hlâwkpui ang?

Kan hmuh tâk Bible zirtîrna pawimawh khaikhâwmte hian Jehova i hmangaihna a tinghet ang tih chu rinhlelh rual a ni lo. He hmangaihna hi chhawm nun zêl a ngai a. (1 Petera 2:⁠2) I chatuan nun beiseina chu Pathian Thu zirna hmanga amah i hnaih zêl leh zêl lovah a innghat a ni.—Johana 17:3; Juda 21 chhiar rawh.

Pathian hriatnaa i ṭhan chhoh zêl chuan, i rinna pawh a lo chak tial tial ang a. Chu chuan Pathian tilâwm tûrin a ṭanpui ang che. (Hebrai 11:​1, 6) Tin, inlamlêt a, i nunah inthlâkthlengna sâwt tak nei tûrin a chêttîr bawk ang che.—Tirhkohte 3:19 chhiar rawh.

2. Engtin nge Pathian i hriatna chu mi dangte’n an hlâwkpui theih?

I thil hriatte mi dangte hnêna hrilh duhna chu i rawn nei chho vang​—⁠chanchin lâwmawm engemaw mite hnêna hrilh chu nuam kan ti ṭheuh si a. Bible i zir zawm zêl chuan, Pathian Jehova leh chanchin ṭha i rinna hrilhfiah nâna Bible hman dân chu i lo thiam chho vang.—Rom 10:​13-15 chhiar rawh.

Mi tam zâwkte chuan an ṭhiante emaw, chhûngkhatte emaw hnênah chanchin ṭha an hrilh ṭan a. Mahse, remhre tak ni ang che. An sakhua a dik loh thu hrilh ai chuan Pathian thutiamte chu hrilh zâwk ang che. Tin, i thusawi aiin i thiltih ngilnei tak chuan mite rilru a hneh zâwk fo tih hre reng bawk ang che.—2 Timothea 2:​24, 25 chhiar rawh.

3. Pathian nên eng ang inlaichînna nge i neih theih?

Pathian Thu zirna chuan thlarau lama ṭhang chho tûrin a ṭanpui ang che a. A tâwpah chuan, Jehova nêna inlaichînna danglam bîk tak chu i nei thei a ni. Dik takin, a chhûngkaw zînga mi i lo ni hial thei bawk a ni.—2 Korinth 6:18 chhiar rawh.

4. Engtin nge hma i sâwm zêl theih ang?

Pathian Thu zir zawm zêlna hmangin thlarau lamah hma i sâwn chho thei a. (Hebrai 5:​13, 14) Jehova Thuhretute zînga pakhat chu Bible Zirtîrna Dik Tak Chu Eng Nge Ni? tih lehkhabu hmanga Bible zirpui tûr chein ngên ang che. Pathian Thu i zir tam poh leh i nun chu a hlawhtling zual sauh dâwn a ni.—Sâm 1:​1-3; 73:​27, 28 chhiar rawh.

Chanchin ṭha chu Pathian hlim, Jehova hnên aṭanga lo chhuak a ni a. A mite hnaihin Pathian chu i hnaih lehzual thei a ni. (Hebrai 10:​24, 25) Jehova tilâwm tûra ṭan i lâk zêl chuan, nunna tak tak​—⁠chatuana nunna​—⁠chu i nei thei ang. Pathian hnaih chu i thil tihtheihte zînga ṭha ber a ni.—1 Timothea 1:​10, 11; 6:19 chhiar rawh.