ZIR TUR THUZIAK 15
HLA 30 Ka Pa, Ka Pathian leh Ka Ṭhian
Kan Tân “Pathian Hnaih Hi A Ṭha!”
“Kei atân erawh zawng Pathian hnaih hi a ṭha a ni.”—SAM 73:28.
A TUM BER
Jehova kan hnaih lehzual theih dân leh chutianga tih kan hlâwkpui theih dân.
1-2. (a) Tu emaw nêna ṭhian ṭha taka insiam tûr chuan eng nge kan tih ngai? (b) He thuziakah hian eng nge kan sawiho vang?
ṬHIAN kawm ngeih tak i nei em? Engtin nge ṭhian ṭhaa in insiam chhoh? Hun in hmang dûn a, a harsatna neihte i hriatpui a, a duh zâwng leh duh loh zâwngte i rawn hre chho a ni. Entawn atâna i duh mize ṭha takte a nei tih i rawn hre chho bawk a. Chûngte avâng chuan, i ṭhian chu i rawn ngaina ta êm êm a ni.
2 Tu emaw nêna ṭhian ṭha taka insiam tûr chuan hun leh tha sên a ngai a. Pathian Jehova nêna mi mal inlaichînna siam tûr pawhin chutianga tih chu a ngai a ni. He thuziak hian Pathian kan hnaih theih dân leh chutianga tih kan hlâwkpui theih dânte a târ lang ang. A hmasa berin, kan Ṭhian ṭha ber Jehova hnaih a ṭhat chhan i lo ngaihtuah ang u.
3. Jehova hnaih kan hlâwkpui theih dânte chu engvângin nge kan chhût ngun ang? Entîrna pe rawh.
3 Jehova hnaih chu a ṭha tih i pawm ngei ang a. Chutih rualin, a ṭhat dân tak chhût ngunna chuan amah hnaih chhunzawm zêl tûrin min chêttîr thei a ni. (Sâm 63:6-8) Entîr nân, chaw hrisêl ei te, insawizawi te, chawlh hahdam te leh, tui in tamte chu kan tân a ṭha tih kan hria a. Mahse, mi tam tak chuan chûngte chu ngai pawimawh lovin an hrisêlna an ngaihthah a ni. Mahse, chîn dân ṭhate kan hlâwkpui dân kan ngaihtuah tam poh leh, chûng thilte tih duhna chu kan nei lehzual dâwn a. Chutiang bawkin, Jehova hnaih chu kan tân a ṭha tih hre mah ila, chutianga tih kan hlâwkpui theih dân kan chhût ngun chauhvin, amah hnaih chhunzawm zêl duhna kan nei dâwn a ni.—Sâm 119:27-30.
4. Sâm 73:28-na ziaktuin eng nge a sawi?
4 Sâm 73:28 chhiar rawh. Sâm 73-na ziaktu hi Jehova biak ina rimawi tum tûra ruat Levia mi a ni. Kum tam tak chhûng rinawm takin Jehova a lo biak tawh a rinawm a. Chuti chung chuan, “Pathian hnaih” chu a tân leh an tân a ṭha tih mi dangte leh mahni inhriat nawntîr a ngai niin a hria a ni. A nih leh, chutianga tih hlâwkna ṭhenkhat chu engte nge ni?
‘PATHIAN HNAIHNAIN’ HLIMNA A THLEN
5. (a) Engvângin nge Jehova hnaih lehzualna chuan hlimna min thlen? (b) Thufingte 2:6-16 ṭanchhanin, kawng ṭhenkhata Pathian Jehova finna i hlâwkpui theih dân leh mi mal taka a vênhim dân che entîrna pe rawh?
5 Jehova kan hnaih poh leh kan hlim lehzual dâwn a ni. (Sâm 65:4) Chutiang a nih chhan tam tak a awm a. Pakhatah, a Thu, Bible-a chuang finna thute nunpui chu kan hlâwkpui a ni. Chûng finna thute chuan, thununna ṭha lote leh sual pawi tak tihna lakah min vênghim a. (Thufingte 2:6-16 chhiar rawh.) Chuvângin, Bible chuan inâwm takin: “Finna hmu chhuaktu chu a nihlawh a, hriatthiamna hmu chhuaktu pawh,” tiin a sawi a ni.—Thuf. 3:13.
6. Engin nge fakna hla phuahtu chu a hlimna hlohtîr?
6 Jehova ṭhiante pawhin hlim loh châng an nei a. Sâm 73-na ziaktu chuan a thim zâwnga ngaihtuahna thununa a awmin a hlimna a hloh a ni. Pathian leh a tehna ngai pawimawh lotute’n nun nuam tak an chên nia a ngaih avângin anni chu a awtin a lung ni lo va. Nun râwng leh chapo takte chu an hausain hrehawm an tuar lo niin dik lo takin a ngai hial a ni. (Sâm 73:3-7, 12) Rorêl dik lohnate chu a hmuh avângin, Jehova rawngbâwl chu hlâwkna awm lo niin a ngai hial a. A lunghnual êm avângin: “A thlâwn maiin a ni, ka thinlung hi ka tihfaia, ka kutte sawisêlbonaa ka sil ni,” tiin a sawi a ni.—Sâm 73:13.
7. Lunghnualna kan neih hunah eng nge kan tih theih? (A kâwma milem en bawk rawh.)
7 Fakna hla phuahtu chu lunghnual hle mah se, a ngaihtuah dân thlâk tûrin thil tih a nei a. ‘Pathian hmun thianghlimah’ chuan a lût a; chutah chuan, Jehova’n a ngaihtuah dân a siam ṭhatsak a ni. (Sâm 73:17-19) Lunghnualna kan neih hian, kan Ṭhian ṭha ber Jehova chuan min hriatpui a. A kaihhruaina dîla kan ṭawngṭai a, a Thu leh kohhran kal tlanga min pêk a ṭanpuinate kan pawm chuan lunghnualna hneh tûrin chhûngrila chakna kan nei ang. Lungkhamna nasa tak kan neih hunah pawh, ani chuan min thlamuanin hahdamna min pe dâwn a ni.—Sâm 94:19.a
Sâm 73-na ziaktu Levia mi chu “Pathian hmun thianghlimah” a ding (Paragraph 7-na en rawh)
‘PATHIAN HNAIHNA’ CHUAN NUN AWMZE NEI TAK LEH BEISEINA MIN PE
8. Eng kawng dang pawimawh taktein nge Pathian hnaih chu kan tân a ṭhat?
8 Pathian hnaih chu kawng pawimawh tak dang pahnihin kan tân a ṭha a. Pakhatnaah, nun awmze nei tak min neihtîr a. Pahnihnaah, hma lam hun atâna beiseina nghet tak min pe a ni. (Jer. 29:11) Tûnah chûng thil pahnihte chu i lo bih chiang ang u.
9. Engtin nge Jehova hnaihna chuan nun awmze nei tak min neihtîr?
9 Jehova hnaihna chuan nun awmze nei tak min neihtîr a. Tûn laiah Pathian awm ring lotu mi tam tak chuan, nun hian awmzia a nei lovin mihringte hi engtikah emaw kan la mang vek dâwn niin an ngai a ni. Mahse, Pathian thu kan zirna aṭangin Pathian chu “a awm tih leh zawngtute hnêna lawmman pêk hmang a ni tih” kan ring a. (Heb. 11:6) Siam kan nih chhan anga kan Pa vâna mi Jehova rawng kan bâwl avângin, tûnah ngei pawh nun hlimawm tak kan nei a ni.—Deut. 10:12, 13.
10. Sâm 37:29-na chuan Jehovah chunga beiseina nghattute hma lam hun tûr chungchângah eng nge a târ lan?
10 Mi tam tak chuan, hnathawh, chhûngkaw din leh, upat hun atâna inkhâwl lâwk ang chi thilte tih loh nunah beisei tûr an nei lo va. Pathianin an nunah hmun chan rêng a nei lo a ni. Chutih rualin, Jehova chhiahhlawhte chuan a chungah beiseina an nghat a. (Sâm 25:3-5; 1 Tim. 6:17) Kan hnaih kan Pathian chu kan rinchhanin thutiam min pêkte chu kan ring a. Hma lam hun atâna kan beiseinaah chuan Paradis-a chatuana amah biak a tel a ni.— Sâm 37:29 chhiar rawh.
11. Pathian hnaihna chuan engtin nge min awmtîr a, chu chuan engtin nge Pathian a awmtîr?
11 Pathian hnaih chu kawng dang tam tak pawhin kan tân a ṭha a. Entîr nân, amah hnaihtute’n an sual an sim chuan ngaihdam a tiam a ni. (Is. 1:18) Chuvângin, tûn hmaa kan thil tihsualte avângin inthiam lo renga kan awm a ngai lo. (Sâm 32:1-5) Chu bâkah, Jehova tihlâwm theihna chanvo hlu kan nei bawk. (Thuf. 23:15) Pathian nêna inṭhian ṭhatna aṭanga lo awm malsâwmna dangte pawh i ngaihtuah thei ngei ang. A nih leh, engtin nge Pathian chu kan hnaih zawm zêl theih ang?
“PATHIAN HNAIH” RENG THEIH DAN
12. Pathian hnaih lehzual tûrin eng thilte nge i tih tawh?
12 Baptisma chang tawh Kristian i nih chuan, Jehova chu eng emaw chen i hnaih tawh tih a chiang a. Pathian Jehova leh Isua Krista chungchâng thutak tam tak i zir tawh a, tûn hmaa i thil tihsualte i sim tawh a, Pathian chunga rinna nghet tak i neihzia i lantîr tawh a; chu bâkah, a duh zâwng mila nun i tum tlat bawk. Mahse, Pathian hnaih lehzual tûr chuan chûng thilte chu kan tih chhunzawm zêl a ngai a ni.—Kol. 2:6-7.
13. Eng thil pathumte’n nge Jehova hnaih zual zêl tûra min ṭanpui thei?
13 Jehova hnaih zual zêl tûrin engin nge min ṭanpui ang? (1) Bible chhiar leh zir chu kan ti chhunzawm zêl tûr a ni. Chutianga kan tih hunah, Pathian chungchânga thutak bulpuite aia tam hriat kan tum tûr a ni a. Pathian duh zâwng hriat a, a Thu-a a târ lan thu bulte kaihhruaia awm kan tum bawk tûr a ni. (Eph. 5:15-17) (2) Min hmangaihzia nemnghettu thil tam takte chu chhût ngunin kan rinna kan tinghet tûr a ni a. (3) Jehova huat zâwng thilte chu haw chhunzawm zêlin, chûng thil titute chu ṭhianah kan siam tûr a ni lo bawk.—Sâm 1:1; 101:3.
14. Korinth thawn khat 10:31-a sawi angin, kan nî tin nunah Jehova tilâwm tûrin eng thilte nge kan tih theih? (Milem en bawk rawh.)
14 Korinth thawn khat 10:31 chhiar rawh. Jehova tilâwmtu thilte chu thatho taka kan tih zêl a pawimawh a. Mahse, thu hrilhna leh inkhâwmnaa tel aia tam kan tih a ngai a ni. Nî tina kan thiltihte chuan Jehova a tilâwm tûr a ni a. Entîr nân, dik taka thil kan tih a, mite hnêna kan thil neihte kan pêk hian Jehova kan tihlim a ni. (2 Kor. 8:21; 9:7) Pathian chuan nunna thilpêk kan ngaihhlutzia lantîr tûrin min duh bawk a. Ei leh in kawnga inbûk tâwk tak kan nih a, a âwm tâwka hrisêlna kan enkawl hian nunna Petu chu kan hnaih lehzual a ni. Thil tê tham anga langahte pawh theih tâwp chhuaha Jehova tihlâwm kan tum chuan min hmangaih lehzual ang.—Lk. 16:10.
Him taka motor khalh te, insawizawi leh chaw hrisêl eia hrisêlna ngaihsak te leh, khualchhâwn thiamna lantîrte chu Jehova kan tihlâwm theih dân kawng ṭhenkhat a ni (Paragraph 14-na en rawh)
15. Engtin nge Jehova chuan mi dangte cheibâwl tûra min beisei?
15 Jehova chu mi felte leh fel lote chungah ngil a nei a. (Mt. 5:45) Keini pawh chutianga ti tûrin min duh a ni. Entîr nân, ‘tu mah sawichhe lova, kawhmawh bâwl lovin, mi zawng zawng lakah kan nunnêm’ tûr a ni a. (Tit. 3:1-2) Chu chu hre rengin, kan rinna min ṭâwmpui loh avâng maiin tu mah kan hmusit lo. (2 Tim. 2:23-25) Mi zawng zawng ngilnei taka kan cheibâwl hian Pathian kan hnaih lehzual a ni.
THIL KAN TIHSUAL HUNAH PAWH ‘PATHIAN KAN HNAIH’ THEI
16. A hnuah, Sâm 73-na ziaktu chu engtin nge a awm?
16 A châng chuan, i thil sual tih tawhte avângin Jehova hlata awm niin i inhre thei a. Kan sawiho tawh angin, Sâm 73-na ziaktu chungah pawh chutiang chu a thleng a ni. “Ka rap pelh ṭhelh ṭhelh a; ka ke pênte hi a tleu lek lek a ni,” tiin a sawi a. (Sâm 73:2) “Lungngai” taka awmin Pathian Jehova hmaah chuan “sa ang” maia “mi mâwl” a nih thu a sawi a ni. (Sâm 73:21, 22) A thil tihsual avângin beisei bo leh Jehova hmangaihna dawng tlâk lo niin a inngai em?
17. (a) Fakna hla phuahtu chuan a lunghnual lai berah pawh eng nge a tih? (b) A chanchin aṭangin eng nge kan zir theih? (Milem en bawk rawh.)
17 Fakna hla phuahtu chuan Jehova hnâwl nia inhriatna a nei a nih pawhin, chutiang chuan rei lo te chhûng chauh a awm a nih a rinawm. A lunghnual lai berah pawh Pathian hnaih lehzual a mamawh tih a inhria niin a lang a, chu chu: “Nimahsela, [Jehova] i hnênah ka awm fo va; ka kut ding lam hi i lo chelh ṭhîn a. Nangin i remruatnain mi hruai ang a, chu mi hnuah chuan ropuinaah khian mi lâwm ang,” tia a sawi aṭang hian a hriat theih a ni. (Sâm 73:23, 24) Keini pawh, kan chak loh emaw, kan lunghnual emaw hunah min tinghet tûrin kan Lungpui Jehova kan rinchhan thei a. (Sâm 73:26; 94:18) Sual pawi tak kan tih hunah pawh, Jehova hnêna kîr lehin min ‘ngaihdam a inpeih reng’ tih kan ring nghet tlat thei a. (Sâm 86:5) A bîk takin, kan lunghnual lai berah pawh kan Pathian chu kan hnaih lehzual a pawimawh a ni.—Sâm 103:13, 14.
Thlarau lama chak lo nia kan inhriat hunah Jehova biaknaa tam lehzuala telin amah kan hnaih tûr a ni (Paragraph 17-na en rawh)
KUMKHUAIN “PATHIAN HNAIH” RAWH
18. Engvângin nge Jehova hnaihna chuan tâwp chin a neih loh?
18 Pathian Jehova kan hnaihna leh amah kan hriatna chuan tâwp chin a nei ngai dâwn lo va. A kawngte, a finna leh, a hriatna thûkzia chu “chhût chhuah rual” a ni lo tih Bible-in a sawi a ni.—Rom 11:33, NWT.
19. Sâm bu chuan eng nge min rin nghehtîr?
19 Sâm 79:13-na chuan: “Keini i mite, i ran tlatna hmuna berâmte hian, kumkhuain lâwm thu kan hrilh ang chia: chhuan zawng zawng thlengin nangmah fakna chu kan hriattîr zêl ang,” tiin a sawi a. Nang pawhin Pathian i hnaih zêl rualin chatuanin malsâwmna i dawng dâwn tih i chiang thei a, inrin tâwkna nên: “Pathian chu kumkhuaa ka thinlung chakna tûr leh ka chanvo tûr a ni,” tiin i sawi ve thei a ni.—Sâm 73:26.
HLA 32 Jehova Lamah Ṭang R’u!
a Hun rei tak chhûng manganna, lungkhamna, a nih loh leh lungngaihna neite chuan mi thiamte ṭanpuina an mamawh thei a. Hriat belh nân Vênnainsâng, No. 1 2023 chhuak chu en rawh.