Tute Nge Pathian Ṭhiante Chu?

Isua Krista chu Jehova Fapa a ni a, a ṭhian bul ber leh duh ber a ni. Leia mihring anga a awm hmain, Isua chu vânah thlarau thil siam thiltithei tak niin a awm reng tawh a. (Johana 17:5) Tichuan, Pathian chungchânga thutak mite zirtîr tûrin he leiah hian a lo kal a ni. (Johana 18:37) Tin, a hringnun chu sual leh thihna ata thuâwih mihringte chhan chhuah nân a pe bawk. (Rom 6:​23) Isua chu Pathian Rama Lalber a ni tawh a, chu Lalram chu he lei Paradis-a siamtu tûr vân sawrkâr a ni.​—⁠Thu Puan 19:16.

Vântirhkohte pawh Pathian ṭhian an ni. Vântirhkohte chuan mihringte angin leiah nun an ṭan lo va. Pathianin lei a siam hmain vânah a siam daih tawh a ni. (Joba 38:​4-7) Vântirhkoh maktaduai tam tak an awm a. (Daniela 7:10) Hêng Pathian vân lam ṭhiante hian mite’n Jehova chungchâng thutak an zir chu an duh a ni.​—⁠Thu Puan 14:​6, 7.

Pathian chuan leiah pawh ṭhian a nei a; ka thuhretute tiin a ko va. Rorêlna court-a thuhretu chuan tuemaw chungchâng, a nih loh leh engemaw chungchânga a thu hriat chu a sawi thîn a. Jehova Thuhretute chuan Jehova leh a thiltumte chungchâng an hriatte chu mi dang hnênah a sawi ṭhîn a ni. (Isaia 43:10) Vântirhkohte angin, Thuhretute chuan Jehova chungchâng thutak zir tûra ṭanpui che chu an duh a. Pathian ṭhian ni ve tûrin an duh che a ni.