Bung 14
Tu Thuneihna Nge I Pawm Ang?
1, 2. Thuneihna zawng zawng hi mi tina thei a ni vek em? Han hrilhfiah teh.
“THUNEIHNA” tih hi mi tam tak tân chuan thu mal duhawm lo tak a ni a. Hei hi thiamawm tak a ni, a chhan chu hnathawhnaah te, chhûngkuaah te, leh sawrkârte pawhin thuneihna hi dik lo taka an hman ṭhin vâng a ni. Bible chuan fing takin: “Mi, mi dang chungah pawi khawpin a intilal ṭhîn,” tiin a lo sawi a. (Thuhriltu 8:9) Mi tam tak chu mi dangte chungah râwng tak leh mahni hmasial takin an intilal ṭhîn a ni.
2 Mahse thuneihna zawng zawng hi mi tina thei a ni vek lo. Entîr nân, kan taksa hian kan chungah thu a nei tiin a sawi theih ang a. Thâwk la tûr te, ei tûr te, in tûr te, leh muhîl tûr tein “thu min pe” a ni. Hei hi tawrhhlelhawm a ni em? Ni lo. Hêng thil phûtte anga kan awm hi kan ṭhatna tûr a ni. Kan taksa mamawhte anga kan tih hi tum lâwkna tel lova tih ni mah sela, kan duh rêng vânga intukluh a ṭûlna thuneihna chi dang dang a awm a. Entîrna ṭhenkhat lo ngaihtuah ila.
THUNEITU SANG BER
3. Jehova hi engvângin nge “Lalpa Chungnungber” tia dik taka koh a nih?
3 Bible-ah hian vawi 300 chuang Jehova chu “Lalpa Chungnungber” tia koh a ni a. Chungnungber chu thuneihna sâng ber neitu hi a ni. He dinhmun chang tûr hian Jehova chu engin nge dikna pe? Thu Puan 4:11 chuan: “Nang, kan Lalpa [“Jehova,” NW] leh kan Pathian, ropuina te, chawimawina te, thiltihtheihna te chu hmu tlâk i ni e; nangin engkim i siam a, i duh avânga awm leh siam a ni bawk si a,” tiin a chhâng a ni.
4. Jehova’n a thuneihna chu engtianga hman nge a thlan?
4 Min Siamtu a nih angin, Jehova chuan a thuneihna chu a duh ang anga hmang tûrin dikna a nei a. A bîkin Pathianin “chakna nasa” tak a neihte kan ngaihtuah chuan, hei hi hlauhawm tak angin a lang thei a ni. Ani chu “Pathian Engkimtitheia” tia koh a ni a—Hebrai ṭawng chuan thiltihtheihnaa khat chakna a kâwk a ni. (Isaia 40:26; Genesis 17:1) Chuti chung chuan, Jehova’n a chakna chu a ṭha lamin a lantîr ṭhîn, a mize langsâr ber chu hmangaihna a nih a vângin.—1 Johana 4:16.
5. Jehova thuneihna hnuaia intukluh hi engvângin nge a harsat loh?
5 Jehova’n sim duh lo thil sualtitute chu a hrem ang tiin lo vaukhân tawh mah se, Mosia’n: “Pathian a ni a; Pathian rinawm, amah hmangaiha a thu zâwmtu chunga chhuan sâng thlenga thuthlung leh khawngaihna nghat reng” a nihzia a hria a ni. (Deuteronomy 7:9) Han ngaihtuah teh! Lei leh vâna Thuneitu Sâng Ber chuan a rawngbâwl tûrin min tilui lo. A hmangaihna chuan a lamah min hîp zâwk a ni. (Rom 2:4; 5:8) Jehova thuneihna hnuaia intukluh chu hlimna a ni hial zâwk a, a chhan chu a dânte hi englai pawhin kan tâna ṭha ber a nih vâng a ni.—Sâm 19:7, 8.
6. Eden huanah khân thuneihna chungchânga thubuai engtin nge a lo chhuah a, chu chuan eng rah nge a chhuah?
6 Kan nu leh pa hmasa berte chuan Pathian chungnungber nihna chu an hnâwl a. A chhia leh a ṭha chu anmahni ngeia thu tâwp siam an duh a. (Genesis 3:4-6) Chuvâng chuan, an chênna in Paradis aṭanga hnawh chhuah an ni ta a ni. Chuta chinah chuan ṭha famkim lo chung pawha kawnghmang nei taka an nun theih nân, Jehova’n mihringte chu thuneihna din a phalsak ta a ni. Chûng thuneihna zînga ṭhenkhat chu engte nge ni a, a hnuaiah Pathianin eng chen nge intulût tûrin min beisei?
“RORELTUTE”
7. “Rorêltute” hi tute nge ni a, an dinhmunin Pathian thuneihna engtin nge a kûngkaih?
7 Tirhkoh Paula chuan: “Mi tin an chunga rorêltute thu thuin awm rawh se. Pathian thu lovin tumah rorêltu an awm si lo,” tiin a ziak a. “Rorêltute” chu tute nge ni? A châng dawt zêla Paula thusawite hian anni chu mihring sawrkâra rorêltute hi an ni tih a târlang a ni. (Rom 13:1-7; Tita 3:1) Mihring sawrkâr thuneihna hi Jehova din a ni lo va, mahse an awm a phal a ni. Chuvângin Paula hian: “Rorêltua awmte hi Pathian ruat an ni,” tiin a ziak thei a ni. Hei hian chutiang lei lam thuneihna chungchângah eng nge a entîr? Pathian thuneihna aiin a hniam zâwk tih emaw, a hnuaihnung zâwk tih emaw a entîr a ni. (Johana 19:10, 11) Chuvângin, Pathian dân leh mihringte dân a inkalh hunah pawh, Kristiante chu Bible zirtîr an chhia leh ṭha hriatna chuan a kaihruai tûr a ni. Anni chuan, ‘mihring thu aiin Pathian thu an zâwm zâwk tûr a ni.’—Tirhkohte 5:29.
8. Rorêltute hi engtin nge i hlâwkpui a, an hnêna i intukluhna chu engtin nge i lantîr theih ang?
8 Amaherawhchu, hun tam takah chuan sawrkâr rorêltute hi ‘kan ṭhatna tûra Pathian rawngbâwltu’ an ni ṭhîn. (Rom 13:4) Eng kawngtein nge an nih? Rorêltuten mipui vântlâng mamawh an ruahman tam tak, dâk lam te, police te leh kângmei vênhimna te, invawn thianghlimna te, leh zirna angte hi han ngaihtuah la. Paula chuan, “He mi avâng hian chhiah pawh in chawi ṭhîn alâwm; chutiang thil ngei ti fan fan tûrin Pathian rawngbâwltute an ni si a,” tiin a ziak a ni. (Rom 13:6) Chhiah chawi chungchângah emaw, dânin a phût thil dangah emaw, ‘engkimah fel takin’ kan awm tûr a ni.—Hebrai 13:18.
9, 10. (a) Rorêltute hi Pathian ruahmannaah engtin nge rem taka an tel ve? (b) Rorêltute dodâl chu engvângin nge a dik loh vang?
9 A châng chuan, rorêltute hian an thuneihna chu dik lo takin an hmang ṭhîn a. Hei hian an thu hnuaia intulût tûra kan mawhphurhna kha a la kiang ta tihna em ni? A la kiang hauh lo. Hêng rorêltute thil sual tih hi Jehova’n a hmu reng a ni. (Thufingte 15:3) Mihringte rorêlna a la dawh hrâm hrâm avângin, an sualnate chu a haider tihna a ni lo va, keini pawh haider tûrin min beisei hek lo. Dik takin, rei lo têah Pathianin “hêng ram zawng zawngte hi a tikeh sawmin a tiral” ang a, ama sawrkâr fel rorêlnain a rawn thlâk dâwn a ni. (Daniela 2:44) Mahse hei hi a lo thlen hma chuan rorêltute hian thil ṭangkai tak an thawk a ni.
10 Paula chuan: “Tupawh rorêltu hnial chu Pathian ruat dodâl an ni,” tiin a sawi a. (Rom 13:2) Rorêltuten engemaw chen chu ram rorêlna ṭha taka an vawnnaah hian Pathian “ruat” an ni a, an vawn ṭhat loh chuan buai nuaih nuaihna leh rorêlna mumal lo tak a awm mai dâwn a ni. Anmahni dodâl chu Pathian Lehkhathu nên a inmil lovin a âtthlâk hle ang. A hrilhfiah nân: Damdawi inah zai i tâwk angah han inngai la, zaina hliam chu an ṭhui ping leh a. Chûng a ṭhuinate chu taksaa tel ni lo mah se, hun engemaw chen chu ṭangkai tak a ni a. A hun hmaa ṭhuina phelh chu a pawi hle thei a ni. Chutiang bawkin, mihring sawrkâr thuneihna pawh hi atîra Pathian thil tumah a tel lo va. Amaherawhchu, a Ramin lei pumpui hi a rawn awp vek hma chuan mihring sawrkârte hian mipui an chelh khâwm a, tûn atân chuan Pathian duh dân nêna inmil hna an thawk rih a ni. Chutiang chuan Pathian dân leh a thuneihna chu ngai pawimawh ber chungin rorêltute hnênah kan intulût tûr a ni.
CHHUNGKUAA THUNEIHNA
11. Lû nihna thu bul chu engtin nge i hrilhfiah ang?
11 Chhûngkua hi mihring nunphung insiamna bul a ni a. A chhûngah hian nupui leh pasalten inṭhianna manhla tak an nei thei a, naupangte pawh an vênhim theihin puitling an nih hun atân pawh an zirtîr theih a ni. (Thufingte 5:15-21; Ephesi 6:1-4) Chutiang ruahmanna ropui tak chu chhûngkuaa mite thlamuang tak leh inrem taka chênhotîr thei tûra buatsaih a ngai a. He thil hi Jehova’n a hlen chhuah dân kawng chu lû nihna thu bul hmangin a ni a, chu chu 1 Korinth 11:3 hian: “Mipa tawh phawt lû chu Krista a ni, hmeichhe lû chu mipa a ni, Krista lû chu Pathian a ni,” tiin a khai khâwm a ni.
12, 13. Chhûngkaw lû ber chu tu nge ni a, Isua’n lû nihna a hman dân kawng aṭangin eng nge a zir theih?
12 Chhûngkaw lû ber chu pasal a ni a. Amaherawhchu, a chungah lû pakhat—Isua Krista a awm a ni. Paula chuan: “Pasalte u, in nupuite hmangaih rawh u, Krista’n kohhranho a hmangaih a, an aia mahni a inpe ang khân,” tiin a ziak a. (Ephesi 5:25) Isua’n englai pawha kohhranho a cheibâwl dân kawnga pasalin a nupui a cheibâwl ve chuan, Krista hnêna a intukluhna a lantîr tihna a ni. (1 Johana 2:6) Isua chu thuneihna ropui tak pêk a ni a, mahse chu chu nunnêmna sâng ber, hmangaihna sâng ber, leh a khirh lo thei ang berin a hmang ṭhîn. (Matthaia 20:25-28) Mihring a nih lai pawhin Isua chuan a thuneihna dinhmun chu dik lo takin a hmang ngai lo. Ani chu “thuhnuairawlh leh rilrua inngaitlâwm tak” a ni a, a hnungzuitute chu “bawihte” tia ko lovin “ṭhiante” tiin a ko zâwk a ni. “Keiman ka chawlhtîr ang che u,” tiin a tiam a, chutiang tak chuan a ti ta rêng a ni.—Matthaia 11:28, 29; Johana 15:15.
13 Isua’n entawn tûr a lo siam hian Kristian lû nihna chu hrehawm taka inawpna dinhmun a ni lo tih pasalte chu a zirtîr a. Mi dangte zah thiamna leh mahni inphat hmangaihna nei chunga inawpna dinhmun a ni zâwk. Hei hian kut thlâk emaw, ṭawngkam emawa kawppuite ṭha lo taka cheibâwl hi a hnâwl chiang hle a ni. (Ephesi 4:29, 31, 32; 5:28, 29; Kolossa 3:19) Kristian mipain a nupui chutianga ṭha lo taka a cheibâwl chuan, hna ṭha dang a lo thawh tawh zawng zawng kha a thlâwn vek ang a, a ṭawngṭainate pawh dâl a ni bawk ang.—1 Korinth 13:1-3; 1 Petera 3:7.
14, 15. Nupui chu a pasal hnêna intulût tûrin Pathian hriatnain engtin nge a ṭanpui?
14 Krista’n entawn tûr a lo siam hi pasalin a entawn chuan, a nupui tân pawh Ephesi 5:22, 23-a: “Nupuite u, Lalpa hnêna in intulût ang hian mahni pasalte hnênah intulût rawh u. Krista chu amah ngei taksa chhandamtu nia kohhranho lû a ni ang bawk hian, pasal chu nupui lû a ni si a,” tih thu hi zawm a awlsam zâwk ang. Pasal chu Krista hnêna intulût tûr a ni ang bawkin, nupui pawh a pasal hnênah a intulût tûr a ni. Nupui fel takte chuan an finna leh an taimâkna avângin chawimawi leh fak an phû a ni tih Bible chuan chiang takin a sawi bawk.—Thufingte 31:10-31.
15 A pasal hnêna Kristian nupui intukluhna chu chintawk nei a ni. A awmzia chu, thil engemaw chungchânga intukluh chu Pathian dân bawhchhiatna a nih dâwn chuan, mihring thu aiin Pathian thu a zâwm zâwk tûr a ni tihna a ni. Chumi hunah pawh chuan, nupui ṭan khawhna chu “rilru thuhnuairawlh leh nunnêm” tak a ni tûr a ni a. Pathian hriatna chuan nupui ṭha lehzual a nihtîr tih a lang chhuak tûr a ni. (1 Petera 3:1-4) Ring lo mi nupuia nei Kristian mipa pawhin hemi chungchângah hian hetiang tho hian a ti ve tûr a ni. Bible thu bulte a zawmna chuan pasal ṭha lehzual a nihtîr tûr a ni.
16. Isua’n a naupan laia entawn tûr a lo siam chu naupangten engtin nge an entawn theih ang?
16 Ephesi 6:1 hian naupangte chanvo sawiin: “Lalpaah chuan in nu leh in pate thu zâwm rawh u; chu chu thil dik a ni si a,” a ti a. Kristian naupangte chuan Isua nundân hi an entawn a, ani chu a nu leh pate hnênah intulûtin a lo seilian a ni. Mipa naupang thuawih tak a ni a, “a fing deuh deuh va, a lo lian telh telh a, Pathian leh mihring duhsakin a awm deuh deuh” a ni.—Luka 2:51, 52.
17. Nu leh paten thuneihna an hman dân kawngin an fate chungah eng nge nghawng a neih theih?
17 Nu leh paten mawhphurhna an kenkawh dân kawng hian an faten thuneihna an zah dâwn leh dâwn loh thu-ah awmzia thui tak a nei thei a. (Thufingte 22:6) Chuvângin nu leh pate chuan, ‘Ka thuneihna hi hmangaihna nên nge ka hman râwng takin? Ka thlahthlam lutuk em?’ ti tein anmahni leh anmahni an inzâwt thei a ni. Pathian ngaihsak nu leh pate chu hmangaihna nei tûr leh mite ngaihsakna nei tûra beisei an ni a, chuti chung chuan Pathian thu bulte nghet taka zâwm tûrin beisei an ni bawk. Inâwm takin Paula chuan: “Nangni pate u, in fate tithinur suh ula [a nihna takah chuan, ‘thinur khawpa nawr’], Lalpa thununnaah leh zilhnaah chuan enkawl zâwk rawh u,” tiin a lo ziak a ni.—Ephesi 6:4; Kolossa 3:21.
18. Nu leh paten engtin nge thununna an pêk ang?
18 Nu leh paten a bîk takin an fate chu thuawih tûr leh an hlimna thlentute ni tûra an duh chuan, an zirtîr dânhmangte an endik tûr a ni. (Thufingte 23:24, 25) Bible-ah hian thununna chu inzirtîr nâna hman ber a ni a. (Thufingte 4:1; 8:33) Hei hi thinurna leh nunrâwnna nên ni lovin, hmangaihna leh nunnêmna nên a inzawm tlat a ni. Chuvângin, Kristian nu leh pate chuan fing taka thil an tih leh, an fate an thunun laia anmahni pawh an insûm a ṭûl a ni.—Thufingte 1:7.
KOHHRANA THUNEIHNA
19. Kristian kohhran chu fel taka enkawl a nih theih nân Pathianin eng nge a ruahman?
19 Jehova chu felna Pathian a nih avângin a mite tâna thuneihna leh kaihhruaina fel tak a pe hi a inâwm hle a ni. Chumi nêna inmilin ani chuan Isua chu Kristian kohhranho Lû atân a ruat a. (1 Korinth 14:33, 40; Ephesi 1:20-23) Hmuh theih lohva Krista hruaina hnuaiah Pathianin ruahmanna a siam a, chumi hmang chuan kohhran tina upa ruatten berâmte chu châk tak, rilrua duh tak, leh hmangaih takin an enkawl a ni. (1 Petera 5:2, 3) Kohhranho rawngbâwltute’n upate chu kawng hrang hrangin an ṭanpui a, kohhran chhûngah hna hlu tak an thawk a ni.—Philippi 1:1.
20. Kristian upaa ruatte hnênah engvângin nge kan intukluh ang a, hei hi engvângin nge a ṭangkai?
20 Kristian upate chungchângah Paula’n: “In hotute thu awih ula, an thu thuin awm rawh u; chanchin sawi tûr an nih avângin, lungngai chunga sawi lova, hlim chunga an sawi theihna tûrin in thlarau an vênsak ṭhîn che u a ni; lungngai chunga sawi chu in tâna pawi tûr a ni si a,” tiin a ziak a. (Hebrai 13:17) Fing takin, Pathian chuan kohhrana awmte thlarau lam mamawh ngaihtuahsak tûrin Kristian enkawltute hnênah mawhphurhna a pe a ni. Hêng upate hi sakhaw hruaitu pâwl hrang an ni lo va. Anni chu Pathian chhiahhlawh leh bawihte an ni a, kan Hotu, Isua Krista’n a lo tih ang chiahin an Pathian biakpuite mamawh an phuhrûksak a ni. (Johana 10:14, 15) Pathian Lehkhathu anga mi tlingten kan hmasâwnna leh thlarau lama kan ṭhan lenna hi an ngaihven a ni tih hriatna hian, anmahni thawhpui zêl tûr leh an hnêna intulût tûrin min fuih a ni.—1 Korinth 16:16.
21. Upaa ruatten an Kristianpuite chu thlarau lamah engtin nge an ṭanpui?
21 A châng chuan berâmte chu an kal pêng thei a, a nih loh leh mi tina thei khawvêl thilten dinhmun hlauhawmah an dintîr thei bawk. Berâmpu Lalber hruaina hnuaiah upate chu berâmpute ni ve lehin, an berâm enkawlte mamawhte chu an hre thuai ṭhîn a, mi mal ṭheuh chu taima takin an ngaihsak a ni. (1 Petera 5:4) Anni chuan kohhran chhûnga mite chu tlawh kualin fuihna thute an hrilh ṭhîn a. Pathian mite inremna chu Diabola’n tihchhiat a tum reng a ni tih hriain, upate chuan harsatna eng pawh chin fel nân chung lam aṭanga finna lo kal chu an hmang ṭhîn a ni. (Jakoba 3:17, 18) Inpumkhatna leh rinna hmunkhat an neih chu vawng reng tûrin nasa takin an thawk a, chu chu Isua ngei pawhin ṭawngṭaia a dîl chu a ni.—Johana 17:20-22; 1 Korinth 1:10.
22. Thil sual tihna chungchângah upaten eng ṭanpuina nge an pêk ṭhin?
22 Kristian pakhat chuan thil sual a tih avângin thil ṭha lo, lo tuar ta sela, a nih loh leh lo lunghnual ta sela, engtin nge ni ang? Bible thurâwn hahdamthlâk tak leh upaten thinlung taka an ṭawngṭaisakna chuan thlarau lama hrisêlna ṭha nei leh tûrin a ṭanpui thei a ni. (Jakoba 5:13-15) Thlarau thianghlimin a ruat hêng mite hian sual kawng zawh zêltu emaw, kohhrana thlarau lam leh nungchang thianghlimna atâna hlauhawm ni thei tûr apiang chu, thunun leh zilhhau tûrin thuneihna an nei bawk a ni. (Tirhkohte 20:28; Tita 1:9; 2:15) Kohhran hi thianghlim taka vawng reng tûrin, sual lian tham tak ti a hriat chuan miin a sawi a ṭûl thei a. (Leviticus 5:1) Sual lian tak titu Kristian pakhatin Pathian Lehkhathu hmanga thununna leh zilhna chu a pawm a, simna dik tak a lantîr chuan, ṭanpui a ni ang. Mahse, Pathian dân bawhchhe zui zêltute leh sim duh lote chu kohhran aṭanga hnawh chhuah an ni thung.—1 Korinth 5:9-13.
23. Kohhran ṭhatna tûrin Kristian enkawltuten eng nge an pêk ṭhin?
23 Isua Krista Lalna hnuaiah chuan thlarau lama puitling mipate chu Pathian mite tâna thlamuanna te, vênhimna te, leh hah chawlhna te pe tûrin ruat an ni ang tih Bible chuan a lo sawi lâwk a. (Isaia 32:1, 2) Thlarau lama ṭhan lenna awmtîr tûrin thuhriltute, berampute, leh zirtîrtute niin hma an hruai ang. (Ephesi 4:11, 12, 16) Kristian enkawltute chuan a chângin an rinpuite chu zilhin, na taka hauvin, fuih bawk ṭhîn mah se, Pathian Thua innghat upate zirtîrna ṭha hi kan zawm chuan kan zavaia nunna kawnga kal zêl tûrin min ṭanpui a ni.—Thufingte 3:11, 12; 6:23; Tita 2:1.
JEHOVA’N THUNEIHNA A THLIR DAN HI PAWM RAWH
24. Eng thubuaiah nge ni tin fiahna kan tawh?
24 Mipa leh hmeichhe hmasa berte kha thuneihna hnuaia intukluhna chungchânga thubuaiah fiah an ni a. Keini pawhin chutiang fiahna ni tina kan tâwk ve hi thil mak a ni lo. Diabol-Setana hian mihringte zîngah helna rilru a awmtîr a. (Ephesi 2:2) Zalênna kawng hi intukluhna kawng aia ṭha zâwk nia lang tûrin a siam îtawm a ni.
25. He khawvêl helna thlarau hnâwl leh Pathian thuneihna emaw, Pathianin awm a phal thuneihna hnuaiah emaw intukluhna chu eng nge a hlâwkna?
25 Amaherawhchu, khawvêl helna thlarau hi kan hnâwl tûr a ni. Chutianga kan tih chuan Pathian ngaihsaka intukluhna hian lâwmman nasa tak a thlen tih kan hria ang. Entîr nân, khawvêl rorêltute nêna buaina siamtuten hlauhthâwnna leh beidawnna an neih ṭhinte chu kan pumpelh dâwn a ni. Chhûngkaw tam taka awm innghirnghonate hi kan titlêm ang a. Kan rinpui Kristiante nên inzawmna duhawm tak kan neih avânga hlâwknate chu kan chên bawk ang. A ṭha berah chuan, Pathian ngaihsaka kan intukluhna hian Thuneitu Sâng Ber, Jehova nêna inlaichînna ṭha min thlen dâwn a ni.
I HRIATNA FIAH RAWH
Jehova’n engtin nge thuneihna a hman?
“Rorêltute” chu tute nge ni a, an hnênah engtin nge kan intukluh reng ang?
Lû nihna thu bul hian chhûngkuaa mi mal tinte chungah eng mawhphurhna nge a nghah?
Kristian kohhranah engtin nge intukluhna kan lantîr theih ang?
[Phêk 134-naa bâwm]
THUHNUAIRAWLH, PAWI KHAWIH CHING LO
Jehova Thuhretute hian vântlang zînga an thu hrilna aṭangin, Pathian Ram chauh hi mihringten himna leh muanna dik atâna an beisei tûr awm chhun a ni tih an kawhhmuh a. Mahse hêng Pathian Ram thu ṭhahnemngai taka puangtute hi eng kawng zâwng mahin an chênna ram sawrkâr pawi khawihtu an ni ngai lo. Thuhretute chu khua leh tui zahawm berte zînga mi leh dân zâwm mite zînga mi an ni zâwk a ni. “Sakhaw kohhran zawng zawng hi Jehova thuhretute ang ni vek sela chuan, tualthahnate, rûk rûknate, khawtlâng tâna mi hnawksakte, lung in tângte, leh atom bomb-te hi a awm lo vang a. Kawngkate pawh chhûn zânin a inkalh reng hek lo vang,” tiin Africa ram pakhata hotu lian pakhat chuan a sawi a ni.
Hei hi an hriat avângin ram tam taka hotu liante chuan Thuhretute thuhril hna chu dang lovin chhunzawm zêl an phalsak a. Ram ṭhenkhatah chuan, rorêltuten Jehova Thuhretute chu a ṭha zâwnga mite ṭanpuitu an nihzia an hriatin an khapna emaw, khuahkhirhna emaw chu an hlîp vek ṭhîn a ni. Tirhkoh Paula’n rorêltute thu awih chungchâng a lo ziah ang hi a ni: “Thil ṭha ti la, a fak i hlawh ang chu,” tih hi.—Rom 13:1, 3.