Bung 10
Pathian Ramin Ro A Rêl
1, 2.. Mihringte sawrkâr hi engtin nge an tling lo tih a chian?
HMANRUA pakhat i han lei a, mahse a thawh tûr ang a lo thawk thei hauh lo tih i hre leh si a. A siam ṭhatu i ko ta a. Mahse, a “siam ṭhat” hnu rei lo têah hmanrua chu a chhe leh ta dêr mai a ni. A va beidawnthlâk ngai êm!
2 Mihringte sawrkâr pawh hetiang chiah hi a ni. Mihringte hian remna leh hlimna tak tak thlen thei sawrkâr chu englai pawhin an duh a. Chuti chung chuan, mipui vântlâng keh darhnate siam ṭhat tuma ṭhahnemngai taka an beihna chu a hlawhtling thei tak tak chuang lo. Inremna thuthlung ropui tak tak siam a ni tawh a—a hnuah an bawhchhe leh tho ṭhîn. Chubâkah, retheihna te, mite pâwngpaw huat ringawtna te, dân bawhchhiatna te, natna te, leh kan chhehvêl tihchhiatna te hi eng sawrkârin nge nuai bo thei tawh? Mihringte rorêlna hi chu siam ṭhat rual a ni tawh lo. Israel-te Lal fing tak Solomona ngei pawhin: “Engtin nge mihringin a kawng an hriat theih ang?” tiin a lo zâwt hial a ni.—Thufingte 20:24.
3. (a) Isua thu hrilnaah a thupui ber eng nge ni? (b) Engtin nge mi ṭhenkhatin Pathian ram an hrilhfiah?
3 Beidawng mai suh! Khawvêl sawrkâr nghet tak lo awm tûr thu hi duhthusâm mai a ni lo. Chu chu Isua thu hrilnaa a thupui ber a ni. “Pathian ram” tiin a vuah a, chu ram chu dîla ṭawngṭai tûrin a hnungzuitute chu a zirtîr a ni. (Luka 11:2; 21:31) Pathian Ram chungchâng hi sakhaw mite zîngah a châng chuan sawi lan a ni rêng a. Dik takin, ni tina Lalpa Ṭawngṭaina (Kan Pa ṭawngṭaina emaw, ṭawngṭaina entawn tûr emaw an tih kha) an sawiin mi maktaduai tam takte chu Pathian ram dîlin an ṭawngṭai ṭhîn a ni. Mahse, “Pathian Ram chu eng nge ni?” tia han zawh hian miten kawng hrang hrangin an chhâng ṭhîn. Ṭhenkhat chuan, “Pathian Ram chu i thinlungah a awm,” an ti a. Mi dangte chuan vân ram a ni an ti bawk. Kan la hriat tûr angin, Bible hian chhânna chiang tak min pe a ni.
THIL TUM NEI RAM CHU
4, 5. Jehova’n engvângin nge chungnungber a nihna chu a thara lan chhuahtîr a tum a, chu chuan eng nge a hlen chhuah dâwn?
4 Pathian Jehova chu englai pawhin lei leh vâna Lalber emaw, Rorêltu Chungnungber emaw a ni reng a. Thil zawng zawng a siam avângin he dinhmun sâng takah hian a awm a ni. (1 Chronicles 29:11; Sâm 103:19; Tirhkohte 4:24) Lei leh vâna Pathian chungnungber nihna dawta pawimawh chu Isua’n a chanchin a lo hril Ram hi a ni. Chu Messia Ram chuan thil tum bîk a nei a, chu chu eng nge ni?
5 Bung 6-a hrilhfiah tawh angin, Pathian thuneihna duh lovin mihring nupa tuak hmasa berte chu an hel a. Chuta thubuai siam chhuahte avâng chuan Jehova’n chungnungber a nihna chu a thara lan chhuahtîr a tum ta a ni. Pathian chuan Rûlpui, Setana, tikehsawm vek tûr leh, mihringte sual rochunin a rah chhuah zawng zawngte nuai bo tûr “chi thlah” piantîr a tum thu a puang a. “Chi thlah” bul ber chu Isua Krista a ni a, “Pathian ram” chu Setana hneh let dêr tûra hmanrua chu a ni. Isua Krista chuan he Ram hmang hian lei chungah Jehova hmingin rorêlna chu a din thar leh ang a, Pathianin chungnungber ni tûra dikna a neih chu chatuan atân thiam a chantîr tawh ang.—Genesis 3:15; Sâm 2:2-9.
6, 7. (a) Ram chu khawiah nge a awm a, a Lalber leh a rorêlpuite chu tute nge ni? (b) Ram khua leh tui chu tute nge ni?
6 Pharisai mi sualte hnêna Isua thusawi an lehlinna pakhatah chuan, Isua’n: “Pathian ram chu nangmahni chhûngah a awm,” a ti a. (Luka 17:21, King James Version) Isua’n chûng mi vervêkte thinlung sual tak chhûngah chuan Ram chu a awm a tihna em ni? Ni lo ve. Atîra Grik ṭawng aṭanga lehlinna dik zâwkahte chuan: “Pathian ram chu in zîngah a awm a ni,” tiin ziak a ni. (Hawrawp kan tihâwn a ni.) (Mizo Bible leh New World Translation) Chutiang chuan, an zînga awm ve Isua chu nakina Lalber ni tûr angin a insawi a ni. Miin a thinlung chhûnga a neih thil engemaw ni lovin, Pathian Ram chu sawrkâr tak tak, rorêltu leh khua leh tuite pawh neia awm a ni zâwk. Vân sawrkâr a ni, a chhan chu “vân ram” tiin leh “Pathian ram” tia sawi a nih ve ve avângin. (Matthaia 13:11; Luka 8:10) Zâwlnei Daniala’n inlârnaah ram Rorêltu chu “mihring fapa ang” niin a hmu a, Pathian Engkimtitheia hmaah chuan an rawn hruai a, “rorêlna te, ropuina te, ram te a hnêna pêk a ni a, mi tin te, hnam tin te leh ṭawng tinte zawng zawng chuan a rawng an bâwl nân.” (Daniela 7:13, 14) Heta Lalber hi tu nge ni? Bible chuan Isua Krista hi “mihring Fapa” tiin a sawi a. (Matthaia 12:40; Luka 17:26) Jehova chuan a Fapa, Isua Krista chu Lalber atân a lo ruat tawh a ni.
7 Isua’n amah chauhvin ro a rêl lo va. A hnênah chuan a rorêlpui tûr leh a puithiam nihpui tûr, “lei ata tlan tawh,” mi 1,44,000-te an awm ve a ni. (Thu Puan 5:9, 10; 14:1, 3; Luka 22:28-30) Pathian Ram khua leh tui tûrte chu lei pumpuia mihring chhûngkua, Krista hruaina hnuaia intulûtte an ni ang. (Sâm 72:7, 8) A nih leh, chu Ram chuan Pathian chungnungber nihna chu thiam a chantîr tak tak ang a, kan leilung ngeiah hian paradis dinhmun chu a din thar leh tak tak ang tih engtin nge kan chian theih ang?
PATHIAN RAM A TAK TAK A NIHZIA
8, 9. (a) Pathian Ram chungchânga thutiamte an rintlâkzia engtin nge kan hrilhfiah ang? (b) Ram chu a tak tak a nihzia engvângin nge kan chian theih?
8 Kângmeiin i chênna in chu a tichhe vek angin han mitthla la. I ṭhian pakhat hausa tak maiin i in sa ṭha leh tûr leh in chhûngkaw ei tûr pawh ngaihtuah tûrin ṭanpui che a intiam a. Chu i ṭhian chuan i hnênah thudik tak hlîr a sawi ṭhîn a nih chuan, amah chu i ring hle dâwn lâwm ni? A tûkah chuan i hnathawhna aṭanga i lo hawin, thil kâng bângte chu hnathawktuten an lo thian fai ṭan tawh a, in chhûngkaw tân pawh ei tûr an rawn la bawk tih hmu ta ang la. Rinhlelh rual lohvin, hun lo kal zêlah chuan thilte chu din thar leh chauh pawh ni lovin, a hma ai mahin a ṭha zâwk dâwn a ni tih i ring ngam ngei ang.
9 Chutiang bawkin, Jehova chuan Ram chu a tak tak a nihzia chungchângah intiamna min pe a ni. Bible-a Hebrai lehkhabuin a târlan angin, Dân thu hmêlhmang tam takte chuan Ram ruahmanna hi a lo entîr lâwk a. (Hebrai 10:1) Pathian Ram awm dân tûr chu lei lam Israel ramah khân chiang takin a hmuh lâwk theih bawk. Chu chu sawrkâr satliah mai a ni lo, rorêltute kha “LALPA lalṭhutthlêngah” an ṭhut avângin. (1 Chronicles 29:23) Chubâkah: “Lal tiang chu Juda lakah a bo lo vang a, rorêltu tiang chu a ke kâr ata a bo hek lo vang, Silova lo kal hma loh chuan; hnam tinin ama thu an awih ang,” tia sawi lâwk a ni bawk. (Genesis 49:10)a He Juda lal inthlah chhâwng zêl aṭang ngei hian a ni Isua, Pathian Ram Lalber ni hlen tûra chu a lo pian dâwn ni.—Luka 1:32, 33.
10. (a) Pathian Messia Ram lungphûm chu engtikah nge phûm a nih? (b) Isua rorêlpui tûrten leiah eng hna pawimawh tak thawhnaah nge hma an hruai ang?
10 Isua tirhkohte thlan an nih khân Pathian Messia Ram lungphûm chu phûm ṭan a ni a. (Ephesi 2:19, 20; Thu Puan 21:14) Hêng mite hi vâna Isua Krista rorêlpui tûr mi 1,44,000-te zînga thlan hmasak berte an ni. Hêng a rorêlpui tûrte hian leia an awm laiin: “Kal ula, hnam tina mi zirtîrahte siam ula, Pa leh Fapa leh Thlarau Thianghlim hmingah chuan baptis ula,” tia Isua thupek nêna inmilin thuhril hna beihpuiah hian hma an hruai a ni.—Matthaia 28:19.
11. Tûn laiah Ram thuhril hna hi engtianga thawh nge a nih a, hei hian eng nge a hlen chhuah?
11 Mite zirtîra siam tûra thupêk chu tûnah hian a hma zawng zawng aia nasain miten an zâwm a. Isua thu sawi lâwk: “He ram Chanchin Ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tih nêna inmil hian, Jehova Thuhretute chuan Ram chanchin ṭha chu khawvêl pumpuiah an puang darh mêk a ni. (Matthaia 24:14) Ram thuhril hna pêng pakhat angin, inzirtîrna hun ropui tak chu hlen chhuah mêk a ni a. Pathian Ram dânte leh thu bulte zâwmtute chuan mihring sawrkârin an thlen theih loh remna leh lungrualna chu an tawng reng tawh a ni. Hêng thil zawng zawng hi Pathian Ram chu a tak tak a nihzia fiahna chiang tak a ni!
12. (a) Ram thu puangtute hi Jehova Thuhretute tia koh engvângin nge a inâwm? (b) Engtin nge Pathian Ram chu mihring sawrkârte lakah a danglam?
12 Jehova’n Israel mite chu: “Nangni hi mi hriatpuitute in ni, ka chhiahhlawh ka thlana pawh chu,” tiin a hrilh a. (Isaia 43:10-12) Isua, “Thu Hretu Rinawm,” chuan Ram chanchin ṭha chu ṭhahnemngai takin a puang a. (Thu Puan 1:5; Matthaia 4:17) Chuvângin tûn laia Ram thu puangtuten Pathian pêk, Jehova Thuhretute tih hming an pû hi a inâwm hle a ni. A nih leh Thuhretute hian mi dangte hnêna Pathian Ram chanchin sawi nân engati nge an hun leh tha tam tak an sên? Ram chu mihringte beisei tûr awm chhun a nih avângin hetiang hian an thawk a ni. Mihringte sawrkâr chu a hnuah a chhe leh mai zêl a, Pathian Ram erawh chu a chhe ngai dâwn lo a ni. Isaia 9:6, 7 chuan Ram Rorêltu tûr, Isua chu, “Remna Lal” tiin a ko va: “A ram a zau zêl ang a, a ramah remnain tâwpintai a nei lo ang” a ti bawk. Pathian Ram chu, vawiina dinga a tûk lawka paih thlâk leh mai ṭhin mihringte sawrkâr ang hi a ni ve lo. Daniela 2:44 chuan heti hian a lo sawi rêng a ni: “Vân Pathianin ram a rawn din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang; . . . kumkhuain a ding reng ang,” tiin.
13. (a) Pathian Ramin hlawhtling taka a tihfel tûr harsatna ṭhenkhat chu engte nge ni? (b) Pathian thutiamte hi a thleng famkim ngei ang tih engvângin nge kan chian theih?
13 Mihring lal tu berin nge indona te, dân bawhchhiatna te, natna te, ṭâmna te, leh chênna tûr in neih lohna te hi nuai bo thei? Chubâkah, leia rorêltu tuin nge mitthite kaitho leh thei? Pathian Ram leh a Lalber chuan hêng thilte hi a tifel dâwn a ni. Pathian Ram chu hmanraw ṭha lo tak, siam ṭhat leh ṭhin ngai ang hi a ni ve lo vang. Pathian Ram chu a hlawhtling zâwk dâwn a ni, a chhan chu Jehova’n: “Ka kâ aṭanga ka thu chhuak chu . . . engmah tih nei lovin ka hnênah a kîr leh lo vang a, ka duh ang chu a tizo zâwk ang a, thil ti tûra ka tirhnaah chuan a hlawhtling bawk ang,” tia a lo tiam avângin a ni. (Isaia 55:11) Pathian thil tum chu a hlawhchham dâwn lo, mahse Ram rorêlna chu engtika inṭan tûr nge a nih?
RAM RORELNA—ENGTIKAH NGE?
14. Isua zirtîrten Ram chungchângah eng nge an hriat sual a, Isua’n a rorêlna chungchângah eng nge a hriat?
14 “Lalpa, tûnah em ni Israelte hnênah ram i pêk leh dâwn?” He Isua zirtîrte zawhna hian Pathian Ramin a tum leh a rorêlna inṭan hun tûra ruat chu an la hre rih lo tih a târlang a ni. Chumi chungchâng chu lo ngaihtuah lo tûra vaukhânin, Isua’n: “Pain a hun leh a nî, ama thu thua awma a ruat chu, nangni lo hriat tûr a ni lo ve,” tiin a chhâng a. Isua chuan lei chunga a rorêlna chu hun lo thleng tûrah, a thawhleha vâna a chhoh hnu rei tâwk takah a ni dâwn tih a hria a ni. (Tirhkohte 1:6-11; Luka 19:11, 12, 15) Hei hi Pathian Lehkhathu chuan a lo sawi lâwk a ni. Engtin nge a lo sawi lâwk?
15. Sâm 110:1 hian Isua rorêl hun tûr chungchângah engtin nge hriat thiamna min pêk?
15 Isua chu “Lalpa” tia lo sawi lâwkin, Lal Davida chuan: “LALPA thu chhuak chuan, ka lalpa hnênah, ‘I hmêlmate i ke nghahchhana ka siam hma loh zawng ka ding lamah ṭhu rawh,’ a ti a,” tiin a sawi a ni. (Sâm 110:1. Tirhkohte 2:34-36 khaikhin rawh.) He hrilh lâwkna hian Isua rorêlna chu vâna a chhoh veleh a inṭan nghâl dâwn lo tih a entîr a. Pathian ding lamah a lo nghâk rih zâwk dâwn a ni. (Hebrai 10:12, 13) Eng chen nge a nghah dâwn? A rorêlna chu engtikah nge a inṭan ang? A chhânna hmu tûrin Bible hian min ṭanpui a ni.
16. B.C.E. 607-ah eng thil nge thleng a, hei hi Pathian Ram nên engtin nge a inkûngkaih?
16 Lei chung zawng zawnga Jehova’n a hming a dahna khawpui awm chhun chu Jerusalem kha a ni a. (1 Lalte 11:36) Vân Pathian Ram nêna ze thuhmun nei, Pathianin a pawm lei lam ram khawpui ber a ni bawk. Chuvângin, B.C.E. 607-a Babulon-in Jerusalem a chhut chhiat kha thil pawimawh tak a ni. He thil thleng hi Pathianin leia a mite chunga amah ngeiin ro a rêlna hun rei tak chhûng tihbahlah a nih inṭanna a ni. Kum zabi ruk hnu vêlah, Isua’n he rorêlna tihbahlahna hun chhûng hi a la inchhunzawm zêl tih a târlang a, a chhan chu: “Jentailte nî a kin hma loh zawng Jerusalem khua chu Jentailte rah behin a awm ang,” tia a lo sawi avângin.—Luka 21:24.
17. (a) “Jentailte nî” chu eng nge ni a, engtia rei tûr nge a nih? (b) “Jentailte nî” chu engtikah nge a inṭan a, engtikah nge a tâwp?
17 “Jentailte nî” hun chhûng chuan, Pathian pawmpui rorêlna chu khawvêl sawrkârten an tihbahlah phalsak an ni ang. Chumi hun chhûng chu B.C.E. 607-a Jerusalem chhiat aṭang khân a inṭan a, chu chu Daniala’n “hun sarih” chhûng a ni dâwn tih a lo sawi a ni. (Daniela 4:23-25) Chu chu engtia rei nge? Bible chuan “hun” thum leh a chanve chu ni 1,260 nên a intluk tih a târlang a. (Thu Puan 12:6, 14) Chumi hun chhûng lêt hnih emaw, hun sarih emaw chu ni 2,520 a ni ang. Mahse, chu hun tawi tê a lo ral chuan thil chhinchhiah tlâk engmah a thleng lo. Amaherawhchu, Daniala hrilh lâwknaah hian “ni khat aiah kum khat zêl” kan hman a, B.C.E. 607 aṭanga ṭanin kum 2,520 kan chhiar chuan, C.E. 1914 kum kan chhiar thleng chiah a ni.—Numbers 14:34; Ezekiela 4:6.
18. Isua’n Ram thuneihna a chan hnu lawkah eng nge a tih a, chu chuan engtin nge lei hi a nghawng?
18 Chumi hunah chuan Isua’n vânah ro a rêl ṭan ta em? A rêl ṭan a ni tia kan sawi nachhan Pathian Lehkhathua mite chu bung dawt lehah hian sawiho a ni ang. Isua’n ro a rêl ṭan veleh chawplehchilhin leiah remna a awm dâwn lo va. Thu Puan 12:7-12 chuan, Isua’n Ram thuneihna a chan veleh Setana leh a tirhkoh ramhuaite chu vân aṭangin a paih thla ang tih a lo sawi a ni. Hei hi lei tân chuan chungpikna a ni dâwn a, mahse Diabola’n “hun tlêm tê” chauh a nei tawh tih thu han chhiar chu a phûrawm hle a ni. Rei lo têah, Pathian Ramin ro a rêl vâng chauh ni lovin, lei leh mihring thuawihte chunga malsâwmna a rawn thlentîr dâwn avâng pawhin kan lâwm thei tawh ang. (Sâm 72:7, 8) Hei hi rei lo têah a lo thleng dâwn tih engtin nge kan hriat theih?
[Footnote]
a Silova tih hming awmzia chu “A Neitu; A Neitu Tak,” tihna a ni a. Hun a lo rei zêl a, chu “Silova” chu Isua Krista, “Sakeibaknei, Juda hnama mi,” a ni tih a lo chiang ta a ni. (Thu Puan 5:5) Juda Targum ṭhenkhat chuan “Silova” tih thu mal hi “Messia” tiin emaw, “lal Messia” tiin emaw an thlâk mai a ni.
I HRIATNA FIAH RAWH
Pathian Ram hi eng nge ni a, khawi aṭangin nge ro a rêl?
Chu Ramah chuan tuten nge rorêl a, tute nge a khua leh tuite?
A Ram chu a tak tak a nihzia Jehova’n engtin nge min tiam?
“Jentailte nî” kha engtikah nge a inṭan a, engtikah nge a tâwp?
[Phêk 94-naa bâwm]
PATHIAN RAM NENA INKUNGKAIH THIL THLENG PAWIMAWH ṬHENKHATTE
• Rûlpui, Diabol-Setana lû tikehsawmtu tûr “chi thlah” piantîr a tum thu Jehova’n a puang.—Genesis 3:15.
• B.C.E. 1943-ah, he “chi thlah” hi Abrahama thlah ami a ni dâwn tih Jehova’n a lo sawi a ni.—Genesis 12:1-3, 7; 22:18.
• B.C.E. 1513-a Israel-te hnêna Dân thuthlung pêk chuan “thil ṭha, lo awm tûrte” a entîr.—Exodus 24:6-8; Hebrai 10:1.
• Lei lam Israel ram chu B.C.E. 1117-ah a inṭan a, a hnuah Davida thlahah a inchhunzawm a ni.—1 Samuela 11:15; 2 Samuela 7:8, 16.
• Jerusalem chu B.C.E. 607-ah tihchhiat a ni a, tichuan “Jentailte nî” a inṭan.—2 Lalte 25:8-10, 25, 26; Luka 21:24.
• C.E. 29-ah Isua chu Lalber ni tûrin hriak thih a ni a, a lei lam rawngbâwlna a ṭan nghâl.—Matthaia 3:16, 17; 4:17; 21:9-11.
• C.E. 33-ah Isua vânah a lâwn a, a rorêlna a inṭan hma loh chuan Pathian ding lamah a nghâk.—Tirhkohte 5:30, 31; Hebrai 10:12, 13.
• C.E. 1914-a “Jentailte nî” a kin chuan Isua chu vân Ramah lalṭhutthlênga ṭhuttîr a ni.—Thu Puan 11:15.
• Setana leh a ramhuaihote chu leiah paih thlâk an ni a, mihringte chungah chungpikna nasa lehzual an thlentîr.—Thu Puan 12:9-12.
• Khawvêl pumpuia Pathian Ram chanchin ṭha hrilna chu Isua’n a enkawl.—Matthaia 24:14; 28:19, 20.