Engvângin Nge Mahni Inzahna A Tlâk Hniam Tâk?

MAHNI INZAH A PAWIMAWH CHHAN

Mahni inzahna neitute chuan harsatnate chu inrintâwkna nên an hmachhawn thei a. An beidawng nghâl mai lo.

Mahni insittute chuan lungkhamna leh rilru hahna nasa tak an neih duh bîk bâkah, mumal lo taka thil ei an chîng tih zirchianna chuan a târ lang a. Chu bâkah, zû leh damdawi an hmang sual duh bîk bawk.
Mahni inzahna neitute chu mi dang nên an inkhaikhin lo va, chu chuan an bula mite nêna inngeih taka awm leh inṭhianna nghet siam an tân a tiawlsam lehzual. Kawng leh lamah chuan, mahni inzahna tlachhamte chu an khirh a, chu chuan inlaichînna a tichhe thei a ni.
Mahni inzahna neitute chu harsatna an hmachhawn hunah pawh chak takin an awm reng a, harsatnate chu an thiltum hlen loh phah nân an hmang lo. Chumi nêna inkalh takin, mahni inzahna tlachhamte erawh chuan hlawhchhamna tê tham tê pawh dâltu lian tak angin an thlîr ṭhîn a. Chu chuan awlsam takin a beidawntîr thei a ni.

I TIH THEIH CHU

Nangmah tichak theitu tûr ṭhiante thlang rawh. Mite zah thiam, i hmakhaw ngai tak leh, nangmah tichak theitu tûr ṭhiante kâwm rawh.

“Ṭhian chuan englai pawhin a hmangaih reng a, mangan nî atâna unauva piang a ni.”—Thufingte 17:17.

Mi dangte ṭanpui rawh. Ngilnei tak i nih a, eng mah tihsak lêt ve thei lotute pawh tiamin, mi dangte thil i tihsak hian pêkna aṭanga lo awm hlimna dik tak i nei ang a. Mi dangte’n i thiltih chu an hre lo a nih pawhin i hlim tho vang.

“Mi dang hnên aṭanga thil dawn aiin, mi hnêna in pêk chhuahin in hlim zâwk ang.”—Tirhkohte 20:35, NWT.

I fate chu mahni inzahna nei tûrin ṭanpui rawh. Chutianga tih theih dân kawng khat chu, an theih chhûng chu an harsatnate anmahnia chinfeltîr hi a ni. Chu chuan naupangte chu an harsatna hneha chinfel dân thiam tûrin a ṭanpui a. Chutianga tih an thiam chuan, tûnah chauh ni lovin an puitlin hunah pawh mahni inzahna an nei lehzual ang.

“Naupang chu a kalna âwm kawngah chuan zirtîr ula, a upat hun pawhin a thlah lo vang.”—Thufingte 22:6.

Jehova Thuhretu pakhatin hmeichhe pakhat chu thingpui dâwrah Bible a zirpui.

KAN THILTIH CHU

Jehova Thuhretute inkhâwmte leh Bible zirna program-te chuan mite chu nun ṭha zâwk nei tûr leh mahni inzahna nei tûrin a ṭanpui a ni.

CHAWLHKAR TINA KAN INKHAWMTE

Chawlhkâr tina kan inkhâwmahte chuan mahni inzahna neih chhoh theih dân chungchânga rawtnate târ langtu Bible ṭanchhan thusawite kan ngaithla ṭhîn a. Chutah chuan mi zawng zawng a thlâwnin an lo tel thei a ni. Entîr nân, kan inkhâwmahte chuan hêng thute hi i hria ang:

Pathian tâna i pawimawh chhan
nunin a tum dik tak hriat theih dân
inṭhianna nghet neih theih dân

Chu bâkah, ṭhian dik tak, “inngaihtuah tawn” ṭhînte chu i tawng bawk ang.—1 Korinth 12:25, 26, NWT.

Kan inkhâwmte chungchâng hriat belh nân, Kingdom Hall-ah Eng Nge Thleng Ṭhîn? tih video tawi chu jw.org-ah zawng ang che.

KAN BIBLE ZIRTIRNA PROGRAM

Chatuanin I Hlim Thei! tih lehkhabu hmanga a thlâwna Bible sawihona phûrawm tak nei tûrin mite kan sâwm a. He lehkhabuah hian Bible châng pawimawh tak tak te, fiah taka chhûtpui dân te, zawhna ṭha tak tak te, mi chawktho thei video te leh, lem mawi tak takte a tel a. Kan Bible zirtîrna program hian mite chu mahni inzahna nei tûr leh nun ṭha zâwk nei tûrin a ṭanpui a ni.

Jehova Thuhretute nêna Bible zirhona i hlâwkpui theih dân hriat nân, Engvângin Nge Bible I Zir Ang? tih video tawi chu jw.org-ah zawng ang che.