Siamtu A Awm Leh Awm Loh Hriat A Pawimawh Chhan

Siamtu a awm leh awm loh hriat chu engvângin nge a pawimawh? Pathian engkimtithei a awm tih finfiahnate i rin chuan, Bible hi a thâwk khuma ziah a ni tih finfiahnate chu zir chian i duh ngei ang. Bible sawite i rin chuan, hetiang kawngte hian i hlâwkpui ang.

I nunin awmzia a nei lehzual ang

BIBLE SAWI CHU: “A thil ṭha tihtein a inhriattîr a, vân aṭanga ruah pe che uin, in thil thar chhuahte nasa takin a tipung a, ei tûra titlai che uin, in thinlung lâwmnain a tikhat ṭhîn.”—Tirhkohte 14:17, NWT.

A AWMZIA: He khawvêla thil awm i hlimpui zawng zawngte hi Siamtu thilthlâwnpêk vek a ni a. A Petuin a ngaihsakzia che i hriat hunah phei chuan, chûng thilthlâwnpêkte chu i ngaihlu lehzual ang.

Ni tîn nun atâna kaihhruaina rin tlâk tak i hmu ang

BIBLE SAWI CHU: “Tichuan, felna leh rorêlna chu i lo hre thiam ang a, hleih neih lohna nên, a ni, kawng ṭha tinrêng pawh.”—Thufingte 2:9.

A AWMZIA: Nangmah Siamtu a nih angin, Pathian chuan i hlim theih nâna i mamawhte chu a hria a. Bible bih chiangin, tûna i hlâwkpui theih tûr thilte i zir thei a ni.

I zawhnate chhânna i hmu ang

BIBLE SAWI CHU: “Pathian hriatna chu i chhar chhuak ang.”—Thufingte 2:5.

A AWMZIA: Siamtu a awm tih hriatna chuan hêng zawhna pawimawh tak takte chhânna zawng hmu tûr hian a ṭanpui thei che a ni: Nunin eng nge a tum? Engvângin nge hrehawm tawrhna a tam êm êm? Kan thihin kan chungah eng nge thleng? A chhânna lungawithlâk takte chu Bible-ah i zawng hmu thei a ni.

Hma lam hun beiseina i nei ang

BIBLE SAWI CHU: “Nangni lama ka rilru putzia chu ka inhre si a, in hun hnuhnûng tâwpah chuan beiseina pe tûr che uin, thil ṭha lo ni lovin, ṭhatna ka ngaihtuah asin.”—Jeremia 29:11.

A AWMZIA: Pathian chuan hma lam hunah sualna, hrehawm tawrhna leh, thihna hial pawh a la bo vang tih a tiam a. Pathian thutiamte i rinna chuan hma lam hun beiseina a pe ang che a, chu chuan nî tina i harsatna tawhte hmachhawn thei tûrin a ṭanpui ang che.

MI ṬHENKHATIN SIAMTU AN RINNA AN HLAWKPUI TAWH DAN

“Kan nun kawng hrang hranga Pathian min ṭanpui dânte ka hmuh hian mak ka ti ṭhîn hle. Ani chuan nuna thil pawimawh ber hre tûr te, mi dangte nêna inrem tûr te leh, a ṭhian ni tûrtein min ṭanpui a ni.”—Cyndi-i, U.S.A.

“Siamtu ka rinna chuan nun lungawithlâk leh hlimawm tak min neihtîr a. A chungchâng te, a thil siam chungchâng te leh, a Thute zir belh zêl tûr a awm avângin Siamtu ka rinna chuan min tiphûr hle a ni.”—Elise-i, France.

“Bible-a min Siamtu zirtîrnate nunpuina chuan mi hlim thei tak min nihtîr lehzual a. Chu chuan khirh lutuk lo tûr te, thil chîk lehzual tûr te leh, lungawina nei lehzual tûrtein min ṭanpui a ni. Pa ṭha lehzual ni tûr pawhin min ṭanpui bawk.”—Peter-a, Netherlands.

“A hma chuan ka nun hman dân chu ei leh in leh a hun taka hnathawhna hmun thlen tum a ni mai a. Ka nung ve hrâm hrâm a ni ber mai! Tûnah erawh chuan nun hi thilpêk hlu leh ropui tak, hlimpui tûr leh ngaihhlut tûr angin ka thlîr tawh a ni.”—Liz-i, Estonia.

“Chi-ai hma tak ka ni a. Mahse, suahsualna te, rorêlna dik lo te leh, hrehawm tawrhnate a tâwp dâwn tih hriatna chuan chi-ai lutuk lo tûrin min ṭanpui a ni.”—Adrien-a, France.